ترامپ له چیی تووڕه‌یه ؟!
وتار/
10/04/2017
702 جار بینراوە
شوان هه‌ورامی
ترامپ
له چیی تووڕه‌یه ؟!
شوان
هه‌ورامی
له‌كاتی
هه‌ڵمه‌ته‌كانی هه‌ڵبژاردندا ، دۆناڵد ترامپ ره‌خنه‌ی تووندی له باراك ئۆباما ده‌گرت
له‌سه‌ر قه‌یرانی سوریاو بێهێزیی له به‌ڕێوه‌بردنیدا ، به‌ڵام چه‌ند رۆژێ به‌ر له
دوایه‌مین هێرشی كیمیاویی بۆ سه‌ر شارۆچكه‌ی خان شیخون ، وته‌بێژی كۆشكی سپی له
زمانی " ترامپ "ه‌وه رایگه‌یاند كه رووخاندنی به‌شار ئه‌سه‌د له
گرنگی پێدانه‌كانی ئه‌وان نیه . هه‌ر بۆیه زۆربه‌ی چاودێران ترامپ به هه‌ڵكه‌ری
چرای سه‌وز ده‌زانن بۆ رژێمی به‌شار ئه‌سه‌د بۆ ئه‌نجامدانی ئه‌م تاوانه قێزه‌ونه
.
ئه‌وه
6 ساڵه رژێمی سوریا له لایه‌ن كۆمه‌ڵی نێوده‌وڵه‌تیه‌وه ده‌ستی ئاوه‌ڵا كراوه
بۆ قڕكردنی خه‌ڵكی سوریا ، زیاتر له 600 هه‌زار كه‌سی كوشتووه‌و زیاتر له 10
ملیۆن هاوڵاتیشی ئاواره كردووه‌و زۆربه‌ی شاره‌كانی ئه‌و وڵاته‌شی وه‌كو
ستالینگرادو به‌رلینی سه‌رده‌می جه‌نگی جیهانی دووه‌م لێكردووه ، هۆی چیه به‌م
چه‌ند بۆمبه كیمیاوییه ترامپ تووڕه بووه‌و ده‌ڵێت رای خۆی گۆڕیووه ؟
كوشتنی
مرۆڤ به به‌رمیلی بارووت بێت یا گازی كیمیاویی هه‌ر كوشتنه ، ئه‌و ژماره زۆره‌ی
كوژراو زۆر زیاتره له‌م ژماره كه‌مه‌ی قوربانیانی كیمیاویی ، ئه‌گه‌ر به‌ڕاستی
ترامپ و سه‌ركرده خۆرئاواییه‌كان راستیان ده‌كرد ، ده‌بوو ویژدانیان بۆ ئه‌و
ژماره زۆره بجوڵایه‌و هه‌ر له سه‌ره‌تاوه رێگه‌یان به‌و تاوانه گه‌وره‌یه نه‌دایه
. ئۆباما خه‌تی سووری زۆری بۆ به‌شار ئه‌سه‌د دانابوو كه چه‌كی كۆمه‌ڵكوژ
تۆخترینیان بوو ، به‌ڵام دوای به‌زاندنی هه‌موو هێڵه سووره‌كان ، ته‌نیا كاری
باراك ئۆباما له دوای تاوانی غوته‌ی خۆرهه‌ڵات داماڵینی ئه‌و چه‌ك و جبه‌خانه‌یه
بوو له رژێم ، ئیتر كارێكی تر نه‌كرا بۆ رێگریی له قه‌سابخانه دڵته‌زێنه‌كانی
سوریا . چونكه له‌ڕاستیدا ئه‌مه‌ریكا به یارمه‌تی رووسیا ویستیان ئه‌و چه‌كه
ترسناكه له‌و رژێمه داماڵن ، نه‌ك رۆژێ له رۆژان بكه‌وێته ده‌ســتی كه‌سانێ كه
خه‌یاڵ بكه‌ن له دژی ئیســـــرائیل به‌كاری بهێنن .
