ژانی دیالۆگی ئێران و ئه‌مه‌ریكا
وتار/
02/08/2018
613 جار بینراوە
شوان هه‌ورامی
ژانی دیالۆگی
ئێران و ئه‌مه‌ریكا
شــوان هه‌ورامی
هاوكات له‌گه‌ڵ هه‌ڕه‌شه‌ی فه‌رمانده‌كانی ســـوپای
پاســــدارانی كۆماری ئیســــلامیی ئێران ، به تایبه‌تی " ژه‌نڕاڵ قاسم سوله‌یمانی
"دا كه رایگه‌یاند ده‌بێ ترامپ بزانێت هه‌موو پێگه‌و بنكه سه‌ربازییه‌كانی
له‌ژێر مه‌ودای مووشه‌كه بالستییه‌كانی ئێراندایه و هه‌ر كاتێ بڕیار بدرێت ده‌كرێنه
ئامانج ، وه‌كو نموونه‌یه‌كی كرده‌یی ئه‌و هه‌ڕه‌شانه له گه‌رووی " بابولمه‌نده‌ب
" له‌لایه‌ن حوسییه‌كانه‌وه دوو كه‌شتی ئیمارات و سعودیه كرانه ئامانج و
كه‌شتیه‌كه‌ی سعودیه راسته‌وخۆ به‌ركه‌وت و سوتێنرا ، تا ئێستا ئیمارات له‌و بابه‌ته
بێده‌نگه ، به‌ڵام سعودیه رایگه‌یاند چیتر له گه‌رووی " بابولمه‌نده‌ب "ه‌وه
نه‌وت ره‌وانه‌ی بازاڕه‌كان ناكات . حوسییه‌كان رایانگه‌یاند كه به‌نده‌ره نه‌وتیی
و بازرگانییه‌كانی وڵاتانی میحوه‌ری عه‌ره‌بیی ( به تایبه‌ت سعودیه و ئیمارات ) له
مه‌ودای مووشه‌كه‌كانیاندایه و له‌مه‌ودوا ده‌كرێنه ئامانج .
له‌دوای هه‌ڵوه‌شاندنه‌وه‌ی یه‌كلایه‌نه‌ی رێكه‌وتنامه‌ی
ئه‌تۆمیی ئێران له‌گه‌ڵ وڵاتانی " 5 + 1 " له لایه‌ن ئه‌مه‌ریكاوه ، لێدوانی
تووندی ترامپ و پۆمپیۆ و جۆن بۆڵتۆن به‌رانبه‌ر به ئێران ده‌ستی پێ كرد ، له به‌رانبه‌ریشدا
وه‌ڵامی به‌رپرسانی ئێرانیی دۆخه میدیاییه‌كه‌ی زیاتر گه‌رم كرد .
ترامپ له دیمانه‌ی ته‌له‌فزیۆنی " فۆكس نیوز "
دا رایگه‌یاند : ئێران گۆڕاوه ، ئێران چیتر ئه‌و وڵاته‌ی پێشوو نیه . به‌ڵام
روونیی نه‌كرده‌وه كه گۆڕانی ئێران له كوێدایه‌و چۆن ئه‌و وڵاته‌ی پێشووش نیه
؟!
پێده‌چێت " ترامپ " قسه‌ی بۆ رای گشتیی وڵاته‌كه‌ی
كردبێت ، كه له مانگی تشرینی دووه‌می ئه‌مساڵدا هه‌ڵبژاردنی كۆنگرێسی ئه‌مه‌ریكا
ده‌كرێت و ترامپ و كۆمارییه‌كان ده‌یانه‌وێت خۆیان وا نیشان بده‌ن كه به‌هێزن ،
ترامپ ده‌یه‌وێت خۆی وه‌كو سه‌رۆكێكی به‌هێز و جیا له سه‌رۆكه‌كانی پێش خۆی نیشان
بدات كه توانیویه‌تی ئێران ملكه‌چی سیاسه‌ته‌كانی بكات ، ته‌نانه‌ت ده‌یه‌وێت
نامه‌یه‌ك ئاراسته‌ی ئه‌وروپاییه‌كانیش بكات كه به‌بێ ئه‌وان و به ده‌رچوون له
رێكه‌وتنامه‌كه رێگه‌ی بۆ رێكه‌وتنێكی تر هه‌موار كردووه !!
