بۆچی حه‌شدی شه‌عبی مه‌ترسیداره ؟
وتار/
01/12/2016
609 جار بینراوە
شوان هه‌ورامی
بۆچی حه‌شدی شه‌عبی مه‌ترسیداره ؟
شوان هه‌ورامی
رۆژی شه‌ممه ( 26 تشرینی دووه‌می
2016 ) ئه‌نجوومه‌نی نوێنه‌رانی عێراق ، پڕۆژه یاسای حه‌شدی شه‌عبی په‌سه‌ند كرد
، به‌و شێوه‌یه‌ش ئه‌و هێزه میلیشیاییه فره باڵ و بۆچوون و تائفیه كرایه هاوته‌ریبی
سوپای عێراق و به‌رگێكی یاسایی له‌به‌ر كرا . ئه‌م سوپا نوێیه مه‌ترسییه‌كی زۆر
گه‌وره‌یه بۆ داهاتووی نزیك و دووری عێراق و ده‌بێته هۆكاری نائارامیی و مه‌ترسیی
هه‌میشه‌یی بۆ ئه‌وه‌ی عێراق نه‌بێته وڵاتێكی ئازاد و دیموكرات و سه‌قامگیر .
بۆ وه‌ڵامدانه‌وه‌ی ئه‌و پرسیاره‌ی
سه‌ره‌وه پێویسته ئاماژه به چه‌ند خاڵێكی گرنگ بده‌ین :
یه‌كه‌م – ئه‌م سوپایه كۆپی كت و متی
سوپای پاسدارانی ئێرانه ، هه‌مان رۆڵیش ده‌بینێت . دوای سه‌ركه‌وتنی شۆڕشی گه‌لانی
ئێران ، سه‌ركردایه‌تی شۆڕش له ئاستێكی به‌ربڵاودا سوپای وڵاته‌كه‌ی پاكسازیی كرد
، كه هه‌زاران ئه‌فسه‌ری باڵاو مام ناوه‌ند و پله نزمیشی گرته‌وه ، له كوشتن و
گرتن و دوورخستنه‌وه ، له هه‌مان كاتیشدا به فه‌رمانی ئایه‌توڵڵا خومه‌ینی - له
كۆمیته جیاوازه‌كانی شاره‌كانی وڵات ولاوه شۆڕشگێڕه‌كان - سوپای پاسدارانی شۆڕشی
ئیسلامیی راگه‌یه‌نرا ، ئه‌م سوپایه له‌سه‌ره‌تادا خاوه‌نی چه‌كه سوكه‌كان بوو ،
به‌ڵام به‌هۆی شه‌ڕی هه‌شت ساڵه له‌گه‌ڵ عێراق و گرنگیی پێدانیه‌وه له لایه‌ن سیستمی
نوێی وڵاته‌وه ، كه به پارێزه‌ری ده‌سكه‌وته‌كانی شۆڕش ناو ده‌برێت ، ئێستا ئه‌و
سوپایه خاوه‌نی سیستمی موشه‌كیی دوورمه‌ودای بالیستیی و هێزه‌كانی وشكانی و ده‌ریایی
و ئاسمانیی و دژه ئاسمانیی پێشكه‌وتووه و رۆڵی سوپای پێشووی نه‌هێشتووه‌و پیشه‌سازیی
پێشكه‌وتووی چه‌كسازیی و ئه‌تۆمیش له ژێر كۆنترۆڵیدایه ، ته‌نانه‌ت ســـــوپای
پاســـــداران ئێســـــتا كۆنترۆڵی ئابووریی وڵاتیشـــــی كردووه . ئه‌و ســــوپایه
ســــــوپایه‌كی ئایدیۆلۆژییه و خۆی به پارێزه‌ری وڵات ده‌زانێت و وڵاتیش به پێی
ده‌ســــــتوور " ئیسلامیه به مه‌زهه‌بی شیعه‌ی دوانزه ئیمامیی " ،
كه ئه‌مه ده‌ستی كراوه ده‌كات بۆ سه‌ركوتكردنی پێكهاته‌كانی تری وڵات .
