كه‌مپینی هه‌ڵبژاردن و موزایه‌ده‌ی سه‌ربه‌خۆیی
وتار/
24/04/2018
647 جار بینراوە
شوان هه‌ورامی
كه‌مپینی هه‌ڵبژاردن و موزایه‌ده‌ی سه‌ربه‌خۆیی
شوان هه‌ورامی
چه‌ند جارێك باوكم ئه‌وه‌ی بۆ گێڕامه‌وه ، بۆ گه‌یاندنی
ناوی رێكخراوێكی ئاماده‌ی پێشمه‌رگه به ئه‌فسه‌ری ناوداری كورد شه‌هید مسته‌فا خۆشناو
بۆ خه‌بات له پێناوی سه‌ربه‌خۆیی كوردستان دا ، له‌سه‌رده‌می راگه‌یاندن و ته‌مه‌نی
كۆماری كوردستاندا له هه‌ورامانی لهۆنه‌وه سه‌ردانی شاری مه‌هاباد ده‌كات و له
نزیكه‌وه راسپارده‌و ئاراسته وه‌رده‌گرێت و ده‌گه‌ڕێته‌وه بۆ شوێنی خۆی .
من هه‌ر له‌و كاته‌وه عاشقی ئه‌وه بووم كه وه‌كو هه‌ر
مرۆڤێكی ئه‌م رووی زه‌وییه ، له‌ژێر ئاڵاو سه‌روه‌ریی وڵاتی خۆمدا بژیم ، بۆیه
له به‌هاری 1975 دا كه تانك و زرێپۆشه‌كانی رژێمی به‌عس بۆ خۆ نمایش كردن هاتنه
گونده‌كه‌مان – له كاتێكدا پیاوێكی ناوداری گوند كه تا چه‌ند رۆژێ له‌وه‌وبه‌ر
ماست و دۆی ده‌برد بۆ به‌رپرسانی شۆڕش و ماستاوی بۆ سارد ده‌كردنه‌وه ، له به‌رده‌رگای
باره‌گاكه‌ی شۆڕشدا به‌رانێكی بۆ پێشوازیی له‌و هێزه‌ی رژێم سه‌ربڕیی – منیش فرمێسك
به چاومدا ده‌هاته خوار و به‌و ته‌مه‌نه كه‌مه‌وه وام هه‌ست ده‌كرد هه‌موو هه‌ره‌سی
شۆڕشه‌كه له‌سه‌ر شانی منه .
هه‌رچه‌نده ده‌مزانیی سه‌ركرده‌كانی ئه‌و سه‌رده‌مه‌ی شۆڕش
، زۆریان خائین و به‌عسیی ده‌رچوون ، بۆ نمونه عه‌بدولوه‌هاب ئه‌ترووشیی كه ئه‌ندامی
كۆمیته‌ی ناوه‌ندیی و بكووژ و ببڕی ناوچه‌ی هه‌ڵه‌بجه و هه‌ورامان و پێنجوێن بوو
، هه‌موو داهاتی فرۆشگای شۆڕش و دارایی حیزبی له‌گه‌ڵ خۆیدا برده به‌غدا و به‌غداش
كردیه به‌ڕێوه‌به‌ری گشتیی كۆمپانیای پاته ، كه ئه‌و كاته كۆمپانیایه‌كی به‌ناوبانگ
بوو ، ئه‌مه له كاتێكدا بوو كه‌سانی ساده كه له ئێران ده‌گه‌ڕانه‌وه دوور ده‌خرانه‌وه
بۆ ناوه‌ڕاست و باشووری عێراق ، واته كاك عه‌بدولوه‌هاب زۆر له‌مێژ بوو سه‌ری خۆی
له‌لای به‌عس قه‌بڵاندبوو . ئه‌وانه‌ی له‌و ناوچه‌یه‌دا بوون و ته‌مه‌نیان ده‌گاته‌وه
ئه‌و سه‌رده‌مه ، زۆر باش له‌م قسه‌یه‌ی من تێده‌گه‌ن . جا قاره‌مانه‌كانیش كه
ده‌یان ملیۆن دیناری شۆڕشیان ده‌ست كه‌وت ، گوێزایانه‌وه بۆ بانكه‌كانی ئه‌وروپا
، واته به‌هه‌ردوو دیوه‌كه‌ی شۆڕشدا كوردایه‌تیی بریتیی بوو له خۆ سه‌رمایه‌دار
كردن و خوێن و ئاره‌قه و ماڵوێرانیی و ئاواره‌یی و شه‌ق و تێهه‌ڵدانیش به به‌ش مه‌ینه‌ته‌كان
بڕا .
