رامــان له وێســتگه‌كانی ئه‌م قۆناغــه/ به‌شی چوارده و كۆتایی
وتار/
27/11/2017
412 جار بینراوە
شوان هه‌ورامی
رامــان له وێســتگه‌كانی ئه‌م قۆناغــه/ به‌شی چوارده و كۆتایی
شوان هه‌ورامی
به‌شی چوارده‌یه‌م و كۆتایی
كوردانی خۆرهه‌ڵات
وه‌كو پێشتریش ئاماژه‌مان پێدا ، په‌رته‌وازه‌یی گوتاری پارته سیاسییه‌كانی
كوردستان له سه‌ره‌تای شۆڕشی گه‌لانی ئێرانه‌وه ، به‌ره‌ی ناوخۆیی كوردانی خۆرهه‌ڵاتی
بێهێز كرد و بووه هۆكارێكی گونجاو بۆ سه‌ركوتكردنی كورد و بزووتنه‌وه شۆڕشگێڕییه‌كه‌ی
. له‌لایه‌ك په‌ڕگیریی بزووتنه‌وه‌ی ماركسیزم لینینیزمی خۆرهه‌ڵاتیی و له‌لایه‌كی
تریش بزووتنه‌وه‌ی سۆشیال دیموكراتی خۆرئاوایی ، به‌ره‌ی جه‌نگی ساردی خۆرهه‌ڵات و
خۆرئاوای هێنابووه ناو خۆرهه‌ڵاتی كوردستان ، ئه‌مه له‌كاتێكدا بوو كه سیستمی
نوێی ئێرانیش – كه سیستمێكی مه‌زهه‌بی په‌ڕگیر و دژه كورد و سوننه بوو – ئه‌و
هه‌له زێڕینه بقۆزێته‌وه‌و بتوانێت له‌لایه‌ك به بانگه‌شه‌ی دژه دینیی و له‌لایه‌كی
تریش تۆمه‌تی دژه گه‌ل و نیشتمان ، كاری سه‌ركوتكردنی كورد ئاسان بكات .
له ساڵی 2009 دا ؛ له دیمانه‌یه‌كدا له‌گه‌ڵ به‌ڕێز حسه‌ینی مه‌ده‌نیی ئه‌ندامی
مه‌كته‌بی سیاسیی حیزبی دیموكراتی كوردستان و تیۆریسیه‌نی ئه‌و حیزبه‌دا به ئه‌نجامم
گه‌یاند ، پرسیارم لێكرد كه ئێوه له‌و كاته‌دا شه‌ڕتان به‌سه‌ردا سه‌پێنراو
ناچار بوون خه‌باتی چه‌كداریی هه‌ڵبژێرن ، بۆچی درووشمێكی بێ مانای وه‌كو { دیموكراسیی
بۆ ئێران و خودموختاریی بۆ كوردستان }تان به‌رز كرده‌وه ، خۆ ئێوه هه‌ر ناچار
بوون بجه‌نگن و دواجاریش شاره‌كانتان چۆڵ كرد ، جا ئێوه نه‌توانن خۆتان بپارێزن چۆن
ئێران ده‌كه‌نه وڵاتی دیموكراسیی ؟ باشتر نه‌بوو قۆناغی دووه‌می كۆماری
كوردستانتان رابگه‌یاندایه ؟ هیچ نه‌بێت ئه‌گه‌ر وه‌كو كۆماری كوردستانیش شكستی
بخواردایه ، جارێكی تر ئه‌و هیمه‌ت و ئیراده‌یه‌ی كوردی دووباره ده‌هێنایه‌وه جۆش
و خرۆش ، هه‌روه‌كو تا ئێستاش ته‌مه‌نی 11 مانگه‌ی كۆماری كوردستان هیمه‌ت و ئیراده‌كان
و مه‌شخه‌ڵه‌كان به‌رز ده‌كاته‌وه ؟ له وه‌ڵامدا وتی : هه‌ر زۆر راسته بریا له‌و
كۆبوونه‌وه نیوملیۆنیانه‌ی كه بۆ دكتۆر قاسملوو ساز ده‌كران ، كۆماری
كوردستانمان بۆ جارێكی تر راگه‌یاندایه‌ته‌وه ، خۆ ئێمه له جه‌نگدا شكاین و دواجار
هاتینه ئه‌م كه‌مپانه‌ی ئێستا ده‌یانبینیت ، به‌ڵام ئه‌وه بۆ گه‌له‌كه‌مان هێزو
ته‌وژمێكی تر ده‌بوو 34 .