كاتێ ده‌ڵێین حه‌شدی شه‌عبی كۆپی هه‌مان
سوپای پاسدارانه ، له‌به‌ر ئه‌م خاڵانه‌یه :
1.هه‌روه‌كو سوپای
پاسداران به بڕیاری ئایه‌توڵڵا عه‌لی ســیســتانی گه‌وره مه‌رجه‌عی عێراق و جیهانی
شــــیعه دامه‌زراوه ، واته دامه‌زراوه‌یه‌كی تائفیه .
2. یه‌كه‌یه‌كی
گرنگ له‌م هێزه له جه‌نگی ئێران و عێراقدا به‌شێك بوون له سوپای پاسداران ، كه
ئه‌و كاته پێیان ده‌وترا فه‌یله‌قی 9 ی به‌در . هه‌مان مه‌شــــق و چه‌ك و یارمه‌تی
سوپای پاسدارانیان هه‌بوو ، له زۆربه‌ی به‌ره‌كانی جه‌نگیشــدا چ له باكوور و چ له
باشووره‌وه به‌شدارییان ده‌كرد .
3. بیانووی راگه‌یاندنی
دژایه‌تی تیرۆره ، به‌ڵام كارنامه‌ی دوو ساڵی رابردووی ئه‌م هێزه ده‌ریخست كه هێزێكی
تائیفیی ترسناكه‌و ره‌فتاره‌كانی له تیرۆریستانیشی تێپه‌ڕاندووه ، له كوشتن و
شوێن بزركردنی هه‌زاران هاوڵاتی سوننه و ته‌قاندنه‌وه‌ی سه‌دان مزگه‌وت و شوێنی پیرۆز
و سوتاندنی شارو گوندی سێگۆشه‌ی سوننه .
4. سوپای عێراق كه
پێشتر له لایه‌ن پۆل بریمه‌ره‌وه هه‌ڵوه‌شێنرایه‌وه و سه‌ر له‌نوێ له‌سه‌ر بنه‌مای
پشكداریی درووستكرایه‌وه ، ده‌كرێ بوترێت " 90% " ی شیعه بوون ، چونكه
سوننه به‌شدارییان تێدا نه‌كرد و كوردیش ته‌نیا بۆ بودجه وه‌رگرتن چه‌ند یه‌كه‌یه‌كی
سه‌ربازییان له‌گه‌ڵ ئه‌و سوپایه‌دا گرێدا ، به‌ڵام دواجار ئه‌و سوپایه زۆرینه‌ی
ره‌های بۆ شیعه یه‌كلایی بووه‌وه ، به‌ڵام وه‌كو بینرا به‌هۆی گه‌نده‌ڵیی ئیدارییه‌وه
به‌رگه‌ی چه‌ند رۆژێكی جه‌نگی نه‌گرت ، كه ئه‌وه بۆ خۆی پرسیاری زۆر هه‌ڵده‌گرێت
، كه ئایا ئه‌وه سیناریۆ بووه بۆ ئه‌وه‌ی عێراق به‌م ئاقاره‌دا ببرێت یا له
راستیدا شكستێكی كه‌مه‌رشكێن بووه ؟ به‌ڵام ئێستا پێكهاته‌ی سوپای عێراق كه زۆرینه‌ی
هه‌مان پێكهاته‌ی شیعه‌یه ژماره‌ی 60 هه‌زار سه‌ربازه ، به‌ڵام حه‌شدی شه‌عبی كه
هه‌مووی شیعه‌یه نزیكه‌ی 140 هه‌زار چه‌كداره ، كه‌واته هه‌ر له ئێستاوه هه‌مان
ئه‌زموونی ئێران دووباره ده‌كه‌نه‌وه .
