نوێكاری و بەخۆداچوونەوە .. هەڵوێست لە مەڕ نوێكاری/ زنجیرەی شەشەم

وتار/ 13/02/2021 411 جار بینراوە

موحسین حسێن

نوێكاری و بەخۆداچوونەوە .. هەڵوێست لە مەڕ نوێكاری/ زنجیرەی شەشەم

شێخ موحسین حوسێن
*************************
✍🏻 زنجیرەی شەشەم 6️⃣ : هەڵوێست لە مەڕ نوێكاری
هەر كاتێك لە نێو حكومەتێك یان كۆمەڵێك یان پارتێك یان ڕێكخراوێك باسی نوێكاری هاتە پێشەوە ، پێنج هەڵوێستی لێك جودا دێنە ئاراوە:
1. ئەوانەی لە گۆڕنكاری دەترسن ‌و وەك كۆدەتا ‌و تۆڵەسەندنەوە بۆی دەڕوانن.
لە ناو هەموو ڕێكخراوو پارتێكدا كۆمەڵە كەسێك هەن كە تەنها بەرژەوەندی خۆیان لەبەر چاوە و ، دەترسن لە هەموو گۆڕانكاری ‌و نوێبوونەوەیەك ، بە خۆ بەستنەوەیان بە كۆمەڵێك یاسا و ڕێسای سواوی كۆن دژایەتی هەموو نوێكاری ‌و گۆڕانكاری ‌و داهێنانێك دەكەن ‌و هەنگاوەكانی چاكسازی پەك دەخەن ، كە زۆر جار بە بەكارهێنانی هەندێك زاراوە بەربەستێكی پۆڵاین لەبەر دەم نوێخوازاندا دادەنێن.
2. ئەوانەی خۆیان مەڵاسداوە بۆ قۆستنەوەی بەرهەمی هەنگاوەكانی نوێخوازەكان.
كەسانێك هەن دەتوانن بۆ ماوەیەكی زۆر لە ئاست واقیع ‌و كێشەكان بێدەنگ ‌و بێ‌ هەڵوێست بن ، چونكە روحێكی كۆنە پارێزی دەمی هەڵدرون ، ئەویش بۆ ئەوەی ئەو پلە و پایە و بەرژەوەندییەی هەیانە ‌و پێی گەیشتوون لەدەستی نەدەن ، بەڵام هەر كاتێك باسی گۆڕانكاری هاتە ئاراوە سوار ئەو شەپۆلە دەبن ‌و بە زمانە لوس ‌و كاریگەرەكەیان دێنە گۆ و، لە پەیوەندیەكانیان ‌و لە كەناڵەكانی راگەیاندندا وەك فەیلەسوفی گۆڕانخواز ‌و نوێخواز خۆیان دەناسێنن ‌و ، پرۆژە ‌و بەرنامەی گۆڕانكاری بۆ ئایندە دادەنێن ‌و، خۆی ‌و حاشیەكەی دەبنە پالێوراوی پرۆسەكانی داهاتوو ، خۆ ئەگەر سەركەووتنیشیان بەدەست نەهێنا ، ئەو كات كەڵكەڵەی كوتلەبازی لەسەریان دەدات. 
3. ئەوانەی لە پێناو گۆرانكاریدا بیردەكەنەوە.
ئەو كەسانەن كە رۆژانە لەسەر جەستە و روحی خۆیان تاڵی ئەو واقیعە دەچێژن كە پارت یان ڕێكخراو یان كۆمەڵەكەیان بۆی هێناونەتەدی ، ژمارەشیان زۆرە و بیركردنەوەشیان لە گۆڕانكاری بنەمایەكی واقیعی هەیە نەك ئارەزوویەكی هەرزەكارانە ، بەڵام حەیف هیچیان بەدەست نییە.
4. ئەوانەی گۆڕانكاریان پێدەكرێت بەڵام نایكەن :
كەسانێك هەن لە سەرچاوەی بڕیاردان ، دەتوانن پێشەنگی گۆڕانكاریەكان بن ، بەڵام بە داخەوە جورئەتی بڕیاردانیان نییە و ئەو هەنگاوە پیرۆزەیان پێ‌ نانرێت.
5. ئەوانەی دەتوانن گۆرانكاری دروست بكەن.
كەسانێكن دەتوانن لە هەستیاری خەڵكیدا جێگای خۆیان بكەنەوە ئەویش بەهۆی زانینی هونەری پەیوەندی كردن ‌و خوێندنەوەی ئەو واقیعەی تێیدا دەجوڵێن ، هەر چەند ژمارەیان زۆركەمە ، بەڵام خۆخستنە بەردەم مەترسیەكان ئیرادەیەكی بەهێزی بۆ بریاردان پێ‌ بەخشیون ، دیارە هەموو گۆڕانكارییەك جۆرێكە لە داهێنان ‌و هێنانەكایەی ئەو دیاردانەیە كە پێشتر نەبوون ‌و پێویستی پارتەكە یان كۆمەڵەكە دەیخوازێت بێنە كایەوە ، ئەمەش بە سیاسەتێكی كارامە و ئیرادەیەكی پتە و بەردەوامی دەداتە كار ‌و بەرگێكی نوێش بە بەر هەنگاوەكانی داهاتوودا دەكات.
ئەم قۆناغەشمان دەخوازێت گۆرانكاریەكان لە مەبەستێكی سیاسی ‌و ئیداری ڕووتەوە بگوێزینەوە بۆ ئاستێكی فیكری ‌و ڕەهەندێكی دیكەی پێ‌ ببەخشین ، مەرجیشە لە پشت هەموو هەنگاوێكی گۆرانكاری وەڵامێك هەبێت بۆ ئەو پرسیارەی كە دەپرسێت : گۆڕانكاری لە پێناو چیدا؟
چاوەڕوانی ( زنجیرەی حەوتەم 7️⃣) بن

نوێترین نوسینەکانی موحسین حسێن