دابڕان هەی دابڕان هەر دابڕان

وتار/ 24/09/2016 1300 جار بینراوە

ئاسۆ گەڵاڵی

دابڕان هەی دابڕان هەر دابڕان
ئاسۆ گەڵاڵی
لەترۆپكی قەیرانی دارایی و هێرشە بەردەوامەكانی چەكدارانی داعش و بەڵێنە بەردەوامە ناوبۆشەكانی حكومەت و هەڕەشە توندەكانی مامۆستاو فەرمانبەران، ژمارەیەك ڕۆشنفكری شاری ڕۆشنبیری كۆنفرانسی دووەمی پۆتفۆرمی دابڕان دەبەستن و ژمارەیەك میوانی ڕۆژئاوایی لەسەر بودجەی خۆیان دەهێننە شارو مانەوەو خەرجیی سێ ڕۆژی دەیان بەشداربوی كۆنفرانسەكە لەئەستۆ ئەگرن، گەرەكمە چەند تێبینیەك لەسەر ئەم بەڕێزانەو ئەجێندای كارەكەیان و ئەوەی خستویانەتە ڕوو، لێرەوە بخەمە ڕوو:

كۆنفرانس یان گردبونەوە
كۆنفرانس و كۆنگرە بۆ پەرەپێدان و تاوتوێكردنی بابەتێك یان ڕەوتێكی دیاریكراوە و ئامانجێكی زانستیی هەیە، ئەمما ئەمەی پلاتفۆرمی دابڕان كردویانە هێندەی لە گردبوونەوەی ژمارەیەك لەو مرۆڤانە دەچێت كە هیچ ئینتیمایەكی ئاینی و كلتوریان نیە، نیو هێندە لە كارێكی زانستی ناچێت، ئەمان پێكەوە گردبونەتەوە و لەهۆڵێكدا سەرقاڵی بۆڵەبۆڵكردنن، كۆبونەوەتەوەو بەپەیڕٍەوی كردن لە بنەمای "مێش بەگامێش كردن" پلاری جەماعی ئەگرنە گشت پیرۆزیەكانی ئەم میللەتە، ئاخر بەرهەمی كۆنفرانسی یەكەمی دابڕان جگە لە وەگەڕخستنی سایتێكی (ڕق هەڵڕێژ) و هێندێك پێكدادانی كۆمەڵایەتی و فكری و دووركەوتنەوەی  زیاتری ئاڕاستە جیاوازەكانی كۆمەڵگە چیی تر بوو؟ ئەی دەبێ بەرهەمی ئەم كۆنفرانس و پلاتفۆرمانە بۆ داهاتووی وڵات و گەلەكەمان چی بێت؟ بەڵێ ئێمە بێبەرهەمیی و بێ ئەنجامیی زۆر لەم جۆرە كارانە دەبینین.

وەزیر
لەكۆنفرانسی یەكەمی دەزگاكەی كارگێڕی مەكتەبی سیاسیی یەكێتیدا وەزیری پەروەردەی حكومەتە پێشكەوتووەكەمان چووە سەر مینبەرو باسی خوێندنی ئاینیی ئامادەییەكانی كردو بەڕاستەوخۆو ناڕاستەوخۆ كۆڵێ قسەی ئاراستەی زانایانی پێشین و ئیسلامیەكانی ئێستە كردو بەڵێنی بەرەنگاری كردن لەگەڵ (خۆیان واتەنی) بیری توندڕەوی و تێكدانی زیاتری وانەی ئاینی پێدان و تێریش چەپڵەی بۆ لێدرا، ئەمجارەش (هەمان تاس و هەمان حەمام) وەزیری خوێندنی باڵای حكومەتی قەیراندۆست، بەشانازیەوە باسی داخستنی چەندان بەشی ئاینی دەكات و جەخت لەخراپسازی كردن و وەلاخستنی زیاتری خوێندنی ئاینیی زانكۆیی دەكاتەوە و ئەمیش چەپڵەی بۆلێدرا.
جا نازانم وەزیری دوو وەزارەتی فێركاری لەحكومەتدا بۆچی دەبێت بچنە كۆنفرانسێكی حزبیی تەنگەنەفەسەوەو لەوێ بەدەم خواردنی شامی نیوەڕۆوە قاقای بەرەنگاربونەوەی ئاین لێبدەن؟.

قسەبێژەكان
ئەوانەی لەكۆنفرانسەكەدا قسەیان دەكرد، زۆرینەیان پاشخانێكی سەیرو تەنز ئامێزیان هەبوو، هۆڵی كۆنفرانسەكە بەهەبوونی "بەرپرسانێك" كە تا بینەقاقایان لەگەندەڵیدایە و "نوسەرانی دەربار" و "ڕۆژنامەنوسی خانەنشینی سەربازی" و "مەلای عەلمانی" و "كۆنە ئیسلامیی بوغزن" جممەی دەهات، لەسەر ئەوە زۆر قسە ناكەین ئەمما ئەو قسەبێژانە هەڵەی وا زەق‌و مەنهەجی و ترسناكیان دەكرد كە نەك هی كۆنفرانسێكی زانستی نیین بەڵكە هی سەر شاشەو تەلەفزیۆنیش نەبوون، تیایاندا بوو دەیوت "ئیمامی شافیعی پێی وایە مسوڵمان ئەبێ عەرەب بێت" یان فەزڵی ریوایەتێكی بچوك و لاوازی ئەدا بەسەر قورئان و فەرمودەدا، یان تێیدا بوو ناوی زانای ئیسلامی بەهەڵە دەوت، ئەوە هەر باس ناكەم كە تەفسیر و تەئویلی مۆدێرنیان بۆ ئایەت و فەرمودەكان هەبوو و خۆیشیان لە "تەبەری و ئیبن كەسیر و بەغەوی و ئەسفەهانی و خەزرەجی و ئیبن جەوزی و بەیزاوی و سەیدقوتب و ئەحمەد كاكە محمود و محمدی خاڵ و عەلی باپیر و محمد بامۆكی و بورهان محمد ئەمین و باقیی موفەسیرینی تر" پێ زاناترە.