5. ئه‌م سوپایه‌ی
مه‌رجه‌عیه‌ت – كه دواجار به‌رگێكی یاساییان له‌به‌ر كرد – ئێستا له لایه‌ن راوێژكارانی
باڵای سوپای پاسدارانی ئێرانه‌وه ئاراسته ده‌كرێت ، كه ژه‌نڕاڵ قاسم سوله‌یمانی
له سه‌رووی هه‌موویانه‌وه‌یه‌و چه‌ندین جار وێنه‌ی له به‌ره‌كانی جه‌نگی عێراقدا
له‌گه‌ڵ فه‌رمانده‌كانی حه‌شدی شه‌عبیدا بڵاو بووه‌ته‌وه . جه‌نگی داعش بیانوویه‌كی
زۆر به‌هێز بوو بۆ ئه‌وه‌ی ئه‌م سوپایه به باشترین چه‌ك و سیستمه سه‌ربازییه‌كان
ئاشناو به‌هێز بكرێت و ورده ورده جێگه‌ی سوپای عێراق بگرێته‌وه .
6. ئه‌م سوپایه
پابه‌ند ناكرێت به ته‌مه‌ن و بڕوانامه‌ی زانســــــتیه‌وه ، واته له هه‌ر كاتێكدا
و له هه‌ر ئاستێكی ته‌مه‌ن و خوێنده‌واریدا خۆبه‌خشـــــان وه‌رده‌گرن ، ئه‌مه‌ش
گوێزانه‌وه‌ی هه‌مان ئه‌زموونی خۆبه‌خشان ( بسیج ) ی سوپای پاسدارانه كه هه‌زارانیان
له جه‌نگی هه‌شت ساڵه‌دا بوونه قوربانیی ، ئه‌مه‌ش بۆ ئه‌وه‌یه هه‌ر كاتێ مه‌رجه‌عیه‌ت
ویستیی ته‌مه‌ن و بڕوانامه‌ی زانستی نه‌بێته رێگر له‌به‌رده‌می وه‌رگرتنی هێزی نوێدا
.
7. ئه‌م سوپایه
فه‌رمانده‌ی خۆی و ته‌شكیلاتی سه‌ربازیی خۆی هه‌یه ، دواتریش هه‌روه‌كو سوپای
پاسداران هێزه‌كانی دابه‌شده‌كرێن به‌سه‌ر وشكانیی و ده‌ریایی و ئاسمانیی و موشه‌كیدا
، كه ئێستا وشكانیی و موشه‌كیی و تۆپخانه ودژه ئاسمانیی و زرێپۆشیان هه‌یه و هێشتا
زووه بگه‌نه قۆناغه‌كانی تر . واته هه‌رچه‌نده به پێی یاسا فه‌رمانده‌ی گشتیی
هێزه چه‌كداره‌كان فه‌رمانده‌یانه ، به‌ڵام ئه‌م هێزه هاوته‌ریبه له‌گه‌ڵ سوپای
فه‌رمیی عێراقدا و له داهاتوودا ده‌رده‌كه‌وێت كه سوپای عێراق ده‌بێته سوپایه‌كی
ره‌مزیی و ئه‌م سوپایه ده‌بێته سوپای فه‌رمیی و به كرده‌وه‌ی عێراق .
