پاشكری ئیسلامی بۆ حیزبە ئیسلامیەكان لەئێستادا عاملی هێزە یان ڕێگر؟!!!.

وتار/ 02/03/2021 458 جار بینراوە

د. ادریس كاریتانی

پاشكری ئیسلامی بۆ حیزبە ئیسلامیەكان لەئێستادا عاملی هێزە یان ڕێگر؟!!!.

(شیكاریەكی بابەتیانە)
لادان و دانانی ناو بۆ ڕەوتە ئیسلامیەكان لە چوارچێوەی ئیجتیهادی سیاسیە، دەچێتە خانەی بۆچوونی مرۆڤەكان، بۆچوونی مرۆڤەكانیش ناچێتە چوارچێوەی عەقیدەو موقەدەسات، هەر چەندە گەورەترین گرفتی ئەم سەردەمەی ئێستا بە موقەدەس كردنی بۆچوونی سەركردەی سیاسی ئیسلامیە تا ئەو لەسەر بۆچوونێك بی، ئەوە سەواب و ڕاستە، هەرچی قسەی لێ‌ بكات لادەرو نەزان و ساویلكەیە، دوای كە ئەو بۆچوونەكەی گۆڕا، ئیدی ئەمجارە ئەمەیان دینداریە، ئەوەی تر تەواو لێ‌ بێدەنگ بن، بەهەرحاڵ بەندە وەك بۆچوونی خۆم پێم وایە لەسەرەتاوە كورد گرفتی بنەماكانی ئیمانی نەبوو، لە(۹٥٪)ی موسڵمان بوو و پێویستی بە پاشگری ئیسلامی نەبوو، گرفتی میللەتی كورد ئازادی نیشتیمانی و داگیركاری و دواتریش نادادگەری و گەندەڵێی و تا ڕادەیەكیش نەزانی بوو لە هەندێك ئەحكامی ئیسلام، بەڵام كاتێك حیزبێكی ئیسلامی لە زۆربەی بڕیارە سیاسیەكانی پشت بەبابەتە فقهیەكان دەبەستی و ئایەت و فەرموودە دەهێنێتەوە بۆ هەر بڕیارێكی سیاسی بە دەلیلی ئیسلامیانە خەڵكی خۆی رازی دەكات، بەشی بانگخوازان و زانایانی هەیە، خۆی كردۆتە خاوەنی كەیسی ئیسلامی  لەسەر هەموو بابەتێكی ئیسلامی بەرگری دەكات و ئەندامانی لەهەموو ناوەندو نوسینگەو بارەگاكانی وانەی ئیسلامی دەخوێنن،

لەكاتی هەڵبژاردن هەمو خیتابەكان بەئایەت و فەرموودەی پیغەمبەر(صلی الله علیە وسلم)ە، بەخەڵك دەڵێن ئەگەر دەنگمان نەدەنێ دەچنە جەهەنم و دوای شكایەتتان لێدەكەین، ئایەتی (وأقیموا الشهادە لله) دەكەنە بەڵگە، ئینجا لەو لاوە دەنگی ئیسلامییەكان لەمزگەوت و ناوەندەكانی لەبەر كردنی قورئان و مەدرەسە شەرعیەكان و وتاری مامۆستایانی ئایینیە، كە هەلبژاردن دێت خیتابی سیاسی و كەناڵەكان دێن دەڵێن ئایا دەنگدان بەحیزبە عەلمانیەكان دروستە یان نا؟ ئەحكامی شەرعی لێرە دەدرێتە پاڵ ئیجتیهادی سیاسی ئینجا پاشگری ئیسلامی لادەی دەبی سیاسەت لەبانگخوازی بكەیتەوە (كە بەندە پێم وایە پسپۆڕی  جیاكردنەوەی هەر لەسەرەتاوە گرنكە، چونكە دوو پسپۆڕی جیاوازن)، لە مەغریب، میصر و تونس جیایان كردەوە، ئەگەر جیای نەكەیتەوە چ لەزانایان و بانگخوازان و ڕیش و هەڵوێستی ئیسلامی و كەیسە ئیسلامیەكانی تا ئێستا خاوەنداریت دەكرد چی لێدەكەی، ئەگەر خاوەنداری بكەی نابیە حیزبێكی سیاسی نیشتیمانی، كەواتە قەیدەكانی ناوی پاشگری ئسلامی هەر دەمێنێ، ئەگەر خاوەنداریەتی نەكەی خەڵكە ئیسلامیەكەی بینات كردووە لێت دور دەكەوێتەوە، دەنگی حیزبە ئیسلامیەكان هەمووی لەتەنزیمی حیزبی نیە، لەمەنهەج و دیدگاو كەیسە نیشتیمانی و پڕۆژە دورو درێژەكانی نیە، بەڵكو لەباڵ ئایەت و فەرموودەو مزگەوت و زانایان و كەیسە ئیسلامیەكەیە،مەلایەک خۆی هەڵدەبژێری لەگەڵ ئەندامێکی شارەزای حیزب مەلایەکە زۆر زیاتر دەنگ دەهێنی بەهۆکاری دینی، جیرانێكمان هەبوو پێشتر پێشمەرگەی كۆنی یەكێتی بوو، دواتر هاتووچۆی مزگەوتی دەكرد، گوتی مامۆستا لەكاتی دەنگدان چەند عائیلەیەكم نارد بۆ دەنگدان، 100 هەزارم دانێ،

گوتم ئەگەر هیچم نەبی بۆ قیامەت با ئەوەندە بكەم، چونكە ئیسلامین، كەواتە لادانی پاشگری ئیسلامی بۆ حیزبێكی ئیسلامی لەسەرەتاوە، ناوو پەروەردەی ئیسلامی بێت هێزی لەپاشگرەكەیە، لەئێستادا كەخەڵك لەگەڵی ڕاهاتووە، دوای ئەوەی عەلمانیەكان لە بواری دەوڵەتداری و ئیدارەو ئایدیۆلۆژیا شكستیان هێنا، خەڵك گەیشتۆتە قەناعەت تاكە دەستی ئەمین ئیسلامیەكانن، لادانی بەم شێوازە زەرەر لە ئیسلامیەكان دەدات، لەكاتی هەڵبژاردن ئەگەر نەگەڕێنەوە بۆ خیتابی ئیسلامی زۆر زەرەریان پێ‌ دەكەوێت، ئەگەر بگەڕێنەوەش كەواتە هەر لەبازنەكە دەخولێنەوەو نەیان توانی گرفتە سەرەكیەكەی پاشەكشەو لاوازی بدۆزنەوە، كە گرفتەكان لەناوەڕۆكن نەك لەناو.

د. ادریس كاریتانی

نوێترین نوسینەکانی د. ادریس كاریتانی