به‌ڵام ئه‌وه‌ی راستییه تا ئێستاش سیاسه‌تی ئێران له عێراق
و سووریا و لوبنان و یه‌مه‌ن به‌رده‌وامه ، هێزه‌كانی ئێران له شه‌ڕی ده‌رعا له
باشووری سووریا به‌شدار بوون ، له كاتێكدا ئه‌و ناوچه‌یه له‌ژێر چاودێریی ئه‌مه‌ریكاییه‌كاندا
بوو ، به ناوچه‌ی هێوركردنه‌وه ناسرابوو ، هه‌روه‌ها هه‌ڕه‌شه‌ی داخستنی گه‌رووی
هورموز ده‌كه‌ن ، هاوكات له گه‌رووی بابولمه‌نده‌ب هێزی خۆیان نیشان ده‌ده‌ن ، له‌گه‌ڵ
ئه‌وه‌شدا جگه له تویته‌كانی ترامپ له تویته‌ردا هیچ لێدوان و په‌رچه‌كردارێكی
سه‌ربازیی نابینرێت .
هاوپه‌یمانه ناوچه‌ییه‌كانی ترامپ ( ئیسرائیل ، سعودیه
و ئیمارات ) لێدانی ئێران و پارچه پارچه كردنی به چاره‌سه‌ر ده‌زانن ، لۆبیه‌كانیشیان
له ئه‌مه‌ریكا هه‌مان گوشار بۆ سه‌ر ئیداره‌ی ترامپ درووست ده‌كه‌ن ، به‌ڵام
ترامپ – وه‌كو بازرگانێكی سه‌وداگه‌ر – ده‌یه‌وێت ئه‌نجامی هه‌ڕه‌شه‌كانی به دیالۆگ
له نێوان وڵاته‌كه‌ی و ئێراندا كۆتایی پێ بهێنرێت ، به‌ڵام سعودیی و ئیماراتیه‌كان
به پشتیوانیی ئیسرائیل ، چۆن وڵاتانی به‌هاری عه‌ره‌بییان خه‌ڵتانی خوێن و پارچه
پارچه كرد ، بۆ ئێرانیش هه‌مان خه‌ونیان هه‌یه ، بۆیه دواجار به دیالۆگی نێوان
ترامپ و ئێرانییه‌كان ئه‌گه‌ری تێكچوونی په‌یوه‌ندییه‌كانی نێوان پۆمپیۆ و جۆن بۆڵتۆن
له‌لایه‌ك و ترامپ له‌لایه‌كی تری هه‌یه ، چونكه ترامپ نایه‌وێت خۆی بخاته ناو
زه‌لكاوێكی زۆر خراپتر له عێراق و ئه‌فغانستان ، به تایبه‌تی قه‌یرانی نێوان ئه‌فغانستان
و عێراق و سوریاش به قه‌یرانی ئێران وه‌كو رایه‌ڵه‌یه‌ك به یه‌كه‌وه ببه‌ستێته‌وه
، كه مه‌حاڵه كۆنترۆڵ بكرێت ، بۆیه وته‌بێژی كۆشكی سپی رایگه‌یاند " مه‌به‌ست
له گوشار بۆ سه‌ر ئێران ملكه‌چ كردنیه‌تی بۆ گفتوگۆ ، نه‌ك گۆڕینی رژێمی كۆماری ئیسلامیی
، چونكه ئه‌وه بڕیاری خه‌ڵكی ئێرانه نه‌ك ویلایه‌ته یه‌كگرتووه‌كانی ئه‌مه‌ریكا
" ، رای گشتیی له ئه‌مه‌ریكا هیچ به‌لایانه‌وه گرنگ نیه ئێران له سووریا
و لوبنان هه‌بێت یا نه ، ئه‌وه لۆبی ئیسرائیله داوای بێهێزكردنی هه‌ژموونی ئێران
له سووریا ده‌كات . هه‌ر بۆیه پۆمپیۆ و بۆڵتۆن و نیكی هایلی كه به‌وه به‌ناوبانگن
فه‌رمانیان راسته‌وخۆ له لۆبیی لایه‌نگری ئیسرائیله‌وه وه‌رده‌گرن ، خوازیاری جه‌نگن
نه‌ك گفتوگۆ .
