زێباریی پێی له‌سه‌ر توێكڵه مۆزه‌كانی "عوبه‌یدی "یه !!
وتار/
31/08/2016
679 جار بینراوە
شوان هه‌ورامی
دوای
ئه‌وه‌ی زێباریی بۆ لێپرسینه‌وه‌ی په‌رله‌مانیی بانگ كرایه به‌رده‌می ئه‌نجوومه‌نی
نوێنه‌رانی عێراق ، نه‌یتوانی به وه‌ڵامه‌كانی قه‌ناعه‌ت به په‌رله‌مانتاران
بكات ، بۆیه ناوبراو هه‌روه‌كو وه‌زیری به‌رگریی لادراو (خالید عوبه‌یدی ) ده‌ستیكرده
هه‌ڕه‌شه‌كردنی هه‌ڵدانه‌وه‌ی دۆسیه‌ی زۆر گه‌وره‌ی گه‌نده‌ڵیی ، كه گوایه دۆسیه‌ی
وای له‌لایه كه تاكه كه‌س هه‌یه به ته‌نیا " 6 " ملیار دۆلاری
بردووه‌ته ده‌ره‌وه‌ی وڵات .
پێش
له‌وه‌ی هاوڵاتیان بپرسن ئه‌و كه‌سه كێیه ؟ رووی پرسیاریان ده‌كه‌نه زێباریی و
ده‌پرسن : خۆ تۆ ئه‌مینداری خه‌زێنه‌ی وڵات بوویت ، بۆچی تا بانگ نه‌كرایته به‌رده‌می
په‌رله‌مان باسی ئه‌و دۆسیانه‌ت نه‌هێنایه گۆڕێ ؟ به‌ڵام كاتێ گه‌یشتیته ئه‌وه‌ی
كه نوێنه‌رانی گه‌لی عێراق بڕوایان به وه‌ڵامه‌كانت نیه ، بۆ تێكه‌ڵكردنی كارته‌كان
– هه‌روه‌كو وه‌زیری پێشووی به‌رگریی – هه‌ڕه‌شه‌ی هه‌ڵدانه‌وه‌ی دۆسیه‌ی گه‌نده‌ڵیی
ده‌كه‌یت ؟ بۆچی تا ئێستا له مافی گه‌لی عێراق بێده‌نگ بوویت كه هه‌قێكی گشتیی
بوو ؟ ئایا نه‌تبیستبوو " بێده‌نگ له هه‌ق شه‌یتانی كه‌ڕولاڵه " ؟!
گه‌رچی
هه‌ندێ كوردی ده‌مارگیر – كه كاك عومه‌ری عه‌نایه‌تی نوێنه‌ری بزووتنه‌وه‌ی گۆڕانیشیان
تێدایه - به بیانووی ئه‌وه‌ی پارێزگاریی له پێگه و سه‌نگی كورد ، بانگه‌شه‌ی
پشتیوانیی له زێباریی ده‌كه‌ن ، گوایه ئه‌گه‌ر پشیوانیی له زێباریی نه‌كرێت ،
شكۆی ئه‌و له‌به‌رده‌می دووژمنانی كورددا ده‌شكێت ، پشتی بگرن با له‌به‌رده‌می نه‌یارانی
كوردا زه‌لیل نه‌بێت ، گوایه كورد له هه‌موو لایه‌كه‌وه هێرشی ده‌كرێته سه‌ر و
ده‌بێ كار به‌و وته‌یه بكرێت " أنصر أخاك ظالماَ أو مظلوماَ " ، ئه‌گه‌ر هۆشیار گه‌نده‌ڵیشه
با دووژمنان دڵمان پێخۆش نه‌كه‌ن .
