رامــان له وێســتگه‌كانی ئه‌م قۆناغــه (1)
وتار/
08/11/2017
449 جار بینراوە
شوان هه‌ورامی
رامــان له وێســتگه‌كانی ئه‌م قۆناغــه (1)
شوان هه‌ورامی
به‌شی یه‌كه‌م
وته‌یه‌كی پێویست
به‌درێژایی مێژووی مرۆڤایه‌تیی ، له هیچ قۆناغێكدا
رووداوه‌كان به ئه‌ندازه‌ی ئه‌مڕۆ ئاڵۆز و فره ره‌هه‌ند نه‌بوون ، كه شرۆڤه‌كاران
هه‌رچه‌نده به‌تواناو دانا بن ، ناتوانن ته‌واویی ره‌هه‌نده‌كان بخه‌نه چوارچێوه‌ی
شرۆڤه‌كانیان ، هۆكاره‌كه‌ش ئه‌وه‌یه ؛ كه زۆربه‌ی ره‌هه‌ندی رووداوه‌كان له
ژووره تاریكه‌كانی ده‌زگا هه‌واڵگرییه‌كانی جیهاندا پلان و به‌رنامه‌یان بۆ داڕێژراوه
، بۆ داپۆشین و ئاسایی نیشاندانی رووداوه‌كانیش میكانیزمێك جێبه‌جێ ده‌كرێت ، كه
زۆر جار دووره له‌و راستیانه‌ی كه ئه‌و ده‌زگایانه به‌دوایدا ده‌گه‌ڕێن ، هه‌ر
بۆیه كاتێ شرۆڤه‌كارێك ده‌گاته هه‌ندێ ئه‌نجامی سه‌رسوڕهێنه‌ر ؛ خوێنه‌رانی ئاسایی
باوه‌ڕی پێناكه‌ن و بگره گاڵته‌شی پێده‌كه‌ن ، كاتێ رووداوه‌كانیش ده‌گه‌نه قۆناغی
ده‌ركه‌وتنی ئه‌نجامی شرۆڤه‌كاران ، تازه كار له كار ترازاوه‌و خه‌ڵكانی ساده‌و
كورتبین ؛ په‌شیمان بوونه‌وه دادیان نادات .
مه‌خابن بۆ ئێمه كه ده‌ستمان ناگاته به‌ڵگه‌نامه نهێنیه‌كان
و ته‌نیا له چوارچێوه‌ی هه‌واڵ و راپۆرته هه‌واڵیه‌كاندا ده‌ستمان به هه‌ندێ
زانیاریی پچڕ پچڕ ده‌كه‌وێت ، كه له خشته‌ی زۆر ئاڵۆزی یه‌كتربڕ ده‌چێت و بۆ ئێمه‌ی
كه‌م ئه‌زموونیش زۆر قورسه ساغی بكه‌ینه‌وه ، بۆیه چاوه‌ڕێ ناكرێت بتوانین له
هه‌موو لایه‌كانه‌وه ؛ له‌بابه‌ت و رووداوه‌كان حاڵیی ببین ، ناشكرێ ئه‌وه‌ی كه
هه‌مووی تێنه‌گه‌ین ؛ سه‌رجه‌می ره‌ها بكه‌ین ، چونكه رووداوه‌كان په‌یوه‌ندییان
به ژینگه‌و بژێویی و ئێستا و داهاتوومانه‌وه هه‌یه .
به‌ڵام سه‌ره‌ڕای هه‌موو ئه‌مانه ، گه‌وره‌ترین گرفتی
شرۆڤه‌كار ئه‌وه‌یه ، كه خوێنه‌رانی ئایدیۆلۆژیی بن ، واته پێشوه‌خته خوێنه‌ر
به‌هۆی ئاراسته‌ی حیزبه‌كه‌یه‌وه قه‌ناعه‌تێكی بۆ دروستكراوه ، بۆیه هه‌رچیه‌ك
له‌گه‌ڵ بیروبڕوای ئاراسته‌كراوی حیزبیه‌كه‌ی ئه‌ودا نه‌گونجا ، هێڵێكی ره‌شی به‌سه‌ردا
ده‌هێنێت و گه‌ر جنێوبارانت نه‌كات ، له‌باشترین حاڵه‌تدا باوه‌كو ئاماژه‌كانت به‌ڵگه‌نه‌ویستیش
بن ، ئه‌و دژایه‌تیان ده‌كات و نایه‌وێت راستیه‌كان وه‌كو خۆی ببیستێت ، كه به‌داخه‌وه
پیرۆزكردنی حیزبه‌كان به عه‌لمانیی و ئیسلامیه‌وه ؛ گه‌وره‌ترین نه‌هامه‌تیی خوێنه‌رانه
له خۆرهه‌ڵاتدا ، بۆیه نابینین له‌دوای شكسته‌كان و رووداوه گه‌وره‌كان هه‌ڵسه‌نگاندنی
زانستییان بۆ بكرێت ، نابینین دوای شكسته كه‌مه‌رشكێنه‌كان سه‌ركرده كارێزمیه‌كان