فائیزه‌ی هاشمی ره‌فسه‌نجانی رۆژی 16 / 7 / 2018 له دیمانه‌ی
رۆژنامه‌ی " فاینه‌نشاڵ تایمز " به ره‌خنه له حكومه‌تی ئێران ، به هۆی
ئه‌وه‌ی " له ماوه‌ی چل ساڵی رابردوودا نه‌یتوانیووه چاكسازیی ناوخۆیی بكات
" ، له‌باره‌ی پێویستیی گفتوگۆشه‌وه رایگه‌یاند " دیالۆگێك كه ده‌بوو
ئه‌نجام بدرێت ، ئێستا له‌وانه‌یه له‌ژێر گوشاری زیاتردا ئه‌نجام بدرێت " ،
ئه‌و به ئاماژه به‌وه‌ی كه ئێران جگه له گفتوگۆ رێگه‌یه‌كی تری له‌به‌رده‌مدا
نییه ، وتی : " ئێمه نابێ به هه‌ڵچوونه‌وه مامه‌ڵه له‌گه‌ڵ ئه‌م بابه‌ته‌دا
بكه‌ین ، ده‌بێ هه‌رچی زووتره بكه‌وینه گفتوگۆ له‌گه‌ڵ ئه‌مه‌ریكادا ، به‌ر له‌وه‌ی
بارودۆخه‌كه خراپتر ببێت ، چونكه ئێمه شتێكی تری جێگره‌وه‌ی دیالۆگمان نیه "
، ئه‌و له‌باره‌ی دۆخی وڵاته‌وه رایگه‌یاند كه " قه‌یران گه‌یشتووته لوتكه
" بۆیه به پێویســــتی زانی دیالۆگ ده‌ست پێ بكات و نه‌بوونی په‌یوه‌ندیی
له‌گه‌ڵ زلهێزێكی جیهانییدا به زیانی ئێرانی له‌قه‌ڵه‌م دا .
هه‌رچه‌نده تا ئێستا چه‌ندین جار له‌سه‌ر هه‌ڵوێسته سیاسییه‌كانی
فائیزه‌ی هاشمی ره‌وانه‌ی زیندان كراوه ، به‌ڵام به‌هۆی ئه‌وه‌ی كچی هاشمی ره‌فسه‌نجانیی
و كه‌سایه‌تیه‌كی نزیكه له حه‌سه‌نی رۆحانی سه‌رۆك كۆماری ئێران ، ئاگاداری سیاسه‌ته‌كانی
حكومه‌ته‌كه‌یه‌تیی و له‌وانه‌یه وته‌كانی مه‌سجێك بێت بۆ هێور كردنه‌وه‌ی هه‌ڵچوونی
نێوان ئێران و ئه‌مه‌ریكا و زه‌مینه خۆش كردن بۆ دیالۆگێكی نزیك .
وه‌كو ئه‌وه‌ی ئاماژه‌ی پێدرا ، سه‌ره‌ڕای گوشاری لۆبیه‌كانی
لایه‌نگری ئیسرائیل و سعودیه‌و ئیمارات له ئه‌مه‌ریكا ، پێده‌چێت ئه‌م هه‌ڕه‌شانه‌ی
ترامپ و رۆحانیی و فه‌رمانده‌كانی سوپای پاسداران و رووداوه‌كانی بابولمه‌نده‌ب ،
هه‌مان سیناریۆی هه‌ڕه‌شه‌كانی ترامپ و كیم جۆنگ ئوون بێت كه گفتوگۆی لوتكه‌ی
ترامپ - ئوونی لێكه‌وته‌وه‌و كۆریای باكوور ئاماده‌یی نیشاندا بۆ له‌ناوبردنی چه‌كه
ئه‌تۆمییه‌كانی ، لێره‌شدا ترامپ ده‌یه‌وێت بڵێت به زۆر ئێرانی ملكه‌چ كردووه به
دیالۆگ و ئێرانییه‌كانییش به رای گشتیی بڵێن ئێمه‌ش له پێگه‌یه‌كی به‌هێزه‌وه
چووینه ناو گفتوگۆوه !!
پێشبینیی ده‌كرێت ئه‌م دۆخه‌ی هه‌ڕه‌شه‌ی میدیایی زۆر نه‌خایه‌نێت
و له مانگی ئه‌یلوول و له كاتی كۆبوونه‌وه‌ی ساڵانه‌ی كۆمه‌ڵه‌ی گشتیی نه‌ته‌وه
یه‌كگرتووه‌كاندا ، دیالۆگی نێوان ئێران و ئه‌مه‌ریكا ده‌ست پێ بكات ، ئه‌وه‌ش ئه‌وه‌یه
كه ترامپ ده‌یه‌وێت بۆ ئه‌وه‌ی وه‌كو سه‌ركه‌وتنی خۆی بۆ بانگه‌شه‌ی هه‌ڵبژاردنی
كۆنگرێس به‌كاری بهێنێت ، به‌ڵام ئێرانییه‌كانییش له‌لایه‌ك نه‌فه‌سیان بۆ گفتوگۆ
درێژه و ئه‌و باجه ناده‌نه ئه‌مه‌ریكا كه ده‌یخوازێت ، به‌ڵام به‌وه ده‌توانن
دۆخه‌كه هێور بكه‌نه‌وه ، به تایبه‌تیی بۆ گفتوگۆیه‌كی له‌و شێوه‌یه‌ش – هه‌روه‌كو
رێكه‌وتنامه‌ی ئه‌تۆمیی – پشتیوانیی ئه‌وروپا و رووسیاو چین و وڵاتانی تریش به ده‌ست
ده‌هێنن .
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018