ئه‌و هه‌موو مانۆڕه‌ی نه‌ده‌ویست یه‌كێتیی !!
وتار/
16/06/2017
1306 جار بینراوە
شوان هه‌ورامی
ئه‌و هه‌موو مانۆڕه‌ی نه‌ده‌ویست یه‌كێتیی !!
شوان هه‌ورامی
دوای ئه‌و كوده‌تایه‌ی به‌سه‌ر په‌رله‌مانی كوردستانیدا
كرد ، بۆ كاراكردنه‌وه‌ی په‌رله‌مان پارتیی هه‌ر یه‌ك قسه‌ی كردووه ، گۆڕینی ده‌سته‌ی
سه‌رۆكایه‌تیی په‌رله‌مان ، چونكه ئه‌و ده‌سته‌یه له فه‌رمانی دیوه‌خان ده‌رچوون
و باسی ئه‌و دۆسیانه‌یان كرد ، كه به بۆچوونی دیوه‌خان نه‌ده‌بوو بیكه‌ن .
له‌ساڵی 1992 ه‌وه كه یه‌كه‌مین خولی په‌رله‌مانی
كوردستان ده‌ستی پێكردووه ، به حوكمی په‌نجا به په‌نجا په‌رله‌مان له رواڵه‌تدا
ده‌زگای یاسادانانی هه‌رێم بووه ، به‌ڵام له‌ڕاستیدا په‌رله‌مان ده‌زگایه‌كی شه‌رعیه‌تدان
بووه به بڕیاری مه‌كته‌بی سیاسیی ئه‌و دوو پارته‌ی كوردستان ، بۆیه رێگه‌یان پێنه‌داوه
كه وه‌كو په‌رله‌مانی راسته‌قینه یاساكان ده‌ربكات و چاودێری حكومه‌ت و وه‌زاره‌ته‌كانی
بكات و لێپرسینه‌وه‌ی ته‌واویان له‌گه‌ڵدا بكات ، بۆیه له ماوه‌ی 26 ساڵی
رابردوودا په‌رله‌مان نه‌یتوانی لێپرسینه‌وه له یه‌ك وه‌زیر بكات ، یا متمانه‌ی
لێوه‌رگرێته‌وه .
له‌م خوله‌ی ئێستای په‌رله‌ماندا ، ده‌سته‌ی سه‌رۆكایه‌تیی
په‌رله‌مان و فراكسیۆنه‌كانی په‌رله‌مان ده‌ستیان بۆ زۆر دۆسیه‌ی گرنگ برد ، له‌وانه
دۆسیه‌ی گرێبه‌سته نه‌وتیه‌كان و ناشه‌فافیی فرۆشتنی نه‌وت و داهاته‌كه‌ی ، لێپرسینه‌وه‌ی
وه‌زاره‌ته‌كان ، به‌دواداچوونی یاسای بودجه‌و په‌سه‌ند كردنی و حیسابی كۆتایی ،
هه‌مواركردنه‌وه‌ی یاساكان ، به تایبه‌تیی یاسای سه‌رۆكایه‌تی هه‌رێم – كه ئه‌مه‌یان
به‌لای پارتیه‌وه به تێپه‌ڕاندنی هێڵی سوور هه‌ژمار ده‌كرا – كه بووه هۆی كوده‌تایه‌كی
سپی به‌سه‌ر په‌رله‌ماندا و په‌كخستنی له‌لایه‌ن مه‌كته‌بی سیاسیی ئه‌و حیزبه‌وه
.
هه‌ر له سه‌ره‌تای كوده‌تاكه‌وه پارتی یه‌ك قسه‌ی هه‌بووه
بۆ به‌گه‌ڕخستنه‌وه‌ی باڵاترین ده‌زگای یاسادانه‌ری كوردستان ، ئه‌ویش گۆڕینی ده‌سته‌ی
سه‌رۆكایه‌تی ئه‌و ده‌زگایه بووه ، چونكه ده‌سته‌ی خوله‌كانی پێشووی په‌رله‌مان
به‌و شێوه‌یه بوون كه رێگه‌یان نه‌داوه دۆسیه گرنگه‌كان بخرێنه به‌ر باس و
گرنگیپێدان ، به كورتیه‌كه‌ی ده‌سته‌گه‌لێك بوون ئه‌جێنداكانی مه‌كته‌بی سیاسیی
پارتیی و یه‌كێتییان جێبه‌جێ ده‌كرد و په‌رله‌مانیان كردبووه حه‌وشه‌ی پشته‌وه‌ی
خواستی مه‌كته‌به سیاسییه‌كانیان .