دووه‌م – راسته سوپای پاسداران له
قۆناغه هه‌ستیاره‌كاندا سیستمی راگه‌یه‌ندراوی وڵاتی پاراست ، به‌ڵام له هه‌مان
كاتیشدا ئایدیۆلۆژیانه له‌گه‌ڵ نه‌یاره‌كاندا مامه‌ڵه‌ی كرد ، هه‌میشه درووشمه
مه‌زهه‌بیه‌كان بنه‌ما بوون بۆ مامه‌ڵه‌یان له‌گه‌ڵ پێكهاته‌كانی تری وڵاتدا ، هه‌ر
له شه‌ڕی كوردستانه‌وه بۆ لێدانی موجاهدینی خه‌لق و لادانی یه‌كه‌مین سه‌رۆك كۆماری
وڵات ( ئه‌بولحه‌سه‌نی به‌نی سه‌در ) و تواندنه‌وه‌ی هه‌موو بیروڕا جیاوازه‌كان له
بۆته‌ی ته‌نیا بۆچوونی سیستمی باوی وڵاتدا . ئه‌م سوپایه‌ی حه‌شدی شه‌عبی به هه‌مان
شێوازه‌وه مه‌ترسییه‌كی گه‌وره‌یه بۆ سه‌ر یه‌كپارچه‌یی خاكی عێراق و گه‌ڕاندنه‌وه‌ی
دیكتاتۆریه‌ت ، به تایبه‌تی ئه‌گه‌ر له سێگۆشه‌ی سوننه رامێنین ده‌زانین مانای
سوپای ئایدیۆلۆژیی چیه ، ئه‌گه‌ر له كارنامه‌ی ئه‌و سوپایه رامێنین له شاری
خورماتوو ، به جوانیی بۆمان روون ده‌بێته‌وه كه چ مه‌ترسییه‌كی جدیی له دوای
شه‌ڕی داعشه‌وه چاوه‌ڕیی هه‌رێمی كوردستان ده‌كات . ئه‌م هێزه عێراق وێران ده‌كات
و له‌سه‌ر بنه‌مای درووشمه تائیفیه‌كان وڵات دابه‌شده‌كات به‌سه‌ر به‌ره‌ی لایه‌نگرو
نه‌یاردا ، به تایبه‌تی ئه‌گه‌ر سه‌رنج بده‌ین له ئاراسته مه‌زهه‌بیه‌كانیان له‌لایه‌ن
پیاوه ئاینیه‌كانیانه‌وه شه‌ڕكردن له شاره سونیه‌كاندا به تۆڵه‌سه‌ندنه‌وه‌ی
پێشه‌وا حوسه‌ینی كوڕی عه‌لی ناو ده‌به‌ن ، وه‌كو ئه‌وه‌ی قه‌یس خه‌زعه‌ل رایگه‌یاند
كه بۆ تۆڵه‌ی پێشه‌وا حوسه‌ین ده‌چن بۆ گرتنه‌وه‌ی موسڵ ، چونكه - به بۆچوونی
تائیفیانه‌ی ئه‌وان - ئه‌م سونیانه‌ی ئێستا نه‌وه‌ی ئه‌و سونیانه‌ن كه له كه‌ربه‌لادا
ئه‌و پێشه‌وایه‌و یارانیان شه‌هید كرد ، كورده‌كان له بۆچوونی ئه‌واندا له‌به‌ر
سوننه بوون و كورد بوونیان ده‌كه‌ونه به‌ر هه‌مان پۆلێن كردنی رێبه‌رانی حه‌شدی
شه‌عبیه‌وه . ئه‌وه‌ی سه‌یری لیستی ناوی یه‌كه سه‌ربازییه‌كانیان بكات هیچ گومانی
بۆ نامێنێته‌وه ، كه ئه‌م یه‌كه سه‌ربازییانه ( حیزبوڵڵای عێراق ، بزووتنه‌وه‌ی
نوجه‌با ، لیوای فاتمیه‌كان ، كه‌تیبه‌كانی خۆراسانی ، عه‌سائبی ئه‌هلی حه‌ق ، سریه‌كانی
زه‌هراء ، كه‌تیبه‌كانی ئه‌بولفه‌زلولعه‌باس ، لیوای زولفه‌قار ، فه‌یله‌قی به‌در
، سوپای مه‌هدی ...هتد) له‌سه‌ر بنه‌مای ئایدیۆلۆژیی ئاراسته ده‌كرێن و كوشتنی به‌رانبه‌ره‌كانیان
به نزیكبوونه‌وه له خودا ده‌زانن و پاداشتی ئه‌و كاره‌یان به‌هه‌شته .
