جینۆسایدی حه‌ڵه‌ب به سپۆنسه‌ری كۆمه‌ڵی نێوده‌وڵه‌تیی !!
وتار/
29/11/2016
735 جار بینراوە
شوان هه‌ورامی
جینۆسایدی
حه‌ڵه‌ب به سپۆنسه‌ری كۆمه‌ڵی نێوده‌وڵه‌تیی !!
شوان
هه‌ورامی
شۆڕشی
سوریا به ئاشتیخوازانه ده‌ستیپێكرد ، نۆ مانگ به‌و شێوه‌یه به‌رده‌وام بوو ، به‌ڵام
رۆژانه ده‌نگی ئاشتیخوازانه‌ی خه‌ڵك خه‌ڵتانی خوێن ده‌كرا ، بۆیه بۆ به‌رده‌وامبوونی
شۆڕش سوپای ئازاد له‌و وڵاته‌دا درووستكرا ، كه به هه‌زاران ئه‌فسه‌ر و سه‌ربازی
سوپا په‌یوه‌ندییان به‌و شۆڕشه‌وه كرد ، به‌ڵام هه‌ر له سه‌ره‌تاوه ده‌ركه‌وت لێدوانه‌كه‌ی
رامی مه‌خلوف ( خاڵی به‌شار ئه‌سه‌د ) ی سه‌رمایه‌داری گه‌وره‌ی سوریا كه رایگه‌یاند
: رووخاندنی حكومه‌تی به‌شار ئه‌سه‌د یه‌كسانه به كه‌وتنه مه‌ترسیی ئاسایشی ئیسرائیل
، بۆیه له‌سه‌داسه‌د یه‌كیگرته‌وه له‌گه‌ڵ ستراتیژی لۆبی جوله‌كه له وڵاتانی خۆرئاواییدا
، له‌و پێگه‌یه‌وه ویلایه‌ته یه‌كگرتووه‌كان و هاوپه‌یمانه خۆرئاواییه‌كانی به
هه‌موو شێوه‌یه‌ك هه‌وڵیاندا هاوسه‌نگیی له جه‌نگی سوریادا رابگرن ، بۆ ئه‌وه‌ی
نه شۆڕش سه‌ربكه‌وێت و نه رژێمیش بڕ‌ووخێت . هه‌ر بۆیه نه ئاماده بوون ناوچه‌ی
دژه فڕین به‌سه‌ر هێزی ئاسمانیی رژێمدا بسه‌پێنن – وه‌كو ئه‌وه‌ی به چه‌ند سه‌عاتێك
دژی قه‌زافیی جێبه‌جێیان كرد - و نه رێگه‌شیاندا چه‌كی دژه ئاسمانیی بگاته شۆڕشگێڕان
، به گه‌رمتر كردنه‌وه‌ی كووره‌ی جه‌نگی سوریا ئه‌و وڵاته‌یان كرده لانكه‌ی نوێی
رێكخراوی قاعیده و له‌دایكبوونی رێكخراوی تیرۆریستیی داعش ، كه ئه‌مانه كرانه
بیانووی نوێی خۆرئاواو لایه‌نگرانی به‌شار ئه‌سه‌د بۆ ئه‌وه‌ی چاوی خۆیان له جینۆسایدی
600 هه‌زار و ئاواره بوونی 10 ملیۆن سوریایی دابخه‌ن و به چه‌واشه‌كاریی میدیایی
، رووگه‌ی شه‌ڕه‌كه له شۆڕش بۆ لادانی به‌شاری خوێنڕێژه‌وه بگۆڕن بۆ شه‌ڕی داعش
و قاعیده ، ئه‌مه‌ش فێڵێكی ئه‌مه‌ریكاو خۆرئاوا بوو بۆ ئه‌وه‌ی شۆڕشی گه‌لانی سوریا
به‌و بیانووه‌وه سه‌ركوت بكرێت . هه‌ر بۆیه‌ش ئێستا به روونیی ده‌رده‌كه‌وێت ، ئۆبامای
وه‌رگری خه‌ڵاتی ئاشتی نۆبڵ به‌و ستراتیژه - به قازانجی پۆتین - پاشه‌كشه‌ی
كردووه له ناوچه‌كه‌دا ، هه‌ر ئه‌و بێده‌نگیه‌ی ئه‌وانیشه كه جورئه‌تی داوه‌ته
رووسه‌كان به ته‌نسیق له‌گه‌ڵ ئێران و ئیسرائیلدا بۆ هێشتنه‌وه‌ی به‌شار ئه‌سه‌د
ده‌یان گرۆزنیی له سوریادا دووباره بكه‌نه‌وه !!
