سۆران عومەر لە بەردەم سەلماندنی ڕاستی قسەکانی و فەراغی سەروەری یاسا

وتار/ 10/05/2020 775 جار بینراوە

عەلی قەڵادزەیی

سۆران عومەر لە بەردەم سەلماندنی ڕاستی قسەکانی و فەراغی سەروەری یاسا

 
عەلی قەڵادزەیی
ڕۆژانێکە لە ژمارەیەک میدیا و ڕاگەیاندنەوە ئاشنای بیروبۆچونی ژمارەیەک پەرلەمانتار و ڕاگەیاندنکاری  حزبی  دەبین کە  قسەکانی  هەموانیان  لە یەک  دەستەواژەدا  دەخولێتەوە  و دەڵێن : ( گەر سۆران عومەر بەڵگەی سەلمێنەری لایە بۆ ڕاستی قسەکانی لە دادگادا لەسەر تۆمارکردنی سکاڵایەکی  سەرۆکی  حکومەت  ئەم  پەلە  قاژەی  لە  پای  چی ؟ ).                                      
بەڵگە نەویستە کە پەنا بردن بۆ یاسا و تۆمارکردنی سکاڵا  لە دادگاکاندا بەمەبەستی یەکلایی کردنەوەی  دۆسێکان و دیاریکردنی  ڕاستی  و ناڕاستی لە یەکتری بەهەموو پێودانگەکان  پڕۆسەیەکی  مەدەنی  و  دیموکڕاتیزەکراوە  و لە هەموو  خیارەکانی  تر ئەهوەنترە  لە  دونیای  ئەمڕۆمان ، بەڵام  بێگومان  ئەم  هەنگاوەش  بە گوڵ  نەچێنراوە  و گرفتی  خۆی هەیە ، ئەوکات  گرفتەکە  نامێنێ  کە  مەرجی  یاسا  سەروەرێتی  لەم  وڵاتە  بوونی  هەبێت  و  هەژمونی  حزب  و  حکومەت  بەسەر  دامەزراوە  یاسایی  و  دادوەریەکانەوە  بەتەواوی  وشک  بوبێت ، واتا بە مەرجی  جێبەجێکردنی  ئەو  تێزەی (مۆنتیسکیۆ) کە  مەرجی  دیموکراتی  بونی  وڵاتێکیشە  و ناواخنی  بریتیە  لە جەختکردنەوە  لەسەر  لەیەک  جیاکردنەوە  و سەربەخۆیی هەرسێ  دەسەڵاتەکە  ( یاسادانان  و جێبەجێکردن و دادوەری ) لە بەرامبەر  یەکتری .                                                                                               
بەیاننامەکەی کۆمەڵی ئیسلامی و پەلە قاژەکەی سۆران عومەر (وەک پارتیەکان دەڵێن ) پەلە قاژەیەک  نیە  لەسەر مەبنای نەبونی بەڵگەو ناڕاستی قسەکانی سەرچاوەی گرتبێ ، سۆران عومەر بەو پێیەی لە دەلاقەی جیهانی ڕۆشنبیریەوە  داخڵی ناو  دونیای سیاسەت  و کاری  پەرلەمانتاری  بووە ، هەر بۆیە  ئەم  پیاوە  باش  لە ئەلیف  و بێی  یاساکانی  نوسین  و قسەکردن  و سنورەکانی  تەشهیرکردن  دەزانێت و کاری پەرلەمانتاریش  ئەزمونێکی زۆرتری  پێدا ، بەحوکمی  ئەوەی  ئەم  پیاوە  هەمیشە  پیاوێکی  ئازا  و  ئازاد  بووە و دەستی  خستۆتە  سەر  برینەکان  لە  ناو  پەرلەمان  و  دەرەوەی  پەرلەماندا هەر  بۆیە  بەشێکی  موی  سەری  لە هاتن  و  چونی  بەردەم  دادگاندا  سپی  کردوە  بە  هۆی  سکاڵاکانی  نوخبەی  دەسەڵاتدارەوە ، بۆیە  ئەم  پیاوە  کاتێک  قسە  دەکات  و  ڕەخنە  دەگرێت  خۆی  باش  دەزانێت  چی  دەڵێت  و باشیش  ئەو  حەقیقەتە  فێربوە  کە نوخبەی  فەرمانڕەوا  لەم مەملەکەتەدا  بە  جۆرێک  گرێی  دەرونیان  بەرامبەری  بۆ  دروست  بووە  کە  چاودێری  ئەو  کۆکەیەش  لەوانەیە بکەن   کە لە دەمیەوە  دەردەچێت ، بە بیانوی  ئەوەی  نەوەک  ئاوێتەی  کۆرۆنا  ڤایرۆس  بوبێت .                      
هەمیشە  باوەڕم  بەو  ڕاستیە  هەیە   کە سۆران  عومەر  پیاوێکی  بوێر  و  حەق  بێژە  و  ترسی  نیە  بەرامبەر  ستەمکاران  و  پیسخۆر و مافیاکانی  نەوت ،  بۆیە  پەلە  قاژەی  ئەو  گەر  ئەم  قسەیە  ڕاست  بێت  ئەوا  پەلە  قاژە  نیە  لە  ترس  لە ناڕاستی  قسەکانی ، بەڵکو  پەلە  قاژەی  ئەو  گەر هەبێت  ئەوا  پەلە  قاژەیە  لە  دەست  دۆخی  خراپی  یاسا  و  دادگاکان  لەمڕۆ  کوردستان ، چونکە  حزبی  کوردی  بە  جۆرێک  ئاوێتەی  کۆمەڵگە  بووە  کە  بۆتە  خوێ  و چۆتە  ناو  چێشتی  هەموو  ماڵێکەوە ، ئەم  واقعە  خوێینەش  وایکردوە  هەر  دۆسیەیەک  خاوەنی  جانبێکی  سیاسی  بێت  و لە لایەن  یەکێک  لە  نوخبە  سیاسیەکانی  حزبی  باڵادەستەوە  لێرە و لەوێ  لەسە  یەکێک  تۆمار  کرابێت ، ئەوا  دەرەنجامەکەی  دیارە  و هیچ  کەسێک  ناتوانێ  ئەوکات  حەقیقەتی  قسەکانی  بسەلمێنێ ، بۆیە  سۆران عومەر  لەم  سۆنگەوەیە  کە نایەوێت  بچێتە  جەنگێکەوە  کە  وەک  جارەکانی   تر ئەوسەری  لێوە  دیارە .
 

نوێترین نوسینەکانی عەلی قەڵادزەیی