تێڕوانینم بۆ کۆمەڵی ئیسلامیی کوردستان ( ڕابردوو - ئێستا - داهاتوو )

وتار/ 26/04/2019 770 جار بینراوە

ڕێبوار حسێن

تێڕوانینم بۆ کۆمەڵی ئیسلامیی کوردستان
( ڕابردوو -- ئێستا -- داهاتوو )

ڕێبوار حسین رسوڵ
کۆمەڵی ئیسلامی کوردستان دوای ئەوەی ساڵی ۲۰۰۱ ئیعلان کرا، بەپێی ئەو مێژووە ڕاگەیاندنی کۆمەڵ نزیکەی ۱٨ ساڵە، بەڵام تەمەن و ڕەگی ئەو حیزبە لە پێشترەو دەگەڕێتەوە بۆ ساڵی هەشتاکان، چونکە ئەمیری کۆمەڵی ئیسلامیی لە پەیوەندی ئیسلامیەوە تاکو بزوتنەوەی یەکبونی ئیسلامیی، ڕۆڵێکی کاریگەری هەبووەو جێ پەنجەی لە کارەکان دیاربووە، کەواتە بەو قیاسە ئەو کاروانە نزیکەی ٤۰ ساڵە بەڕێوەیەو دەیان هەورازو نشێوی بینیوە، بۆیە لەو بابەتەمدا، بەبۆنەی ئەو تێڕوانینە ئیعلامیەی لێرەو لەوێ دەیبینین بەجۆرێک وێنای کۆمەڵ دەکرێ گوایە لە دۆخێکی ناجێگیردایە، بەڵام ئەگەر سەیری ڕابردووی کۆمەڵ بکەین دەیبینین لە دۆخی سەختتر مۆفەق بووەو سەرکەوتوبووە، ئەوەی من دەینوسم بەرگری نیە لە کەموکوڕی یان هەڵەیەک کە کرابێ، چونکە کۆمەڵی ئیسلامیش مرۆڤ بەڕێوەی دەبات و قابیلی هەڵەو کەموکوڕی و لەبیرچونە، لەگەڵ ئەوەشدا بە هێمنى هەرسێ قۆناغى (ڕابردوو -- ئێستا -- داهاتوو ) لەگەڵ ئەو بابەتەدا دەستەملان ببەو بە وردى بیخوێنەوە.....

