نوێكاری و بەخۆدا چوونەوە/ زنجیرەی چواردەهەم

وتار/ 03/03/2021 305 جار بینراوە

موحسین حسێن

نوێكاری و بەخۆدا چوونەوە/ زنجیرەی چواردەهەم
شێخ موحسین حوسێن
✍🏻 زنجیرەی چواردەهەم : با پێویستی خەڵك
      پێوەر بێت نەك قەناعەتی خۆمان
      ***************************************
🌻 زێڕ بە پێی عەیارەكانی نرخ و بەهای دەگۆڕێت ، ئەوەتا دەبینین عەیارە ( 18 ) جیاوازترە لە عەیارە ( 21 ) وە هەروەها .....  كەواتە كاتێك ئێمەی ئیسلامی مامەڵە لەگەڵ جەماوەردا دەكەین پێویستە خۆمان لە ئیلتیزاماتدا عەیارە ( 21 ) بین ، بەڵام قبوڵمان بێت لە عەیارە ( 1 ) وە تا عەیارە ( 21 ) بێتە ناو ڕیزەكانمان ، جا لەبەر ئەوەی پەیامەكەمان ڕەحمەتە بۆ هەموو مرۆڤەكان بە بێ‌ جیاوازی ( وَمَا أَرْسَلْنَاكَ إِلَّا رَحْمَةً لِلْعَالَمِينَ) الأنبياء 107  پێویستە ڕەزیل نەبین و بەشی هەموو كەسێكی لێ‌ بدەین ، كەواتە مەرجی ئیلتیزاماتی تەواو و قورس بۆ وەرگرتن وا دەكات كە خەڵكانێكی كەم خۆیان لە ڕیزەكانماندا ببیننەوە ، ئەمەش بێ‌ ئەوەی بەخۆمان بزانین پێچەوانەی دروشمی  ( وَمَا أَرْسَلْنَاكَ إِلَّا رَحْمَةً لِلْعَالَمِينَ) و مانای وەستانی كاریشە ، بێگومان ئەصڵ لە كاری ئێمە وەرگرتنی خەڵكی نا مولتەزیمە نەك خۆبەدورگرتن لێیان ، تا بتوانین بەرە بەرە و قۆناغ قۆناغ بەرەو ئیلتیزاماتی تەواویان بەرین ، پێشتر سانسۆرمان لەسەر خەڵكی هەبوو ، هەموو كەس بۆی نەبوو لێمان نزیك بێتەوە و خۆی بە ئەندام یان دۆست و لایەنگری ئێمە بزانێت ، بۆیە پێویست دەكات لە قۆناغی داهاتوودا بازنەی وەرگرتن فراوان بكەین و مەرجی ئەندامبوون ئاسان بكەین ، دەبێت پێویستی خەڵك بكەینە پێوەر بۆ پێدانی بنەما ئاینیەكان ، نەك قەناعەت و ئارەزوی خۆمان ، بە مانایەكی تر : ئەگەر وا دابنێین هەموو ئەو بەرنامەیەی كە پێمانە نرخەكەی ( یەك ملیۆن دۆلارە ) ، نابێت داوامان لە خەڵكی بە جۆرێك بێت ئەگەر ئەو بڕەی پێنەبێت ئیتر بۆی نییە خۆی بە دیندار بزانێت ، وەك پێشتر مومارەسەمان دەكرد ، بەڵكو پێویستە وردی بكەینەوە بۆ پارچەی بچوكتر و هەر كەسە چەندی دەوێت ئەوەندەی بدەینێ‌ ، بۆ نموونە : لەوە دەچێت ئافرەتێك نەتوانێ‌ حیجاب بكات ، بەڵام ئامادەیە نوێژەكانی بكات ، یان پیاوێك نەتوانێ‌ فڵانە كار ئەنجام بدات ، بەڵام لە فڵانە ئەركدا چالاكە .... هتد ... دەی با لەمەولا وەك دوكاندارێكی كارامە و بەئەزموون مامەڵە بكەین ، ئەو شتەی كە دەمانەوێت بیخەینە بازاڕەوە پێویستە بیرازێنینەوە و لەبەر چاوی كڕیارەكان جوانی بكەین ، پاشان هەر كڕیارە بایی چەندی دەوێت ئەوەندەی پێ‌ بدەین ، نەك ئەگەر ( یەك ملیۆن دۆلار ) ی پێ‌ نەبوو مافی ئەوەی نەبێت پەیامەكەمان لێ‌ وەرگرێت. 🥀
چاوەڕوانی ( زنجیرەی پانزەهەم ) بن

نوێترین نوسینەکانی موحسین حسێن