نوێكاری و بەخۆدا چوونەوە/زنجیرەی یەكەم

وتار/ 04/02/2021 340 جار بینراوە

موحسین حسێن

نوێكاری و بەخۆدا چوونەوە/زنجیرەی یەكەم

شێخ موحسین حوسێن
مافی جێنشینیەتی ئادەمیزاد لەم سەر زەویەدا پەیوەستە بە هەڵگرتن ‌و پارێزگاری كردن لە ئەمانەتێك ، هەروەك پەروەردگارمان دەفەرمووێت [ إِنَّا عَرَضْنَا الْأَمَانَةَ عَلَى السَّمَاوَاتِ وَالْأَرْضِ وَالْجِبَالِ فَأَبَيْنَ أَنْ يَحْمِلْنَهَا وَأَشْفَقْنَ مِنْهَا وَحَمَلَهَا الْأِنْسَانُ إِنَّهُ كَانَ ظَلُوماً جَهُولاً ] الأحزاب:72
واتە: ئێمە ئەم ئه‌مانەتییەمان لە بەرامبەر ئاسمانەكان ‌و زەمین ‌و ئەو هەموو كێوانە ڕانا ، كەچی هیچیان لە خۆیان ڕانەبینی بچنە ژێری ‌و لێی دەترسان بۆیە دەستیان پێوە نا ، بەڵام مرۆڤ لە ئەستۆی خۆی گرت ‌و هەڵیگرت ، كە نەیزانی سەبارەت بە خودی خۆی غەدری كرد .
جا بۆ ئەوەی هەڵگرتنی ئەمانەتەكەی كەمەكێك لەسەر ئاسان بكات ، پەروەردگارمان ژیری ‌و توانایەكی بەخشیە ئادەمیزاد تا لایەق بێت بەوەی بتوانێت بەجوانترین شێوە سەر زەوی ئاوەدان بكاتەوە ‌و بینای ژیانی تێدا بكات ‌و چڵەپۆپەی شارستانی بۆ خۆی بپچڕێت .
بۆ بەرز ڕاگرتن ‌و پارێزگاری ئەو ئەمانەتەش لەسەر مرۆڤەكان پێویست كراوە كە لە سنوری چوارچێوەیەكی دیاری كراودا هەنگاو هەڵگرێ‌ و جوڵە دروست بكات ‌و نوێكار بێت ، بێ‌ ئەوەی بۆ سەركەوتن ‌و هەنگاوەكانی چاوەرێی موعجیزە ‌و موفاجەئات بكات .
جا ئەوەی پێویستە لە هەنگاوەكانمان ئاگاداری بین بریتیە لەوەی كە رۆژگاری ئەمرۆمان ژیانی وابەستە كردوین بە زنجیرەیەك شێوەی لێك جیا ، كە لەدەرەوەی خۆمان بریاری لەسەر دراوە و رۆڵمان لەسازدانیدا نەبووه.
دیارە كەسێكی خاوەن پەیامیش كە ڕاسپێردراوە پارێزگاری لە ئەمانەتێك بكات دەبێت لەناوەندێكی وادا پێداویستییەكانی ژیانی بەرەنج ‌و قوربانیدان بكرێت ‌و ، نابێت هەموو كردار و چالاكیەكانی پابەندی ئەو هەل ‌و مەرجانە بێت كە ڕووداوەكان بەرهەمیان هێناون ، بەڵكو دەبێت ئازادیەك بداتە خۆی هەتا لە دەرگای شتە نوێكان بدات ‌و شێوازێكی گونجاو بۆ هەنگاوەكانی هەڵبژێرێت .
پێویستە ئیعترافیش بەوە بكەین ، كە زۆر هەنگاوی دەق پێوە گرتوو هەن كە هەڵگری كارەسات ‌و نا ئومێدین بەڵام بەناوی ( پێویستی ) یەوە قەناعەتمان بە خۆمان كردووە كە لەسەریان بەردەوام بین ‌و دەست بەرداریان نەبین ، بێ‌ ئاگا لەوەی كە كەوتووینەتە زەمەنێك كە دەخوازێت دڵسۆزانە ( پێویستی ) سنوردار بكەین ، چونكە چەمكی ( پێویستی )چەمكێكی فرە ڕەهەندە و یەك مانا و یەك دۆخی دەركەووتنی نییە .
یەكەمین تۆوی گۆرانكاری و نوێبوونەوە لە پەراوێزی ئەو ئەزموونەوە هەڵدەوەرێت كە لەكاتی نەهامەتی ‌و ناخۆشیەكاندا هەستی پێ‌ دەكەین ‌و پاشان لە هزرماندا چەكەرە دەكات ‌و ، كاتێكیش كەشێكی هێدی ‌و گونجاو دروست بوو لەسەر ئەزری واقیع سەوز دەبێـت ‌و ، هەر كاتێكیش هەنگاوەكە كرایە كردار سەر لە نوێ‌ پێدەگرینەوە ‌و تێهەڵچونەوەمان بۆكارو چالاكی بە شێوازێكی گونجاو پێ‌ دەبەخشێتەوە .
ڕووداوە تاڵ ‌و شیرینەكانی ڕابردووش هەموومانی فێری جۆرێك لە خۆناسین ‌و بەخۆداچوونەوە كردوە و بوونەتە ئەزموونێك گەشەی بەعەقڵمان داوە ، بۆیە ئەمجارە نابێت تەنها هەستەكانمان بدوێنین ‌و راپێچی ناو یادەوەریەكانی بكەین ، بەڵكو دەبێت هوشیاریمان بیدار بكەینەوە تا ئاراستەی نیگامان لەتەماشاكردنی لاشە شەتەك ‌و ماندووەكان بگوێزینەوە بۆ تەماشاكردنی ئاسۆكانی بەردەوامی .
چاوەڕوانی ( زنجیرەی دووەم ) بن .....

نوێترین نوسینەکانی موحسین حسێن