واز له كورسیه‌كانیان بهێنن ، به‌ڵكو به پێچه‌وانه‌وه شكسته‌كانیش ده‌كه‌نه سه‌ركه‌وتن
، بۆ نمونه له‌دوای ریسوایی شكستی عێراق له كوه‌یت ، راگه‌یاندنی عێراق سه‌دامی
به سه‌ركرده‌ی ئه‌و وڵاته ناو ده‌برد ، كه قاره‌مانی رووبه‌ڕوو بوونه‌وه‌ی 33 ده‌وڵه‌تی
جیهان بوو ، هه‌ر بۆیه لێره مرۆڤپه‌رستیی و حیزب په‌رستیی و كۆیلایه‌تیی بۆ كاریزماكان
به‌شێوه‌یه‌ك له ژیان و ژینگه‌و ئه‌ده‌بیاتدا ره‌گی داكوتاوه ؛ ئاسان نیه شرۆڤه‌كار
له‌وه‌دا سه‌ركه‌وتوو بێت ئه‌و ده‌رگای قه‌ڵای خه‌یبه‌ره به سانایی بشكێنێت ، بۆیه
دواجار له‌م زنجیره وتاره‌دا زۆر گه‌شبین نیم سه‌ركه‌وتوو بم ، چ له‌رووی بنه‌ماكانی
شرۆڤه‌ی زانستیه‌وه‌و چ له رووی شكاندنی ئه‌و ده‌رگا مه‌حكه‌مانه‌ی پیرۆزییه‌كانی
حیزب و كارێزمای خۆرهه‌ڵاته‌وه ، به‌ڵام ئه‌وه‌ش راستیه‌كی تره ؛ ئه‌گه‌ر شرۆڤه‌كار
تێگه‌یشتنی خۆی پێشكه‌ش نه‌كات ، گه‌ر ئه‌و پشتگوێ خستنه‌ی نه‌چێته خانه‌ی خیانه‌ته‌وه
؛ ئه‌وا له باشترین حاڵدا كه‌مته‌رخه‌میه به‌رانبه‌ر به گه‌ل و نیشتمان ، به‌سه
شرۆڤه‌كان ژماره‌یه‌كی زۆر كه‌میش بیانخوێننه‌وه‌و كه‌متر له‌وانیش قبوڵیان بكه‌ن
، به‌ڵام گرنگ ئه‌وه‌یه شرۆڤه‌كار ئه‌ركی خۆی به‌رانبه‌ر گه‌له‌كه‌ی جێبه‌جێ بكات
.
دواجار ده‌بێ خاڵێكی تری زانستیی له‌باره‌ی شرۆڤه‌وه
ئاماژه پێ بده‌ین ، ئه‌ویش ئه‌وه‌یه كاتێ شرۆڤه‌كار ده‌یه‌وێت له هه‌ڵوێستی لایه‌نه‌كانی
بابه‌تێك تێبگات ، ده‌بێ له گۆشه‌نیگای بیركردنه‌وه‌ی هه‌مه‌لایه‌نه‌ی هه‌ر لایه‌نێكه‌وه
شرۆڤه‌كه‌ی ئاماده بكات ، واته ناكرێ شرۆڤه‌كارێكی كورد توركیا و ئێران و عێراق
و وڵاتانی عه‌ره‌ب به ناحه‌زی خۆی ده‌زانێت ، له‌سه‌ر بنه‌مای بژی و بروخێ و
درووشمی كوردستان یا نه‌مان بنوسێت و له‌ناو كه‌فوكوڵی عاتیفیدا خۆی ون بكات ، ده‌بێ
بزانێت هۆكار چیه توركیا و ئێران و ئه‌وانی تریش به‌و شێوه‌یه بیر ده‌كه‌نه‌وه
، شرۆڤه‌كار ده‌بێ ئاوێنه‌ی گه‌له‌كه‌ی بێت ، نه‌ك راستیه‌كانی لێ ون بكات و چه‌واشه‌كارانه
ره‌فتار بكات ، چونكه هه‌ر كاتێ بڕیارده‌ران تێگه‌یشتن خواست و بنه‌مای هه‌ڵوێستی
وڵاتان به‌رانبه‌رمان له‌سه‌ر چ بنه‌مایه‌كه ، باشتر ده‌زانن چۆن وه‌ڵامی ئه‌و نیگه‌رانیی
و هه‌ڵوێستانه بده‌نه‌وه‌و به زانستیانه هه‌نگاو بنێن ، چونكه عاتیفه‌و سۆزی
نه‌ته‌وه‌یی وشك ؛ هه‌ڵوێستی نه‌زانانه‌ی لێده‌كه‌وێته‌وه ، كه گه‌لی ئێمه
نمونه‌ی زۆری له‌و شێوه‌یه‌ی پێشكه‌ش كردووه‌و تا ئێستاش وانه‌ی لێ وه‌رنه‌گرتووه‌و
له وێستگه و قۆناغه مێژووییه‌كاندا به‌رده‌وام دووباره‌یان ده‌كاته‌وه !!
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018