له‌په‌راوێزی سه‌ردانه‌كه‌ی بارزانی بۆ توركیادا
وتار/
01/03/2017
676 جار بینراوە
شوان هه‌ورامی
له‌په‌راوێزی
سه‌ردانه‌كه‌ی بارزانی بۆ توركیادا
شوان هه‌ورامی
رۆژی
26 ی شوبات بارزانی سه‌ردانی توركیای كرد ، له‌و سه‌ردانه‌دا له‌گه‌ڵ هه‌ریه‌كه
له " ره‌جه‌ب ته‌یب ئه‌ردۆغان "ی سه‌رۆك كۆمار و " بینالی یه‌ڵدریم
"ی سه‌رۆك وه‌زیران كۆبوه‌وه ، میدیای پارتی زیاتر تیشكی خسته‌سه‌ر هه‌ڵكرانی
ئاڵای كوردستان ، له فڕۆكه‌خانه‌ی ئه‌تاتۆرك له ئه‌سته‌نبوڵ و نه‌یارانیشی به
به‌رده‌وامیی شه‌ڕی سوپای توركیاو " PKK " یان كرده بنێشته خۆشه‌ی سه‌ر زمانیان له باكووری كوردستان ، لێره‌دا
ئاماژه به چه‌ند خاڵێك به گرنگ ده‌زانم :
1. هه‌ر مه‌به‌ستێك له پشتی هه‌ڵكردنی
ئاڵای كوردستانه‌وه بێت ، به‌پێی كلتووری ئینكاری كورد له باكووری كوردستان و
دژایه‌تیی هه‌ر سه‌روه‌رییه‌كی كورد له پارچه‌كانی تر ، كه سیاسه‌تی ده‌وڵه‌تی
توركیا بووه له ساڵی 1923 وه تا هاتنی پارتی دادوگه‌شه‌پێدان " AKP " ، گۆڕانكارییه‌كی زۆر گه‌وره‌یه‌و هیچ وڵاتێكی تری دراوسێی
هه‌رێمی كوردستان و عێراق ( به تایبه‌تیی ئێران و سوریا و ئه‌رده‌ن و سعودیه‌و
كوه‌یت ) ئه‌و كاره‌یان نه‌كردووه ، ئه‌وه ئاماژه‌یه‌كی پۆزه‌تیڤه بۆ مافی چاره‌نووسی
كورد ، كاتێ بزانین جیۆپۆلۆتیكی كوردستان ترسناك و داخراوه‌و كه‌ناری ئاویمان نیه‌و
ئه‌گه‌ر سه‌ربه‌خۆش بین ، وه‌كو وڵاتانی تری داخراو بۆ نمونه ئه‌فغانستان ، نیپاڵ
، باشووری سودان و ئیسیوپیا ، گرفتی په‌یوه‌ندیی ده‌ریاییمان هه‌یه‌و ناتوانین به‌بێ
په‌یوه‌ندیی باش له‌گه‌ڵ دراوسێكانماندا گه‌شه‌ی ئابووریی بكه‌ین .
2. میدیای پارتی بۆ جارێكی تر و
بۆ ئیستیهلاكی ناوخۆ ، مه‌سه‌له‌ی ئاڵاو سه‌ربه‌خۆیی كرده‌وه به خۆركی ئه‌م چه‌ند
رۆژه‌ی ، به‌ڵام هه‌روه‌كو له په‌یجی فه‌رمیی ئه‌ردۆغاندا هاتووه ، جگه له سه‌رۆك
، ئه‌ندامانی كۆبوونه‌وه‌كه له‌لایه‌نی توركیاوه " به‌رائه‌ت به‌یره‌ق
"ی وه‌زیری وزه‌و سامانه سروشتیه‌كان و " هاكان فیدان "ی سه‌رۆكی
گشتیی ده‌زگای هه‌واڵگریی و " ئه‌حمه‌د یه‌ڵماز " یاریده‌ده‌ری وه‌زیری
ده‌ره‌وه‌ی توركیا ئاماده بوون ، لای هه‌رێمیشه‌وه جگه له مه‌سعود بارزانی ،
فوئاد حوسێن و سه‌فین دزه‌یی ئاماده بوون ، ئه‌وه‌ی سه‌یری پێكهاته‌كه‌ی توركیا
بكات ، بۆی روون ده‌بێته‌وه كه توركیا دوو دۆسیه‌ی به‌لاوه گرنگ بووه‌و باسی لێكردووه
، دۆسیه‌ی ئابووریی و دۆسیه‌ی ئاسایش ، دوای ئه‌و تۆمه‌تباركردنه‌ی ئێران له‌لایه‌ن
توركیاوه بۆ شیعه‌گه‌ریی له‌ناوچه‌كه‌دا ، بۆی هه‌یه گرفتی وزه‌ی لێبكه‌وێته‌وه
، بۆیه له‌و رووه‌وه وزه‌ی كوردستان بۆ توركیا زۆر گرنگه ، هه‌روه‌كو ته‌نیا رێگه‌چاره‌ی
هه‌رێمیش ته‌نیا ناردنی نه‌وت و غازه له رێگه‌ی توركیاوه ، شه‌ڕی داعش و شه‌ڕی
" PKK " ش دۆسیه‌یه‌كی تری گرنگه بۆ توركیاو ئه‌و وڵاته هه‌روه‌كو
له گۆڕه‌پانی جه‌نگدا كاری له‌سه‌ر ده‌كات ، له‌رووی ئه‌منیی و دیبلۆماسیشه‌وه
له‌گه‌ڵ ناوچه‌كه‌و خۆرئاوادا گرنگیی پێده‌دات ، بۆیه له دوای هاتنی ترامپ و له‌پاش
گفتوگۆكانی ئاستانه‌و جنێف توركیا ده‌یه‌وێت له هاوكێشه‌ی نوێدا هه‌ژموونی پارێزراو
بێت و سنوور بۆ نه‌یاره‌كانی دابنێت .
