پارتی لە نێوان کۆنترۆڵکردنی هەست و بلۆککردنی هوشیاریدا

وتار/ 20/06/2021 331 جار بینراوە

دانا مەنمی

پارتی لە نێوان کۆنترۆڵکردنی هەست و بلۆککردنی هوشیاریدا

دانا مەنمی
زیاد له پێنج ملیۆن کورد له هەرێمی کوردستاندا خاوه‌نی چاون بۆ بینین، به‌ڵام ئه‌م چاوانه خاوه‌نی پێرسپێکتیڤی جیاوازن، به‌تایبه‌ت له بواری سیاسی و بواری ئازادی و مافەکانی مرۆڤ و  سه‌ربه‌خۆی و پاراستنی کەرامەتی مرۆڤ دا ، زانست سەلماندویەتی ئه‌وانه‌ی خاوه‌نی جووڵه‌ن زۆرتر و باشتر ده‌بینن، ئه‌وانه‌شی که‌متر ده‌جووڵێن، که‌مبینترن ، جوڵەی سیاسی لە هەرێمی کوردستان ئەگەر بە چاوی بینین خوێندنەوەی بۆ بکەین جوڵەیەکی خنکێنراوە ، پارتی وەک هێزێکی هەژمونخوازی خێڵەکی لەسەر بنەمای کاردانەوەی “پرۆڤیکاسیۆن “بێزارکردنی خەڵک و تووڕه‌کردن و بێ ئومێدبوونی خەڵک هەنگاوەکانی دەنێت ، لە پشتی ئەو بێزاریی و توڕەیی و بێ ئومێدبونەی خەڵکەوە دیوێکی تری ئامانجەکانی پارتی بلۆککردنی هوشیاری خەلک و ڕۆشنبیران و سزادانی رۆژنامەنوسان و قەڵەمە بوێرەکانە ، هەموو ئەمانە پێکەوە کۆمپلێکسیتێتی کۆمه‌ڵایه‌تی (ئاڵۆزیی کۆمه‌ڵایه‌تی) خولقاندووە کە جگە لە پارتی هیچ هێزێکی تری سیاسی سودمەند نابێت .

پارتی لەم کێڵگە سیاسی یە ئاڵۆزە شکستخواردووەدا و لەم دۆخە کۆمەڵایەتییە شێواوەدا کە خەڵکی کوردستان بێ ئومێد بوون پێویستی بە گەمەی نابەجێی سیاسی و مەشغوڵکردنی خەڵکە بە دونیای شتە بچوکەکان تا بەرهەمی هەستی مرۆڤەکان لەناو دونیای کەمتر جوڵان کەمتر بینین و بیرکردنەوەدا بچنێتەوە ، بە نمونە بۆ ئەوەی بەرهەمی هەستی هاوڵاتیانی که‌رکووک، خانه‌قین بچنێتەوە ڕوداوەکانی ١٦ی ئۆکتۆبەری ٢٠١٧ وەک چەکێکی سیاسی بەکار دەهێنێت ، لەبەر ئەوەی خودی ڕوداوەکە بەشێوەیەکی زانستی و ئەکادیمی توێژینەوەی لەسەر نەکراوە بارگاوی کراوە بە حقدوکینەی سیاسی دژ بە هێزێکی سیاسی تووڕه‌ییه‌‌کی گه‌وره‌یان هه‌ڵگرتووەو توڕەی و کینەی پارتیش ئەم پرسە هەڵدەسوڕێنێ و بیریان دەخاتەوە وەک ئەوەی دوگمەی کۆنترۆڵکردنی هەستەکانیان بە دەست پارتییەوە بێت.

پارتی دیموکراتی کوردستان وەک هێزێکی ئه‌نتی سۆسیال و هه‌ڵخه‌ڵه‌تێنه‌ر و مانیپولیره‌که‌ر، کە بە توخم رەگەزی تۆتالیتارانەوە خولقاوە لە ناو کۆمەڵگای کوردەواریدا هەژمونەکەی دۆخێکی خولقاندووە کە یەکێتی و بزوتنەوەی گوڕان و ئیسلامییەکان لە ناو مەکینەی هەژمونخوازی پارتی و سەرۆکەکەیدا ببن بە ژێرەوە ، هەرگیز یەکێتییەکەی مام جلال و کۆمەڵەکەی کاکە نەوە ڕۆحیان شاد بێت لە ژیانیاندا بیریان لەوە نەکردبویەوە کە ڕۆژگارێک بخولقێت کادیرانیان لە پارتی پارتیتر بن !

