نوێكاری و بەخۆدا چوونەوە/ زنجیرەی بیست و شەش

وتار/ 14/03/2021 457 جار بینراوە

موحسین حسێن

نوێكاری و بەخۆدا چوونەوە/ زنجیرەی بیست و شەش

✍🏻 زنجیرەی بیست و شەش : ئایا مرۆڤ لەسەر دینی هاوڕێكەیەتی؟
**********************************************
دیارە لە كۆتایی هەشتاكان و سەرەتای نەوەدەكانی سەددەی ڕابردو كاری ئیسلامی كەمتر خۆی لە كایە سیاسیەكە دەدا ، بەڵكو هەنگاوەكانی زیاتر لە پەروەردە و بانگەوازدا چڕ كردبۆوە ، بۆیە خێر و بەرەكەتێكی زۆر بە هەنگاوەكانمانەوە دیار بوو ، جا وەك ئەدەبیاتی كاری ئیسلامی قۆناغێك لە ئاستە حزبیەكدا هەبوو بە ناوی قۆناغی هاوڕێیەتی ( مرحلە المصاحبة ) ، بە جۆرێك كاتێك كەسێك پەیوەندی دەكرد بە ڕێزەكانی ڕێكخستنەوە پێویست بوو سەرەتا ئەو قۆناغە ( مرحلة المصاحبة ) ببڕێت ، پاش ئەوە ئاستە حزبیەكان دەستی پێدەكرد و قۆناغ قۆناغ هەڵدەكشا ، بەڵام لە نێو بڕگەكانی  پڕۆگرامی پەروەردەیدا بڕگەیەك هەبوو باسی لە ( هاوڕێ‌ ) دەكرد ، كە زۆر تەئكید دەكرایەوە كە نابێت مرۆڤ ( هاوڕێ ) یەتی هەموو كەسێك بكات ، چونكە مرۆڤ لەسەر دینی هاوڕێكەیەتی و كاریگەری سلبی لەسەر دروست دەبێت ، ئەوەتا پێغەمبەری خوداش ( درودی خودای لەسەر بێت ) دەفەرمووێت : [ الْمَرْءُ عَلى دِينِ خَلِيلِه ، فَلْيَنْظُرْ أَحَدُكُمْ مَنْ يُخالِلُ ] رواه أحمد في مسنده.....  ئەم بڕگەیە كە وەك وانەیەك لە بازنە پەروەردەیەكاندا دەخوێنرا وای لە كادیران دەكرد كە تێكەڵاوی هەموو كەسێك نەكەن و بەو هۆیەشەوە بانگەواز سنوردار دەكرا ... دەی باشە  ئەگەر هاوڕێیەتی ئەو خەڵكە نەكەین چۆن دەعوەیان بكەین ؟ ئەی چۆن قۆناغی هاوڕێیەتی كراوەتە ئاستێك لە ئاستەكانی ڕێكخستن ؟
بێگومان ئەگەر كەسێك كەمێك شارەزای زمانی عەرەبی بێت دەزانێت كە چەند زاراوەیەك هەیە بەتامی ( هاوڕێ‌ ) ، واتە كاتێك ئێمە ئەو زاراوانە وەردەگێڕینە سەر زمانی كوردی لە بەرامبەریدا تەنها ووشەی ( هاوڕێ‌ یان هەڤاڵ ) مان هەیە ، بۆیە هەموو زاراوەكان [ الصديق – الرفيق – الزميل – الحواري – الأصحاب – الخليل ..... الخ ] بە ( هاوڕێ‌ ) مانا دەكەین ، فەرموودەكەش زۆر بە ڕۆشنی دیارە كە باسی ( خەلیل ) دەكات و نافەرمووێت ( عَلى دِينِ صديقه ) يان ( رفيقه ) يان ( زميله ) يان ...... بەڵكو دەفەرمووێت ( عَلى دِينِ خَلِيلِه) ، خەلیلیش : واتە هاوڕێیەكی پاڵفتەی دڵسۆزی زۆر خۆشەویست ، كوردەواتەنی ( هاوڕێی گیانی بە گیانی ) كە كاریگەریان لەسەر یەكتر هەیە ، ئەمەش ڕێگا ناگرێت لە هاوڕێیەتیكردنی خەڵكانی نامولتەزیم.
جا پێویستە لە قۆناغی داهاتوودا ڕایەڵە كۆمەڵایەتیەكانمان لەگەڵ هەموو كەسێك پەرە پێبدەین ، بە مولتەزیم و نا مولتەزیمەوە ، تا بتوانین كاریگەریان لەسەر دروست كەین ، چونكە تا هاوڕێیەتییان نەكەین ناتوانین پەیامەكەمان بگەیەنین پێیان ، بێگومان خەڵكی نامولتەزیمیش زیاتر پێویستیان بەوەیە لە پەیامی ئیسلام حاڵیان كەین ، دەی با ئەو فەرموودەیەی پێغەمبەری خودا ( درودی خودای لەسەر بێت ) نەكەینە بەهانە بۆ خۆ بە دورگرتن لە خەڵكی نامولتەزیم ، بەڵكو هەوڵدەین هاوڕێیەتیان بكەین و خۆمانیان لێ‌ نزیك بكەینەوە ، جا وەك ئاماژەم بە ( زاراوەكان ) دا ، ناڵێم ببینە ( خلیل ) ی ئەو خەڵكە ، بەڵكو ببینە ( صدیق یان رفیق یان زمیل ....  ) ی ئەو خەڵكە.
چاوەڕوانی ( زنجیرەی بیست و حەوت ) بن

نوێترین نوسینەکانی موحسین حسێن