فۆبیای پارتی گردبونەوەی خەڵک و ڕەخنەگرتن لە ماڵباتە

وتار/ 19/05/2020 595 جار بینراوە

عەلی قەڵادزەیی

فۆبیای پارتی گردبونەوەی خەڵک و ڕەخنەگرتن لە ماڵباتە

عەلی قەڵادزەیی
یەکێک  لە  خەسڵەتە  هاوبەشەکانی  دەسەڵاتە  گەندەڵ  و دیکتاتۆرەکانی  دونیا  بریتیە  لە  ترسانیان  تاکو  ڕادەی  (فۆبیا)  لە  گردبونەوە و هاتنە  سەر  شەقامی  خەڵکی  ناڕازی  لە  وڵاتەکانیان ، چونکە  ئەم  دەسەڵاتانە  ویستویانە  بە  زۆر  باوەڕ  بەدەرونی  خۆیان  و  دۆست  و  نەیارە  دەرەکیەکانیان  بکەن  کە  بەڵێ  سەرجەم  کۆمەڵگە  لێیان  ڕازییە  و  وەکو  مێگەل  دوایان  کەوتووە ، ئەی  ئەوە  نیە  لەهەڵبژاردنەکاندا  سەرۆک  ٩٩.٩٩٪ ی  دەنگی  خەڵک  بۆ  خۆی  مسۆگەر  دەکات  و  ساڵ  دوای  ساڵیش  ئەم  کێرڤی  لەگەڵبونەی  خەڵک  بۆ  خۆیی  و  حزبەکە  بەرزتر  دەبێتەوە ، بەڵام  بەپێچەوانەوە  کاتێک  خەڵکانێک  لەبەرامبەر  ئەوان  گردبونەوە  دەکەن  و  دەڕژێنە  سەر  شەقامەکان  و  داوای  نان  و  ئازادی  و  چاکسازی  بە  ئاشکرا و  بەدەنگی  بەرز  دەکەن ، ئەوکات  سەر  لەبەری  دونیای  ڕەفاهیەتی  ئەم  حوکمڕانانە  دەبێتە  لەرزو  تاو  فۆبیا ، چونکە  هەر  چرکەیەکی  گردبونەوەکان  بەدرۆخەرەوەی  ئەو  جیهانبینیە  ساختەیە  کە  بە  زۆر  لە  هزریان  کێشاویانە  و  دەرونیشیان  پێ  ئەرامکردۆتەوە  کەگوایە  سەرۆکیان  سەرۆکی  قائید و  حزبیان  حزبی  قائیدی  بێ  ڕکابەرە ، وە  هەر  هەنگاوێکی  چونە  ناو  گردبونەکان  بەلای  ئەمانەوە  بریتیە  لە  پڕۆژەیەک  بۆ  ڕاستەوخۆ  لێدان  لەم  وێنایەی  کەئەم  جۆرە  دەسەڵاتدارانە  لە  هەڵبژاردنەکاندا  بە  ترس  و  تۆقاندن  و  تەزویرچێتی  بۆ  دەنگەکانی  سەرۆک  و  کورسیەکانی  پەڕلەمانی  خۆیان  کێشاویانە .
 پارتی  دیموکڕات  یەکێکە  لەو حزبە  قائیدانەی  کەزۆر  کەیفی  بەگەمەی  دیکتاتۆرەکان  دێت  و  ساڵانێکیشە  لەسایەی  حوکمی  ئەم  حزبەدا  لێشاوێک  لە  دزی  و  تاڵانی  و  پیسخۆری  کوردستانی  داپۆشیوە ، ئەم  حزبە  لە  مێژوی  حوکمڕانێتی  خۆیدا  سەلماندویەتی  کە  چارەی  (ڕەخنەگرتن  لە  ماڵبات  و  گردبونەوە و  خۆپیشاندانی)  خەڵکی  ناڕازی  ناوێت  لە  تخوبی  قەڵەمڕەوی  خۆیدا ، حەز  دەکات   گردبونەوە  هەر  نەبێ  بەڵام  لە  حاڵێکدا  کە  دەشبێت  شەیدای  ئەوەیە  کە  گردبونەوەی  ناڕەزایەتی  نەبێت  بەڵکو  گردبونەوەی  هۆڕنلێدان  و  پیاهەڵدان  بێت  بەشان  و  باڵی  خۆیاندا .