لە دوای ئاشبەتاڵی ساڵی ١٩٧٥ وە تاکو ڕاپەڕین چارەنووسی سیاسی کورد له‌مپه‌ڕی تراژیدیا و ژێرکه‌وتنه‌وه بۆ ئه‌وپه‌ڕی سه‌رکه‌وتن لەسەر دەستی دوو کەسایەتی و دوو قوتبی سیاسیدا بووە کە ئەوانیش “ مام جلال و نەوشیروان مستەفا” بوو ، هەر بۆیە وەفاتی “مام جلال و نەوشیروان مستەفا” یەکێتی و گۆڕان پێکەوە ڕۆچوون ، دوای وەفاتی کاکە نەوەو مام جلال  بزوتنەوەی گۆڕان و یەکێتی نەیانتوانی ئەو نوسەرو ڕۆشنبیرو  شاعیرو ڕۆژنامەنوسانەی کە بەهۆی “شێرکۆ بێکەس” ەوە لە دەوری یەکێتی و گۆڕان کۆبوبونەوە ئیستیسمار بکەن ، هەردوو حیزبەکە لەناو ململانێ و بەریەککەوتن و دژایەتی کردنی یەکتریدا خزمەتی باشی ئامانجەکانی پارتییان کردو جەماوەریان لێ دوور کەوتەوەو زۆرێکیش لە کادیران و هەڵسوراوانیان لەناو حیزبەکانیان بوونە سیخورو بەکرێگیراوی پارتی ، لە دوای وەفاتی “ مام جلال و نەوشیروان مستەفا “ سه‌رده‌مێکی نوێ له نەبوونی ئه‌واندا هاتە کایەوە ئەویش هەژمونخوازی پارتی و سەرۆکەکەی بوو ، ئەم هەژموونەی پارتی و سەرۆکەکەی کار لەسەر کۆنترۆڵکردنی هەستی مرۆڤەکان و بلۆککردنی هوشیاری و بێ ئومێدی و توڕەیی خەڵک دەکات ، بەشێکی زۆری خەڵکانی ڕاسیۆناڵ و رۆشنبیر لەلایەن پارتی و سەرۆکەکەیەوە هەستەکانیان کۆنترۆڵ کراوە و خۆیان توانای کۆنترۆڵکردنی هەستەکانی خۆیانیان نییە .

پرسی ریفراندۆم وەک مۆدێلێکی سیاسی و کۆمەڵایەتی یەکێک بوو لەو پرسانەی کە بە هەست و سۆزو دیدێکی حیزبیانەوە پارتی مامەڵەی لەگەڵدا کرد ، ریفراندۆم مەشروعێک بوو کە پارتی موڵکایەتی مەشروعەکەی لە گشتییەوە گواستەوە بۆ حیزبی و دواتریش بەرگێکی شەخسی کرد بەبەریدا ، پارتی لە ریفراندۆم دا هەستەکانی خەلک و هێزە سیاسییەکانی کۆنترۆڵ کرد و ئازادی مافی بڕیاردانیشی لەخەڵک سەندەوە ، ریفراندۆم بۆ خۆی مەشروعێکی رەوا بوو خەڵکی لەو ڕۆژەدا بە ئیرادەی سەربەخۆییەوە چوونە دەنگدان ، بەڵام بێ ئاگا لەوەی کە هەستەکانیان لەلایەن پارتی و سەرۆکەکەیەوە کۆنترۆڵ کراوەو بەکار دەهێنرێت بۆ مەرامی سیاسی! ماوەتەوە بڵێم وەرن با هەموو پێکەوە دوای دروشمی ئەو کوردایەتییە نەکەوین کە پارتی بانگەشەی بۆ دەکات و ئازادانە ڕاستگۆیانە کوردانە هەستەکانمان کۆنترۆڵ بکەین.

نوێترین نوسینەکانی دانا مەنمی