له‌په‌راوێزی كۆنگره‌ی چواره‌می "كۆمه‌ڵ"دا/2
وتار/
14/03/2021
406 جار بینراوە
شوان هه‌ورامی
له‌په‌راوێزی كۆنگره‌ی چواره‌می "كۆمه‌ڵ"دا/2
شوان هه‌ورامه
ناو گۆڕین قه‌ناعه‌ته یا پێویستیی قۆناغه‌كه‌یه
له‌سه‌رانسه‌ری جیهانی ئیسلامییدا هه‌موان كۆكن له‌سه‌ر
چه‌ند هۆكارێك، گرنگترینیان ئه‌مانه‌ن:
1. رووخاندنی
خیلافه‌تی عوسمانیی وه‌كو چه‌تری سه‌ری هه‌موو موسوڵمانان و له‌جێگه‌یدا دانانی عه‌لمانییه‌تی
لایه‌نگری مسقۆفیی (ئیلحاد)، كاردانه‌وه‌ی لێكه‌وته‌وه به‌وه‌ی موسوڵمانانیش
درووشم و ناونیشانه‌كانیان زه‌ق بكه‌نه‌وه به‌پاشگریی ئیسلامیی.
2. هاتنی
ئیمپریالیسته خۆرئاواییه‌كان و داگیركردنی خاكی موسوڵمانان و لایه‌نگریی له‌دامه‌زراندنی
قه‌واره‌یه‌كی زایۆنیستیی له فه‌له‌ستین، موسوڵمانانی له‌وه هۆشیار كرده‌وه كه
داگیركه‌ران دڵی جیهانی ئیسلامیان كردووه‌ته ئامانج.
3. له‌دوای
جه‌نگی جیهانیی دووه‌میش جیهان دابه‌شكرا به‌سه‌ر دوو كوتله‌ی سه‌رمایه‌داریی و كۆمۆنیستییدا،
له‌به‌ر ئه‌وه‌ی پێناسه‌ی داگیركه‌رانی خۆرئاوا روون بوو بۆ گه‌لانی موسوڵمان، بۆیه
كوتله‌ی كۆمۆنیستیی (سۆڤێتیی و چینیی) بوونه چه‌كی هزریی و كرده‌یی بۆ خه‌بات دژی
داگیركه‌ران و حكومه‌ته دیكتاتۆره‌كان، بۆیه زۆربه‌ی خوێنده‌واران روویان كرده
هزری ماركسیی لینینیی و ره‌وتی چه‌پ، له‌جیهانی ئیسلامییشدا به‌ر له سیستمی سه‌رمایه‌داریی
ئیسلامیان كرده ئامانج به‌و پێیه‌ی كه ماركس گوتبووی " دین ئه‌فیونی گه‌لانه"،
بۆیه ته‌وژمی ئیسلامییش له‌به‌رانبه‌ریاندا ئه‌وه‌ی زیاتر تۆخ كرده‌وه، ئیسلام
به‌پێچه‌وانه‌وه مه‌شخه‌ڵی راسته‌قینه‌ی خه‌باته له‌دژی داگیركه‌ران، چونكه ئه‌وه‌ی
بڕوای به‌ژیانێكی تر نه‌بێت، وه‌كو " به‌در شاكر ئه‌سسه‌یاب"ی شاعیری
ناوداری عێراق و كۆنه شیوعیی ده‌ڵێت خاڵی بێهێزی كۆمۆنیسته‌كان نه‌بوونی گیانی فیداكاریی
و ژیان به‌خشینه و ناتوانن به‌ته‌نیا له‌پێناوی ئه‌م ژیانه‌دا خۆیان بكه‌نه
قوربانیی.
ئه‌و پاڵنه‌رانه بوونه هۆكاری ئه‌وه‌ی له‌سه‌د ساڵی
رابردوودا چه‌ندین بزووتنه‌وه‌ی هزریی و بانگخوازیی حیزبی ئیسلامیی و سیاسیی رابگه‌یه‌نرێن
و كاریگه‌ریی خۆیان له‌سه‌ر كۆمه‌ڵگه دیاریی بكه‌ن، له‌كوردستانیش به‌هه‌مان شێوه
له‌سه‌ره‌تای په‌نجاكانه‌وه چالاكیی بزووتنه‌وه‌ی فیكریی "ئیخوان موسلمین"
گه‌یشته كوردستان و سه‌ره‌تا له‌چوارچێوه‌ی هۆشیاریی هزریی و بڵاوكردنه‌وه‌ی كتێب
و نامیلكه و دواتر پێكهێنانی پارتی سیاسیی و دواتریش بزووتنه‌وه‌ی چه‌كداریی بوون
و كاریگه‌ریی خۆی له‌سه‌ر گۆڕه‌پانی سیاسیی كوردستان دیاریی كرد.