3. هه‌رچه‌نده هه‌ندێ كه‌سایه‌تیی
باكووری كوردستان هیوای زۆریان به‌و سه‌ردانه هه‌ڵچنیووه ، بۆ ئه‌وه‌ی پرۆسه‌ی
ئاشتیی ده‌ست پێبكاته‌وه ، به‌ڵام دوای هه‌ڵگیرسانه‌وه‌ی شه‌ڕ و تێكه‌ڵبوونی
" PKK " و " HDP " به‌و هێزه ناوچه‌یی و تاڕاده‌یه‌ك جیهانیانه‌وه كه ئه‌وانیان وه‌كو كارتێك
له دژی " AKP " به‌كارهێناو مه‌به‌ستیش رووخاندنی ده‌سه‌ڵاتی ئه‌و پارته
بوو ، دیواری بێمتمانه‌یی ئه‌ستوور كردووه ، به تایبه‌تیی دوای ئه‌وه‌ی " PKK " تێكه‌ڵ بووه به هاوپه‌یمانێتیی دیمه‌شق و تارانه‌وه له
دژی توركیا ، بۆیه هێشتا زووه گفتوگۆكان ده‌ست پێبكه‌نه‌وه ، به‌تایبه‌تیی ئه‌و
میكانیزمانه‌ی كه گفتوگۆكان بگه‌یه‌ننه ئه‌نجامی متمانه پێكراو دیار نین ، كه
بێگومان له‌لایه‌ن " PKK " و لایه‌نگرانیه‌وه داوای میكانیزمی روون له حكومه‌تی توركیا ده‌كه‌ن بۆ
به‌ره‌وپێشچوونی به‌رجه‌سته‌و له‌لایه‌ن حكومه‌تیشه‌وه بوونی چه‌ك هه‌میشه بنه‌مایه‌كی
له‌رزۆكه بۆ دیالۆگ و له‌هه‌ر چركه ساتێكدا ئه‌گه‌ری هه‌ڵگیرسانه‌وه‌ی شه‌ڕ هه‌یه
، به تایبه‌تی سه‌ركردایه‌تیی قه‌ندیل تێكه‌ڵی ستراتیژیه‌تی عه‌له‌ویی – شیعی
ناوچه‌كه بووه‌و ئه‌سته‌مه پاشه‌كشه‌ی لێ بكات ، هه‌ر خوێندنه‌وه‌ی هه‌ڵه‌ی ئه‌وانیش
بوو بۆ بارودۆخی توركیا كه ئه‌ردۆغانیان به رووخاو ده‌زانیی ، به‌و ئاكامه ناله‌باره‌ی
گه‌یاندن و به‌سه‌نگه‌رلێدانی ناو شاره‌كان و شه‌ڕ هه‌ڵگیرساندنه‌وه ، باكووریان
بۆ چه‌ندین ساڵی تر به‌ره‌و دواوه گه‌ڕانده‌وه .
