پەیپەرە چاکسازیەکەی پاسەوانان

وتار/ 16/06/2021 325 جار بینراوە

عەلی قەڵادزەیی

پەیپەرە چاکسازیەکەی پاسەوانان
عەلی قەڵادزەیی
چاکسازی لە پاسەوانانی بەرپرسانی حکومەت بریتی یە لەناونیشانی ئەو پەیپەرە چاکسازیەی کەڕۆژانێکە وەزارەتی ناوخۆی حکومەتی هەرێم ئامادەی کردوەو بەرزی کردۆتەوە بۆ ئەنجومەنی وەزیران بەمەبەستی تەسدیقکردنی، بەنمونە بەشێکی پەیپەرەکە لەژێر شوناسی چاکسازی جەخت لەڕێکخستنەوەی ژمارەی پاسەوانانی وەزیرەکانی حکومەتی هەرێم دەکاتەوە، ئەم ڕێکخستنەوەیەش بەجۆرێک ڕێکخراوە کەچانسی ئەوە بەهەر وەزیرێک دەدات کەژمارەی پاسەوانەکانی لە شەش کەسەوە بەرزبکاتەوە بۆ دە پاسەوان، ئەم هەنگاوەش لەمڕی هەرێم لەدوو لاوە مایەی لەسەر وەستانە:

یەکەم: بەپێی سەرچاوەکان ئەمڕۆ ژمارەی پاسەوانانی بەرپرسان لە کوردستان گەیشتوە بەنزیکەی حەفتا هەزار کەس ، ئەم ژمارە زۆرەی پاسەوانان مانگانە بڕی پێنج ملیار دینار لەداهاتی هەرێم بۆ گیرفانی پاسەوانانی بەرپرسان دەبات، بێگومان ئەم ڕێژەیەش لەم سەردەمی قەیرانی دارایی و لەم ڕۆژگاری سیستمی لێدزینی موچەی فەرمانبەراندا ڕێژەیەکی گەلێک زۆرەو پێویستیش نیە، چونکە بەداخەوە بەشێک لەم پاسەوانانە کاری باخەوانی و ئەرکی ماڵەوەیان ڕۆژانە لەلایەن بەرپرسەکانیانەوە پێ ڕایی دەکرێ ، بۆیە ناوەڕۆکی ڕاستەقینەی چاکسازی ئەوەی دەخواست کەخەمی لەپێشینەی ئەم پەیپەرە بریتی بوایە لەکەمکردنەوە لەجێگەی زیادکردن لەژمارەی پاسەوانان، وە بە دەقێک ڕێگری لە بەکارهێنانی پاسەوانان لەلایەن بەرپرسەکانیانەوە بکرایە لەکاری باخەوانی و ڕاییکردنی ئیش و کاری ماڵەوەی بەرپرسەکانیان.

دووەم: کوردستان ئارامترین و پڕئاسایشترین ناوچەی عێڕاقی نوێیە، ئەم دەستەواژەیە مەکرەمەی بەشی زۆری بەرپرسانی حزب و حکومەتە کەبەردەوام بەشەقامی کوردی دەفرۆشنەوە بەمەبەستی دروستکردنی سەروەری بۆخۆیان و زیاتر بێدەنگکردنمان، بێگومان ئەم ئاسایش و ئارامیەی ئەمڕۆی کوردستان بەر لەهەر شتێک ئەوەی دەخواست کە حکومەت بەکردار بیسەلماندایە کەرکوردستان ئارامە، ئەم سەلماندنەش بەرلە هەر شتێک ئەوەی دەخواست کەژمارەی پاسەوانانی وەزیرەکانی حکومەت لەجێگەی زیادکردن کەمتر بکرایەتەوە.