نوێكاری و بەخۆدا چوونەوە/زنجیرەی سی

وتار/ 03/05/2021 390 جار بینراوە

موحسین حسێن

نوێكاری و بەخۆدا چوونەوە
✍🏻 زنجیرەی سی: ڕێگایەك بۆ فراوانبوونی دەسەڵات
***********************
لە زنجیرەی پێشوودا ئاماژەماندا كە روحیەتی سەركەوتنمان لە دەست و بازوماندا نییە بەڵكو لە نێو چەقی دڵدایە و هەر لەوێشەوە سەرچاوە دەگرێت ، بۆیە گرنگیدانمان بە ئاوەدانكردنەوەی دڵ و پاكژكردنەوەی دەرونمان جەوهەری شەخسیەتی ئیسلامیە و ڕێگایەكی نزیكە بۆ سەركەوتن و گەیشتن بە ئامانجەكانمان ، دیارە یەكێك لەو ئامانجانەش كە لە پێناویدا تێدەكۆشین و قوربانی بۆ دەدەین بریتییە لە فراوانكردنی هێز و دەسەڵات و پێگەی ڕابوونی ئیسلامی ، جا ئەگەر سەیری قورئان بكەین دەبینین كە گەیشتن بەو ئامانجەش هەر لە بەهێزكردنی لایەنی ئیمانی و ڕوحیمانەوە سەرچاوە دەگرێت ، ئەوەتا خودای پەروەردگار لە باسكردنی سەركەوتنەكانی داود ( درودی خودای لەسەر بێت ) دەفەرمووێت [  وَاذْكُرْ عَبْدَنَا دَاوُودَ ذَا الْأَيْدِ إِنَّهُ أَوَّابٌ (17) إِنَّا سَخَّرْنَا الْجِبَالَ مَعَهُ يُسَبِّحْنَ بِالْعَشِيِّ وَالْإِشْرَاقِ ] ص 17-18 .....    واتە / یادی بەندەی دڵسۆزمان ( داود ) بكەنەوە : كە هێز و توانا و دەسەڵاتمان پێ‌ بەخشیبوو ، ئەو بەتەنگ ڕەزامەندی ئێمەوە بوو بۆیە هەمیشە دڵی لای ئێمە بوو ، هەتا كەژ و كێوەكانمان بۆ ڕام هێنابوو كە ئەوانیش تەسبیحاتی خودایان دەكرد و پێكەوە لە دەمەوئێواران و بەرەبەیاناندا.
لەبەرهەمی ئەم بۆ خودا سوڵحانەش ، بەتایبەت گرنگیدان بە دوو كاتی زێڕین بۆ عیبادەت و خواپەرستی ( بِالْعَشِيِّ وَالْإِشْرَاقِ )  خودای میهرەبان سێ‌ نیعمەتی پێ‌ بەخشین ، بەڵێ‌ سێ‌ نیعمەت كە پێویستی ئێستای هەموو سەركردە و كادیرێكی ئیسلامیە ، ئەو سێ‌ نیعمەت و خەسڵەتەش بریتین لە ( فراوانكردنی دەسەڵات – حیكمەت و دانایی – قسەزانی ) [ وَشَدَدْنَا مُلْكَهُ وَآَتَيْنَاهُ الْحِكْمَةَ وَفَصْلَ الْخِطَابِ ] ص 20 .....  واتە / ئێمە بە بەهێزكردنی پاشایەتیەكەی دەسەڵاتمان فراوانكرد ، وە حیكمەت و دانایمان پێ‌ بەخشی ، وە فێری قسە و فەرمانی بەجێمان كرد.
هەموومان دەزانین لە مەملەكەتێك كە موسڵمانان زیاد لە 95% ی دانیشتوانەكەی بێت ، وە هەموو كوچە و كۆڵانێك مزگەوتێكی تیابێت ، وە مزگەوتەكان جمەیان بێت لە ئیمانداری دەست بە دەستنوێژ و نوێژخوێن ، نەدەبوو دەسەڵات و پێگەی ئیسلامیەكان ئەوەندە لاواز بێت.
جا ئەگەر دەمانەوێت لە قۆناغی داهاتوودا دەسەڵاتی خۆمان فراوانتر بكەین و بە حیكمەت و داناییەوە مامەڵە لەگەڵ ڕودا و پێشهاتەكاندا بكەین و بە زمانێكی شیرین و حەقبێژانە قسە لەگەڵ دەوروبەرمان بكەین ، پێویستە بەخۆداچونەوەیەكی لایەنی ئیمانی و ڕوحی خۆمان بكەین ، بەتایبەت گرنگی بدەین بە نوێژی جەماعەتی بەیانیان و عیشایان ، بێگومان خودا بارودۆخی هیچ قەوم و گەلێك ناگۆڕێت ( لە ناخۆشیەوە بۆ خۆشی ، لە زەلیلیەوە بۆ سەربەرزی ، لە گرانیەوە بۆ هەرزانی ) هەتا خۆمان نەگۆڕین [ إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ ] الرعد 11 ، هەمووشمان دەزانین كە تەنها بەندە شیاو و چاكەكار و بۆ خوداسوڵحاوەكان دەبنە خاوەنی ئەم زەویە [ وَلَقَدْ كَتَبْنَا فِي الزَّبُورِ مِنْ بَعْدِ الذِّكْرِ أَنَّ الْأَرْضَ يَرِثُهَا عِبَادِيَ الصَّالِحُونَ ] الانبياء 105
چاوەڕوانی ( زنجیرەی سی و یەك ) بن.

نوێترین نوسینەکانی موحسین حسێن