ئێمەش بێ تاوان نین

وتار/ 14/11/2020 650 جار بینراوە

ئاکام وەزیری

ئێمەش بێ تاوان نین

ئاکام وەزیری
بۆ لۆمەی بەغدا بکەین؟ ئێمە خۆشمان تاوانبارین ناکرێت هەموو تاوانەکان بخەینە ئەستۆی کازمی و کابینەکەی و هەندێک لەنوێنەرانی کوردیش لەبەغدا بەخۆفرۆش تاوانباربکەین.

لەم بابەتەم دا نامەوێت پشتگیری کابینەکەی کازمی بکەم بەڵام ناشمەوێت کوێرانە دوای هەستێکی نیشتمان پەروەری و ناسیۆنالیستی کوردایەتی بکەوم و بەهۆیەوە ڕاستگۆ نەبم و جیاوازی نێوان تاوانبار و بێتاوان نەکەم، بەڵکو ئەمەوێت بەبێ هیچ هەست و سۆزێک بۆچوونی خۆم لەسەر پرسی بڕینی ٣٢٠ملیارەکەی بەغدا دەربڕم، ئێوەش ئازادن چۆن لێکی دەدەنەوە.

گەر بەرپرسانی هەرێم بەدرێژایی ١٥ساڵی ڕابردوو شەفاف و ڕاستگۆ بوونایە ئەوا میللەتیش بەگشتی پشتگیریانی دەکردچ میللەتێک هەیە لەسەر گۆی زەوی حەزی لەدەوڵەتی خۆی نەبێ؟، چ کەسێک هەیە حەزنەکات وڵاتەکەی پێشکەوتووبێت؟، بەدرێژایی دەیە و نیوێک ئەو پارەیەی بەغدا بۆهەرێمی کوردستانی ناردووە لەلایەن بەرپرسانی حزبی و حکومییەوە دەستی بەسەرداگیرا و بەشێوەیەکی ناتەندرووست و نازانستی دابەشیان کرد و دەستیان پێوەی نەگرت و قاسایەکی گشتییان بۆمیللەت درووست نەکرد تاوەکو ببێتە فاکتەرێک بۆدرووست بوونی ژێرخانی دەوڵەتێکی تایبەت بەکوردەکان درووست بێت وەکو تەحەدایەک بۆدووژمنان و ئەو کەسانەی ئەیانەوێت شکست بەو هەوڵە بهێنن، بەڵام کەمتەرخەمی حکومەت و لایەنە سیاسی و حزبییەکان بەرامبەر بەرامبەر میللەت و گوێنەدان بەخواستی گەل و کارکردن لەسەر ئەجندای نەهێشتی هەستی نەتەوایەتی لەلای میللەت وای کردووە، کە تاکەکانی کۆمەڵگای کوردی بێ هەڵوێست پەرتەوازە بن لەئاستی کێشە و پرسە نیشتمانییەکان، لەکاتێکدا پرسی بڕینی ٣٢٠ملیارەکەی بەغدا پەیوەندی بەکۆی دانیشتوانی هەرێمەوە هەیە بەهۆی ئەوەی زیاتر لە پێنج یەکی دانیشتوانی هەرێمی کوردستان مووچە خۆرن و مووچەکەیان لەو ٣٢٠ملیارەی بەغدا دەدرێت، کەچی خەڵکێکی زۆر لەبری هەڵوێست دەربڕین بێ هەڵوێست بوون، تەنها بەشێکی نەبێ، کەبەهۆی نزیکی بیروباوەڕیان بەحزبی دەسەڵات و باڵا دەستی هەرێم(پارتی دیموکراتی کوردستان) و بەتەوجیهاتی حزبی کەوتنە هێرش کردنە سەر حکومەتەکەی کازمی و بەخشینەوەی تۆمەتی جاشییەتی بۆبەشێک لەپەڕلەمانتارە کوردەکان، لەکاتێکدا بەدانپێدانانی