كاتێ یه‌كێتی له بنه‌ماكانی لایدا !!
وتار/
04/09/2016
866 جار بینراوە
شوان هه‌ورامی
یه‌كێك
له بنه‌ما سه‌ره‌كیه راگه‌یه‌ندراوه‌كانی دامه‌زراندنی یه‌كێتی نیشتمانیی
كوردستان ، ئه‌وه‌بوو كه گوایه شۆڕشه‌كانی پێشتر بنه‌مای بنه‌ماڵه‌یی و هۆزایه‌تیی
زاڵبووه به‌سه‌ریدا و هه‌ر ئه‌وه‌ش زه‌مینه‌ی هه‌ره‌س و رووخاندنیانی هه‌ڵگرتووه
. مه‌به‌ست له‌و ده‌سته‌واژه‌یه‌ش زیاتر ئاماژه بوو به شێوازی سه‌ركردایه‌تی شۆڕشی
ئه‌یلول و بنه‌ماڵه‌ی بارزانی .
گه‌رچی
ئه‌و ره‌خنه‌یه پاشخانێكی ململانێی سیاسیی و سه‌ربازیی خوێناویی هه‌ڵگرتبوو ، به‌ڵام
له رووی زانستیی و ئه‌كادیمیه‌وه زۆر له راستیه‌وه نزیك بوو ، چونكه پشتبه‌ستن
به كارێزما و پشتكردنه بنه‌مای زانستیی حیزبایه‌تیی له سه‌ركردایه‌تیی به كۆمه‌ڵ
و به دامه‌زراوه‌یی كردنی ده‌زگا و ئۆرگانه‌كانیدا ، بنه‌ما و ماكی هه‌ره‌سن بۆ
هه‌ر بزووتنه‌وه‌یه‌كی شۆڕشگێڕیی . بۆیه به درێژایی مێژووی شۆڕشه‌كانی كورد ، به
كوژرانی رێبه‌ری شۆڕشه‌كان ، له لوتكه‌وه بزووتنه‌وه‌كانیان هه‌ره‌سیان هێناوه
و شوێنكه‌وتوانیان هاتوونه‌ته‌وه سه‌ر خاڵی سفر !!
ته‌نانه‌ت
ئه‌و شێوازی رێبه‌رایه‌تیكردنه‌ی پارتی دیموكراتی كوردستان كه رێبه‌رانی یه‌كێتی
ره‌خنه‌یان لێگرت ، تا ئێستاش وه‌كو بنه‌مایه‌كی زانستیی راسته و سه‌ركردایه‌تیی
بنه‌ماڵه هه‌ر هه‌مان رێبه‌رایه‌تیی سه‌رۆك هۆزه‌كانه له مێژووی كوردستاندا ،
ته‌نیا كات و هه‌ندێ پێشكه‌وتنی دنیای مادیی و مۆدێرنه وه‌كو ته‌كنه‌لۆژیا و ده‌رهاویشته‌كانی
چووه‌ته سه‌ر ، ده‌نا هه‌مان پیرۆزكردن و مرۆڤپه‌رستیی پێشووه و رێبه‌ر و بنه‌ماڵه‌ی
كردووه‌ته كارێزما و بگره په‌رستراو !!
به‌ڵام
ئه‌وه‌ی جێی سه‌رسوڕمانه دوای تێپه‌ڕاندنی سێ ده‌یه له ته‌مه‌نی یه‌كێتیی ، ئه‌وه‌ی
كه بووه بنه‌مای دامه‌زراندنی پارتێكی نوێی پێشكه‌وتنخواز ، پشتگوێ خرا ، ورده
ورده تاڵه‌بانیی له سه‌ركردایه‌تیی و كۆنترۆڵكردنی جومگه هه‌ستیاره‌كانی حیزبه‌كه‌یدا
هه‌مان شێواز و ره‌وشی بنه‌ماڵه‌ی بارزانیی كرده ستراتیژ و هاوسه‌ر و خزمه‌كانی
ده‌ستیان گرت به‌سه‌ر حیزبه‌كه‌دا و گله‌یی و ناڕه‌زایی به‌شێوه‌یه‌ك په‌ره‌ی سه‌ند
كه گه‌یشته جیابوونه‌وه‌ی بزووتنه‌وه‌ی گۆڕان و دوای ئه‌ویش ئه‌م حاڵه‌ته‌ی كه
هیچ حیزب و عاقڵێك حه‌سوودی به‌و حیزبه نه‌بات .