سێیه‌م – ئه‌م هێزه میلیشیاییه كه
له چه‌ندین گرووپ و لایه‌نی سیاسیی و مه‌زهه‌بی شیعه درووستكراون ، جگه له‌ناوخۆی
عێراقدا ، ده‌ستیان هه‌یه له كاری تیرۆریستیی ده‌ره‌وه‌ی عێراقیشدا ، وه‌كو ئه‌وه‌ی
هه‌ر ئێستا چه‌ندین گرووپیان بۆ سه‌ركوتكردنی شۆڕشی گه‌لانی سوریا چوونه‌ته ناو
ئه‌و وڵاته‌وه‌و ده‌ستیان سووره به خوێنی هه‌زاران سڤیل و ئاواره كردنی گه‌لانی
ئه‌و وڵاته و وێرانكردنی شارو گونده‌كان ، به بیانووی شه‌ڕی دژه تیرۆر و
پاراستنی مه‌زاره شیعیه‌كان . سه‌ركرده‌كانی ئه‌م هێزه زۆر به سانایی شــــانازیی
به كاره تیرۆریستیه‌كانیانه‌وه ده‌كه‌ن ، ته‌نانه‌ت كه‌ناڵه سه‌ته‌لایته‌كانیان
به شانازییه‌وه باس له‌و ترس و تۆقاندنانه ده‌كه‌ن كه كه‌سانی وه‌كو ئه‌بو عیزرائیل
ئه‌نجامی ده‌ده‌ن . بو نمونه ویلایه‌ته یه‌كگرتووه‌كانی ئه‌مه‌ریكا و هه‌ندێ وڵاتی
خۆرئاوایی و ناوچه‌كه‌ش جێگری فه‌رمانده‌ی حه‌شــــدی شـه‌عبی ( ئه‌بو مه‌هدی موهه‌ندیس
)یان خستۆته سه‌ر لیستی تیرۆریان ، چونكه ناوبراو به‌هۆی كاری تیرۆریستیه‌وه له
وڵاتی كوه‌یت فه‌رمانی له‌سێداره‌دانی بۆ ده‌رچووه ، ئایا هێزێكی له‌و شێوه‌یه
ده‌توانێت متمانه‌ی دراوسێیه‌تی چاك له نێوان عێراق و ناوچه‌كه‌و جیهان بچه‌سپێنێ
و رایه‌ڵه دیبلۆماســــــیه‌كان راگیر بكات ؟!
چواره‌م – به گشتیی له‌گه‌ڵ په‌لهاویشتنی
ئێراندا بۆ كۆنترۆڵ كردنی خۆرهه‌ڵاتی ناوه‌ڕاست ، هه‌وڵی جدیی ده‌دات كه كۆپی سیاسه‌ت
و كارگێڕیی و سیاسه‌تی سه‌ربازیی و ئایدیۆلۆژیی خۆی له ناوچه‌كه‌دا بسه‌پێنێت ، بۆ
ئه‌مه‌ش سیاسه‌تی دووفاقیی په‌یڕه‌و ده‌كات ، ناڕه‌زایی به‌حره‌ینیه شیعه‌كان به‌رانبه‌ر
دیكتاتۆریه‌تی ئالی خه‌لیفه به داخوازیی ره‌وا ده‌زانێت ، به‌ڵام شۆڕشی گه‌لانی
سوریا كه تا ئێستا 600 هه‌زار شه‌هید و 10 ملیۆن ئاواره‌یان هه‌یه به تیرۆریستیی