ئه‌و
گه‌لانه‌ی كه ده‌كه‌ونه به‌ر هێرشی ناحه‌زانیان ، له‌پێش ئه‌وه‌ی به‌رانبه‌ر
دووژمن سه‌نگه‌ر لێ بده‌ن ناوخۆیان بژار ده‌كه‌ن ، نه‌ك ئه‌وه‌ی به‌ناوی پاراستنی یه‌كڕیزییه‌وه
گه‌نده‌ڵ و دز و پیاوخراپه‌كانیان بپارێزن ، كه هه‌ر ئه‌وانه‌ن ده‌بنه هۆی ئه‌وه‌ی
حكومه‌ت و ده‌سه‌ڵات له پشتیوانه‌ی به‌هێزی جه‌ماوه‌ر داماڵن وه‌كو ئه‌وه‌ی ئێستا
له هه‌رێمی كوردستاندا ده‌یبینین ، به پێچه‌وانه‌ی بۆچوونی ئه‌و خه‌ڵكه په‌ڕگیره‌وه
، كاتێ متمانه بۆ جه‌ماوه‌ر ده‌گه‌ڕێته‌وه به‌ڕاستیی له هه‌ڵكێشانی كیاكه‌ڵه‌ی
گه‌نده‌ڵیه‌وه ده‌ست پێ بكرێت و خه‌ڵك قه‌ناعه‌ت بكه‌ن گه‌نده‌ڵكاران راده‌گیرێن
و سزا ده‌درێن .
ده‌بێ
كاك عومه‌ری عه‌نایه‌ت له جیاتی ئه‌وه‌ی به هه‌ڵه داوای سه‌رخستنی برای گه‌نده‌ڵی
بكات ، سه‌ره‌تا له مانای فه‌رمووده‌كه تێبگات ، نابێ نیوه‌ی فه‌رمووده‌كه بهێنێ
و نیوه‌كه‌ی تری بقرتێنێ ، چونكه پێغه‌مبه‌ری خوا ده‌فه‌رموێت : انصر أخاك ظالماً أو مظلوماً، فقال: رجل يا رسول الله
صلى الله عليه وسلم أنصره إذ كان مظلوماً،
أفرأيت إذا كان ظالماً كيف أنصره؟! قال: تحجزه أو
تمنعه من الظلم، فإن ذلك نصره.
براكه‌ت
سه‌ربخه سته‌مكار بێت یا سته‌م لێكراو ، پیاوێك گوتی ئه‌ی پێغه‌مبه‌ری خوا سه‌ری
ده‌خه‌م كاتێ سته‌م لێكراوه ، ئه‌ی ئه‌و كاته‌ی كه سته‌مكاره چۆن سه‌ری بخه‌م ؟
فه‌رمووی : رایده‌گریی و ده‌ستی ده‌گریت له سته‌مكاریی ، ئه‌وه سه‌رخستنیه‌تی . ده‌بێ
كاك عومه‌ری عه‌نایه‌ت بزانێت سه‌رخستنی زێباری ده‌ست گرتنیه‌تی له سته‌مكاریی ،
كه نه‌ك هه‌ر خۆی به‌ڵكو ناوبانگی گه‌لی كوردیشی له‌كه‌دار كردووه و ئه‌گه‌ر عه‌ره‌بیش
وازی لێ بهێنن ، نابێ كورد رێگه بدات ناوبانگی كورد به هۆی كه‌سێكی له‌كه‌داره‌وه
بزڕێ و ناشیرین بكرێت .
لایه‌نگرانی
عوبه‌یدی كه سه‌رۆك وه‌زیران ( عه‌بادی ) یه‌كێك بوو له‌وانه ده‌یگووت : له كاتی
جه‌نگی داعشدا لێپرسینه‌وه و لادانی وه‌زیری به‌رگریی ده‌بێته هۆی بێهێزبوونی به‌ره‌ی
جه‌نگمان دژی تیرۆر ، به‌ڵام لادانی وه‌زیری گه‌نده‌ڵی به‌رگریی هه‌نگاوێكی زۆر دروست
بوو ، چونكه جه‌نگ له ژێر سێبه‌ر و فه‌رمانده‌یی گه‌نده‌ڵكاردا ئامانجی خۆی ناپێكێت
، به‌ڵكو ئه‌وه ئه‌و گه‌نده‌ڵكارانه بوون كه ده‌یان ملیار دۆلار چه‌كی پێشكه‌وتوویان
له سێگۆشه‌ی سوننیدا بۆ داعش به‌جێهێشت ، مانه‌وه‌شیان بۆ خۆی هێشتنه‌وه‌ی زه‌مینه‌ی
شكسته تا ئێستاش ، چونكه ئه‌وانه فه‌رمانده‌ی راسته‌قینه‌ی جه‌نگ نین و بازرگانیی
به خوێنی خه‌ڵكی عێراقه‌وه ده‌كه‌ن ، ئه‌وانه پله‌و پایه سه‌ربازییه‌كه‌یان بۆ
داپۆشینی بانده مافیاییه‌كانیان به‌كار ده‌هێنن و سوپا و كارگێڕییه‌كی بێ ئیراده
و گه‌نده‌ڵ دروست ده‌كه‌ن .