ئه‌و بزووتنه‌وه فیكریی و چه‌كدارییه خزمه‌تی زۆری به‌دۆزی
كورد كرد، له‌وانه:
1. ژماره‌یه‌كی
زۆری نه‌وجه‌وان و گه‌نج و خوێنده‌واری كوردی له‌و ته‌وژمه كوێرانه‌یه‌ی چه‌پ
رزگار كرد، كه‌دواجار به‌هه‌ره‌سی كوتله‌ی كۆمۆنیستیی ده‌ستیان له‌بنی هه‌مبانه‌وه
ده‌رچوو، كه مه‌خابن هه‌زاران لاوی كورد كران به كووره‌ی جه‌نگی چه‌پدا، كه تا
ئێستاش له‌هه‌ندێ پارچه‌ی كوردستاندا ئه‌و تراژیدیایه به‌ناوی كوردایه‌تییه‌وه
به‌رده‌وامه، له‌كاتێكدا خه‌باته‌كه له‌پێناوی فیكرێكی دۆڕاوی شكستخواردوودایه،
كه ئێستا بووه‌ته پاشكۆی سیستمی سه‌رمایه‌داریی، كه له‌بناغه‌دا بۆ دژایه‌تیی
ئه‌و سیستمه خۆی راگه‌یاندووه!!
2. كاریگه‌ریی
هه‌بووه بۆ زیندوو راگرتنی ره‌وشته به‌رزه‌كان و په‌روه‌رده‌كردنی به‌شێكی به‌رفراوانی
كۆمه‌ڵگه‌ی كوردستانیی، كه خۆشبه‌ختانه ئه‌مڕۆ چین و توێژه‌كانی كورده‌واریی به‌هره‌مه‌ندن
له‌ده‌ستگرتن به دین و به‌ها به‌رزه‌كانییه‌وه.
3. ئه‌و
بزووتنه‌وه‌یه - به‌پێی توانای - چه‌وساوه‌یی كوردی به‌گه‌لانی موسوڵمان گه‌یاندووه‌و
توانیویه‌تیی ئه‌و دۆزه به زمانێكی كاریگه‌ری عاتیفیی بگه‌یه‌نێته جیهانی ئیسلامیی
– كه نه‌وه‌كانی سه‌لاحه‌دینی ئه‌یوبیی ده‌چه‌وسێنرێنه‌وه- له‌ڕاستییدا كوردی
په‌راوێزخراوی بزووتنه‌وه‌ی ناسیۆنالیستیی كردووه‌ته‌وه به به‌شێك له كێشه‌ی هه‌موو
موسوڵمانانی جیهان، كه ئه‌گه‌ر هه‌ڵه‌ی ناسیۆنالیستی كورد نه‌بوایه، كاریگه‌ریی
ئه‌و هه‌وڵه زۆر له‌ئێستای گه‌وره‌و به‌رفراوانتر ده‌بوو.
4. بۆ
رووبه‌ڕووبوونه‌وه‌ی سته‌مكاریی حكومه‌ته دیكتاتۆره‌كان له‌قوربانیدان نه‌سڵه‌میونه‌ته‌وه،
هه‌ر قۆناغه‌و به‌پێی پێویستیی چوونه‌ته پێشه‌وه، كه له‌هه‌شتاكاندا گه‌یشته قۆناغی
خه‌باتی چه‌كداریی و قوربانیدان له‌پێناوی گه‌ل و نیشتماندا، له‌و پێناوه‌شدا به‌هه‌زاران
قوربانیی پێشكه‌ش كرد.
5. له‌ڕووی
ئاوه‌دانكردنه‌وه‌ی كوردستان و به‌پڕۆژه خزمه‌تگوزارییه‌كانی وه‌كو كردنه‌وه‌ی نه‌خۆشخانه‌و
قوتابخانه و په‌یداكردنی مووچه بۆ منداڵانی بێناز و خێزانه هه‌ژاره‌كان و ده‌یان
پڕۆژه‌ی تره‌وه خزمه‌تی بێبه‌رانبه‌ر و سه‌خاوه‌تمه‌ندانه‌یان پێشكه‌شی خه‌ڵكی
كوردستان كردووه، كه وایكردووه حیزبه‌كانی ده‌سه‌ڵات له‌كاتێكدا خۆیان هۆكاری
ئه‌و حاڵه‌ته‌ن رێگریی له‌و خزمه‌تانه‌ش ده‌كه‌ن، نه‌وه‌كو جه‌ماوه‌ری ئه‌وانی تری
پێ فراوان ببێت.
6. ئیسلامییه‌كان
له‌ڕابردوودا هه‌میشه هه‌وێنی پێكه‌وه ژیان بوون له‌كوردستان، به‌ر له‌ڕاپه‌ڕین
به‌چه‌ندین رێكه‌وتن و پرۆتۆكۆل په‌یوه‌ندیی و هاوخه‌باتییان له‌گه‌ڵ لایه‌نه‌كانی
تری كوردستان و عێراق واژۆ كردووه، له‌دوای راپه‌ڕینیش – ئه‌گه‌ر جه‌نگیشیان به‌سه‌ردا
سه‌پابێت – دواجار رێگه‌ی ئاشتیی راسته‌قینه و به‌شداریی حكومه‌تیان گرتووه‌ته
به‌ر له‌پێناوی پاراستنی سه‌قامگیریی هه‌رێمه‌كه‌و خزمه‌ت كردنیدا.
ئه‌وه‌ی له‌ڕابردوودا كردوویانه قه‌ناعه‌تی ته‌واویان پێی
هه‌بووه، رابردووش چرایه بۆ داهاتوو، به‌جورئه‌ته‌وه ده‌ڵێین داهاتووش به قه‌ناعه‌ته‌وه
درێژه‌ی پێده‌درێت، بۆیه ئه‌م ناو گۆڕینه‌ش قه‌ناعه‌ت و ئیجتیهادێكی فیقهیی و سیاسیی
نوێیه ، كه هۆكاری خۆیی و بابه‌تیی هه‌یه.
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018