حوكمڕانیی 27 ساڵی رابردوو ، پێویستی به راڤه‌ی من نیه‌و
هه‌موان ده‌زانین به كوێ گه‌یشتووین ، ئه‌وه‌ی جێگه‌ی سه‌رنجی منه باسی ریفراندۆم
و سه‌ربه‌خۆییه ، به‌ر له ئه‌نجامدانی ریفراندۆم له چه‌ند نووسین و دیمانه‌ی ته‌له‌فزیۆنیدا
باسی بێ ئاكامیی ریفراندۆم و هۆكاره‌كانی بێ به‌رهه‌میی ئه‌نجامدانیم كرد ، كه به‌داخه‌وه
نه زه‌مینه‌ی ناوخۆی بۆ ئاماده كرابوو نه زه‌مینه‌ی نێوده‌وڵه‌تیی ، ته‌نیا زل
حیزبێك ده‌یه‌ویست سه‌رۆكه‌كه‌یمان لێ بكاته بیسمارك و جۆرج واشنتۆنی كورد ، مه‌خابن
له‌وه‌شدا زۆر سه‌ركه‌وتوو بوو كه هه‌ندێ حیزبی تری ئه‌وه‌نده چه‌واشه كردبوو ،
كه وایانده‌زانیی ناتانیاهۆی ئیسرائیل قه‌ناعه‌تی به ترامپ كردووه كه له رۆژی
26 ی ئه‌یلولی 2017 دا دان بنێت به ئه‌نجامی ریفراندۆمدا و 33 وڵاتی تریش به‌دوای
ئه‌ودا ئه‌و بڕیاره ده‌ده‌ن ، ته‌نانه‌ت ئه‌و حیزبانه‌ی تر ئه‌وه‌نده دڵنیابوون
له‌و ریكلامه موخابه‌راتیه‌ی پارتیی و شرۆڤه‌كانی سه‌رۆ قادر و هێمن هه‌ورامیی ،
زۆر به دڵنیاییه‌وه روویان ده‌كرده ئه‌وانه‌ی كه كاتی ریفراندۆمه‌كه‌یان به
گونجاو نه‌ده‌زانیی ، ده‌یانگووت : به‌ڕاســــــــتیی برا گیانه‌كه‌م كێ ئێوه ده‌ناســـــێت
، له‌م قۆناغه‌دا ده‌وڵه‌ت به ئێوه دروست ناكرێت ، دونیا گوێ له‌وانه ده‌گرێت
كه بڕیاری عه‌ســـكه‌ریی و سیاســـــیی و ئابووریی و په‌یوه‌ندییه‌كانی هه‌رێمیان
به‌ده‌ســــته ، ســــــه‌د جار هاوار بكه‌ن توركیا و ئێران و ئه‌مه‌ریكا و ئه‌وروپا
گوێ له ئێوه ناگرن ، چونكه ئێوه توانای ( بارزانیی )تان له‌به‌رده‌ســــتدا نیه
.
هه‌موان ئه‌نجامی كاره‌ساتباری ریفراندۆمه‌كه‌مان بینیی
، به‌ڵام ئه‌وه‌ی جێگه‌ی سه‌رنجه - له جه‌مسه‌ری پشتیوانانی ریفراندۆمدا – هێشتا
كه‌سانی موزایه‌ده‌چیی و گه‌رمكه‌ری كه‌مپینی هه‌ڵبژاردن هه‌ن ئه‌و بڕیاره‌یان پێ
دروسته و ده‌ڵێن ئێمه سوورین له‌سه‌ر ئه‌نجامی ئه‌و ریفراندۆمه و په‌شیمان نین
له‌وه‌ی كردمان ، به‌ڵام كاراكته‌ری سه‌ره‌كیی ریفراندۆم ، كه ده‌سه‌ڵاته‌كانی گوێزایه‌وه
بۆ سه‌رۆكی ئه‌نجوومه‌نی وه‌زیران ، ئه‌و خاوه‌ن ده‌سه‌ڵاته و قسه‌یه‌كی تری هه‌یه
.
له‌دوای گوشاره‌كان بۆ سه‌ر هه‌رێم و داخستنی فڕۆكه‌خانه‌كان
و سنووره‌كان و راده‌ستكردنه‌وه‌ی 51% ی خاكی هه‌رێم به حكومه‌تی ناوه‌ندیی ، بۆ
ئه‌وه‌ی به‌غدا ده‌رگای گفتوگۆیان له‌گه‌ڵدا بكاته‌وه ، سه‌رۆكی حكومه‌تی هه‌رێم
له نامه‌یه‌كدا بۆ به‌غدا رایگه‌یاند كه ئه‌وان به بڕیاری دادگه‌ی باڵای فیدراڵیی
رازین .