بۆیه
ئه‌وانه‌ی كه به‌ناوی كوردایه‌تیه‌وه به‌رگریی له گه‌نده‌ڵیه‌كانی زێباریی ده‌كه‌ن
، گه‌ر نیه‌تیشیان خراپ نه‌بێت ، ئه‌وا پینه‌و په‌ڕۆی دۆخه‌كه ده‌كه‌ن ، كه پینه‌و
په‌ڕۆ دۆخی داڕزاو چاك ناكاته‌وه ، به‌ڵكو زۆر خراپتری ده‌كات ، هه‌یسه‌م جبوریی
ده‌ڵێت خۆم ئاگادارم كه خه‌سره‌و گۆران هه‌ڕه‌شه‌ی له‌و په‌رله‌مانتارانه كردووه
كه ماڵیان له هه‌رێمی كوردستانه ، كه ئه‌گه‌ر ده‌نگ به لێسه‌ندنه‌وه‌ی متمانه
له زێباری بده‌ن ، له كوردستان ده‌ریان ده‌كه‌ن . مه‌خابن پارتی وا ده‌زانێت
زمانه‌كه‌ی پردێ و دێگه‌ڵه و ره‌چه‌ته‌كه‌ی ناو كوردستان بۆ هه‌موو حاڵه‌تێك
گونجاوه و به هه‌ڕه‌شه هه‌ر كارێكی بوێت بۆی ده‌كرێت .
باشه
پارتی رۆژانه گوێی جه‌ماوه‌ری كه‌ڕ كردووه به‌وه‌ی كه ده‌بێ ریفراندۆم ساز بكرێت
و سه‌ربه‌خۆیی كوردستان رابگه‌یه‌نرێت ، یا ده‌ڵێن ئێمه هیچ شتێك نه‌ماوه به به‌غدامانه‌وه
ببه‌ستێته‌وه ، كه‌چی هه‌ر هه‌وڵێكی موسته‌حیل ده‌دات بۆ هێشتنه‌وه‌ی زێباریی له
پۆسته‌كه‌یدا ، باشه ئه‌و پۆسته‌ی زێباریی له به‌غدا چی بۆ هه‌رێمی كوردستان به‌ده‌ستهێناوه
؟ ته‌نانه‌ت عومه‌ری عه‌نایه‌ت ده‌ڵێت : ده جار په‌یوه‌ندیم پێوه كردووه و نامه‌شم
بۆ ناردووه ، وه‌ڵامی نه‌داومه‌ته‌وه ، كه داوای روونكردنه‌وه‌ی لێ بكه‌م بۆ ئه‌و
دوو ملیاره‌ی بۆ بودجه‌ی هه‌ڵه‌بجه ته‌رخان كراوه له بودجه‌ی 2016 عێراقدا ،
باشه وه‌زیرێك وه‌ڵامی په‌رله‌مانتارێكی كورد نه‌داوه ، هه‌ر له‌به‌ر ئه‌وه‌ی
كورده - ده‌بێ به لۆژیكی عومه‌ری عه‌نایه‌ت - پشتیوانیی لێ بكرێت ؟
تكایه
با شكسته‌كانمان نه‌خه‌ینه ئه‌ستۆی ناحه‌زانی كورد ، چونكه بۆ خۆمان بنه‌ماو ماكی
شكسته‌كانمان هه‌ڵگرتووه ، ته‌نانه‌ت گۆڕانخوازه‌كانیش كه خۆیان به خۆیی دۆخه‌كه
ناو ده‌برد ، ئه‌وانیش بوونه خوێی گه‌نیو ، ئه‌مانه ده‌یانه‌وێت به‌م لۆژیكه گێلانه‌یه
به‌ره‌و كوێمان ببه‌ن ؟!!
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018