 لای  پارتی  پرسی  ڕەخنە  گرتن  لە  ماڵبات  ساڵانێکە  پرسێکی  تابۆکراوە  و  ئەوەیان  تەواو  بڕاوەتەوە ، وە هەر  کەسێک  جورئەتی  ئەوەی  کردبێ  ڕۆژێ  لە  ڕۆژان  ئەم  تابۆیە  بشکێنێت  ئەوە  ڕوبەڕوی  ترس  و  تۆقاندن  و  هەندێ  جار  تیرۆرکردنیش  بۆتەوە ، (سەردەشت  عوسمان و  سۆران  عومەر)  دوو  قوربانی  ئەم  مەیدانەن  و بە  هۆی  شکاندنی  ئەو  تابۆیەوە  سەردەشت  ڕوبەڕوی  تیرۆرکردن  و  سۆرانیش  ڕوبەڕوی  لە  پەڕلەمان  وەدەرنان  و  لێسەندنەوەی  حەصانەی  پەڕلەمانی   بۆوە .
پارتی  تاکو  ڕادەی  فۆبیای  سیاسی  لە  گردبونەوەی  خەڵک  لە  ناو  ماڵی  خۆیدا  دەترسێت ، بۆ  ئەوەی  ئەم  فۆبیایە  نەبێت  هەمیشە  هەوڵی  داوە  کە  قەیدێک  لەبەردەمی  گردبونەوەکان  دابنێ  بە  پێنەدانی  مۆڵەتی  یاسایی  بە  بیانویەکەوە ، وە  لە  چرکەساتەکانی  ئەنجامدانیشی  مامۆستایان  و   توێژەکان  زۆر  بە  توندی  ڕوبەڕوی  ڕفاندن  و  گرتن  و شەق  لێوەشاندن  بونەتەوە ، بەڵام  لە  کۆتایدا  فۆبیای  پارتی  لە  گربونەوەکان  ڕەوشێکی  تەندروستی  وەهای  دروستکردوە  بەجۆرێک  کە  ئەگەر  هەر  نەیتوانی  ڕێگە  لە  خەڵکی  برسی  و  گیرفان  بەتاڵ  بگرێت  کە  نەڕژێنە  سەر  شەقام  و  ناو  پاڕکەکان ، سەرئەنجام  ئەم  فۆبیایە  دەبێتە  دەلاقەیەکی  ئەرێو  مڕومۆنی  و  بێمنەتیەکەی  پارتی  لە  ناڕەزایەتیەکان  دەشکێنێت ، هەموان  بیرمانە  لە  ڕۆژگاری  نیوەموچەدا  کاتێک  مامۆستایان  و  فەرمانبەرانی  سلێمانی  و  گەرمیان  و  ڕاپەڕین  دوو  ساڵ  بایکۆتی  دەوامیان  کردو و  چونە  سەر  شەقام  و  هوتافکێشانیان  وەکو  ژەمێکی  نانخواردن  لێکردبو ، کەچی  لەبەرامبەردا  پارتی  لۆکەی  خستبوە  گوێکانیەوە  و  هیچی  نەدەبیست  چونکە  (ئاگرە  سورە  لە  خۆم  دورە  بوو) ، بەڵام  ئەو  ڕۆژەی  ئاگرەکە  نزیک  کەوتەوە  و  مامۆستایان  و  فەرمانبەران  بۆ  ماوەی  (٣) ڕۆژ  لەسەر  یەک  گردبونەوە  لە  شاری  هەولێر ، سەرئەنجام  ڕاستەوخۆ  حکومەت  گوێکانی  کردەوە  و بڕیاری  هەڵوەشاندنەوەی  سیستمی  نیوەموچەیدا ، ئەمجارەش  لە  ڕۆژی  شەممە  تەنیا  گردبونەوەیەکی  چەند  کاتژمێری  مامۆستایانی  دهۆک  توانی  ببێ  بە  شۆڕشێکی  گەورە  و  بەهۆیەوە  دوای  دوو  مانگ  حکومەتی  هەرێم  ڕاستەوخۆ  بڕیاری  پێشخستن  و  دابەشکردنی  موچەی  مامۆستایانی دا.

نوێترین نوسینەکانی عەلی قەڵادزەیی