له قه‌ڵه‌م ده‌دات و به‌شداره له سه‌ركوت كردنیاندا ، كوده‌تای حوسیه‌كان به
خه‌باتی ره‌وا ناو ده‌بات ، به‌ڵام كوده‌تای سیسی به‌ڕه‌وا ده‌زانێت و په‌یوه‌ندیی
به‌هێزی له‌گه‌ڵدا ده‌به‌ستێت . به‌ڵام كاتێ سه‌یری كارنامه‌ی سه‌ربازیی لایه‌نگرانی
تاران ده‌كه‌ین ده‌بینین ، له لوبنان ساڵانێكه به بیانووی رووبه‌ڕووبوونه‌وه‌ی
ئیسرائیله‌وه حیزبوڵڵا سوپایه‌كی به‌هێزی درووستكردووه ، كه هه‌ژموونێكی گه‌وره‌ی
به‌سه‌ر سیاسه‌تی وڵاتدا سه‌پاندووه ، به‌ڵام ئێستا مه‌ترسیی ئه‌و سوپا هاوته‌ریبه
ده‌ركه‌وتووه ، كه‌به‌بێ پرسی حكومه‌تی ئه‌و وڵاته هێزه‌كانی له سوریادا به‌شدارن
له سه‌ركوتكردن و كوشتاری خه‌ڵكی ئه‌و وڵاته‌دا ، به هه‌مان شێوه ئێستا حه‌شدی
شه‌عبی به هه‌مان بیانوو بووه‌ته مه‌ترسیی بۆ سه‌ر عێراقیه‌كان و به فه‌رمانی
تارانیش ده‌نێردرێنه كوشتاری خه‌ڵكی سوریا بۆ جێبه‌جێ كردنی ستراتیژه‌كه‌ی ئێران
، به هه‌مان شێوه‌ش هێزه‌كانی ئه‌نساروڵڵای حوسیی هه‌مان ئه‌زموونی سوپای
پاسداران له یه‌مه‌ن كۆپیی ده‌كه‌نه‌وه . بۆیه مه‌ترسیه‌كه جدییه‌و ئه‌جێندای
حه‌شدی شه‌عبی ئه‌جێندایه‌كی تائیفیی و ئایدیۆلۆژییه و كه‌س نازانێت داهاتووی وڵات
به‌ره‌و كوێ ده‌به‌ن .
پێنجه‌م – ئه‌مه‌ریكاو هاوپه‌یمانه‌كانی
رژێمی "سه‌دام حوسه‌ین"یان به‌و بیانووه‌وه رووخاند كه وڵات له دیكتاتۆریه‌ت
رزگار بكه‌ن و سیستمێكی دیموكراسیی دامه‌زرێنن كه رێزو كه‌رامه‌ت بگه‌ڕێنێته‌وه
بۆ هاوڵاتیانی عێراق به گشت پێكهاته‌كانیه‌وه ، حكومه‌تێكی فیدراڵیی دامه‌زرێنن
كه ده‌ستووریی و دامه‌زراوه‌یی بێت و عێراق ببێته سیمایه‌كی نوێی حكومه‌تی مه‌ده‌نیی
و شارستانیی ، به‌ڵام ئایا له په‌نای هێزێكی میلیشیایی و ئایدیۆلۆژیی و ده‌سكه‌لای
ده‌ستی هێزێكی بێگانه‌دا هیچ مانایه‌ك بۆ ده‌ستوور و دامه‌زراوه‌و مه‌ده‌نیه‌ت و دیموكراسیی
و مافی مرۆڤ ده‌مێنێته‌وه ؟!
