کۆڕۆنا و مرۆڤ جەمسەری

وتار/ 28/03/2020 781 جار بینراوە

به‌ختیار عه‌بدوڵڵا

کۆڕۆنا و مرۆڤ جەمسەری

به‌ختیار عه‌بدوڵڵا
هەموومان جۆرێک لە ڕوانین و تێگەیشتنمان بۆ دروستکراوە، کە جیهانی نوێ و دنیای سەرمایەداری بەجۆرێک پێشکەوتووە کە هیچ لایەن و سیمای ژیانێکی سەردەمیانە نەماوە دەستی پێنەگەیشتبێت، پێمانوابوو خۆرئاواییەکان گەیشتوونەتە لوتکەی باڵاو دەیانەوێت ژیانێکی نمونەیی بۆ گرۆی بەشەریەت بکەنە دیاری.
جێگای لەسەر وەستانە ئەو وڵاتانە لە چ ڕوویەکەوە پێگەیشتوون و پێشکەوتوون، ئایا تەنیا دنیاو ژیانی شیاو بەمرۆڤی خاوەن شکۆیان بۆخۆیان و گەلەکانیان دەوێت یان ئەوەی هەر لە دێر زەمانەوە کاریان بۆ کردووە  قۆرخکردنی زەوی و  تەواوی پێکهاتە سەرەکیەکانی هێزو زاڵبوون بەسەر وڵاتان و بێ شکۆ کردنی مرۆڤ و تاڵانکردنی سەروەت و سامانیانە، دەزانن بۆچی ئەوروپی و خۆرئاواییەکان زۆرترین دراوی قورس و کانزای زێڕو زیو و بەنرخ لە کۆگاکانیاندا مۆڵدراوە؟ چونکە هەرچی دەرفەتیان هەبوو بەناوی دۆزینەوەی جوگرافی و ئیستیعمار هاتن و وڵاتانی ئێمەیان وەکو کێکی لە دایک بوون بەشکردو هەرچی تێیدا بوو بردیان و تاڵانیان کرد،  بەناوی سەربەخۆیی وڵاتانیش دوا بەدوای ڕووخاندنی دەوڵەتی عوسمانی؛ وڵاتانیان لە ڕێگای کۆمپانیا زەبەلاحەکانیانەوە کۆت و بەند کردو کردیانن بە پاشکۆو بەکرێگیراوی خۆیان و پیاوی خۆیان لەسەر کردن بە دیکتاتۆرو چەوسێنەری گەلانیان.
ڤایرۆسی کۆڕۆنا هۆکاری هەڵماڵینی ڕووی ڕاستەقینەو دڵڕەقی و بێ ویژدانی خۆرئاوای بۆ دەرخستین کە جگە لەهەوڵدان بۆ قۆرخکردنی دنیا لەڕێی کۆمپانیا چاوچنۆکەکانیانەوە هیچ مەرام و مەبەستێکی دیکەیان نییە، ئەوەندەش وردو بەهێز نین کە بتوانن ڕووبەڕووی ڤایرۆسێکی درم بوەستنەوە بەڵکو شەکەتی کردوون و بۆتە مەترسی و هەڕەشەیەکی جدی سەر پێشکەوتنیان.
ئەم دۆخە دەرفەتێکە بۆ تاکی خۆرهەڵاتی کە بەخۆیدا بچێتەوە لە حکومەت و دەسەڵاتە دڵڕەقەکانی داوای ماف و ئازادی و کۆتایی هێنان بە پاشکۆیەتی خۆرئاواو گەڕانەوە بۆ دەسەڵاتێکی مەدەنی و بنیاتنراو بۆ بەرژەوەندی هاوڵاتیان و مرۆڤ جەمسەری بکاتەوە.

نوێترین نوسینەکانی به‌ختیار عه‌بدوڵڵا