له‌په‌راوێزی كۆنگره‌ی چواره‌می "كۆمه‌ڵ"دا/به‌شی یه‌كه‌م
وتار/
27/02/2021
447 جار بینراوە
شوان هه‌ورامی
له‌په‌راوێزی كۆنگره‌ی چواره‌می "كۆمه‌ڵ"دا/به‌شی
یه‌كه‌م
شوان هه‌ورامی
پێشه‌كیی
ئه‌م دۆسیه‌یه بابه‌تێكی زۆر هه‌ستیاره‌و ئه‌و حیزبانه‌ی له‌جیهانی ئیسلامییدا
پێیدا تێپه‌ڕیون، تووشی چه‌ندین گرفت و له‌مپه‌ری ناوخۆیی و ده‌ره‌كیی بوونه‌ته‌وه،
هێشتا زۆربه‌یان له‌قۆناغی ئه‌زموونه‌كه‌ش ده‌رنه‌چوون و به‌رده‌وامن.
بۆیه ئه‌وانه‌ی وا ده‌زانن ئه‌و بابه‌ته به‌سانایی تێده‌په‌ڕێت، به‌هه‌ڵه‌دا
ده‌چن، به‌ڵام تاچه‌نده‌ی له‌و هه‌نگاوه‌دا شه‌فافیه‌ت و تێگه‌یشتنی قۆناغه‌كه بۆ
ئه‌ندامان و لایه‌نگران و گشت چین و توێژه‌كان روون بكرێته‌وه هێشتا كه‌مه،
چونكه دۆستان نیگه‌رانی هه‌نگاوه‌كه‌ن و نه‌یارانیش له كه‌میندان بۆ گومان
درووستكردن و نانه‌وه‌ی ئاژاوه‌و په‌شێویی.
كۆمه‌ڵ هه‌نگاوێكی قورسی هه‌ڵگرت، كه لێكه‌وته‌ی ناوخۆیی و ده‌ره‌كیی لێكه‌وتووه‌ته‌وه،
كه‌هه‌ندێ نه‌یار ده‌یانه‌وێت هه‌ر له‌م سه‌ره‌تایه‌وه هه‌نگاوه‌كه بگۆڕن به‌شكست،
بۆیه لێره‌دا چه‌ند خاڵێك به‌گرنگ ده‌زانم:
یه‌كه‌م- ئه‌وانه‌ی له‌گه‌ڵ ناو گۆڕینی "كۆمه‌ڵ"دا نه‌بوون، به‌شێكن
له‌ئه‌ندامانی دڵسۆزی ئه‌و حیزبه‌و به‌خوێن و گیانی خۆیان به‌رگرییان لێكردووه،
هه‌رچه‌نده هه‌ندێ ناویان ده‌نێن "سه‌له‌فیه‌كانی ناو كۆمه‌ڵ"، بۆ خۆم
هه‌رگیز له‌گه‌ڵ ئه‌و ناوه‌دا نیم، به‌ڵام ئه‌وانه كه‌سانێكی خاوه‌ن بیروباوه‌ڕی
پاكن و ئه‌وه‌ی گومان له‌دڵسۆزییان بكات، یا نایانناسێت یا هه‌ر له‌بناغه‌وه به‌كوێرانه
ئاڵای دژایه‌تیانی هه‌ڵگرتووه، من قسه‌م له‌گه‌ڵ ئه‌وانه‌یه كه نایانناسن، ئه‌و
براو خوشكانه كه‌سانێكن، نه‌ك ته‌نیا بۆ كۆمه‌ڵ به‌ڵكو له‌چه‌ندین پێگه‌و قۆناغدا
خزمه‌تیان كردووه:
1. ئه‌وانه به‌پێچه‌وانه‌ی سه‌له‌فیی مه‌دخه‌لیی
بڕوایان به‌هه‌بوونی پارتی سیاسیی هه‌یه‌و له‌ناویدا خه‌باتیان كردووه بۆ رووبه‌ڕووبوونه‌وه‌ی
بێدادیی و سته‌مكاریی، نه‌ك ئه‌وه‌ی خه‌ڵك هانبده‌ن بۆ گوێڕایه‌ڵیی تاغووت و سته‌مكار
به‌ناوی گوێڕایه‌ڵیی بۆ "وه‌لی ئه‌مر"، كه پێچه‌وانه‌یه له‌گه‌ڵ
بانگه‌وازی گشت پێغه‌مبه‌ران (سڵاوی خوایان لێ بێت).
2. ئه‌وانه هه‌وێنی سه‌قامگیریی و ئاسایشی
كوردستانن، له‌نزیكه‌وه ئاگادارم ئه‌گه‌ر هه‌وڵی خواویستانه‌و جوامێرانه‌ی ئه‌وان
نه‌بوایه، له‌وانه‌بوو به‌ده‌یان به‌پرس و شوێنی ئه‌م وڵاته به‌هۆی رۆڵه هه‌ڵخه‌ڵه‌تێنراوه‌كانییه‌وه
بكرایه‌نه ئامانجی تیرۆریستان.
3. ئه‌وانه له‌ڕووی په‌روه‌رده‌ی كۆمه‌ڵایه‌تییه‌وه
هه‌زاران نه‌وجه‌وان و لاوی ئه‌م وڵاته‌یان له‌خونه‌ریتی خراپ و تاوان به‌ره‌و ئه‌خلاق
و به‌ها به‌رزه‌كان بردووه، كه دواجار ئه‌وانه‌ن داهاتووی ئه‌م وڵاته به‌ڕێوه
ده‌به‌ن، كه به‌داخه‌وه خه‌ڵكانی دیكه به‌ره‌و یانه‌كانی شه‌وانه‌و بازرگانیی
له‌شفرۆشییان ده‌به‌ن.