ساڵێكه ئه‌و ده‌نگۆیه هه‌یه كه یه‌كێتیی رازییه به
پێشنیازه‌كه‌ی پارتیی بۆ ئه‌وه‌ی ده‌سته‌یه‌كی سه‌رۆكایه‌تی دروست بكرێت ، په‌رله‌مان
بكه‌نه‌وه به ته‌یره نامه‌عقوله‌كه‌ی جاران و رێگه‌ی نه‌ده‌ن ده‌ست بۆ ئه‌و دۆسیانه
ببات كه په‌یوه‌ندییان به سه‌روه‌ریی نیشتمانیی و سیاسه‌ت و ئابووریی هه‌رێمه‌وه
هه‌یه ، چونكه ئه‌و دۆسیانه ده‌بێ له دیوه‌خانه‌كانی مه‌كته‌بی سیاسیی و له
ژووره داخراوه‌كاندا بڕیاریان له‌سه‌ر بدرێت . به‌ڵام له‌و ماوه‌یه‌دا یه‌كێتیی ویستی
كار به‌و په‌نده بكات كه زه‌مان به‌شێكه له چاره‌سه‌ر و ئه‌وه‌نده ئه‌و خواسته‌ی
پارتیی ئه‌مدیو و ئه‌ودیو ده‌كه‌ن تا هه‌موان به‌و خواسته‌ی رازیی ده‌كه‌ن .
هه‌موان ده‌زانین كه په‌رله‌مان له‌سه‌ر ده‌ستبردن بۆ
هه‌مواركردنه‌وه‌ی یاسای سه‌رۆكایه‌تیی هه‌رێم كوده‌تای به‌سه‌ردا كرا ، گریمان به‌و
شێوه‌یه‌ی پارتی ده‌یه‌وێت كارا كرایه‌وه ، ئایا له‌كام دۆسیه‌وه ده‌ست پێده‌كاته‌وه؟
ئایا ده‌ست ده‌باته‌وه بۆ ئه‌و بابه‌ته گرنگه‌ی كه بۆشایی یاسایی له هه‌رێمدا
دروستكردووه ، واته ته‌واوبوونی ویلایه‌تی سه‌رۆكی هه‌رێم ؟ ئایا شێوازی ده‌سه‌ڵات
له هه‌رێمدا په‌رله‌مانیی ده‌بێت یا سه‌رۆكایه‌تیی ؟ ئایا كه حیزبه‌كان بڕیاریان
له‌سه‌ر ریفراندۆم داوه ، په‌رله‌مان ده‌توانێت یاسای بۆ ده‌ربكات كه كار به ئه‌نجامه‌كانی
بكرێت و رێز له ئیراده‌ی جه‌ماوه‌ری كوردستان بگیرێت ؟ ئایا په‌رله‌مان ده‌توانێت
له‌وه بپرسێته‌وه كه حكومه‌تی هه‌رێم بۆچی كار به یاسای سندوقی نه‌وت و گاز و
شه‌فافیه‌تی داهاته‌كه‌ی ناكات ؟ ئایا گرێبه‌سته‌كانی نه‌وت و گاز وه‌كو هه‌ر بابه‌تێكی
په‌یوه‌ندیدار به ســــه‌روه‌ریی نیشـــــتمانیه‌وه ده‌خرێته كارنامه‌ی په‌رله‌مانه‌وه
بۆ ئه‌وه‌ی وه‌كو په‌رله‌مانه‌كانی جیهــــان له‌لایه‌ن ئیراده‌ی گه‌له‌وه په‌ســـــه‌ند
بكرێن ؟
من دڵنیام له‌وه‌ی پارتیی قه‌ناعه‌تی به یه‌كێتیی
كردووه كه په‌رله‌مانێكی گوێ له مستی مه‌كته‌بی سیاسیی كارا بكه‌نه‌وه‌و به گۆڕینی
ده‌سته‌ی سه‌رۆكایه‌تیش ئه‌م مه‌سجانه بده‌نه هه‌موو لایه‌ك :
یه‌كه‌م – ئه‌وه‌ی پارتی بیه‌وێت هه‌ر ئه‌وه ده‌بێت ،
چونكه ئه‌و پارته زیاتر گرنگیی به گره‌وه ناوچه‌یی و جیهانیه‌كان ده‌دات ، كه
له‌م قۆناغه‌دا گوێ به بنه‌ما دیموكراسیی و خواسته‌كانی مافی مرۆڤ ناده‌ن ، به
تایبه‌تیی كۆمپانیا نێوده‌وڵه‌تیه سه‌رمایه‌داره‌كانی بواری نه‌وت و گاز .
