یەکێتی دوای مام...لەدەستێکی نائەمیندا!

وتار/ 03/11/2020 810 جار بینراوە

كارزان شوشكه‌یی

یەکێتی دوای مام...لەدەستێکی نائەمیندا!

کارزان شوشکەیی
کەس گومانی لە خەبات و کارێزمایی سەرۆک مام جلال نیە بەدۆست ودوژمنەوە گەواهیدەری ئەو راستیەن....قسە و فۆکەسی ئێمە لەسەر سەردەمی دوای مامە، بەدیاریکراوی سەردەمی مۆدێلە تازەکەی یەکێتیە کە هاوسەرۆکییە و بەبڕوای من تا ئەم دەقەیە سەرکەوتنی بەدەست نەهێناوە و نەیتوانیوە ببێتە بەدیلێکی باش بۆ دوای ژیانئاوایی مام.
هاوسەرۆکان رۆڵیان هەبوە لە خولقاندنی هەندێک لە قەیران و کێشەکانی ئێستای هەرێم و فۆکەسیان زیاتر لەسەر پێگە و سەپاندنی دەسەڵات بوە لە دەرەوە بەگشتی و عێراق بەتایبەتی
بۆ ئەم مەبەستەش تاڕادەیەکی باش کوردستانیان بە نیمچە فەرمی رادەستی بارزانیەکان کردوە و خەمی گەورەیان پۆستی سەرۆک کۆماری بوو بەدەستیان هێنا و چونەوە ناو دۆخی سڕبوون و تیمەکەیان لە حکومەتیش تەنیا تەشریفاتیە و پڕکردنەوەی پۆستەکان بوە!.
یەکێتی لە سێ سەرۆکایەتیەکەی هەرێم تەنیا سەرۆکایەتی پەرلەمانی بەدەستە و لەویش بەدانانی کەسی ناگونجاو بۆ ئەو پلەیە زۆرێک لە چاودێرانی دۆخی سیاسی هەرێم بە سێبەری دەسەڵاتی پارتی ناوزەندی دەکەن و  ئەدا و کاری پەرلەمانیان تەواو ئیفلیج و بێ دەسەڵات کردوە و تاکە کێشەیان گۆرینی وشەکانە بوو بە نمونەی (بەروار بوو بە رێکەوت)!!

گەورەترین شکستی هاوسەرۆکان نەیان توانی کەسێک وەک پارێزگاری کەرکوکی قودس دیاری بکەن و فێڵیان  لێکرا لەلایەن پارتیەوە و بەوەی مەرجی سەرەکیان چونە ناو حکومەتەکەی پارتی دانانی پارێزگاری نوێ بوو، پارتی لەوەشدا گۆڵی خۆی کرد.
روداوی زینێ  وەرتێ نمونەیەکی تری شکستی هاوسەرۆکانە و نامەوێ لێرەدا بەوردی بچمە ناو بابەتەکەوە، دواین تاقیکردنەوەی هاوسەرۆکان دەسکاری موچەی و بژێوی خەڵک بوو خۆشبەختانە هاوسەرۆک ڕایگەیاند لێبڕینی موچە کەمن ناوم ناوە لێدزین بۆ یەک مانگە و قبوڵی ناکەین، لەسەر ئەو خەیاڵەش بوو ئومێدی خەڵک بە هاوسەرۆک و یەکێتی گەیشتە لوتکە بەوەی ئەو سەرکردایەتیە نوێیە لەگەل خەم و ئازارەکانی میللەت دایەو خوێنی زەرد و پاشکۆیی سەردەمی بەسەرچوو بەڵام دەکرێ بلێین بەداخەوە نەک قبوڵ کرا بەڵکو موچەی پێنچ مانگی تریان بەخڕی قوت دا و نقەیان لێوەنەهات!

یەکێتی داینەمۆ و چرای ئازادی و دەستگری میللەتە بوە لە بارودۆخە سەخت و قورسەکاندا و بگرە دروستبونی یەکێتی لەپێناو ئەو مەبەستەدا بوو، بەڵام دوای سەرۆک مام جلال وردە وردە کارێزمایی و تروسکەی ئومێدمان کز دەبێت و ئەوانیش توانای هەڵگرتنی بەرپرسیارەتیەکی وا گەورەیان نیە ومۆدێلی هاوسەرۆکیش بۆ ئێستای کوردستان بەرەو شکستێکی چاوەروانکراو دەچێت بەوەی ناوەندی بڕیار لەناو یەکێتیدا وونە.

نوێترین نوسینەکانی كارزان شوشكه‌یی