له دوای راپه‌ڕینی ئازاری 1991 و دواتر هه‌ڵبژاردنی په‌رله‌مان و دامه‌زراندنی
حكومه‌تی هه‌رێمی كوردستان له ساڵی 1992 دا ، كوردانی خۆرهه‌ڵات به دوو هه‌نگاوی
ژیرانه هه‌ڵوێستی خۆیان تۆمار كرد ، یه‌كه‌میان كه زانیان حكومه‌تی كۆماری ئیسلامیی
له جه‌نگی عێراق – ئێران رزگاری بووه‌و به‌ره‌و به‌هێزبوونه‌وه‌ی توانای سه‌ربازیی
خۆی هه‌نگاو ده‌نێت ، شۆڕشی چه‌كدارانه زیان به خودی خه‌باته‌كه و به گه‌لی
كوردیش ده‌گه‌یه‌نێت ، بۆیه زیاتر جه‌ختیان له خه‌باتی سیاسیی كرده‌وه ، به‌بێ
وازهێنان له خه‌باتی چه‌كداریی ، ده‌كرێ بوترێت خه‌باتی سه‌ربازییان هه‌ڵپه‌سارد
، دووه‌میش به ره‌چاوكردنی بارودۆخی ناسكی حكومه‌تی هه‌رێمی كوردستان و هه‌لومه‌رجه‌كه‌ی
– كه ده‌كه‌وته نێو وڵاتانی ناحه‌زییه‌وه - و ده‌بێت وه‌كو حكومه‌تێكی به‌رپرس
له‌سه‌ر بنه‌مای پاراستنی سنووره‌كانی ره‌فتار بكات له‌گه‌ڵ دراوسێكانیدا ، ئه‌و
پارتانه ره‌چاوی حاڵه‌ته‌كه‌یان كرد و خه‌باتی چه‌كدارانه‌یان راگرت ، گه‌رچی به
ده‌یان ئه‌ندامیان تیرۆر كران ، به‌ڵام ئه‌وان سه‌رخستنی حكومه‌تی هه‌رێمیان وه‌كو
سه‌رخستنی بزووتنه‌وه‌ی رزگاریخوازیی هه‌موو پارچه‌كان ده‌زانی ، بۆیه ئه‌و رێگه‌یان
هه‌ڵبژارد .
له‌وانه‌یه ئێستا سه‌نگه‌ربه‌ندیی ناوچه‌كه ، له نێوان ئه‌مه‌ریكاو ئیسرائیل
و سعودیه و هاوپه‌یمانه‌كانیان له‌لایه‌ك و ئێرانیش – وه‌كو ئه‌وه‌ی له رواڵه‌تدا
ده‌رده‌كه‌وێت – له‌لایه‌كی تر ؛ هه‌لومه‌رجێكی هێنابێته پێشه‌وه ، كه كه‌سانی
وه‌كو بێرنارد هێنری لیڤی و بیرنارد كۆشنێر سه‌ردانی پارته‌كانی خۆرهه‌ڵات بكه‌ن
وله‌گه‌ڵیاندا كۆببنه‌وه‌و بیانه‌وێت له خۆرهه‌ڵات بیانجوڵێنن ، به‌ڵام وابزانم دۆخی
دوای گرتنه‌وه‌ی كه‌ركوك زۆر وانه‌ی تێدا بوو بۆ ئه‌وانه‌ی كه به راوێژ و ئامۆژگارییه‌كانی
ئه‌وانه هه‌ڵخه‌ڵه‌تابوون !!
