دواجار فوئاد مه‌عسووم نیگه‌ران بوو !!
وتار/
27/10/2016
931 جار بینراوە
شوان هه‌ورامی
دواجار فوئاد مه‌عسووم نیگه‌ران بوو
!!
شوان هه‌ورامی
سه‌باره‌ت به یاسای قه‌ده‌غه‌كردنی
ماده كحولیه‌كان ( كه رۆژی 22 / 10 / 2016 له ئه‌نجوومه‌نی نوێنه‌رانی عێراق په‌سه‌ند
كرا ) ، فوئاد مه‌عسووم سه‌رۆك كۆماری عێراق نیگه‌رانی خۆی ده‌ربڕیی و به ره‌خنه‌گرتن
له ئه‌نجوومه‌نی نوێنه‌ران رایگه‌یاند : ئه‌و بابه‌ته به‌سه‌ر په‌رله‌مانی عێراقدا
تێپه‌ڕیووه . نووسینگه‌ی ناوبراو له راگه‌یه‌ندراوێكدا ئاماژه‌ی به یاساكه‌ی په‌رله‌مان
و ئه‌ركی سه‌رۆك وه‌كو پارێزه‌ری مافی هاوڵاتیان رایده‌گه‌یه‌نێت : " له
چوارچێوه‌ی به‌رپرسیارێتیی ده‌ستووریی به‌ڕێز سه‌رۆك كۆمار و په‌رۆشیی زۆری بۆ
پابه‌ندبوون به ته‌واوی پره‌نسیپه‌كانی ده‌ستوور به تایبه‌تی ئه‌وه‌ی په‌یوه‌ندیی
هه‌یه به ئازادییه تاكه كه‌سییه‌كان و ئه‌و مافانه‌ی كه په‌یوه‌ستن به مافه‌كانی
پێكهاته ئاینیی و مه‌زهه‌بیه هه‌مه ره‌نگه‌كان ، به‌ڕێزیان داوای پێداچوونه‌وه‌یه‌كی
وردتری ئه‌م قانونه ده‌كات ".
فوئاد مه‌عسووم جه‌خت له‌وه ده‌كاته‌وه
كه پێویسته ئه‌نجوومه‌نی نوێنه‌رانی عێراق هه‌وڵبدات بۆ چاره‌سه‌ركردنی ئه‌و
بارودۆخه‌و گه‌ڕانه‌وه بۆ راستكردنه‌وه‌ی یاساكه ، كه به كتوپڕیی به‌سه‌ریدا تێپه‌ڕیووه
به‌و جۆره‌ی كه رێزی ئازادییه‌كان و مافه‌كانی هاوڵاتییان له ئاین و مه‌زهه‌به
جیاجیاكان بگرێت .
ئه‌وه‌ی جێگه‌ی سه‌رنجه ئه‌م سه‌رۆكه
كه باسی مافی هاوڵاتیان و پاراستنیان ده‌كات ، تا ئێستا نه‌یتوانیووه پاسه‌وانه‌كانی
خۆیشی له میلیشیاكانی شیعه بپارێزێت ، چ بگاته هاوڵاتیان . نه‌مانیستووه بۆ
تراژیدیاكان به‌یاننامه‌ی نیگه‌رانیی بڵاو بكاته‌وه ، سه‌یره ئێستا بۆ قه‌ده‌غه‌كردنی
ماده كحولیه‌كان شپرزه بووه و به‌یاننامه بڵاو ده‌كاته‌وه !!
ئه‌گه‌ر سه‌رۆك پارێزه‌ری وڵات و مافی
هاوڵاتیانه ، بۆچی بۆ كوشتنی ده‌یان هاوڵاتی كوردی گه‌رمه‌سێر له لایه‌ن میلیشیاكان
و ته‌قاندنه‌وه‌ی مزگه‌وتی گه‌وره‌ی مه‌حموود پاشای جاف له سه‌عدیه كه له ساڵی
1893 دا دروستكرابوو به‌یاننامه‌ی ناڕه‌زایی ده‌رنه‌كرد ، ئه‌گه‌ر حه‌زی به مزگه‌وتیش
نیه ئه‌وا ئه‌و مزگه‌وته ره‌مزیی كوردایه‌تیی كوردانی گه‌رمه‌سێر بوو ، بۆیه
كرایه ئامانجی میلیشیا شیعه‌كان .
