عفرین بۆچی كه‌وت ؟
وتار/
27/03/2018
493 جار بینراوە
نه‌وزادی موهه‌ندیس
عفرین بۆچی كه‌وت ؟
نه‌وزادی موهه‌ندیس
• شاری عفرینی خۆڕاگر له ئه‌نجامی پیلانێكی نێوده‌وڵه‌تی نامرۆڤانه‌وه كه‌وته ژێر داگیركردنی سوپای توركیا و چه‌ته تیرۆریسته‌كانی له سوپای به‌ناو ئازادی سوریاو به‌ره‌ی نوصره‌و زیاد له 25 میلیشیای چه‌كداری تونڕه‌وی تر كه هه‌موانیان له‌ژێر چه‌تر و باڵی ده‌وڵه‌تی توركیادا سه‌رپه‌رشتیده‌كران و ڕێنوێنی و پاڵپشتی سیاسی و ئه‌منی و چه‌كداری ده‌كران، توركیا بۆخۆی له‌م پیلانه‌دا به‌ته‌نها نه‌بوو،به‌ڵكو هه‌مئاهه‌نگی ته‌واوی له‌گه‌ڵ ڕوسیا و ئێران و ته‌نانه‌ت ڕژێمی سوریاشدا هه‌بوه وه‌ك به‌ره‌یه‌ك دژ به به‌ره‌ی ئه‌مریكا و ئه‌وروپیه‌كان.بۆیه به‌خه‌م و كه‌سه‌رێكی گه‌وره‌وه شاری عفرین دوای 57 ڕۆژی ته‌واو له مقاوه‌مه‌ت و به‌رگریكردن و به‌رخۆدانێكی بێ وێنه له‌م سه‌ده و ڕۆژگاره‌دا له بێ كه‌سی و بێ پشتیوانیه‌كی ڕاستگۆ و ڕاسته‌قینه كه‌وته به‌ر هێرش و په‌لامار و داگیركردنه‌وه به‌به‌رچاوی هه‌موو دونیای ڕۆژهه‌لاَت و ڕۆژئاوای به‌ناو دیموكراسی و ئازادیخواوه ته‌نانه‌ت نه‌ته‌وه یه‌كگرتوه‌كان و ولاَتانی ئیسلامی و عه‌ره‌بیش هه‌ڵوێستێكی توند و جدیان نه‌نواند دژی ئه‌و داگیركردنه‌ی توركیا به‌رامبه‌ر لانی كه‌م به‌شێك له‌ولاَتێكی عه‌ره‌ب كه سوریایه.بۆخۆی كوردیش له‌هیچ به‌شێكه‌وه نه له‌سه‌ر ئاستی حیزب و سه‌ركرده و ته‌نانه‌ت جه‌ماوه‌ریش پشتیوانیه‌كی تۆكمه و پته‌و هه‌ست پێنه‌ده‌كرا.وعفرینیه‌كان به‌ته‌نها هه‌ر ئه‌وه‌نده‌یان له‌توانادا بوو كه به‌رامبه‌ر دووه‌م گه‌وره‌و پێشكه‌وتوی سوپای ناتۆ خۆڕابگرن.
• له‌ئێستاشدا و دوای كه‌وتنی عفرین و جێبه‌جیكردنی پیلانه شه‌ڕه‌نگێزیه‌كانی توركیا بۆ له‌ناوبردن و ده‌ركردنی كوردان له زێدی باوباپیرانیان و نیشته‌جێكردنی ئاواره سوریه‌كان له نه‌ته‌وه و ئاین و مه‌زهه‌به‌كانی تر له جێگه‌یاندا گه‌ره‌كێتی كه جێ پێگه‌یه‌كی توندو پته‌و بۆ ئاینده له‌سنوره‌كانی باشوریدا دروستبكات و بیكاته جێگه‌و مۆڵگه‌ی سوپا و تیرۆریستانی سه‌ر به‌خۆی و به‌تایبه‌تیش كورد له سه‌ر سنوره‌كانیدا نه‌هێڵێت و پیلانی دواتری ئه‌ردۆگان و توركیاش بریتیه له هێرش و فشاری زیاتر بۆ سه‌ر كوردان له منبه‌ج و كوبانێ و ته‌نانه‌ت هه‌ڕه‌شه‌ش له قامیشلۆ و حه‌سه‌كه‌ش ده‌كات و به‌ئاشكراش هه‌ڕه‌شه‌ی په‌لاماردانی په‌كه‌كه‌ش ده‌كات له شه‌نگار له عێراقدا و هه‌وڵیشده‌دات به‌ره‌و قه‌ندیلیش هه‌نگاو بنێت.
