ڕێگا چارە چیە؟

وتار/ 05/12/2020 779 جار بینراوە

ئەمیر مام والی

ڕێگا چارە چیە؟

ئەمیر مام والی
ئەمە ئەو پرسیارەیە کە زۆرێک لە ئێمە ڕۆژانە ئاڕاستەی خۆمانی دەکەین و هەمیش ئاڕاستەی یەکتری دەکەین. پرسیارێکی ئاسان و وەڵامێکی قورس، پرسیارێک لەدڵەوە ئەکرێت و وەڵامێک بەدەم ئەدرێتەوە، پرسیارێک کە ڕۆژ لەدوای ڕۆژ ئەهلی وەڵامدەرەوەکانی زۆرتر ئەبێت و بکەرانی وەڵامدەرەوەکانیشی کەمتر ئەبێت.
پێش ئەوەی باسی ڕێگا چارەی دەربازبونمان بکەین دەبێ بپرسین ئایا ئێمە ئامادەیمان تێدایە بۆ دەربازبوون؟
لەکۆی نزیکەی ۷۰۰۰۰۰ هەزار مووچەخۆری ناڕازی بەزمان، لەواقیعدا ۷ هەزاری ئامادەنین بۆ دەربازبوون. لەکۆی گەلێکی ٦ ملێۆنی ٦ هەزار کەس ئامادەنین بۆ چارەسەرکردن.
ئێمە بە غەیری زمان کردارمان نیە،هەموومان بەزمان شۆڕشگێڕین بەڵام کە هاتە سەرکردار ئەقڵ و لاشەمان گێڕ ئەبێت و لەجوڵە ئەکەوین. بۆگۆڕانکاری سەرەتاسەری دەبێ واز لەداواکاری پێدانی مووچە بهێندرێت و ئاستی داواکارییەکان فراوانکرێت.

ئەی ڕێگاچارە چیە؟

۱-دیاریکردنی دروشم
هەر ئاینێک یان بەرنامەیەک یان حیزبێک، هەتا لەئاستی تاکیشدا کە دەیەوێت کارێک بکات دەبێ دروشمەکەی بۆخەڵک ڕوون بکاتەوە، ناڕەزایەتی بەبێ دروشم نەزانی و نەفامییە. تۆ دەبێت دروشمەکانت دیاری بکەیت و بەخەڵک بڵێیت کە چیت دەوێت و بۆچی هاتویتە سەرشەقام. گەر دروشمەکەت بۆ مووچەیە ئەوا مووچە چارەنوسی نادیارە. گەر دروشمەکە بۆ چاکسازییە بەدڵنیاییەوە حکومەت ناتوانێت چاکسازی بکات چونکە خۆی خراپەکاری سەرەکی و خوڵقێنەری ئەم دۆخە خراپەیە.
خەڵک بەئاسانی خوێنی خۆی بەقوربانی ناکات تا نەزانێت لەخوێنەکەی چی سەوز ئەبێت، خەڵک نایەوێت لەخوێنەکەی گروپێک ترسنۆک و بێ مۆڕاڵی دیکە زیاد بن کە بانگەشەی لادانی فیرعەونیان دەکرد و ئێستاش خۆیان بوون بە فیرعەون.

۲- خۆبەکەمزان نەبین
ڕێگاچارەی خەڵک بۆ دەرباز بوون لەم دۆخە ئەوەیە کە ئیدی ئومێد لەسەر قسەی سواوی هیچ حیزب و لایەنێک هەڵنەچنن،
نابێ خەڵک چاوەڕێی موسایەک بێت بەدار عەسایەک لەم دۆزەخە بەهەشتێکی بۆ بخوڵقێنێت، دەبێت هەموومان بەرگی خۆ بەکەمزانی و ترس لەناخمان فڕێ بدەین، نابێ هەرکەس و چاوڕەڕێی کەسێکی دیکە بکات ڕزگاری بکات دەبێ ئێمە خۆمان ڕزگارکەری خۆمان بین.

۳- کاری پێکەوەیی
پێویستە لەناو خۆپیشاندەراندا تیمێکی شارەزا دروستبکرێت بۆ ئاڕاستەکردنی خۆپیشاندانەکان. دەبێت بەزووترین کات بەبەرنامه ئاستی داخوازییەکان و ڕێژەیی داخوازیکەران زیاد بکرێت و ڕێگا بەکەسانی حیزبی و دەستەمۆکراوانی حیزب نەدەین خۆیان بکەن بەخاوەنی ناڕەزایەتیەکان.

٤- لۆبی و تەڵەکەی میدیا
پێویستە لۆبییەکی فراوان هەم لەناوەوەو هەم لەدەرەوەی هەرێم دروست بکەین و نوێنەرانی ئەمرێکاو وڵاتانی دیکە لەم زوڵموو زۆرە بەئاگا بهێنن. وەک ئەزانرێت حکومەت لەڕێگەی میدیاوە دەیەوێت خۆپیشاندانەکان سوک و بێ بەهابکات.نابێ بکەوینە داوی میدیا تەڵەکەبازەکانی حیزب و حکومەت و سارد ببینەوە لەداواکانمان.ئێمە پێویستە بەردەوامبین و پشتمان بەخوداو بەیەکتری بەهێز بێت ونیەتەکەمان بۆ چاکەی گشتی بێت تا هەم خوداو هەمیش خۆمان هاوکار بین لەبەدی هێنانی مافەکانی خۆماندا.

نوێترین نوسینەکانی ئەمیر مام والی