(دابڕان) لە نێوان (وێنای ڕەوتێكی ڕۆشنگەر و شوێنگەی داعشی چەپگەرا)/4

وتار/ 07/03/2019 710 جار بینراوە

سامان ره‌باتی

(دابڕان) لە نێوان (وێنای ڕەوتێكی ڕۆشنگەر و شوێنگەی داعشی چەپگەرا)/4
سامان ره‌باتی
گۆشەی دووەم /
شیكاری چوارەم / لە پەڕەی پاناڵستێكی كۆنە ئیسلامیەوە لە ژێر ناوی ( ئیسلامی نابینا لە چوارچێوەی ئیسلامكردنەوەی كۆمەڵ )
ئەم برادەرە پێی وابو ووتاری ئیسلامی تەقلیدی (واتە ئەو ووتارەی كە مامۆستایەكی ئایینی بێ ئامانجێكی سیاسی ئەیدات ، بەبێ ئەوەی بەخۆی بزانێت ئەچێتە خزمەتی توندڕەوی و ئیسلامی سیاسیەوە ) ، بۆ توندرەویەكە نمونەی بەوتاری جەژنی قوربان ھێنایەوە كە گوایە مناڵێك دانیشتوە و باسی ھەوڵی سەربڕینی مناڵێك لە لایەن باوكیەوە ئەدرێت (مەبەستی جەژنی قوربان بو) ، بێئاگا لەوەی چیرۆك بەشی كۆتاییەكەی كە ئامانجی چیرۆكەكەیە كاریگەری ڕاستەوخۆ بەجێ ئەھێڵێت و ئەبێتە مادەی سەرەكی لە ناو چیرۆكەكە ، بۆیە ئەگەر دیقەت بدرێت لە چیرۆكی پێغەمبەران ئیبراھیم و ئیسماعیل سەلامی خوایان لێبێت ، ھەرتاكێكی موسڵمان كە گوێی لەو چیرۆكە بوبێت ئەوەی كە لە زھنیا ماوەتەوە چەند خاڵێكی سەرەكیە ، لەوانە گوێڕایەڵی كوڕ بۆ باوك ، فەرمانبەرداری خوا ، شەڕەنگێزی شەیتان ، میھرەبانی دایك ، خۆشی دەربڕین بە بۆنەی ڕزگار بون لە تاقیكردنەوەیەكی گەورە ...، بەپێی خوێندنەوەی ئەم كۆنە ئیسلامیە بوایە بۆ چیرۆكی قوربانی ، ئەبوایە لە ماوەی ١٤٠٠ساڵی ڕابوردو تائێستا میللەتی كورد نیوەی یەكتری سەرببڕیایە ، بەپێچەوانەوە ئەم چیرۆكە قورئانیە دەرگای بەرەكەتی ھەژاران و جوڵەیەكی زۆرباشی بازرگانیە بۆ قازانجی بازاڕ ، بێجگە لەوەی جەژنی گەردن ئازادی و توندوتۆڵكردنی پەیوەندی كۆمەڵایەتی و ماڵ بەخشینە ، ئەمە لە كاتێكدا ئەم ڕەخنە ئەگرێت كە چیرۆكەكە قورئانیەو خوێندنەوە و تەفسیركردن و باسكردنی بەپێی ئایەتی قورئان مایەی وەرگرتنی پەندو عیبرەتە وەكو ئەفەرموێت {لَقَدْ كَانَ فِي قَصَصِهِمْ عِبْرَةٌ لِّأُولِي الْأَلْبَابِ ۗ}، كەواتە كاكی لێكۆڵەر ڕێك دژ بە ئامانجی قورئانە لەباسكردنی چیرۆكە قورئانیەكان .
لەلای ئەم ئیسلامی سیاسی ئەو ئیسلامەیە كە ڕێكخراوەو ئامانجی سیاسی و حوكمڕانی ھەیە ، كەواتە ئەبێ لەوە تێبگەین دابڕەوانان كێشەیان لەگەڵ ئەوە ھەیە كە قورئان بە كتێبی خوا بزانرێت و بڕوات وابێت كە ئەو كتێبە ئاسمانیە قانونە بنەڕەتیەكانی ژیانی باسكردوە ، ھەر بۆیەشە ئەو قەناعەتی وابو ھەر مامۆستایەكی ئایینی لەكوردستان وتار ئەدات ئەگەرچی ھیچ ئامانجێكیشی نەبێت بەڵام ناڕاستەوخۆ ئەچێتە خزمەتی ئیسلامی سیاسی ، بۆ ؟ چونكە ھەر بەرگریەك لە ئیسلام ، ھەر بانگەشەیەك بۆ جێبەجێكردنی فەرمانی خوا ، ھەر ڕێگریەك لەفەساد و زوڵم و ستەم ، ھەر وشیاركردنەوەیەك لە خەتەری سیكولاریزم بۆسەر كۆمەڵگەی كوردی ، ئەمان بە پرۆژەی ئیسلامی سیاسی ئەزانن ، بێئاگا لەوەی ئەوە ئەركی سەرەكی مامۆستایانی ئاینیە و لەبەر ئەوەی ئیسلام شەریعەتەو یاساو ڕێسای تیایە پڕیەتی لە ئاراستەكردن ، ئەمان ھاتون ئەیانەوێ لەژێر ناوی ئیسلامی سیاسی بەر بە ئاڕاستەكردنی كۆمەڵگەبگرن لەلایەن مامۆستایانی ئایینی ، ھەر بۆیەش لە یەكێك لە ئەنجامگیریەكانی لێكۆڵەر ئەوەبو كە ( ووتاری ئیسلامی تەقلیدی لەژێر كاریگەری ئیسلامی سیاسی )دایە