جێگری دووەمی سەرۆکی پەڕلەمانی عێراق لەماوەی ڕابردوودا هەموو پەڕلەمانتارەکان بەبێ جیاوازی و بەیەک دەنگی لەخەمی مووچەی خەڵک بوونە، ئەوەی مەبەستمە لێرەدا بیدرکێنم ئەوەیە، دەبوو بەرپرسانی هەرێم بەبێ جیاوازی ڕاستگۆ بوونایە لەگەڵ میللەت و خوێنی شەهیدان و یاریان بەچارەنووسی میللەتێک نەکردایە، کەزیاتر لە ٥ملیۆن کەسە، بەڵکو پێش ٣ساڵ بەرپرسیارییەتی شسکتی ڕیفراندۆمیان هەڵبگرتایە و لەو پرسە پاشگەزنەبوونایەتەوە، چونکە لەدوای ڕیفراندۆمەوە بەشکۆی کورد لەعێراق شکا بەتایبەت دوای ڕووداوەکانی شانزەی ئۆکتۆبەر،گەر خیانەت کرابێت یان نا، بەڵام دەبوو بەرپرسانی هەرێم وەکو بەرپرسانی کەتەلۆنیا ئامادەبوونایە لەپێناو خواستی گەل ئاوارەی وڵاتان بونایە وەکو قازی محمد لەسێدارە بدرابانایە، هەرچەندە ئەوەش ڕووینەدەدا، بەڵکو دەرکەوت بەرپرسانی کورد کارتی سەربەخۆییان وەکو فشار بۆزیادکردنی بەشی خۆیان و کۆمپانیاکانیان لەپارەی بەغدا بەکارهێنا، بەڵام دواجار بەسەر خۆیان شکایەوە، بۆیە شکۆی میللەتێک شکا و خواستی سەربەخۆی و وشەی ڕیفراندۆمیش لەلای گەل شکێندرا، هێشتا دۆخەکە خراپتر نەبووە، گەر هەموو سەرکردایەتی کورد بوێری بڕیاردانیان هەبێت و یەکجار بڕیار بدەن یان ئەوەتا سەریان کزبکەن و هەوڵبدەن کێشەی مووچە لەبەغدا چارەسەر بکەن و نەوتی هەرێم ڕادەستی کۆمپانیا سۆمۆ بکەن، یانیش بەتەواوی بکشێنەوە لەبەغدا و هیچ بەرپرسێکی کورد دوو مووچەکەی لەبەغدا وەرنەگرێت وەکو هەڵوێستێک تاوەکو مووچەی خەڵکی هەرێم دەنێردرێت، گەر ئەوەش بکرێت و بەرپرسان لەگەڵ میللەت ڕاستگۆ و شەفاف بن و پارەی قاسەکانیان بگەڕێننەوە بۆمیللەت و بڕیاری ڕاگەیاندنی دەوڵەتی کوردی بدەن، ئەوکاتیش میللەت دڵسۆزانە پشتگیریتان دەکات و دەتوانن مێژوویەکی جوان بنووسنەوە، دڵنیابن ئەوکاتیش میللەت لەبرسا نامرێت، چونکە میللەتی کورد لەگرانییەکەی دوای ڕاپەڕین و سەردەمی شەڕی ناوخۆ بەرگەی گرت، کەوەکو گەورەکانمان گێڕاویانەتەوە، بەمانگ نەدەتواندرا پیاڵەیەک چای بخۆیت، لەخوابەزیادبێت ئێستا حاڵی زۆرینەمان لەچاو ئەوکاتەوە باشترە، بەڵام ئێستا دوو کێشەمان هەیە، کە ئەو کات نەمان بوو یەکەمیان ئارامی و قەناعەت و دووەمیشیان متمانەی میللەت بەحکومەت، کەئەوکات نهێنی کۆتایی هێنان بەشەڕی خوێناوی ناوخۆ بوو.

نوێترین نوسینەکانی ئاکام وەزیری