... (۱ ) ڕابردووی سەخت....
ئەوەی خۆی لەناو ئەو کاروانەدابوبێت یان مێژووەکەی خوێندبێتەوە دەبینێ کۆمەڵ چۆن بەرگەی دژواریەکانی شاخی گرتووە، چۆن پڵنگ ئاسا لەگەڵ سروشتی شاخدا دەستەملان بووەو بەرگەی بێ پارەی و برسیتی و نەداری گرتووە، لەگەڵ ئەوەش نەخۆی تەسلیمی ئێران کردووەو نە ڕێککەوتنی ژێربەژێری لەگەڵ حکومەتی بەعس کردووە، تەنانەت شەڕی قەڵاتوکان و گردی ڕەمکان شاهێدی جەربەزەیی و قارەمانێتین دژی حکومەتی بەعسی فاشستی، دواتر لە ڕاپەڕین و دوای ڕاپەرینیش ڕۆڵی کارای هەبووە لە بەرگری خاک و نیشتیمان و چەندان پێشمەرگەی دەست بەدەستنوێژی پێشکەشی دین و ژینی خەڵکی کوردستان کردووە، دواتر شەڕەکانی ساڵی ۱۹۹۳ و ۱۹۹٤ و ۱۹۹۷ توشی هات، بەڵام توانی خۆی ڕابگرێ و هەرچەندە سەرەتا توشی نسکۆ بوو بەڵام دواتر هەستایەوە، لەو شەڕانەشدا دەیان سەرکردەو پێشمەرگەی قارەمانی شەهید بوون و سەدانیش برینداربوون، کاتێکیش پێی نایە ساڵی ۲۰۰۰ کان و لە ۲۰۰۱ کۆمەڵ ڕاگەیەندرا، زۆر پلان و پیلان دڕێژران بۆ ئەوەی کۆمەڵ سەرنەگرێ و هەڕەشەی ناوخۆیی و دەرەکیش هەبوون بۆ هەڵوەشاندنەوەی کۆمەڵ، بەڵام بەشتیوانی خواو هەوڵی دڵسۆزان کۆمەڵ لەو پیلانانە ڕزگاری بوو، کاتێکیش ساڵی ۲۰۰۳ هات و سەدام حسین ڕووخاو دۆخێکی نوێ هاتە کایەوە، بەبیانوی دراوسیەتی ئەنسارولئیسلام، کۆمەڵی ئیسلامیی پەلاماردرایەوەو سەرکردەیەکی وەکو م. عبدالله ی قەسرێیان شەهید کردوو، دواتر لە شیرینی خەوو ٤۳ پێشمەرگەی دیکەیان بە سارۆخی ئەو زلهێزەی بانگەشەی ئازادی دەکات ( ئەمریکا ) خەڵتانی خوێن کرد، پاش ئەوە ئەمیری کۆمەڵیان دەستگیر کردوو بارەگاکانیان لێ سەندنەوەو کۆمەڵ کەوتە ژێر فشاری ئەمنی و دارایی و گرتن و ڕفاندن، بەڵام لە هەڵبژاردنەکان خۆی ئیسپات کردوو، لە گۆڕەپانەکە مایەوە، دوای ئازادکردنی ئەمیری کۆمەڵ و بەڕەچاوکرنی دۆخی نوێی ناوچەکە بڕیاری کۆنگرەی ۲ ی داو کۆمەڵێک گۆڕانکاری لە شێوازی کاری حیزبی کردو توانی هەروەکو چۆن لە خەباتی شاخ و چەکداری ڕۆڵی هەبێ و دوانەکەوێ لە خەباتی شارو مەدەنیەتیش هاتە مەیدان و بووە حیزبێکی مەدەنی خاوەن تێڕوانینی ڕوون بۆ کایەی حکومڕانی...
( ۲) ئێستاى کۆمەڵى ئیسلامیى
ئەو قۆناغە سەختانەی باسم کردن لە ڕابردوو، بەڵام لە قۆناغی ئیستاش چونکە کۆمەڵ لەسەر ئەو مەبدەئەی هەیەتی دەڕوات، لە ژیانی مەدەنیشدا ڕووبەڕووی دەیان کێشەو گرفت کراوەتەوە لە ڕووی سیاسی و دارایی و ئەمنی، ئێوەی خوێنەری ئەزیز سەیربکەن بەو بێ پارەی و قەیرانە جۆربەجۆرانەی بۆ کۆمەڵ دروستکران بەڵام سازشی لە هەڵوێستی خۆی نەکردوو یەک مەودا لەگەڵ ڕووداوەکان ڕۆیشت و هەرئەوەش بوو خەڵکی کوردستان پاداشتی دایەوەو هێزەکانی تر زۆربەی دەنگ و کورسیان کەمی کرد، کەچی کۆمەڵ زیادی کرد، ئەوەش ئەو شانازیەیە کە ئەمیرو سەرکردایەتی و ئەندامانی کۆمەڵ دەبێ شانازی پێوەبکەن، کە جێی خواستی خەڵکی کوردستانن و خەڵکێکی زۆر دڵی بەکۆمەڵ خۆشە ئێستا لە ساحەکەدا خۆی گرتووەو بەچاک دەڵێ چاک و بەخراپیش دەڵێ خراپ، ئێستای کۆمەڵ سەرەڕای قەیرانە سروشتی و دەستکردەکان، حیزبێکە مرۆڤ لێی ئاسوودەیە کاری تێدا بکات و بەپێی توێژینەوەیەکی براتان بەناوی ( شوناسی گەنج لە کۆمەڵی ئیسلامیی ) گەنجەکان زۆر ئاسودەن لە ڕیزی کۆمەڵی ئیسلامیی کاردەکەن، کەواتە ئەو خوشک و برا بەڕێزانەی لە دۆخی سەختی کۆمەڵ بەشداربوون دەبێ ئەو دڵخۆشیەی ئێستای گەنجی ناو کۆمەڵ ببێتە هەوێنی دڵخۆشی زیاتریان بە کارەکەو دەستهێنانیان بەسەری ئەو گەنجانەی هاتونەتە مەیدان، نەک جێهێشتن و پشتکردنە ڕابردووی پڕ سەروەری، کۆمەڵ لە قۆناغی ئیستا لە باشترینی حیزبەکان دەبینرێ، سەرەڕای ئەو دۆخە ناهەموارانە بڕیاری بەستنی کۆنگرەی چواری داوە ئەوەش ئەوە دەردەخات ناوماڵی کۆمەڵ پتەوەو بە جورئەتەوە کۆنگرە دەکات و گۆڕانکاری دەکات، کۆنگرەی چوارەمی کۆنگرە لە کاتی خۆیدا، ڕاستی ئەوەیە کە دوو حیزبی گەورەی وەکو یەکێتی و پارتی ، یەکیان چەند ساڵە نەیتوانیوە خۆی لە کۆنگرە بدات و ئەویتریان دووساڵ بەسەر وادەی کۆنگرەدا ڕۆیشتووە کەچی بەبڕیاریکی حیزبی بەهۆی شەڕی داعش کۆنگرەیان دواخستوە، بۆیە ئیستای کۆمەڵ پێویستی بە دەست پێوەگرتن و پشتیوانیە نەک دەست لێ بەردان و پشت تێکردن، شانازى ئەو قۆناغەش دەگەڕێتەوە بۆ تاک بەتاکى ئەندامانى کۆمەڵى ئیسلامیى بە گوێرەى پلەو پۆست و خۆ ماندوکردنیان بۆ کاروانى کۆمەڵى ئیسلامیى.

