نوێكاری و بەخۆدا چوونەوە/زنجیرەی حەڤدەهەم

وتار/ 06/03/2021 360 جار بینراوە

موحسین حسێن

نوێكاری و بەخۆدا چوونەوە/زنجیرەی حەڤدەهەم

✍🏻 زنجیرەی حەڤدەهەم : پەیڕە و یان نەخشەڕێ‌
      ******************************************
بابەتێك كە زۆر كاتی ( كۆنگرە و كۆنفرانس ) ەكانی پارتە سیاسیەكانی ئەم هەرێمەی پێوە دەكوژرێت ، بریتییە لە گفتوگۆكردن لەسەر بڕگەكانی ( پەیڕەوی ناوخۆ ) ، دیارە هەموو جارێكیش لە دووای چەلەحانێیەكی زۆر مەجبور دەبین بڕگەیەك لەو پەیڕەوەدا تۆمار بكەین و بنووسین ( سەركردایەتی بۆی هەیە بە زۆرینەی دەنگ یان بەڕێژەی -  ؟  -  هەموواری برگەكانی پەیڕەو بكات )...
دەی توخوا ئەگەر ئەم مافە دەدرێتە ( سەركردایەتی داهاتوو ) چی پێویستی دەكرد كاتی ئەم هەموو ئەندامە چالاكە بەم گفتوگۆ بێ‌ بەرهەمەوە بكوژرێت !!
پەیكەری حزبی : بریتیە لەو نموونە دیزاین كراوەی كە ڕەنگدانەوەی سروشتی مامەڵەكردن ‌و هەماهەنگیە لە پێناو بەیەكبەستنەوەی ئەركەكانی تاك ‌و ئۆرگان بۆ گەیشتن بە ئامانجێكی دیاریكراو ، كەواتە پەیكەر پێكهاتەیەكە كە فەلسەفەكەی بریتیە لە ڕێككردنی پەیوەندی نێوان ئەندام ‌و ئۆرگان ....  لەم پێناسەسەوە دەبینین كە ئەم پەیكەرە تەقلیدییە داڕشتنی پەیوەندی بە هاوڵاتی ، یان خزمەت بەدەرەوەی خۆی پێ‌ نیە.
جا لەبەر ئەوەی هەموو پارتە سیاسیەكانی كوردستان سەرەتا لە حزبی شیوعی ‌و كۆمۆنیستەكان پەیكەریان وەرگرتووە ، كەواتە قاڵبێكی كۆنكرێتی ( ستالین ) یان داڕشتووە كە بە پێی تێڕوانینی ( ستالین ) یش ڕێكخستن لەسەر چوار پایە بنیات دەنرێت كە بریتین لە پایەكانی (  شوێن -  هەرەم – پرۆسە – ئامڕاز  ) ، واتە ( شوێن ) ێكی جوگرافی دیاریكراو هەبێت پارتەكە كاری تیا بكات ، پاشان ( پەیكەر ) ێكی كۆنكرێتی موقەدەسی هەبێت و دەستكاریكردنی بڤە بێت ، ئەنجا لە سنورە دیاریكراوەكەدا ( پرۆسە ) دروست بكرێت و ئەرك بۆ ( پەیكەر ) ەكە بدۆزیتەوە و پاشان ( ئامڕاز ) ی پێویست و گونجاو بخرێتە بەر دەستی ئاستەكانی پەیكەرەكە .... بۆیە دەبینین بەردەوام لە كۆنگرەكاندا گفتوگۆیەكی زۆر لەسەر پەیڕە و دەكەین و ( پەیكەر ) ەكە دادەڕێژین ، پاشان دووا كۆنگرەكان ( لیژنەی نووسینەوەی كارنامە ) كان تەشكیل دەكەین ، تا ئیش بۆ ئاستەكانی پەیكەرەكە بدۆزێتەوە و ( پرۆسە ) كە بخرێتە گەڕ ....   بەڵام دووا ئەوەی ( لە جیهاندا ) ئیشی دەوڵەت لە ( پارێزگاری سنورەكانی وڵات ‌و دەستە بەركردنی ئاسایش بۆ هاوڵاتیان ) ەوە گۆڕا بۆ دابینكردنی پێداویستی هاوڵاتیان ‌و پێشكەشكردنی خزمەتگوزاری ‌و چەسپاندنی دادگەری كۆمەڵایەتی ‌و دەستەبەركردنی ژیانێكی شایستە بۆ هاولاتیان ، بێگومان ئەركی پارتی سیاسسیش گۆڕانكاری بەسەردا هاتووە و ، كەواتە پێناسەی هاوچەرخ بۆ پەیكەری حزبی بەم جۆرەی لێ‌ هاتووە.
پەیكەری حزبی: یەكەیەكی كۆمەڵایەتیە كە تاك دەخاتە گەڕ بۆ گەیشتن ئامانجێكی دیاریكراو ، بۆیە دەتوانین بڵێین پەیامێكی كۆمەڵایەتی پێیە ( لە ئەفكار، لە قییەم ، لە خۆشەویستی ، لە بەخشندەیی ، لە هاوكاری...هتد ) بۆ بنیادنانی كۆمەڵگایەكی پڕ لە دادگەری ، بە بەشداری پێكردنی هاوڵاتی بۆ هاوكاری مرۆڤەكانی تر ، كەواتە سوود لە توانای مرۆڤ وەردەگرێت بۆ هاوكاری مرۆڤ ، بەمەش كۆمەڵگا هەڵدەستێنێتە سەر پێی خۆی تا پشت بە خۆی ببەستێت.
ئێستا لە پارتە مۆدێرنەكاندا ڕیزبەندی ئەو چوار پایەی ڕێكخستنی لەسەر بنیات نراوە بەم جۆرەی لێ‌ هاتووە ( شوێن – پرۆسە -  هەرەم -  ئامڕاز  ) ، واتە لە كۆنگرەكاندا گفتوگۆ لەسەر ( پرۆسە ) دەكرێت و نەخشەڕێی داهاتوو دادەڕێژرێت نەك ( پەیكەر ) ، چونكە پرۆسەكەیان لا پیرۆزە نەك پەیكەرەكە ، بۆیە پێویستە ئێمەش لە كۆنگرەكاندا واز لە گفتوگۆكردنی ( پەیڕەو ) بهێنین و هەوڵدەین ( نەخشە ڕێ‌ ) دیاریكەین ، واتە ئایا دەمانەوێت لە چوار ساڵی داهاتوودا چی بكەین ؟ ئەوە بكەینە ( نەخشەڕێ‌ ) و لە ( 20 خاڵ ) ێكدا كۆی كەینەوە و پاشان لیژنەیەكی پسپۆڕ دیاری بكرێت تا لە دووای كۆنگرە ( پەیڕەو ) ێك ئامادە بكات بۆ ئەوەی ئەو نەخشەڕێیە جێبەجێ‌ بكرێت و ڕیزبەندیش بۆ هەنگاوەكان دیاری بكات ، كەواتە پێویستە لەمەولا [ پەیكەرێكی نەرممان هەبێت بۆ پرۆسەیەكی گەرم ]
چاوەڕوانی ( زنجیرەی هەژدەهەم ) بن

نوێترین نوسینەکانی موحسین حسێن

خـێـزان

کەشوهەوا

بۆ بینینی كه‌ش و هه‌وای زیاتر كلیك بكه‌

تـه‌ندروستی

به‌م ڕێگایانه‌ به‌رگریی‌ له‌شت به‌هێز بكه‌

ئه‌م هه‌نگاوانه‌ په‌یره‌و بكه‌