دەربارەی بزوتنەوەی گۆڕان و رێكخەری گشتی

وتار/ 18/07/2017 939 جار بینراوە

له‌تیف فاتیح فه‌ره‌ج

دەربارەی بزوتنەوەی گۆڕان و رێكخەری گشتی
لەتیف فاتیح فەرەج
لە راستیدا نابێ‌ بزوتنەوەی گۆڕان لەوە نیگەران بێت لە ماڵپەڕو پەیج و واڵەكان چۆن باسی رێكخەری گشتی دوای كاك نەوشیروان و هەروەها خانەی راپەڕاندن دەكرێت ، كە دروستكردنی ئەمی دووەمیان یەكێ‌ لە خەونەكانی كاك نەوشیروان بوو ، بزوتنەوەی گۆڕان لە دەرەوەی ئەوەی چی دەگوترێ‌ و چۆن دەبێت بەردەوام بێت لە كاری خۆی و درێژە بە هەنگاوەكان بدات ، بۆ ئەمەش هەقی خۆیەتی سەیری هەموو سەرنج و تێبینیەكان بكات و هەڵوەستەی لە سەر بكات و ئەو كارەش بكات كە بۆ ئەم قۆناغە لە بەرژەوەندی بزوتنەوەكەیە ، دوای هە ڵبژاردنی خانەی راپەڕاندن،  بۆ رێكخەری گشتی ، ئەگەر بڕیارە بە هەمان رچە رێی رابردودا بڕوات ، باشترە بزوتنەوەی گۆڕان لە هەنگاوی یەكەمدا ئەو ناوانە وەربگرێ‌ كە خۆیان كاندید دەكەن ، بە ڕێگەی یاسای سەرەتا كار لە سەر پێشمەرجەكان بكات ، دواتر هەڵسەنگاندن  لە بەر چاو بگیرێ‌ و ئیدی پێوەرەكانی ئەو هەڵسەنگاندنە ، هەر بارێ‌ بن " توانای ئیدارەدان ، باری لەشساغی ، توانای كۆكردنەوە ، یان هەر هەنگاوێكی تر " دواتر تا بكرێ‌ لە رێی گفت و گۆو هەڵسەنگاندنی بارو دۆخی ناوخۆی بزوتنەوەكەوناوخۆی هەرێم و پێشهاتەكان و گۆڕانكاریەكان و هتد ، بازنەی خۆكاندید كردنەكە بچوك بكەنەوە ، بێ‌ ئەوەی ململانێی ناجۆر بكەوێتە نێوان خۆ بژێرەكانەوە ، یانی وابكرێ‌ بازنەكە تا ئاستی ئەوە بێت لە كەسێك یان دواندا بچوك بكرێتەوە، بڕوام وایە ئەمە رێگەیەكی دروست و دیموكراتیشە ، تەنانەت بۆ هەڵبژاردنی سەرۆكی وڵاتیش لە ئەوروپاو شوێنانی تر دەگیرێتە بەر وەك ئەوەی لە فەڕەنسا بە رێوە چوو، كە دواجار بەس لۆپێن و ماكرۆن مانەوە .
خانەی راپەڕاندنیش پێو یستی بە هەندێ‌ رێ‌ و شوێن و هەنگاوی ورد هەیە ، من وای دەبینم بزوتنەوەی گۆڕان بە گوێرەی تەمەنی خۆی كاری زۆری بۆ هێنانە پێشەوەی گەنج كرد و بۆ ئەمەش لە بانگەشەكانی هەڵبژاردنا تێكۆشەرانی شاخ درێغیان نەكرد ، هاتنە پێشەوەی گەنجانی وەك یوسف محەمەد ، ئارام شێخ محەمەد ، هۆشیار عەبدوڵا ، هەڤاڵ ئەبوبەكرو عەبدوڵای مەلانوری  و هەموو ئەوانی تر ، بەوانەوە كە پشوكورتیش بوون رۆڵی گەورەی لە ئەستۆی تێكۆشەرانی بە تەمەن بوو نمونەی " نەوشیروان مستەفاو عومەری سەید عەلی  قادری حاجی عەلی و عوسمانی حاجی مەحمود و مام رۆستەم و هەموو ئەوانی تر كە دیارە دیسان لیستەكە زۆر درێژە "، ئەم نمونانەم بۆ ئەوە باسكرد كە بڵێم ئەم بزوتنەوەیە بەم تەمەنە كەمەوە جیاوازی زۆری لە گەڵ لایەنەكانی دیكەدا دروستكردووە ، بۆیە بە بڕوای من هەرگیز ئەوە كێشە نابێ‌ كە خانەی راپەڕاندن هەمووتێكۆشەرانی دوێنێن ، یان خوێنگەرمانی ئەمڕۆ ، گرنگ پڕۆژەو بەرنامەی گۆڕان و كاركردنە لەسەری ، خۆ ئەگەر خانەی راپەڕاندن یەك گەنجیشی تیا نەبێت ئەمە مانای ئەوە نیە گەنج فەرامۆشكراوە لەم بزوتنەوەیەدا ئەمە بۆ ژنیش هەر وایە .
بڕوای من بەشداری راستەقینە سەرخستنی پڕۆژەكە و درێژە پێدانێتی ، خۆ با ئەو راستیەش بڵێین لەم بزوتنەوەیەدا بە هیمەتی نەوشیروان مستەفاو تێكۆشەرانی هاوڕێی گەنجی وا هاتوەتە پێشەوە كە رەنگە هەرگیز لە شوێنێكی تر نەگەیشتبا بەو شوێنە ، ئەمە ناكاتە كەمكردنەوەی رۆڵ ، بۆ نمونە ئەگەر دلاوەری حاجی عوسمان لە پێنجوێن رۆڵی نەگێڕابا ئەو دەنگە نەدەهات ، یان ناوە دیارەكان لە سلێمانی ، یاخود هەر ناوێكی تر ، كەواتە مەسەلەكە تەواوكردنی یەكە ، بۆ ئەمە بزوتنەوەی گۆڕان لە بەردەم تاقیكردنەوەیەكی بە رواڵەت قورس و بە تێگەیشتن و گفت و گۆ ئاساندایە ، ئاخر لە دەرەوەی بزوتنەوەكە زۆرن ئەوانەی گرەو لە سەر تەكەتولات و ململانێ‌ ی وەهمی و دروستكراو دەكەن ، كە پێویستە هەڵسوڕاوانی گۆڕان ئەو وەهمە بە تاڵبكەنەوە .
ئەم بزوتنەوەیە ناكرێ‌ لە دۆخێكی ئاواداو لە بەرانبەر ئەو ئەركەگەورانەی بەردەمیدا كێشەی ئەوە بێت رێكخەری گشتی كێ‌ بێت و خانەی راپەڕاندن كێ‌ بن ، ئەگەر بزوتنەوەیەكی زندوو بێت هەر ئەندامێكی بۆ خۆی رێكخەرێكی گشتیە ، خۆ ئەگەر واشنەبێت دەی ئێمە دەشێ‌ بەزەیمان بە هەر هەڵەو كێماسیەكدا نەیەتەوە ، هەڵبەت لەو بارەیەوە دەكرێ‌ قسەی زۆر بكرێ‌ ، بەڵام ئێستا هەر ئەو چەند دێڕە بەسە .
بڕواشم وایە بزوتنەوەی گۆڕان بەو تەمەنەكەمەوە بواری 50 ساڵی حزبە كلاسیكیەكانی بۆ گەنجان تەرخانكردوە.

نوێترین نوسینەکانی له‌تیف فاتیح فه‌ره‌ج