به‌ڕاستی ئه‌وه‌ی بۆ گه‌لی كوردستان
و هه‌رێمه‌كه‌ی جێگه‌ی مه‌ترسییه ، ئه‌وه‌یه ئه‌م هێزه له كاتێكدا به‌بێ پێشمه‌رگه
ته‌نانه‌ت نه‌یانتوانیووه له باشووری كه‌ركوك گوندێكیش رزگار بكه‌ن ، كه‌چی له هه‌ر
شوێنێ به هاوكاری پێشمه‌رگه‌ش ناوچه‌یه‌كیان ده‌ست كه‌وتبێت – هه‌ر وه‌كو ناوچه
سونیه‌كان – مزگه‌وت و ماڵی كورده‌كانیان وه‌كو سوننه‌ی عه‌ره‌ب سوتاندووه ، بۆ
نمونه له سه‌عدیه به یارمه‌تی پێشمه‌رگه ئه‌و شاره‌یان له داعش وه‌رگرته‌وه
، به‌ڵام له یه‌كه‌م هه‌فته‌دا 27 مزگه‌وتی سوننه‌ی شاره‌كه‌یان ته‌قانده‌وه ،
كه یه‌كێكیان مزگه‌وتی گه‌وره‌ی مه‌حموود پاشای جاف بوو ، كه له ساڵی 1893وه
له لایه‌ن ئه‌و پاشا كورده‌وه درووستكرابوو ، كه ته‌نیا هێمای كوردایه‌تی شاره‌كه
بوو ، كه مه‌خابن سه‌كردایه‌تی كورد هیچ هه‌ڵوێستێكیان نه‌بوو به‌رانبه‌ر ئه‌و
تاوانه گه‌وره‌یه ، كه به‌داخه‌وه له‌وانه‌یه هۆكاره‌كه‌ش ئه‌وه بێت عه‌لمانیه‌تی
كورد به‌لایه‌وه ئاساییه مزگه‌وت وێران بكرێت ، باوه‌كو هێمای كوردایه‌تی و نیشتمانیشی
پێوه گرێ درابێت . یا ئه‌و تاوانانه‌ی كه له ناوچه‌ی گه‌رمه‌سێر به گشتیی و
شاری خورماتوو له لایه‌ن ئه‌م هێزه دڕنده‌یه‌وه ئه‌نجام دراوه‌و ده‌درێت ، هیچ
گومانێكی بۆ مرۆڤی ژیر نه‌هێشتووه‌ته‌وه كه له دوای شه‌ڕی داعش حه‌شدی شه‌عبی چ
مه‌ترسیه‌كن بۆ سه‌ر هه‌رێمی كوردستان به گشتیی و پارێزگای كه‌ركوك به تایبه‌تیی
. ئه‌وه قسه‌ی من نیه به ته‌نیا ، ماوه‌یه‌ك له‌مه‌وبه‌ر مه‌حموود سه‌نگاوی به‌ڕاشكاوی
گوتی فه‌رمانده‌یه‌كی حه‌شدی شه‌عبی ئه‌و هه‌ڕه‌شه‌یه‌ی لێكردوون كه له دوای
داعش جه‌نگی یه‌كلاكه‌ره‌وه‌یان له‌گه‌ڵ پێشمه‌رگه‌و كوردایه ، ته‌نانه‌ت پاسه‌وانه‌كانی
سه‌رۆك كۆماری عێراقیش له‌م هێزه پارێزراو نه‌بوون و چه‌ندانیان گیران و شوێن بزر
كران . ده‌بێ بزانین ئه‌گه‌ر داعش بێكه‌سه‌و پشتیوانی ناوچه‌یی و جیهانیی نیه ،
له عێراق هێزی ئاسمانی ئه‌مه‌ریكا به قازانجی حه‌شدی شه‌عبی بۆمباران ده‌كات و
له سوریاش هێزی ئاسمانی رووسیا هه‌مان كاریان بۆ ده‌كات و ئێرانیش سه‌نته‌ری
پلاندانه‌ری ستراتیژه‌كه‌یانه ، كه‌واته ئه‌وانه‌ی له هێنانه‌وه‌ی شیعه بۆ گه‌رمه‌سێر
و رێگه‌دان به كردنه‌وه‌ی فه‌وجه‌كانی حه‌شدی شه‌عبی له‌ناو كورده‌كاندا هاوكار
بوون ، به تایبه‌تی تریش ئه‌وكوردانه‌ی له ئه‌نجوومه‌نی نوێنه‌رانی عێراق ده‌نگیان
به‌و پڕۆژه یاسایه داوه‌و بیریان له به‌رژه‌وه‌ندیی كوردو كوردستان نه‌كردۆته‌وه
، ده‌بێ بزانن داری ژێر خۆیان بڕییوه‌ته‌وه‌و له‌داهاتوودا ئه‌نجامه خراپه‌كانی
به چاوی خۆیان ده‌بینن ، ئێستا هاواریان لێده‌كه‌ین تكایه ئه‌و كاته به موزایه‌ده
بێتامه‌كانتان زاراوه‌كانی كوردایه‌تیمان پێ مه‌فرۆشنه‌وه !!
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018