دووه‌م – سه‌رۆكی خولی ئێستای په‌رله‌مان ، ماده‌م گوێ
له مستی مه‌كته‌بی سیاسیی خاوه‌ن میلیشیا نیه ، باوه‌كو خواسته‌كانیشی هاوته‌ریب
بن له‌گه‌ڵ خواستی چینه سته‌م لێكراوه‌كانی كۆمه‌ڵگه‌دا ، ده‌بێ لا بدرێت و سه‌رۆكێكی
تر له شوێنی دابنرێت ، گه‌رچی ئه‌و سه‌رۆكه له هه‌مان پارتی سیاسییش بێت ، به‌ڵام
ئه‌وه‌ی پێده‌ڵێت : ئه‌گه‌ر تۆش ده‌ست ببه‌یت بۆ ئه‌و دۆسیانه‌ی كه كوده‌تای به‌سه‌ر
سه‌رۆك و ده‌سته‌ی سه‌رۆكایه‌تیی پێشوودا كرد ، به‌سه‌ر تۆیشدا دووباره ده‌كرێته‌وه
.
سێیه‌م – خوێندنه‌وه‌ی پارتی بۆ دۆخی ناوچه‌كه‌و جیهان
ئه‌وه‌یه ، كه ماده‌م سه‌رۆكی نوێی ئه‌مه‌ریكا پشتیوانیی له دیكتاتۆریه‌ت و خۆسه‌پاندن
ده‌كات ، به‌مه‌رجی ئه‌وه‌ی به‌رژه‌وه‌ندیی سه‌رمایه‌داران و كۆمپانیاكانی خۆرئاوا
دابین بكرێت ، جارێ پێویست ناكات حساب بۆ ئیراده‌ی جه‌ماوه‌ری كوردستان بكرێت بۆ
چاكسازیی و به دامه‌زراوه‌یی و نیشتمانیی كردنی ده‌زگاكانی .
چواره‌م – ده‌یه‌وێت به‌م هه‌نگاوه ، له‌لایه‌ك سه‌رۆكی
ئێستای په‌رله‌مان له تۆڵه‌ی ده‌ستبردن بۆ پۆستی سه‌رۆكی هه‌رێم سزا بدات و بیگۆڕێت
به ئه‌ندامێكی گۆڕان ، له‌لایه‌كی تریش دووری بخاته‌وه له كۆمه‌ڵ كه پێكه‌وه
هه‌ڵوێستیان هه‌بووه ، له‌ولاوه‌ش پۆستی سكرتێری په‌رله‌مان له كۆمه‌ڵ وه‌ربگرێته‌وه‌و
بیداته یه‌كگرتووی ئیسلامیی بۆ ئه‌وه‌ی تا بتوانێت نێوانیان تێكبدات ، ئه‌مه له
كاتێكدایه هه‌موو ئه‌و پۆستانه - وه‌كو گوتمان – گره‌ون له‌سه‌ر ئه‌سپی تۆپیو ،
چونكه په‌رله‌مان ده‌بێته‌وه به دیوه‌خانی دووه‌می مه‌كته‌بی سیاسیی و ئیراده‌ی
یاسایی و نیشتمانیی لێوه‌رده‌گیرێته‌وه .
هه‌رچه‌نده وه‌كو هه‌ستی پێده‌كرێت ، ئه‌وه‌ی كه
باسمان كرد باڵێكی یه‌كێتیی بڕوای پێیه‌تیی و ئه‌وانی تر پێی ناڕازین ، به‌ڵام ئه‌وانیش
ده‌بێ بزانن ئه‌و هه‌نگاوه‌ی یه‌كێتیی زیانی گه‌وره‌یان لێده‌دات ، زیانه‌كه ته‌نیا
بۆ لێدانی ئیراده‌ی جه‌ماوه‌ری كوردستان نیه ، به‌ڵكو یه‌كێتیی وه‌كو لایه‌نێكی
خاوه‌ن پڕۆژه بۆ هه‌مواری یاسای سه‌رۆكایه‌تیی هه‌رێم ده‌خاته ژێر پرسیارێكی گه‌وره‌وه
، كه ئایا حیزبی خاوه‌ن پڕۆژه‌ی سیاسیی و درووشمه پێشكه‌وتنخوازییه‌كان ، به‌چ هۆكارێك
ده‌گه‌ڕێته‌وه بۆ شێوازی سوڵحی عه‌شائیریی !!
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018