ئه‌وه‌ی
ئێستا له شاری " حه‌له‌ب "دا روو ده‌دات ، له دووباره كردنه‌وه‌ی جینۆسایدی
گرۆزنیی و له بێده‌نگیی كۆمه‌ڵی نێوده‌وڵه‌تیی ، خاڵێكی ره‌شه به‌نێوچاوانی ئه‌وانه‌ی
باسی مافی مرۆڤ و كه‌رامه‌تی مرۆیی ده‌كه‌ن ، هه‌رچه‌نده وه‌زیری ده‌ره‌وه‌ی فه‌ره‌نسا
داوای كۆبوونه‌وه‌ی خێرای ئه‌نجوومه‌نی ئاسایش ده‌كات ، به‌ڵام ئه‌نجوومه‌نی ئاسایش
چیی ده‌كات ؟ تا ئێستا ئه‌و ئه‌نجوومه 5 بڕیاری ده‌ركردووه بۆ هه‌ڵگرتنی گه‌مارۆی
سه‌ر ناوچه گه‌مارۆدراوه‌كان و گه‌یاندنی خواردن و ده‌رمان به‌و ناوچانه ، به‌ڵام
هیچیان جێبه‌جێ نه‌كراون ، ده‌بێ ئه‌نجوومه‌نی ئاسایش جگه له ئیدانه‌و نیگه‌رانیی
ده‌بڕین و ناڕه‌زایی چیی تر به‌و شاره پێشكه‌ش بكات ؟ ئه‌و شاره‌ی له ماوه‌ی دوو
رۆژدا دوو هه‌زار هێرشی ئاسمانیی و 7000 هێرشی مووشه‌كیی و هه‌زاران بۆمبی تۆپخانه‌و
هاوه‌نی به‌سه‌ردا رژێنراوه ؟
كاتێ
هه‌ندێ ده‌نگی شه‌رمنانه‌ی خۆرئاوا ، داوای راگرتنی شه‌ڕی سه‌ر خه‌ڵكه سڤیله‌كه‌ی
ناو حه‌ڵه‌ب ده‌كه‌ن ، له وه‌ڵامدا وه‌زیری جه‌نگی رووسیا رایده‌گه‌یه‌نێت : خۆرئاوا
گوێ ناداته ئه‌و گۆڕانكارییه ریشه‌ییانه‌ی كه له حه‌ڵه‌بدا روویداوه ، واته
رووسیاو سوریای ئه‌سه‌د گوێ ناده‌نه ئه‌و داواكاریانه ، به تایبه‌تی ئیداره‌ی ئۆباما
ده‌مێكه بێده‌نگه له‌وه‌ی پۆتین ده‌یكات ، "دۆناڵد ترامپ"یش ده‌یه‌وێت
زۆر زیاتر له ئۆباما له پۆتین بچێته پێشه‌وه ، زۆربه‌ی ئه‌وانه‌ی كه دیبلۆماتی
راسپێردراون به دۆسیه‌ی رووسیا له لایه‌ن ئیداره‌ی نوێی ئه‌مه‌ریكاوه ، سه‌رسامن
به پۆتین و ده‌یانه‌وێت په‌یوه‌ندییه‌كانی مۆسكۆ و واشنتۆن ئاسایی بكه‌نه‌وه ،
به‌ڵام ئه‌وه‌ی جێگه‌ی سه‌رنجه ئه‌وه‌یه ترامپ ده‌یه‌وێت هه‌مان سیاسه‌تیش له‌گه‌ڵ
ئه‌ردۆغان بگرێته‌به‌ر ، كه دیار نیه چۆن توركیا له دۆسیه‌ی سوریادا رازیی ده‌كات
، كه ململانێی نێوان ئه‌نكه‌ره‌و واشنتۆنی گه‌یاندۆته خاڵێكی قه‌یراناویی ؟ چۆن
ئه‌ردۆغان رازیی ده‌كات له‌كاتێكدا ستراتیژی ئه‌مه‌ریكا درێژكردنه‌وه‌ی شه‌ڕی شیعه‌و
سوننه‌یه ، بۆ ئه‌وه‌ش هاوسه‌نگیی بۆ ئه‌و شه‌ڕه درووست بكات له سوننه‌ی زۆرینه
ده‌دات و هه‌موو گرووپه شیعه‌كانیش – كه له داعش دڕنده‌ترن – ده‌بنه هاوپه‌یمانی
، چۆن توركیای هاوپه‌یمانی رازیی ده‌كات له ناتۆدا له كاتێكدا به كرده‌وه بۆیه
پاشه‌كشه ده‌كات له ناوچه‌كه‌دا به قازانجی رووسیا ، بۆ ئه‌وه‌ی رێگه نه‌داته
توركیا سه‌روه‌رییه مێژووییه‌كانی زیندوو بكاته‌وه ، ئایا ترامپ ئه‌م هاوكێشه
ئاڵۆزه‌ی له‌گه‌ڵ توركیادا چاره‌سه‌ر ده‌كات ؟!
