کۆمەڵکوژی کۆمەڵگای کوردی

وتار/ 20/11/2020 973 جار بینراوە

ڕه‌وه‌ند جەزا

کۆمەڵکوژی کۆمەڵگای کوردی

ڕەوەند جەزا
لەوە ئەچێت بۆمباربارانکردنی خەڵکی کوردستان، قەدەرێکی مارەبراوی ئەبەدی جیانەبووەوە بێت لەهاوڵاتیانی کوردستان. هەرجارەش بە شێوەیەک و بەجۆرێکی تایبەت بەڕێوەبچێت. خەڵکی کوردستان کەم بەدەستی ڕژیمە یەک لەدوای یەکەکانی عێراق و وڵاتانی کۆنەپەرستی ناوچەکەوە، بەتایبەتیش ڕژیمی بەعس بۆمباباران نەکراوە، ئاماری کوشتاری خەڵک بە بۆمباران و لەوانەش واوەتر بە چەکی قەدەغەکراوی نێودەوڵەتی وەکو بۆمبی هێشوویی، ناپاڵم، کیمیایی ….تاد. بەهەزارانن.
لەو کاتەشەوە دەسەڵاتی بەعس وەلانراوە، کوردستان دەستی پیسی ئەوانی بەسەرەوە نەماوە، دەسەڵات سپێردراوەتە ئەحزابی قەومی کورد، جگە لە قوربانیانی شەڕی ناوخۆ، جگە لەقوربانیانی تیرۆریزمی ئیسلامی، جگە لەقوربانیانی ناموسپەرستی و پیاوسالاری، قوربانیانی بۆمبارانکردن و ژەهراویکردنی کوردستان و خەڵکەکەی بە خۆراک و دەرمانی بەسەرچوو و کۆن، قەدەرێکی ترە. و دەستی ناوەتە بینەقاقای خەڵکی کوردستان.

ئێستا خۆراک و دەرمانی کۆن و ماوە بەسەرچوو لەپاڵ دەسەڵاتی تاڵانچی و مافیایی و ئۆپۆزیسێۆنێکی بودەڵەی قیرقیرکەردا، لەپاڵ میتی تورکی و بەرەی تورکمانیدا، لەکەنار دەستێوەردانی بەردەوامی ئاخوندەکانی ئێراندا، لەڕێگای قازانج پەرستان وسەرمایەدارانی کوردەوە بەسەر خەڵکی کوردستاندا دابەشدەکرین. ئەو خۆراک و دەرمانە کۆن و ماوە بەسەرچوانە کە بازاری کوردستان بۆتە باشترین بازار بۆساغکردنەوەیان، هاوکات بۆتە قەتلگایەکی هەمیشەیی شێنیەیی بۆ خەڵکی کوردستان، ئاماری نەخۆشیەکان و خەستەخانەکان گەواهی ئەو ڕاستیەن، کە ڕۆژ بەڕۆژ ڕادەی مردن بە نەخۆشی دڵ و شێرپەنجە زیاد دەکات.

هیچ لەوەش ڕۆشنتر نییە، ئەوەی کە دەتوانێت بازگەکانی ئەم وڵاتە بەسانایی ببڕێت ئەو کۆمپانیایانەن کە پەیوەندی ڕاستەوخۆیان بەدەسەڵات و سەرمایەداری سەر بەدەسەڵات و سەیارە جام ڕەشە ناونەبینراوەکانەوە هەیە، تەنانەت ئەو خۆراک و مواد ودەرمانانەش کەهەندیک جار ئەیسوتێنن و دەستی بەسەرائەگرن ومیدیای ئەم وڵاتە نیشانی خەڵکی ئەدەن، ئەوبەشەیە کە دیسان ئەم کۆمپانیایانە فرۆشتویانەتە چەند دوکاندارێک. ئەگەر نا هەرگیز ئاگر و زبڵخانەکان یەک کیلۆ مودای بەسەرچووی کۆمپانیا زەبەلاحەکانی بەرپرسان و سەرمایەدارانی سەر بە حزبیان نەبینیووە.

نە هاواری ئەندامپەرلەمانان و نە هاواری دایکی شەهید و نە بەرزبونەوەی ڕێژەی مردن ، بەم چەکە ساردەی دوو بنەماڵەی دەسەڵات دژ بە خەڵکی کوردستان بەکاردەهێن ، گرنگ نیە بۆ دەسەڵات . ئەوەی گرنگە بۆیان بوونی نزیکەی ۳٠ ملیاردلێر و سەدەها ملیۆنێرە لە کوردستان کە هەمویان بەرپرس و کادری سیاسی حیزبەکانیانن . کە ئەم ڕێژە سەرمایەدارە لەو هەرێمە بچوکەدا ڕێژەیەکی ئێجگار بەرزە ، کە سەرچاوەکەی لە بە قاچاخ بردنی مەوادی بەسەرچووە بۆ هەرێم ، وە ساغکردنەوەیەتی بە شێوەیەکی ئاسان و بەبێ هیچ بەربەستێک .

ئەوەی بەرپرسە لەو کوشتارگەیە دوو بنەماڵەی دەسەڵاتن ، کە بە هەمان ئەو ڕێگەیەدا دەڕۆن کە دیکتاتۆرە لە ناوچوەکان پیایدا ڕۆشتن .دواجار سەرئەنجامی ئەمانیش لەوان باشتر نابێت . بۆیە داوا لە هاونیشتیمانیان ئەکەم چی زووە هەڵوێستە و خۆپیشاندان دەسپێبکەن دژ بەو کۆمەڵکوژیە و ئەو دوو بنەماڵە مافیایە .