شیكاری پێنجەم / لە ڕاسپاردەكانی (دابڕان و فێمێنزم)وە
بێگومان بۆ گەیشتن بە پوختەی ئامانجی (دابڕان و فێمێنزم) گرنگترین سەرچاوە دوای لێكۆڵینەوەكان بەلاغی كۆتایی و راسپاردەی كۆنفرانسەكانە وە بەھۆی لێكۆڵینەوەكان كە زیاتر و ڕاشكاوانەتر نیەتی خۆیان ئەلێن ، ئەتوانین وردتر لە ڕاسپاردەكان تێبگەین ، كە لێرە شیكاری بۆ ھەندێكیان ئەكەین لەوانە :
یەكەم / ھەندێك لە ڕاسپاردەكانی (دابڕان)
2. نەریت و نواڕینە رەنگڕێژەكان بە ئایین و باوەڕە چەقبەستووەكانی ناو هەژموون و هێزی ئایینی و مەزهەبی پێویستە لە سەرچاوەو سیمای تێكستە یاساییەكان دابماڵرێن.

داوا ئەكات یاسا ھچ كاریگەری ئیسلامی بەسەرەوە نەمێنێت .

8. دروستكردنی پانتاییەكی هۆشیاری كە تێیدا هونەر و ئەدەب بە هەموو واتاكانییەوە لە مەتەرێزو میتۆدی چەقبەستوویی رەهابكرێت و گۆرانی و سەماو سینەماو سیحری جوانی كوردستان بەزمانێكی سەردەمیانە دەربڕین.

ئەم ڕاسپاردە زۆر ڕونە پێویست بە كۆمێنت ناكات .

9. پێویستە ئایدیۆلۆژیا نە لە كایەی ئاینیدا و نە لە كایەی زانستیدا تێكەڵ بەو دوو رەوتە نەكرێن. ئایین بۆ ئاییندار و زانست بۆ زانستخواز. نە پرۆژە زانستییەكان بخرێنە گەمەی ئاینییەوە، نە ئایینیش شرۆڤەی زانستی دەرببڕێت. ئایین قۆناغێكی دووای ئەفسانەیەو زانستیش قۆناغێكی دووای ئایینە.