ئه‌وه‌ی
له ساڵی 2011وه تا ئه‌مڕۆ له خۆرئاوای كوردستاندا روو ده‌دات ، بۆ مێژوو خاڵێكی
ره‌شه كه هێزێكی كوردیی به‌ناوی بێلایه‌نیه‌وه له نێوان جه‌للاد و قوربانیدا
له شۆڕشی سوریادا هاوپه‌یمانێتیی جه‌للاد هه‌ڵبژێرێت ، به‌ناوی شۆڕشگێڕیی و ئازادیخوازیی
و دیموكراسیه‌وه به كرده‌وه ببێته به‌شێك له‌و هێزه‌ی رژێمی به‌شار ئه‌سه‌د و
حیزبوڵڵای لوبنان و گرووپه میلیشیاییه‌كانی شیعه بۆ هێرشكردنه سه‌ر حه‌ڵه‌ب و شۆڕشگێڕانی
و خه‌ڵكه سڤیله‌كه‌ی ، هه‌روه‌ها به بیانووی شه‌ڕی داعش و پاراستنی ئاسایش سه‌دان
كادیری پارته كوردییه‌كانی پارتی دیموكراتی كوردستانی سوریا و یه‌كێتی و حیزبه‌كانی
تر و نه‌یارانی به‌شار ئه‌سه‌د بخاته زیندانه‌وه‌و " ساڵح موسلم "یش بڵێت
: هیچ زیندانیه‌كی سیاسییمان نیه ، هه‌ر ئێستاش بۆ زیندووكردنه‌وه‌ی خووه ناشیرینه‌كه‌ی
كورد – واته له پێناوی ئامانجی حیزبیدا گوێ به‌هیچ ئابڕووچوونێك نه‌درێت له ده‌ست
تێكه‌ڵ كردن له‌گه‌ڵ دووژمنانی سه‌رسه‌ختی كورددا – هیچ گومانێكیان نه‌هێشته‌وه
ئه‌وان تێكه‌ڵی ستراتیژی تائیفیی شیعه‌و عه‌له‌وییه سیاسییه‌كانن . په‌یه‌ده ده‌یه‌وێت
به هاوكاریی رژێم و میلیشیا شیعه‌كانی هاوپه‌یمانی هێرش بۆ سه‌ر باكووری حه‌ڵه‌ب
په‌ره پێبدات ، كه ئه‌وه‌ش گره‌وێكی تریه‌تی له‌سه‌ر ئه‌وه‌ی شه‌ڕی راسته‌وخۆی
رژێمی سوریا و توركیا هه‌ڵگیرسێنێت ، به‌و مه‌به‌سته‌ی زیاتر تۆڵه له توركیا
بكاته‌وه ، كه له هه‌فته‌ی داهاتوودا بۆیان ده‌رده‌كه‌وێت تا چه‌نده خوێندنه‌وه‌كه‌یان
درووسته ، چونكه به‌ڵێنیان دابووه ناتۆ بگه‌ڕێنه‌وه خۆرهه‌ڵاتی فورات و ئێستا
ده‌بنه‌وه به هاوسه‌نگه‌ری رژێم له هه‌مان شوێن ، گره‌وه له‌سه‌ر ئه‌وه ده‌كه‌ن
هێزه ناوچه‌یی و جیهانیه‌كان به خوێندنه‌وه‌و پلانی ئه‌وان له یه‌كتر ده‌ده‌ن ،
به تایبه‌تی بیانووه‌كه‌ش جه‌نگی داعشه ؟
قه‌ده‌ری
زۆرێك له شۆڕشگێڕانی جیهان وابووه ، كه هه‌ندێ جار تووشی پاشه‌كشه بوون به‌رانبه‌ر
سته‌مكاران و داگیركه‌ران ، گه‌لی كورد له هه‌ر گه‌لێكی سته‌م لێكراو زیاتر له‌و
هاوكێشه‌یه تێده‌گات ، هه‌روه‌ها به داگیركردنه‌وه‌ی حه‌ڵه‌ب و ناوچه‌كانی ژێر
ده‌سه‌ڵاتی شۆڕشگێڕان له‌م قۆناغه‌دا ، مانای ئه‌وه نیه كه ئه‌و گه‌له‌ی 600 هه‌زار
قوربانیی پێشكه‌ش كردبێت و ئه‌و هه‌موو بۆمباو چه‌كه قه‌ده‌غه‌كراوانه‌ی كیمیاویی
له دژی به‌كار هاتبێت به سانایی له‌به‌رانبه‌ری سته‌مكاران و هاوپه‌یمانه‌كانیانه‌وه
چۆك دابدات ، بۆیه شۆڕشی سوریا زۆر نه‌فه‌س درێژتره له‌وه‌ی رووسیا و هاوپه‌یمانه‌كانی
تێیده‌گه‌ن ، به تایبه‌تی شۆڕش له سوریا دووڕیانی مان و نه‌مانی خه‌ڵكی ئه‌و وڵاته‌یه
، كه له‌ناوبردنی گه‌لێك بۆ سته‌مكاران و داگیركه‌ران هه‌رگیز روو نادات و گه‌لی
ئه‌و وڵاته‌ش به‌بێ سه‌ركه‌وتنی شۆڕشه‌كه‌یان خۆیان به زیندوو نازانن ، بۆیه ئه‌سته‌مه
ئاگرو ئاسن بتوانێت ده‌نگی ئه‌و گه‌له كپ بكاته‌وه .
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018