4. ئه‌وه‌ی جێگه‌ی سه‌رنجه
" PKK " و لایه‌نگرانی بۆ ئه‌م سه‌ردانه‌ی بارزانی بۆ توركیا ،
ناوبراو به شه‌یتان ده‌كه‌ن ، راسته بارزانی هه‌تكی پرۆسه‌ی دیموكراسیی و مافی
مرۆڤی هه‌رێمی كردووه ، به‌ڵام خۆ PKK و لایه‌نگرانی
فریشته‌ی دیموكراسیی و مافی مرۆڤ نین ، خۆرئاوای كوردستان نمونه‌یه‌كی روونه له
مۆدێلی ستالینیانه‌ی كۆریای باكوور . بیانووی PKK بۆ به‌شه‌یتانكردنی بارزانی ئه‌وه‌یه ناوبراو سه‌ردانی توركیای كردووه ، له‌كاتێكدا
سوپای ئه‌و وڵاته - به‌پێی شرۆڤه‌ی ئاپۆچیه‌كان – شه‌ڕ له‌گه‌ڵ PKK و كوردانی باكوور ده‌كات و په‌رله‌مانتارو كادیرانی HDP ده‌ستگیر ده‌كات ، به‌ڵام ئه‌وان له‌مه‌دا چه‌واشه‌كاریی ده‌كه‌ن
، چونكه : مه‌گه‌ر كێ رایگه‌یاند كه ئاگربه‌ست كۆتایی هاتووه ؟ قه‌نیل یا ئه‌نقه‌ره
؟ كێ سه‌نگه‌ری له‌ناو شاره‌كانی باكووری كوردستان لێدا ؟ سوپا بوو یا PKK ؟ ئایا كاتێ ساڵح موسلیم سه‌ردانی توركیای كردو
چه‌ندین كۆبوونه‌وه‌ی له‌گه‌ڵ ده‌زگای هه‌واڵگریی ئه‌و وڵاته‌دا ئه‌نجامدا ، نه‌ك
به‌رپرسانی فه‌رمیی و سیاسیی وڵاته‌كه ، بۆچی میدیای PKK و لایه‌نگرانی له‌و سه‌ردانه بێده‌نگ بوون ؟ بانێك و دوو هه‌وایه
؟ بۆچی بوونی "عه‌بدوڵڵا ئۆجه‌لان "یان له‌بیرچۆته‌وه ، كه زیاتر له
15 ساڵ له سووریای "حافیز ئه‌سه‌د "دا ژیا ، كه ئێستاشی له‌گه‌ڵدابێت
به‌شاری كوڕیشی دان نانێت به بوونی كورددا و به ئاواره‌ی توركیایان ناو ده‌بات ؟
به‌داخه‌وه PKK ده‌یه‌وێت هه‌ر كه‌س و پارت و لایه‌نێك سه‌ردانی توركیای كرد ، ده‌بێ
سه‌ره‌تا ڤیزای قه‌ندیل وه‌ربگرێت ، كه به‌داخه‌وه نه‌بوونی یه‌كڕیزیی كوردو تێكه‌ڵ
بوونی پارته كوردییه‌كان به سه‌فه‌وی و عوسمانی نوێ كارێكی كردووه ، ئه‌م دابڕانانه
زیاتر ببن ، كه له‌م رووه‌وه میدیای بزوتنه‌وه‌ی گۆڕان و یه‌كێتی نیشتمانی
كوردستان رۆڵێكی خراپ ده‌گێڕن ، له‌وه‌ی هه‌ر رووكردنه توركیایه‌ك تاوانه‌و هه‌ر
تێكه‌ڵبوونێكیش به ئێران و هاوپه‌یمانێتیی شیعه و دژایه‌تی توركیاوه نیشتمانپه‌روه‌رێتیه
، هه‌ر له‌به‌ر ئه‌وه‌شه چاویان سیستمه‌كه‌ی كۆریای باكووری خۆرئاوای كوردستان
نابینێت و هه‌موو ناشیرینیه‌كانی به نرخی هه‌نگوینی قه‌ندیل ده‌رخواردی كۆمه‌ڵانی
خه‌ڵك ده‌ده‌ن !!
كه‌واته
هه‌موو دونیا باسی قاره‌مانێتی پێشمه‌رگه‌و كورد بكات ، هه‌موو دونیا مافی چاره‌نووسمان
پێ ره‌وا ببینن ، پشتیوانیمان بكه‌ن ، كه ماده‌م دیموكراسیه‌كه‌مان داخستنی په‌رله‌مان
و كوشتنی رۆژنامه‌نووسان و پاشقول له یه‌كتر گرتنه ، لووشدانی سامانی نیشتمانه
، ئاڵاو ده‌وڵه‌تیشمان هه‌بێت ، ئاڵاو مۆدێله‌كه‌ی له‌وه‌ی كۆماری باشووری سوودانی
سلفاكیر و ریاك مه‌شار جوانتر نابێت ، كه له‌دوای سه‌ربه‌خۆییه‌وه نزیكه‌ی 100
هه‌زار هاوڵاتیان كوشتووه‌و ملیۆنانیش ماڵوێران و ئاواره بوون ، ته‌نانه‌ت ئه‌وانه‌شیان
كه ده‌نگیان بۆ جیابوونه‌وه داوه ، ئێستا 200 هه‌زاریان په‌نایان بۆ باكووری
سوودان بردۆته‌وه ، جگه له ئیفلاسی بانكی ناوه‌ندیی جوبا . به‌ڕاستی به‌م حاڵه‌ته
پڕ له قه‌یرانه‌ی هه‌رێمه‌وه دیمه‌نه‌كه له‌وه‌ی باشووری سوودان جوانتر نابینم
!!
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018