كوتومت كۆپیكردنی كێشەی نێوان زانایانی ڕۆژئاواو كەنیسەیە ، ئەیانەوێ لەڕێگەی ئەم ڕاسپاردەوە بڵێن ئیسلام تێكگیرانی لەگەڵ زانست ھەیە بۆیە ئەڵێن ھی قۆناغێكی دیاریكراوی مێژووییەو لەدوای قۆناغی ئەفسانەوە ھاتوەو زانستیش دوای قۆناغی ئایینە ، چونكە لەلای ئەمان ئیسلام زادەی بیری مرۆڤێكە و توانای بەزیندومانەوەی نیە بۆ قۆناغی دوای خۆی كە قۆناغی زانستیە ، بۆیە باشترین چارەسەر قسەنەكرنی ئیسلامە لەبارەی زانستەوە ، ھەتا یەكێك لە لێكۆڵەرەكان كە لە بارەی بیردۆزی پەرەسەندن قسەیكرد ئەیوت ( ئەگەر ئەتەوێ ئیمانێكی سەلامەتت ھەبێ تێكەڵی زانستی مەكە) ھەرتۆزێك وردبونەوە لەم جۆرە قسانە ئەوەمان پێئەڵێت ئەمان بەھیچ جۆرێك بڕوایان بەوە نیە بەدیھێنەری زەوی و ئاسمانەكان و مرۆڤ قورئانی ناردبێتە خوارەوە ، ھەر لەوڕوانگەشەوە داوا ئەكەن با ئیسلام بێدەنگی ھەڵبژێرێت لەبارەی زانستەوە ، خۆبێئاگاكردن لەوەی سەدان لێكۆڵینەوەی زانستی كراوە لەسەر قورئان و فەرمودە كە پێش زانستی سەردەم كەوتون .
10. ئەو روانگە ئاینیانە كاڵبكرێنەوە كە ناهێڵن بەها زانستییەكان و پێشكەوتنە تەكنەلۆژییەكان پێشبكەون.

لەكوێدا ئیسلام ڕێگری زانست بوە !!!

دووەم / ھەندێك لە ڕاسپاردەكانی كۆنفرانسی (فێمێنزم)

4. تێگەیشتنی ئایدیۆلۆژی ئیسلامگەراكان و كەڵك وەرگرتنیان لە توراسی تێرۆر و زەبروزەنگی هەڵهێنجراوی ناو دەق و تێكستە ئاینییەكان، فاكتەر و فەلسەفەو فێرگەیەكی دانەبڕوای ناو كوردەواریین و دامەزراوە ئاینییەكان بە نەزم و نواڕینێكی پۆپۆلیستی و ئایدیۆلۆژیی بەردەوام دیاردە كۆنخوازو كەلتورە رەنگڕێژەكانی بیرو نەریتی پیاوسالاریی بەرهەم دەهێنن.

نۆ كۆمێنت !

5. دەخوازین لەبەندو یاساكاندا و لە دەستورێكی نیشتیمانی و هاوچەرخدا، بەوردی رەچاوی ئەو پانتاییە بەرینەی ئایین و شەریعەت بكرێت، كە خزاوەتە ناو بەند بە بەندی ڕێسا و یاساكانەوە، پێویستە لیژنە و لایەنی پسپۆڕ بۆ یەكەمجار بە بوێرانەو بە بیریارانە كار لەسەر پێگە و پەیڕەوی فێمێنیزمی رۆشنگەریی بكەن، كە بەتەواوی لەبازنەی سروشت و سیماكانی ژنی كوردی روانیوە.

نۆ كۆمێنت !

وەكو لەسەرەتاش ئاماژەم پێكرد داب و نەریتی نەشیاو و دژ بە پەیامی خوا دزەیان كردۆتە نێو سلوكی كۆمەڵگەو لەوێشەوە بۆ یاسا ، بەڵام كێشە لەوەیە ئەمان خودی ئیسلام بەھۆكار ئەزانن ، وەداوای ئەوان بۆ نەھێشتنی كاریگەری ئیسلامە لەسەر پێناسەی ئازادی و مافی تاكەكەسی ، بۆیە ھەمو ھەوڵیان بۆ بەركەناركردنی ئیسلامە ، وەسفركردنەوەیەتی لە ھەژمون بەسەر ھیچ یاسایەك ، چونكە ئەوان باش ئەزانن نەمانی ئەو ھەژمونە واتە كردنەوەی دەرگای ئیباحیەت .

گۆشەی/ سێھەم

ماویەتی....

نوێترین نوسینەکانی سامان ره‌باتی