سه‌رۆك كۆمار بۆچی نیگه‌ران نیه له
كوشتاری سێگۆشه‌ی سوننه و ته‌قاندنه‌وه‌ی مزگه‌وته‌كانیان ؟ كه هه‌ر دوێنێ له
شاری روتبه ( روطبة ) مزگه‌وتی گه‌وره‌ی شاره‌كه له لایه‌ن حه‌شدی شه‌عبیه‌وه
ته‌قێنرایه‌وه و چه‌ندین لاوی سڤیلی شاره‌كه‌ش قۆڵبه‌ست كران و بۆ شوێنێكی نادیار
راپێچ كران ، دیاره چاره‌نووسی ئه‌وانه‌ش هه‌مان چاره‌نووسی لاوانی سوننه‌یه له
كاتی ئۆپه‌راسیۆنه‌كانی فه‌لوجه و تكریت و رومادی و سێگۆشه‌ی سوننه‌دا . سه‌رۆك نیگه‌ران
نیه له بڵاوبوونه‌وه‌ی ڤیدیۆی منداڵانی موسڵ كه له لایه‌ن میلیشیاكانه‌وه به
شێوه‌یه‌كی دڕندانه ئه‌شكه‌نجه ده‌درێن .
جه‌نابی سه‌رۆك كۆمار بۆچی نیگه‌ران
نیه له قاتوقڕیی و بڕینی مووچه‌ی فه‌رمانبه‌رانی هه‌رێم و هاوڕه‌گه‌زه كورده‌كانی
خۆی ؟ كه ئازاره‌كه‌ی گه‌یشتووه‌ته سه‌ر ئێسقان و باڵێكی حیزبه‌كه‌ی خۆیشی له‌و
سته‌مكارییه‌دا به‌شداره .
له‌باره‌ی ئه‌م یاسایه‌وه ، ئه‌گه‌ر
ئێمه باسی ویستی زۆرینه‌ی موسوڵمانی عێراقیش نه‌كه‌ین كه ئیراده‌یان له ئه‌نجوومه‌نی
نوێنه‌راندا به‌رجه‌سته‌یه ، ماده كحولیه‌كان له پێویستیه‌كانی ژیانی مرۆڤ نیه
و بۆ رازاندنه‌وه‌ی سفره‌ی ده‌وڵه‌مه‌نده‌كان و كه‌ڵه‌كه‌كردنی زیاتری سه‌رمایه‌ی
سه‌رمایه‌داره‌كانه و زیاتر ئه‌وان پێی نیگه‌رانن ، به‌ڵام مووچه په‌یوه‌ندیی به
ژیان و كه‌رامه‌تی ژن و منداڵ و پیرو په‌ككه‌وته و گشت چین و توێژه‌كانه‌وه هه‌یه
و ده‌بوو ناوبراو له نیگه‌رانیدا پشووی لێهه‌ڵگیرێت ، به‌ڵام ئه‌م نه‌هامه‌تیانه
له‌لای كایه و شتی بچووكی له‌لا گایه ، وه‌كو بڵێی عێراق هیچ كێشه‌یه‌كی نیه قه‌ده‌غه‌ی
ماده كحولیه‌كان نه‌بێت .
ئه‌م سه‌رۆكه بۆ وا ده‌كات ؟ بۆ
حســـاب بۆ زۆرینه‌ی په‌رله‌مانیی ناكات ئه‌گه‌ر بڕوای به دیموكراســــیی هه‌یه ؟
ئه‌گه‌ر سه‌رۆك نیگه‌رانی میوانه‌كانیه‌تیی خۆ ئه‌و پارێزبه‌ندیی دیبلۆماسیی هه‌یه
و حاڵه‌ته‌كه‌ی جێی نیگه‌رانیی نیه ، ئیتر بۆچی ئابڕووی خۆی و نه‌ته‌وه‌كه‌یشی ده‌بات
؟!
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018