مەدلولەکانی پشت توڕەیی وەفدی دانوستانکاری هەرێم

وتار/ 24/03/2021 620 جار بینراوە

عەلی قەڵادزەیی

مەدلولەکانی پشت توڕەیی وەفدی دانوستانکاری هەرێم

عەلی قەڵادزەیی
بیریاری گەورەی عەرەب محەمەد ئەڕاگۆن لە کتێبی بەرەو ئیسلامۆلۆژیای پڕاکتیکی و لەبابەتی (خۆرئاواو ناپاکی لەمۆدێرنە)دا ئاماژە بەلادانی خۆرئاواییەکان دەکات لەدەستکەوتە مرۆییەکانی مۆدێرنە لەدونیای دەرەوەی خۆیان لەڕێگەی مومارەسەی کۆڵۆنیالیزەکردنی وڵاتانەوە، چونکە لەدیدگای ئەڕاگۆن کۆڵۆنیالیزم لەجێگەی بڵاوکردنەوەی ئایدیای ڕێز و خۆشەویستی نێوان مرۆڤەکان و بەسەنتەرکردنی مرۆڤ و مافەکانی کەدوانەیەکن و بەیەکەوە جەوهەری ئاقاری مرۆگەرایی (هیومانیزم) پێکدەهێنن، ئەوا ئایدیای بەدێوکردن و خیاری توندوتیژی و شۆڕشگێرێتی لەنێوان مرۆڤی خۆرئاوایی و دەرەوەی خۆرئاوا بەرهەمهێنا، وە لەجێگەی بینای دەوڵەتێکی مەدەنی و کراوەو پێشکەوتوو کەکڕۆکی ڕۆشنگەرین، لەدەرەوەی خۆرئاوا کۆڵۆنیالیزم پرسی تاڵانکردنی وڵاتانی بەرهەمهێنا بەهۆی عەقڵی نەخۆشی چاوبرسێتی و بەهۆی عەقڵیەتی پاوانخوازیشەوە دروستکردنی ڕژێمە وەسی و دیکتاتۆرو داخراوەکانی ناوچەکەی لێکەوتەوە، لەم سۆنگەوە نوسەر ئەم لادانەی خۆرئاوایەکانی بەمەترسی خیانەتکردن لەمۆدێرنە پێناسەکردوە.

گەر ئەڕاگۆن مەترسیەکانی ئەم عەقڵە خۆرئاواییە بەرژەوەندخوازە (پاوانخوازو چاوبرسیە)ی بەکەم نەزانێت و لەئاستیدا بێدەنگ نەبێت و پێناسەی خیانەتکردنی بۆ کردبێت، ئەوا بەدیوە خۆماڵیەکەشدا ئەم عەقڵیەتە نەخۆشە بەرژەوەندخوازە (چاوبرسی و پاوانخوازە)ی دەسەڵاتە خۆماڵیەکانی ناوچەکەش هەڕ بەهەمان جۆر مایەی مەترسین، چونکە گەر ئەوکات خۆرئاواییەکان لەپێناو بەرژەوەندیەکانیان قوربانیان بەدەستکەوتەکانی مۆدێرنە دابێت، ئەوا ئەمڕۆش ڕژێمە خۆماڵیەکان لەپێناو مانەوەو دەوڵەمەندترکردنی سەرانی ڕژێمەکانیان قوربانی بەگوتاری نەتەوەیی و دروشمە جوانەکانی سەردەمی شۆڕشگێڕێتی (ئازادی و بوژانەوەو پێشکەوتنی) ڕۆژگاری شاخیان دەدەن.

دوای (١٧) هەمین جار لەهاتن و ڕۆیشتنی ماڕاسۆنی وەفدی دانوستانکاری کوردی بۆ بەغدا، بەڵام سەرئەنجام ئەوکاتەی کۆتا جار چانسی لێکگەیشتن هاتە ئاراوە لەنێوان هەرێم و بەغدا، کەچی هەر ئەوکاتەی کوتلە شیعیەکان بۆ دڵنەوایی خۆیان دەقێکیان لەشەوی ١٩ی ئەم مانگە بۆ پتەوترکردنی لەیەکگەیشتنەکە زیادکرد کەدەڵێت:( گەر هەرێم پابەند نەبوو بەناوەڕۆکی ڕێککەوتنەوە ئەوکات سەرجەم شایستە داراییەکانی دەبڕدرێت)، هەر ئەوشەوە بوو شاندەکەی هەرێم لەزیادکردنی ئەم دەقە بەجۆرێک لە دڵشکاوی و توڕەییەوە گەڕایەوە بۆ کوردستان، لەکاتێکدا کوتلە شیعیەکان نایشارنەوە گەر هەرێم ڕاستگۆیە لەڕێککەوتن و نیازی پابەندبوونی پێوەی هەیە، ئەوا ئەم دڵشکاوی و بەتوڕەیی گەڕانەوەی شاندی هەرێم بۆ کوردستان لەپای چی؟

خۆ قسەیەکی خۆمانەش بێ کوتلە شیعیەکان بەزیادکردنی ئەم دەقە بۆ ڕێککەوتنەکە هەڵەیاننەکردوەو گەر لەحاڵێکدا منیش لەجێگەی ئەو کوتلانە بموایە هەر وامدەکرد، چونکە گەر هەرێم نیازێکی شەریفانەی هەبێت و خواستی نەبێت درێژە بەسیاسەتی ڕابردوی هی خۆم بۆ خۆم و هی تۆش دەخۆم بدات، وە گەر مەبەستی نەبێت درێژە بەسیاسەتی چاوبرسێتی دوو بنەماڵە لەسەر نەوت و داهاتی هەرێم بدات و ئەمنی دارایی حزب بپارێزێت، ئەوا بێگومان ئەم دەقە بەدەر لەمانە هیچ مەترسیەکی تری تێدا نابینم بۆ سەر دروشمە نەتەوەییەکانی هاوشیوەی ئازادی و موچەی خەڵک و ئاوەدانکردنەوەی کوردستان و ئەمنی قەومی کوردی، بەڵام بەداخەوە ئەم توڕەییە ئەو حەقیقەتەی لێ ڕاڤە دەکرێت کەدەسەڵاتی کوردی خۆمانە هەرگیز ئامادە نیە واز لەسیاسەتی قوربانیدان بە دروشمە نەتەوەیی و گوتارە شۆڕشگێریە جوانەکانی دوێنێی بهێنێت لەپێناو بەرژەوەندی و دەستکەوتە مفتە حزبی و بنەماڵەییەکان.