• هه‌موو ئه‌م هه‌ڵوێست و پێداگیری و زیاده‌ڕه‌ویانه‌ی توركیا و ئه‌ردۆگان له‌ئه‌نجانی بێده‌نگی كۆمه‌ڵگه‌ی نێوده‌وڵه‌تی به‌گشتی و ئه‌مریكا و ڕوسیاش وه‌ك دوو زلهێز و دووكاراكته‌ری سه‌ره‌كی كێشه و گرفته‌كانی ناوچه‌كه توانیویه‌تی به‌شێك له ئامانجه پاوانخوازی و تاكڕه‌ویه‌كانی بێنێته‌دی. هه‌موو ئه‌م هه‌ڵوێسته توندڕه‌وانه‌یه‌ی توركیا جێگه‌ی سه‌رسوڕمان نین بۆ كورد چونكه ئه‌و به ئاشكرا و نهێنی دژایه‌تی خۆی نه‌شاردۆته‌وه بۆ ئامانج و دروشم و نیاز و خواست و مافه ڕه‌واكانی كورد له‌سه‌ربه‌خۆبوون و ئازادبون و پێكه‌وه‌نانی ده‌وڵه‌تی سه‌ربه‌خۆدا، به‌لاَم ئه‌وه‌ی مایه‌ی نیگه‌رانیه و شۆكبونی كوردانه بریتیه له‌هه‌ڵوێستی ڕوسیا كه هه‌میشه واخۆی نیشانداوه كه دۆست و پشتیوانی جولاَنه‌وه ئازادیخواز و چه‌پ و سۆسیالیسته‌كان بێت و مافی گه‌لانی داگیركراو ده‌پارێزێت،به‌لاَم ئه‌وه‌ی پۆتین و ڕوسیا كردویانه ده‌رهه‌ق به‌كورد وپه‌یه‌ده و په‌كه‌كه‌ش وه‌ك دوو ڕێكخراوی چه‌پ و ماركسی ئه‌وپه‌ڕی بێ ڕه‌وشتی سیاسیه و ناچێته چوارچێوه‌ی هیچ به‌هاو لۆجیك و مۆڕاڵێكی مرۆڤدۆستانه و ئازادیخوازانه‌وه،ئه‌م هه‌ڵویسته‌ی ڕوسیاش بۆ كوردانی هه‌رچوار پارچه‌كه نوێ نیه به‌ڵكو هه‌ر له‌هاتنه سه‌ر حوكمی سۆسیالیسته‌كان له ساڵی 1917وه هه‌میشه ڕۆڵێكی نه‌رێنیان هه‌بوه به‌رامبه‌ر شۆڕشه‌كانی كورد له باكور و باشوور و ڕۆژهه‌لاَتی كوردستان له‌سه‌رده‌مه‌كانی شۆڕش و ڕاپه‌ڕینه‌كانی شێخ سه‌عیدی پیران و شێخ مه‌محمود و پێشه‌وا قازی موحه‌مه‌د و دواتریشدا و ئێستاش له ڕۆژئاوای كوردستان له‌سه‌ر هه‌مان سیاسه‌تی كۆنی خۆی به‌رده‌وامه و كوردانی پشتگوێ خستوه‌و كردینیه پاداشتێكی گه‌وره و ئاسان بۆ توركیا و سوریا.
• هه‌موو ئه‌م هه‌ڵویسته نامرۆڤانه‌یه‌ی هه‌موان دژ به كورد،ته‌نها و ته‌نها له‌به‌ر پاراستنی به‌رژه‌وه‌ندیه سیاسی و ئابوری و ئه‌منیه‌كانی خۆیانه و هه‌موان گه‌ره‌كیانه كه له ده‌سكه‌وته‌كاندا به‌شیان هه‌بێت له‌سه‌ر حسابی گه‌لانی ناوچه‌كه و به‌تایبه‌تیش كورد. به‌لاَم پێناچێت تاسه‌ر نه سیاسه‌ته‌كانی توركیا و نه ئێران و نه‌ڕوسیاش له‌ناوچه‌كه‌دا سه‌ركه‌وتن به‌ده‌ستبێنن و له ئاینده‌دا هه‌وڵه‌كانی ئه‌مریكا و ئه‌وروپیه‌كان به‌توندی دژی ئه‌و به‌ره نه‌گریس و شه‌ڕه‌نگێزه ده‌وه‌ستنه‌وه ،گه‌ر به‌هه‌لاَیسانی جه‌نگێكی گه‌رمی گه‌وره‌ش بێت،چونكه نه ئه‌مریكا و نه ئه‌وروپیه‌كان ناوچه‌ی ڕۆژهه‌لاَتی ناوه‌ڕاست به‌و گه‌وره و گرنگیه ئابوری و ئه‌منی و سیاسیه‌وه به‌جێناهێڵن بۆ ڕوسیا و توركیا و ئێران ئازادانه ته‌راتێنی تیادا بكه‌ن،به‌ڵكو له ئێستاوه ئه‌مریكا و سعودیه و ئیمارات و میسرو ئیسڕائیل له‌گه‌ڵ ئه‌وروپیه‌كانیشدا كه‌وتونه‌ته خۆ بۆ پێكه‌وه‌نان و خۆئاماده‌كردن بۆ ئه‌و جه‌نگه چاوه‌ڕوانكراوه‌ی ئاینده‌و هه‌ریه‌كه‌ش ڕۆڵی خۆی بۆ دیاریكراوه.
• به‌دڵنیایش كورد له ئه‌نجامی شكست و بچوكبونه‌وه‌ی هه‌ریه‌كه له ئێران و توركیا قازانجی گه‌وره به‌ده‌ستدێنێت و ڕژێمه‌كانی توركیا و ئێران و سوریاش به‌م شێوه‌یه‌ی ئێستا نامێننه‌وه و كوردیش له باكور و ڕۆژئاواو ڕۆژهه‌لاَتیش به چه‌شنی باشوور جۆره ئازادی و سه‌ربه‌خۆیی و خۆبه‌ڕێوه‌بردنێك به‌ده‌ستدێنن.
[email protected]
نوێترین نوسینەکانی نه‌وزادی موهه‌ندیس
-
نه‌وزادی موهه‌ندیس
17/09/2021
-
نه‌وزادی موهه‌ندیس
07/09/2021
-
نه‌وزادی موهه‌ندیس
29/08/2021
-
نه‌وزادی موهه‌ندیس
21/08/2021
-
نه‌وزادی موهه‌ندیس
12/08/2021
-
نه‌وزادی موهه‌ندیس
04/07/2021