( 3 ) داهاتووى کۆمەڵى ئیسلامیى
بە خوێندنەوەى ئەو مێژووە واقیعیەى کۆمەڵى ئیسلامیى کە زۆر ڕۆژى سەختى بڕیوەو مادام لەو کاروانە بەردەوامە چاوەڕێى سەخستى ڕۆژگارەکانى داهاتووش دەکات، بەڵام سروشتى کارى سیاسى وایە بەهەر هۆکارێک بێت هەندێک دێنە ناو ڕیزەکانى کۆمەڵ و هەندێکى تریش لێى دەڕۆن، بەڵام گرنگ ئەوەیە نە ئەوەى تازە دێت پێى وابێت کۆمەڵ لەو ڕۆژەوە دەستپێدەکات کە ئەو دەستبەکاربووە، نە ئەوەش ریزەکانى کۆمەڵ جێ دەهێڵێ وەفادارى دەنوێنێ پشت لەو مێژووە بکات و بەهى خۆى نەزانێ، ئەگەر خراپ بوبێ بە قەدەر ئاستى بەرپرسیاریەتى بەردەکەوێ و ئەگەر باشیش بوبێ هەروا، ئەو نەیارانەش کە خەونى جیاجیا بە کۆمەڵى ئیسلامیى دەبینن با ئەو مێژووەى سەرەوە باش بخوێننەوە تاکو بزانن کۆمەڵ وەکو چیاى سەفین ڕەگەکانى قوڵ لە زەوى قایم بونەو وەکو ئەمیرى کۆمەڵیش دەڵێ : ئێمە لەو مەعەدەنەین تاکو زەختى لێ بکرێ قایمتر دەبێت ) ، ئەوەى چاوەڕێش دەکرێت لە کۆنگرەى چوارەمدا، کۆمەڵى ئیسلامیى هەنگاوى ترى گۆڕانکارى بنێ و بۆ چوار ساڵى ئایندە باشتر ببێتە جێى ڕەزامەندى خواو بەرژەوەندیە باڵاکانى خەڵکى کوردستان، خەڵک ئومێدى بە کۆمەڵ هەیە بۆیە پێمان وایە ئایندەى گەش چاوەڕێ ى کۆمەڵى ئیسلامیى دەکات، بەو مەرجەى ئێمەش ناوخۆى خۆمان باشتر بپارێزین وبە پڕۆژەو کارى جوان داهاتومان بنەخشێنین....

نوێترین نوسینەکانی ڕێبوار حسێن