هەرێم و پەرلەمان..

وتار/ 30/07/2018 659 جار بینراوە

سه‌لیم كۆیی

هەرێم و پەرلەمان..
نوسینی : سەلیم کۆیی
ئاشکرایە خەونی لەمێژینەی کوردبەگشتی و هەرێمی کوردستان بەتایبەتی ، پێکهێنانی دەسەڵاتێکی خۆجێیی وسیستەمێکی پەرلەمانی بوە ، تا ئاستێک بتوانێ ئاواتەکانی دانیشتوانەکەی تیادا بەدی بێ ، هەموولایەک لە ژێرسایەو سێبەریدا سەقامگیر بێ و هەوای ئازادی تیادا هەڵمژێ  .

باشوری کوردستان لەدوای نەهامەتی و ڕشتنی خوێنی هەزارەها ڕۆڵەی دلسۆزوخۆشەویست لەپێناو بەدیهێنانی حکومڕانیەکی خۆماڵی و پەرلەمان ، لەپێناو ڕزگاربون لەژێر نێزەی زوڵم وستەمی بێگانە ،لەقۆناغی ئێستادا دوای بەڕێکردنی چوار خولی پەرلەمان ،کەچی  تا ئێستا (پەرلەمان) دەسەڵاتی یاسادانانمان  نەیتوانیوە نوێنەرایەتی ڕاستەقینەی خەڵک بێ و بەئەرکی  خۆی هەڵسێ لەدەرکردنی یاسا لەبەرژەوەندی گشتی و چاودێریکردنی دەسەڵاتی جێبەجێکردن (حکومەت) ٫ نەیتوانیوە دۆخێک بێنێتە ئاراوە تا هاووڵاتی  بتوانێ دەنگ بە حکومەتێک بدات کە یاساکانی پەرلەمان جێ بەجێ بکات و ڕێز لە پەرلەمان بگرێ کە بەرزترین موئەسەسەی ئەم هەرێمەیە .

 پەرلەمان لەهەمووووڵاتانی پێشکەوتوو ڕێز لێ گیراوەو هەیمەنەی تەواوی هەیە بەسەر دەسەڵات ودامەزراوەکانی تر ، هەروەها  ئەندامانی پەرلەمان بەهۆکاری ئەوەی هەڵبژێردراوی گەلن بەپێی یاسا پارێز بەندیان هەیە بۆ ئەوەی هیچ کەس ولایەنێک نەتوانێ ڕێگری لەو دەسەڵاتەو  وبڕیارەکانی بکات ، بەڵام پەرلەمان لەهەرێمەکەی ئێمە خاوەنی بودجەو موچەیەکی لەڕادەبەدەرە لەسەر حسابی داهاتی گشتی و لەسەر شانی میللەت ، جگە لەوەی خاوەنی چەندین لیژنەو دەیان ڕاوێژکارە لەسەرجەم سێکتەرو  بوارەکان دا، کەچی چوار خولی پەرلەمان مان بەڕێ کرد تا ئێستا نەتوانراوە دەستی حزب لە حکومەت دور بخرێتەوە ، نەتوانراوە خاوەنی داهات وبودجەی دیارو سەربەخۆ بین ،

پەرلەمان نەیتوانیوە لێ پرسینەوەلەگەل هیچ وەزیر و بەرپرسێکی حکومەت بکات ، بەجۆرێک کەسێک شارەزای گوزەرانی خەڵکی هەرێم نەبێ وادەزانێ هیچ کەم وکوڕیەکمان نیە ، بەڵام خۆمان باش دەزانین هیچمان بەسەر هیچەوە نیە.

 ڕێکخراوەکان و خەڵکی  لێقەوماو هاواری زۆریان بۆ بردن و چونە بەردەمی پەرلەمان بەڵام دیارە ئەوەی جێگای چاوەڕوانی خەڵک بوو نەهاتەدی تا کار گەیشتە ڕێگری لە سەرۆکی پەرلەمان وسکرتێرو ئەندامانی پەرلەمان هەڕەشە لێکردنیان ، لە ئێستادا فراکسیۆن و ئەندام وحزبەکانیش لەبەردەمی هەڕەشەی گەورەتردان وشەڕ  بەردەرگای پەرلەمانی گرتوەو تاوانبار دەکرێن بە داعش وڕاوەدونانیان .

لە ئێستادا دوای ڕووداوەکەی چەند ڕۆژی ڕابردوو لەبینای پارێزگای هەولێر پەڕلەمان  لەڕێگەی لیژنەی ناو خۆوە نەتوانێ ئەو تۆمەتانە ساغ بکاتەوە و ڕێکاری یاسایی بگرێتەبەر ئاخۆ ڕاستە یان نا ، ئەی چ باس وپرسێک بەئەرکی خۆی دەزانێ ؟ پێم وایە پەرلەمان بەرپرسیاری یەکەمە لە یەکلایی کردنەوەی ڕوداو و پرسە هەستیارەکان ، ئێستا لەبەردەمی هەڵبژاردنین بۆ خولی نوێ ، ئەگەر وەکو خولی ئێستا و خولەکانی ڕابردوو بێ ،
کاتێ پەرلەمان لیژنەی پەروەردەی هەیە و مامۆستا شەقی تێهەڵدەدرێ ، کاتێ لیژنەی ئەوقافی هەیە و زانایان ڕووبەڕووی ڕاگواستن و لادان لەسەر مینەبەر و سوکایەتی دەبنەوە ،
کاتێ لیژنەی دەست پاکی هەیە و سامانی  بەرپرسان  لەوپەڕی ناڕوونی دایە ،
کاتێ لیژنەی نەوت وسامانی سروشتی هەیە و داهاتی نەوت کەس نایزانێ ،
کاتێ لیژنەی دارایی هەیە و هەر ڕۆژێ چین وتوێژێک بۆ موچە لەخۆپیشاندان دایە ،
کاتێ لیژنەی مافی مرۆڤ هەیە و هاووڵاتیان بەسواڵکردنیش لەبەردەرگای حکومەت ماف یان بۆ دەستەبەر نابێ،
کاتێ  لیژنەکانی  پەرلەمان لەگەڵ ئەو هەموو فەزاحەتە دوای بەدواداچون و ماندوبونێکی زۆر هیچیان بۆ ناکرێ ،  کەواتە جگە  لە خۆماندو کردن بەولاوە شتێک بۆ خەڵک نامێنێتەوە .

نوێترین نوسینەکانی سه‌لیم كۆیی