لەوەهابیەوە بۆ ئیلحادی
ئەوان لەژێر پەردەی ڕەخنەگرتن لە بیری وەهابی و باسكردنی "سەلەفیزم" و "ئەحزابی ئیسلامی" و ڕەوتە ئیسلامیەكاندا پلاریان ئاڕاستەی قورئان و فەرمودەو سەنەدو هاوەڵان دەگرت، تا دەگەیشتە خودا! مرۆڤی وەهایان تێدابوو دەیوت "كێشەكان لەوێوە دەست پێ دەكەن كە خودا موزەكەر و نێرە!". برەو پێدانی ئەم جۆرە بیركردنەوانەش برەودانە بە بیری توندڕەوی ئیلحادیی و دژە ئاینی و نازانستیی بوونی كۆنفرانسەكەش زیاتر دەسەلمێنێت.

ئاین بۆ تاك
لەهەموو جێی سەرنجتـر ئەو دێڕەیە كە زۆر دەیڵێنەوەو كردویانەتە دروشمی كۆنفرانس، ئێمە ڕازین با ئاین بۆ تاك بێت بەڵام تاك-ی ئایندار پێویستی بە "ئازادی هەڵبژاردنی مەزهەب و شێوازی پەرستش و شوێنی پەرستش و ئەو زانایەی پێڕەویی دەكات و بلاوكردنەوەی ئاینەكەیی و سوكایەتی پێ نەكردن و ....هتد" هەیە، بەڕێزانی كۆنفرانس لەقسەكانیاندا دژی هەمو ئەو پێداویستیانەبوون كە ئایندارەكان پێویستیانە كەوایە ئێمە قەبوڵمانە با ئاین بۆ تاك بێت بەڵام نەك بەو هەموو كۆتوبەندەی پشتگیریی لێ دەكەن.

دیموكراسی بۆ هەموان
ئەمەش بەشی دووەمی دروشمەكەیانە، نازانم ئەم بەڕێزانە شارەزای ڕێزمانی كوردی نیین یان فەرهەنگی زمانەوانییان نەخوێندووەتەوە، ئاخر هەر "تاك"ـە و دەبێتە "كۆ"، تاكەكان هەموان دروست دەكەن، هەر شتێكیش بۆ هەموان بێت دەبێ سەرەتا بۆ "تاك" بێت.
ڕاستگۆنەبون لەگەڵ دروشم كێشەی مەزنی ئەو كەسانەیە كە ڕەخنە ئاراستەی ئیسلام و بنەماكانی ئەكەن، ئاخر ئەم بەڕێزانە بڕوایان بە دیموكراسی هەیە و "كۆنگرەی حزبەكەیان ناكەن، پارەی میللەت بۆ بەرژەوەندی كەسی بەكاردەهێنن، پێیان شەرمە ئازادی بدەنە ئەوانی تر، بەناوی دیموكراسیەوە دژایەتی سەرجەم بیرۆكەكانی تر ئەكەن و ...هتد".

ئەنجام
بەستنی كۆنفرانسێكی لەمجۆرە لەتەوقیتێكی ئاوەهادا و سەرقاڵكردنی میدیا بۆ ماوەی سێ ڕۆژ بەخۆیەوەو كۆكردنەوەی سەرجەم ئەو كەسانەی ئەلفوبێیەكیان دژی ئاین وتوە، وا دەكات كە بیربكەینەوە لەوەی ئەم ماستە نەك موو، بەڵكە گوریسێكی تیایە، چونكە ئەوەی ئەوان بانگەشەی بۆ دەكەن دژایەتیكردنی توندڕەوی ئاینییە ئەمما خۆیان بەشێكن لەفوو پێداكردنی پشكۆی ئەو توندڕەویە، ئەویش بە كەمڕوانین بۆ سەرجەم ئەو دروشمە ئاینیانەی ئەهلی ئیسلام بەپیرۆزیان دەزانن.
پێشنیاریش بۆ ئەو بەڕێزانە دەكەین ئەو "دابڕان"ـەی كە تا ئێستە لە میللەت و هەقیقەت و كولتوری كۆمەڵگەكەیان دابڕاون هێندەی تر دانەبڕێن، چونكە دابڕانی لەمە زیاتر مەترسیی ڕاستەقینە دەخاتە سەر پێكەوەژیانی ئاین و ئاینزا و فكرە جیاوازەكانی وڵاتەكەمان و هێندەی تر لەیەك دادەبڕێن.

نوێترین نوسینەکانی ئاسۆ گەڵاڵی