ئێستا
یه‌كێتیی عه‌لمانیی و سۆشیال دیموكرات ، هه‌مان پارت و هێزی كورده كه ده‌ڵێی له
قوڵایی مێژووی هۆز و بنه‌ماڵه‌كانی سه‌ده‌كانی شانزه و حه‌ڤده و هه‌ژده‌وه هه‌ڵقوڵاوه
و ته‌نیا سیمای مۆدێرنه - زاراوه زاره‌كیی و خاڵییه‌كان له كردار- وه‌كو دیموكراسیی
و مافی مرۆڤ و مه‌ده‌نیه‌ت له هۆزه‌كانی جیا ده‌كاته‌وه ، ده‌نا كوا سۆشیال دیموكراتی
حیزبی مه‌ده‌نی ، كه نابێ خاوه‌نی میلیشیا بێت ؟ كوا شه‌فافیه‌تی حیزبێ كه بڕوای
به دامه‌زراوه‌یی بوون و چاودێریی هه‌بێت ؟ كه ئه‌ندامانی مه‌كته‌بی سیاسیی حیزبه‌كه‌ی
هاوار و فوغانیانه به ده‌ست ناشه‌فافیه‌ته‌وه ، به تایبه‌تی له دۆسیه‌ی نه‌وتدا
؟ كوا مه‌ده‌نیه‌ت كاتێ هه‌موو بڕگه‌كانی بڕیار و پاره و ده‌سه‌ڵاتی ئه‌منیی و میدیایی
و حكومه‌ت له‌لای كه‌سه ده‌سڕۆیشتووه‌كانی بنه‌ماڵه‌یه ؟
ئاشكرایه
له‌و كاته‌وه كه ئه‌م حیزبه له شێوازی ده‌سه‌ڵاتدا خۆی كۆپیی و مانیفێست كرده‌وه
به هه‌مان ره‌وشی بنه‌ماڵه‌ی بارزانیی و بگره بوونه هاوسه‌نگه‌ر و هاومیكانیزم
له ناشه‌فافیه‌ت و به‌هه‌ده‌ردانی سامانی گشتیدا ، ئیتر ئه‌و حیزبه ته‌نیا به
ناو مایه‌وه‌و دابڕانێكی ته‌واوی له‌گه‌ڵ مێژوویدا بۆ دروست بووه ، بۆیه ئه‌و ئه‌ندامانه‌ی
كه نایانه‌وێت حیزبه‌كه‌یان به‌ره‌و هه‌ڵدێری ته‌واو هه‌نگاو هه‌ڵگرێت ، ده‌یانه‌وێت
به‌رگریی له مێژوویان بكه‌ن و نه‌هێڵن دوای چوار ده‌یه له ته‌مه‌نی ، جارێكی تر
حیزبه‌كه‌یان كت و مت پارتیه‌كی تر بێت به‌ڵام به تامی بنه‌ماڵه‌یه‌كی تر !!
نوێترین نوسینەکانی شوان هه‌ورامی
-
شوان هه‌ورامی
14/03/2021
-
شوان هه‌ورامی
27/02/2021
-
شوان هه‌ورامی
02/08/2018
-
شوان هه‌ورامی
25/07/2018
-
شوان هه‌ورامی
16/07/2018
-
شوان هه‌ورامی
23/06/2018