بڕیاری دادگه‌ی فیدراڵییش بریتی بوو له‌وه‌ی كه ریفراندۆمی
هه‌رێم ناده‌ستوورییه و ئه‌نجامه‌كه‌ی هه‌ڵوه‌شاوه‌یه ، واته حكومه‌تی هه‌رێمی
كوردستان رازییه به ناده‌ستووریی بوونی ریفراندۆمه‌كه‌و هه‌ڵوه‌شاندنه‌وه‌ی ، هه‌ر
كرانه‌وه‌یه‌كیش له‌لایه‌ن به‌غداوه به‌رانبه‌ر هه‌رێم كرابێت له دوای ئه‌و ملكه‌چ
بوونه بووه بۆ به‌غدا ، كه‌واته ئه‌وانه‌ی وا ده‌زانن ئه‌نجامده‌رانی ریفراندۆم
بڕوایان به‌و ریفراندۆمه ماوه له هه‌ڵه‌یه‌كی كوشنده‌دا ده‌ژین . نه كۆمه‌ڵی نێوده‌وڵه‌تیی
دانی به‌و ریفراندۆمه‌دا ناوه و نه له عێراقدا كاری پێ ده‌كرێت و نه حكومه‌تی
هه‌رێمییش كاری پێ ده‌كات ، نه یاسایه‌كیش هه‌یه له په‌رله‌مانی كوردستان ئه‌و
ریفراندۆمه به فه‌رمیی و یاسایی ناو ببات ، كه‌واته ئه‌وانه‌ی خه‌ڵكیان هان ده‌دا
كه كارتی باری شارستانیی و ره‌گه‌زنامه‌و پاسپۆرته‌كانیان بدڕێنن و بسوتێنن ، ئێستا
ماراسۆنیانه بۆ گه‌یشتن به به‌غدا ، بۆ ئه‌وه‌ی جارێكی تر بگه‌نه‌وه به كورسیی
و پۆست و ئیمتیازه‌كان ، ئه‌م كارته ته‌نیا بۆ گه‌وجاندنی ئه‌ندام و لایه‌نگرانیان
به‌كار ده‌هێنن ، گه‌رچی ئه‌م جاره له‌وانه‌یه ئه‌وه‌شیان پێ نه‌كرێت ، چونكه
گه‌وجێنراوانیش باش ده‌زانن دوای ئه‌و هه‌موو ساڵه له به‌غدا كه جگه شه‌ڕكردن
بۆ پله‌و پۆست ؛ ئه‌وانه كارێكی تریان نه‌كردووه و بگره گه‌لی كوردیشیان شه‌رمه‌زار
كردووه ، ئه‌ی له‌م بێهێزییه‌دا چۆن ئه‌و جه‌نگه ده‌ستوورییه ده‌به‌نه‌وه كه
به‌غدا ده‌زانێت له كوردستان چه‌نده بێزراون ؟!!
ئایا نابێ بپرسین .. ئه‌وه‌ی كه حسابی بۆ كه‌س نه‌ده‌كرد
، بۆچی له 26 ی ئه‌یلولدا سه‌ربه‌خۆیی رانه‌گه‌یاند ؟ ئه‌وه‌ی كه ده‌یگووت مردنه
له چوارچێوه‌ی عێراق دا بمێنینه‌وه ، بۆچی كه‌مپینی هه‌ڵبژاردنی خۆكردنه‌وه به
ئه‌نجوومه‌نی نوێنه‌رانی به‌غدا ناو ده‌نێت شه‌ڕی سه‌ربه‌خۆیی ؟ ئه‌وه‌ی كه نامه‌ی
ریكس تیلرسۆنی نه‌ده‌خوێنده‌وه چونكه له رۆژی 25 ی ئه‌یلولی 2017 ی چاكتر نه‌دۆزیبووه‌وه
بۆ ریفراندۆم ، بۆچی ئێستا له‌سه‌ر هه‌ر وه‌ڵامدانه‌وه‌ی سڵاوێكی به‌غدا هه‌زار
جار سوپاسی لوتفیان ده‌كات ؟ ئه‌وانه‌ی كه په‌شیمان نین له ئه‌نجامدانی ریفراندۆم
بۆچی گوشاریان نه‌كرد بۆ راگه‌یاندنی سه‌ربه‌خۆیی ؟ خۆ ئه‌وان ده‌یانگووت له رۆژی
25 ی ئه‌یلوول گونجاو ترمان نیه ، ئه‌ی بۆچی له 26 ی ئه‌یلوولدا سه‌دو هه‌شتا
پله كه‌ش و هه‌واو ژینگه‌كه تێكچوو ؟ یا ئێستا نایانه‌وێت دان به‌ڕاستیدا بنێن و
بۆ موزایه‌ده‌ی كه‌مپینی هه‌ڵبژاردن پێویسته به‌ره‌و پێشه‌وه غار بده‌ن ؟!
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018