بۆیه پێموایه كوردانی ئه‌و پارچه‌یه پێویسته له‌م قۆناغه‌دا زیاتر گرنگیی
به‌م خاڵانه بده‌ن :
1. له‌م هه‌لومه‌رجه‌دا كه ئێران و سوپاكه‌ی توانیویانه
هه‌ژموونی خۆیان به‌سه‌ر عێراق و سوریا و لوبنان و یه‌مه‌ندا بسه‌پێنن ، كارێكی ژیرانه
نیه له‌ناوخۆی وڵاتدا چالاكیی چه‌كدارانه ئه‌نجام بده‌ن ، چونكه له وه‌ها حاڵه‌تێكدا
- به‌هۆی ناهاوسه‌نگیی هێزه‌وه - زیانی گه‌وره به بزووتنه‌وه‌كه و به جه‌ماوه‌ریش
ده‌گات .
2. كوردانی ئه‌و به‌شه‌ی كوردستان ؛ ده‌بێ له‌م قۆناغه‌دا
چالاكیی ئابووریی و وه‌به‌رهێنان به ئه‌نجام بگه‌یه‌نن ، ئه‌وه‌ش به ئارامیی
بارودۆخه‌كه ده‌بێت . چونكه سه‌رمایه وه‌كو كۆتر وایه‌و له شوێن و جێگه‌ی
ئارامدا هێلانه ده‌كات .
3. له‌م هه‌لومه‌رجه‌دا – باوه‌كو ئاسۆش تاڕاده‌یه‌ك داخراو
بێت – به‌ڵام درێژه‌دان به چالاكیه فه‌رهه‌نگیی و كلتوورییه‌كانی كورده‌واریی ،
گرنگیی خۆی ده‌بێت ، هه‌ر ئه‌وه‌ش ده‌بێته ژێر خانی رووناكبیریی بۆ داهاتووی ئه‌و
به‌شه‌ی كوردستان . كاتی خۆی چالاكیه رۆشنبیرییه‌كانی سه‌رده‌می سه‌دام به نزمیی
هه‌ڵده‌سه‌نگێنران ، به‌ڵام هه‌ر ئه‌و زمانه كوردییه گه‌شه‌كردووه بوو ، كه
بووه بناغه‌ی میدیا و خوێندنی قۆناغه‌كانی ئێستای په‌روه‌رده‌و فێركردنی هه‌رێمی
كوردستان .
4. ده‌بێ ئۆپۆزیسیۆنی كوردانی خۆرهه‌ڵات بزانن ؛ هه‌ر بێهێزبوونێكی
هه‌رێمی كوردستان به قازانجی به‌غدا ، له‌وانه‌یه داهاتووی بوونی ئه‌وان له هه‌رێمدا
بخاته مه‌ترسییه‌وه ، هه‌روه‌كو له ساڵانی دوای 2003 وه رێكخراوی موجاهیدینی
خه‌لق له كامپی ئه‌شره‌ف و دواتریش له كامپی لێبرتی كه‌وتنه به‌ر هێرشی سوپای
قودس و لایه‌نگرانیان له عێراق ، دوور نیه به شێوه‌و سیناریۆی تر كوردانی خۆرهه‌ڵاتیش
بكرێنه ئامانج ، بۆیه ده‌بێ باش دیراسه‌ی ئه‌و بابه‌ته بكه‌ن .
هیواخوازم گه‌له‌كه‌مان به لۆژیك و دانایی رێبه‌رانی دڵسۆزی ئه‌م قۆناغه
سه‌خته تێپه‌ڕێنێت و شكسته‌كان بۆ سه‌ركه‌وتن بگۆڕێت .
----------------
په‌راوێزه‌كان :
34. كاسێتی ئه‌و دیمانه‌یه له‌لای خۆم پارێزراوه‌و له كاتی گونجاودا – به
یارمه‌تی خوا – بڵاوی ده‌كه‌مه‌وه .
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018