4. ئه‌و بابه‌ته‌ی "ناو" یا "نێوه‌رۆك"
گۆڕینه‌ش پێویستیی به ده‌یان سیمینار و مێزگرد و دیالۆگی زانستیی و ئه‌كادیمیی هه‌یه،
كه پێموایه ده‌بوو به‌ر له‌كۆنگره بكرایه، به‌ڵام نه‌كراو بابه‌ته‌كه هاته
ناو كۆنگره‌وه، هۆكارو پاساوه‌كه هه‌رچییه‌ك بووبێت، ئه‌و بابه‌ته ده‌بوو به رێككه‌وتن
یه‌كلایی بكرێته‌وه، نه‌ك به‌زۆرینه‌ی ده‌نگ، ئێستاش ئه‌و بابه‌ته له‌نێوخۆی حیزب
و ده‌ره‌وه‌شیدا ده‌بێ هه‌ر به‌هه‌مان شێوه روون بكرێته‌وه، چونكه بابه‌تی فیكریی
و سیاسیی له‌گفتوگۆو نووسین و لێكتێگه‌یشتن زیاتر رێگه‌یه‌كی تریان نییه، رابردووی
حیزبه چه‌كداره‌كان زۆر تاڵه، كاتێ شتی فیكریی زۆر ساده‌یان به‌لووله‌ی چه‌ك
باسكردووه، هه‌زاران لاوی ئه‌م وڵاته‌یان بۆ كردووه‌ته قوربانیی!!
دووه‌م- هه‌روه‌كو له‌په‌یڕه‌وی ناوخۆی نوێی "كۆمه‌ڵ"دا هاتووه،
ئه‌ندام مافی پێشنیاز و سكاڵاو ره‌خنه‌ی هه‌یه، بۆ خۆم بڕوای ته‌واوم به‌ئازادیی
ئه‌ندامی حیزبیی هه‌یه، ئه‌وه‌ش به‌مانای ده‌رچوون له‌پابه‌ندییه‌ك نییه كه ئه‌ندام
بۆ خۆی به‌خۆبه‌خشانه قبوڵی كردووه، چونكه كه‌س زۆری لێنه‌كردووه ببێته ئه‌ندامی
حیزب، به‌ڵام هه‌رگیز له‌گه‌ڵ ئه‌وه‌دانیم له‌م سه‌رده‌می "سۆشیال میدیا"
و راگه‌یاندنه بێسنووره‌ی ئێستادا هه‌ر ئه‌ندامێكی حیزب رێگه به‌خۆی بدات ببێته
وته‌بێژ و به‌تێگه‌یشتن و ئاره‌زووی خۆی قسه له‌سه‌ر بابه‌تی چاره‌نووسساز بكات،
به‌تایبه‌تی له‌م رۆژانه‌دا هه‌ندێ كه‌ناڵی راگه‌یاندن به ئه‌نقه‌ست ئه‌ندامانێكی
كۆمه‌ڵ بانگهێشت ده‌كه‌ن، بۆ ئه‌وه‌ی بیانخه‌نه ئه‌و بۆسه‌یه‌وه كه بۆیان دیاریی
كردوون، كه من بۆ خۆم هه‌ر له‌بناغه‌وه بڕوام وایه مرۆڤی موسوڵمان و كوردی جوامێر
بۆی حه‌رام و قه‌ده‌غه‌یه لێدوان بۆ كه‌ناڵێك بدات كه به‌سامانی گشتیی دامه‌زراوه‌و
بوجه‌كه‌شی به‌رده‌وام له‌قووتی ئه‌و خه‌ڵكه دابین ده‌كرێت.
سێیه‌م- ئه‌وه‌ی كه له‌م وتاره‌دا پێشكه‌شی ده‌كه‌م رای تایبه‌تی خۆمه‌و
نه مه‌به‌ستم بریندار كردنی هه‌ستی كه‌سه‌و نه رێگه به‌خۆیشم ده‌ده‌م دوای ئه‌و
ته‌مه‌نه بێڕێزیی به‌هه‌ستی كه‌س بكه‌م، ئه‌وه بابه‌تێكی تیۆریی و لێكۆڵینه‌وه‌یه
كه له‌جیهانی ئیسلامییدا به سه‌دان كتێب و توێژینه‌وه‌ی له‌سه‌ر كراوه، به‌خۆشحاڵییه‌وه
له‌وڵاتی خۆشمان چه‌ندین كتێب و لێكۆڵینه‌وه‌ی له‌سه‌ر پێشكه‌ش كراوه، به‌ڵام هێشتا
بابه‌ته‌كه ماویه‌تیی هه‌موان تیایدا بگه‌نه ئه‌نجام.
بۆیه ئه‌م بابه‌ته‌ش به ئه‌ندازه‌ی هه‌ژاریی هزرییم، هه‌وڵێكی تره له‌و
بواره‌داو ئه‌گه‌ر خێرێكی تێدابوو له‌فه‌زڵی خواوه‌یه‌و هه‌رچیی كه‌موكورتیشه له‌خۆمه‌وه‌یه،
هه‌ر ره‌خنه‌و گله‌ییه‌كی بابه‌تیانه‌ش له‌سه‌ر سه‌ر و له‌سه‌ر چاوه.
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018