لە(32)هەمین ساڵیادی ڕاگواستنی: (چی کراوە بۆ قەڵادزێ؟)

وتار/ 28/06/2021 304 جار بینراوە

عەلی قەڵادزەیی

لە(32)هەمین ساڵیادی ڕاگواستنی: (چی کراوە بۆ قەڵادزێ؟)
عەلی قەڵادزەیی

ڕێک(32)هاوین لەمەوبەر بوو کاتێک ڕژێمی بەعس تاوانێکی دڕندانەی تری خستە سەر هەموو ئەو تاوانانەی کەدژ بەگەلی کورد و شاری قەڵادزێ لەمێژوی حکومڕانێتی خۆیدا ئەنجامی داون، 26ی حوزەیرانی(1989) بوو کاتێک ڕژێم دەستی دایە پڕۆسەی ڕاگواستن و کاولکردنی شاری قەڵادزێ و وێرانکردنی (125) گوندی سنورەکە و تەختکردنی تەواوی سنورەکە لەگەڵ زەوی.

تاوانی ڕاگواستنی شاری قەڵادزێ بۆ ئۆردوگا زۆرەملێکان کردەیەکی تەواو سەربازی نەخشە بۆکێشراوبوو لەلایەن سەرانی ڕژێمەوە و لەچوارچێوەی ستڕاتیژیەتی شۆڤینیانەی پاکتاوکردنی گەلێک و سوتماککردنی نیشتمانێک داڕێژرابوو، نەخشەیەک بوو لەیەککاتدا فاکتەرێک بوو بۆ دابڕینی دانیشتوانێکی ڕەسەن لەزێدی باپیرانیان و لێدانبوو لەتوانستی پێشمەرگە لەو ڕۆژگارەدا لەڕێگەی پچڕاندنی پردی پەیوەندی لەنێوان ئەم هێزە و خەڵکی کوردستان، بەشێوازێکی گشتگیرتر بڵێین پڕۆسەکە بەشێک بوو لە چوارچێوەی ئایدیۆلۆژیایەکی بەرفراوانی بەعسیزم لەکوردستان کەپایەکانی (تەعریب و تەبعیس و تەرحیل) پێکیانهێنابوو، بۆیە لەم ساڵیادە خەمناکەدا دەکرێت بڵێین ئەوەی کراوە بۆ شار زۆر کەمە و کەواتە چی بکەین؟

یەکەم: کارکردنی زۆر زیاتر بەئاقاری ئاوەدانکردنەوەی قەڵادزێ و سڕینەوەی هەموو ئاسەوارێکی ڕاگواستن و کاولکاری لەم شارە، کەبەداخەوە تاکو ئەم چرکە ساتەش شار هەموو چرکەیەک بۆنی کاولکاری و زیندویی ئایدیۆلۆژیای بەعسیزمی لەڕۆژگاری دەسەڵاتی خۆماڵی کوردیدا لێدێت.

دووەم: دروستکردنی مۆزەخانەیەکی تایبەت بۆ سەرجەم یاد و کارەساتە خەمناکەکانی ئەم شارە، لەناویشیاندا کارەساتی هەردوو 24/4 و کارەساتی ڕاگواستنی ساڵی (1989)، بەئامانجی گواستنەوەی یاد و کارەساتەکان بۆ نەوەکانی ئایندە و بەزیندویی هێشتنەوەیان لەهزری مرۆڤی کورددا.

سێ یەم: کارکردنی جیدی بۆ دروستکردنی بەنداوی دەڵگە لەسنورەکە، کەخزمەتێکی گەورە دەکات بە کەرتەکانی کشتوکاڵ و گەشتوگوزارو ئاژەڵداری و ئاوەدانکاری لەسنورەکەدا و پاراستنی شارەکەشە لە مەترسی کەم ئاوی لەوەرزی هاویندا بەهۆی گرتنەوەی زێی بچوک لەلایەن کۆماری ئیسلامی ئێرانەوە.