لێره‌وه
بۆمان ده‌رده‌كه‌وێت كه تووڕه‌یی ترامپ له‌سه‌ر تراژیدیای خان شیخون نیه ، به‌ڵكو
له‌سه‌ر ئه‌و درۆ گه‌وره‌یه كه رژێمی به‌شار ئه‌سه‌د له‌گه‌ڵیاندا كردوویه‌تی ،
كه پێشتر رایگه‌یاندووه به‌وه‌ی هه‌موو چه‌كه كۆكووژه‌كانی راده‌ستی ئه‌مه‌ریكا
كردووه ، به‌ڵام ئێستا دووباره به‌كاریان ده‌هێنێته‌وه ، ئه‌وه‌ش هه‌مان ئه‌گه‌ری
مه‌ترسیی بۆ سه‌ر ئاسایشی ئیسرائیل دروست ده‌كاته‌وه ، كه ترامپ له‌به‌رده‌می
كۆنگره‌ی "ئایپاك"دا به‌ڵێنی به سه‌ركرده‌كانی رێكخراوی زایۆنیستی
جیهانی داوه كه ئیسرائیل وه‌كو بیلبیله‌ی چاوانی بپارێزێت ، بۆیه رێگه نادرێت
به هیچ هێزێكی ناوچه‌كه باڵاده‌ستیی ئیسرائیل تێكبدات !!
دوێنێ
ترامپ له وه‌ڵامی پرسیاری رۆژنامه‌نووساندا كه پرسیاریان لێكرد : چیی ده‌كه‌یت
له دژی ئه‌و سنوور به‌زاندنه‌ی به‌شار ئه‌سه‌د ؟ گوتی : ده‌یبینن .. كه‌واته چیی
پێشبینیی ده‌كرێت كه ئیداره‌ی ترامپ له دژی رژێمی به‌شار ئه‌سه‌د بیكات ؟ ئه‌گه‌ره‌كان
به‌م شێوه‌یه‌ن :
1. ترامپ په‌یوه‌ندییه‌كی باشی له‌گه‌ڵ پۆتین هه‌یه ، ته‌نانه‌ت
قه‌رزداری هه‌وڵه‌كانی ده‌زگای هه‌واڵگریی رووسیایه له هه‌ڵبژاردن و سه‌رخستنیدا
، بۆیه هه‌رچیه‌ك بكات به ئاگاداری رووسیا ده‌یكات ، چونكه رووسیا له سوریادا
بوونی هه‌یه‌و ئه‌مه‌ریكاش بێ ئاگا نیه له‌و رۆڵه‌ی كه به رووسیا دراوه .
2. ستراتیژی نوێی ئه‌مه‌ریكا ئه‌وه‌یه جارێكی تر له خۆرهه‌ڵاتی
ناوه‌ڕاستدا سه‌ربازانی خۆی ناكاته قوربانیی ، ته‌نانه‌ت له یارمه‌تیدانی
وڵاتانیشدا ده‌بێ نرخه‌كه‌ی به زیاده‌وه وه‌رگرێته‌وه ، چه‌ند رۆژێ له‌مه‌وبه‌ریش
" ئاشتۆن كارته‌ر"ی وه‌زیری پێشووی به‌رگریی ئه‌مه‌ریكا رایگه‌یاند : تا
ئێستاش پنتاگۆن هه‌ر هه‌مان پلان و ستراتیژ جێبه‌جێ ده‌كات كه ئیداره‌ی باراك
ئۆباما دایناوه ، بۆیه چاوه‌ڕوان ناكرێت گۆڕانكاریی به‌رچاو له‌و پلانه سه‌ربازییه‌دا
رووبدات .
3. له‌وانه‌یه بۆ چه‌واشه‌كاریی رای گشتیی جیهانیی ، هێزه
ئاسمانیه‌كانی ئه‌مه‌ریكا بۆمبارانی چه‌ند ناوچه‌یه‌كی دووره ده‌ست و نا كاریگه‌ر
له سوریادا بكه‌ن ، هه‌روه‌كو ئه‌و بۆمبارانانه‌ی كه له رۆژی 31 ی ئابی 1996 و
رۆژانی دواتردا له عێراق كردیان ، كاتێ چاوپۆشیان كرد له گرتنی شاری هه‌ولێر له
لایه‌ن هێزه‌كانی گاردی كۆمارییه‌وه ، به‌ڵام له به‌سره‌و ناوه‌ڕاستی عێراق چه‌ند
رادارو دژه ئاسمانیان كرده ئامانج ، له‌وانه‌یه له‌م حاڵه‌ته‌دا هه‌ندێ ناوه‌ندی
فه‌رمانده‌یی حیزبوڵڵا و ئێرانیش له شامدا بكه‌نه ئامانج ، بۆ ئه‌وه‌ی پێگه‌ی
رووسیا زیاتر به‌هێز بكه‌ن ، به‌ڵام ئه‌وه‌ش ته‌نیا وه‌كو گه‌یاندنی چه‌ند نامه‌یه‌كه
نه‌ك جدیی بوونیان له رووخاندنی به‌شار ئه‌سه‌ددا ، چونكه مانه‌وه‌ی به‌شار به‌ر
له ئێران و رووسیا ویستێكی ئیسرائیلیی و خۆرئاواییه .
4. ئه‌وه‌ی كه ده‌ری ده‌خات هه‌ڵوێسته‌كانی ئه‌مه‌ریكا و
خۆرئاواییه‌كان له دژی به‌شار ئه‌سه‌د جدیی نیه ، ئه‌وه‌یه كه 6 ساڵه ئه‌مه‌ریكا
نه ناوچه‌ی دژه فڕینی به‌سه‌ر رژێمی سوریادا سه‌پاندووه ، نه هێشتوویه‌تی چه‌كی
دژه ئاسمانی بگاته شۆڕشگێڕان بۆ ئه‌وه‌ی ده‌ستی باڵای رژێم بۆ كوشتاری خه‌ڵك
ئاوه‌ڵا بێت ، نه ناوچه‌ی ئارامیشی بۆ خه‌ڵكی سڤیل دروستكردووه ، جا له كۆبوونه‌وه‌كه‌ی
ئه‌نجوومه‌نی ئاسایشدا هیچ ئاماژه‌یه‌ك به بڕیارێكی له‌و شێوه‌یه نه‌درا ، كه‌واته
هه‌موو هه‌ڕه‌شه‌و ناڕه‌زاییه‌كان ته‌نیا بۆ چه‌واشه‌كردنی رای گشتین و به چه‌ند
هێرشێك تووڕه‌یی رای گشتیی له‌بیری خه‌ڵك ده‌به‌نه‌وه .
5. ته‌نانه‌ت ئه‌گه‌ری ئه‌وه هه‌یه هه‌روه‌كو به‌كارهێنانی چه‌كی
كیمیاویی له‌لایه‌ن رژێمی به‌عسه‌وه به چڕیی له كۆتایی جه‌نگی 8 ساڵه‌ی عێراق -
ئێراندا ، به ئاماژه‌ی خۆرئاواییه‌كان بووبێت بۆ كۆتایی هێنان به شه‌ڕه‌كه‌و سه‌پاندنی
بریاری 598 ی ئه‌نجوومه‌نی ئاسایش ، ته‌نانه‌ت باسی ئه‌وه ده‌كرێت له كه‌ناڵی
دیبلۆماسیه‌وه به ئێران راگه‌یه‌نراوه هه‌موو شاره‌كانی ئێران ئه‌گه‌ری به هه‌ڵه‌بجه
كردنیان هه‌یه ، بۆیه دوور نیه ئه‌م تراژیدیایه‌ی خان شیخون هه‌ڵه‌بجه‌یه‌كی تر
بێت بۆ گوشار خستنه سه‌ر ئۆپۆزیسیۆنی ئه‌و وڵاته كه پاشه‌كشه بكه‌ن له
داخوازیی لادانی به‌شار ئه‌سه‌د و رازیی بوون به نه‌خشه‌رێگه‌ی خۆرئاواییه‌كان و
رووسیا له ناوچه‌كه‌دا .
جا
با چاوه‌ڕوان بین بزانین ترامپ به‌رنامه‌ی چییه‌و چیی ده‌ته‌قێنێت ؟!!
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018