ڕۆژهه‌لاَتی ناوین له‌سه‌ر ئاگرێكی هێمن ده‌كوڵێت !
وتار/
10/11/2017
473 جار بینراوە
نه‌وزادی موهه‌ندیس
ڕۆژهه‌لاَتی ناوین له‌سه‌ر ئاگرێكی هێمن ده‌كوڵێت !
نه‌وزادی موهه‌ندیس
• گه‌ر به دیقه‌ت له مێژوو و ڕابووردووی ناوچه‌ی ڕۆژهه‌لاَتی ناوین ووردبینه‌وه ،هیچ ده‌یه ساڵێك نابینیت كه ئه‌م ناوچه‌یه به ئارامی گوزه‌ری كردبێت و پێشكه‌وتن و گه‌شه‌ی هه‌مه‌لایه‌نه‌ی ژیانی تیادا ڕوویدابێت،به‌ڵكو به پێچه‌وانه‌وه له ئه‌زه‌له‌وه ئه‌م ناوچه‌یه گیرۆده‌ی نه‌فره‌تێكی نه‌بڕاوه بوه و ئه‌مه بۆته مایه‌ی شه‌ڕوشۆڕ و كاولكاری و دواكه‌وتن و بێئۆقره‌ییه‌كی هه‌میشه‌یی.
• ئاشكراشه هۆكاری ئه‌م ناكۆكی و ململانێ ئاینی و سیاسی و ئابوری و سه‌ربازیانه ده‌گه‌ڕێته‌وه له‌لایه‌ك بۆ دواكه‌وتوویی كۆمه‌ڵگاكانی ئه‌م ناوچه‌یه به گه‌ل و سه‌ركرده‌كانیانه‌وه خۆیان و ته‌نها بۆ یه‌كلاكردنه‌وه‌ی ناكۆكیه‌كانیان په‌نایان بردۆته به‌ر شه‌ڕ و خوێنڕشتن نه‌ك دایه‌لۆگ و لێكتێگه‌یشتن،هه‌رئه‌مه‌ش بۆته كه‌لتورێكی قێزه‌ون و بێزراوی ناوچه‌كه تا ئێستاش و له‌لایه‌كی تریشه‌وه به‌هۆی ده‌وڵه‌مه‌ندی ناوچه‌كه‌ش به سه‌رچاوه‌ی داهات و خۆشگوزه‌رانی و پێشكه‌وتن و داهێنانه‌كان هه‌میشه بۆته جێگه‌ی ته‌ماع و چاوتێبڕینی لایه‌نه‌كانی ده‌ره‌وه و ئه‌وانیش هۆكارێك بوون بۆ نانه‌وه‌ی ئاژاوه بۆئه‌وه‌ی بتوانن به ئاشكرا و به نهێنی و به‌ناوی پشتیوانی و هاوكاری گه‌لانی ناوچه‌كه له ژێر دروشمه باقوبریقه‌كانی ئازادی گه‌لان و دیموكراسی و مافه‌كانی مرۆڤ و یه‌كسانیه‌وه خۆیان بگه‌یه‌ننه ناوچه‌كه و بتوانن ده‌ستبگرن به‌سه‌ر ئه‌و سه‌رچاوه گرنگانه‌ی وزه و ئابوری و بتوانن بیخه‌نه خزمه‌ت ماكینه‌ی پێشكه‌وتن و داهێنانه‌كانیانه‌وه و دواتریش هه‌ر هه‌مان ناوچه‌كه و كۆمه‌ڵگاكانیشیان بكه‌نه‌وه بازاڕێكی به‌رده‌وام و به‌قازانج بۆ ده‌سكه‌وتنی سوودی گه‌وره‌تر بۆ خه‌زێنه‌ی حكومه‌ته‌كانیان.
• جا ئه‌و ململانێیانه به‌درێژایی 2000ساڵ به‌رده‌وامیان هه‌یه و له ئێستاشدا قۆناغێكی نوێی ئه‌و ململانێیانه خه‌توخاڵیان ده‌ركه‌وتون به‌شێوه‌یه‌ك مه‌ترسیه‌كان هێند گه‌وره‌ن كه لێكترازان و هه‌ڵوه‌شاندنه‌وه و جه‌نگێكی خوێناوی سه‌رتاسه‌ری لێچاوه‌ڕوان ده‌كرێت،ئاشكراشه هێنده‌ی ململانێكان ناوچه‌یی و ناوخۆیین،ده‌هێنده كاره‌كته‌ر و فاكته‌ری ده‌ره‌كی ڕۆڵی تیادا ده‌بینن،ململانێكان هه‌مان ململانێ مێژوویه‌كانن و هۆكاره‌كانیش هه‌مان هۆكارن ،ته‌نها ئاڵوگۆڕ له كاراكته‌ر و شێواز و میكانیزمه‌كانیاندا هاتوه ئه‌وه‌ش به‌هۆی پێشكه‌وتنه ته‌كنه‌لۆجی و سه‌ربازی و په‌ێوه‌ندیه‌كانه‌وه‌ن و هیچی تر.
• له ئێستادا ڕۆژهه‌لاَتی ناوین بۆته كوانوی ململانێیه‌كی توندی نێوان زلهێزه ڕۆژئاوایی و ڕۆژهه‌لاَتیه‌كان له‌نێوان ئه‌مریكا و ئه‌وروپاو ڕوسیاو تاڕاده‌یه‌كیش چین دا، له‌خوار ئه‌م دوو ناونیشانه گه‌وره‌یه‌شه‌وه ململانێكان به ئیداره و به ئیڕاده و پلانی ئه‌مان درێژه‌یان هه‌یه و شۆڕبونه‌ته‌وه بۆ نێوان كاراكته‌ره ناوچه‌ییه‌كان و ئه‌مانیش له‌ناوخۆیاندا دابه‌شبونه‌ته سه‌ر ئه‌و دوو بلۆكه زلهێزانه و ته‌نها بۆ پاراستنی به‌رژه‌وه‌ندیه‌كانی خۆیان و مانه‌وه‌یانه بۆ زۆرترین ماوه له‌ده‌سه‌لاَتدا،ئه‌گینا ئه‌مان بڕیارده‌ری كۆتایی نین به‌ڵكو ته‌نها بوكه‌ڵه‌یه‌كن به‌ده‌ستوپه‌نجه‌ی زلهێزه‌كانه‌وه هه‌ڵده‌سوڕێن، ململانێكانی ئێستا له ناوچه‌كه‌دا له‌نێوان له‌لایه‌ك سعودیه و ولاَتانی كه‌نداو جگه له‌قه‌ته‌ر(( كه له‌ئێستادا له هێڵی كه‌نداویه‌كان ده‌رچوه وتاڕاده‌یه‌ك په‌یوه‌ندیه‌كانی له‌گه‌ڵ ئێرانی دژیاندا توندوتۆڵكردۆته‌وه)) و میسر و ئوردون كه به‌هۆی په‌یوه‌ندی ئاینی و مه‌زهه‌بیشه‌وه توركیا هاوكار و پشتیوانیانه،به‌لاَم بۆخۆی توركیاش له‌دوولا مه‌ست و حه‌یران بوه و به‌رژه‌وه‌ندیه‌كانی واده‌خوازن كه ڕۆڵێكی تاسه‌ر دیاریكراوی نه‌بێت و زوو زوو ڕۆڵ و پێگه‌ی خۆی ده‌گۆڕێت،به‌لاَم سه‌ركه‌وتنی گه‌وره‌شی به‌ده‌ستنه‌هێناوه جگه له پیشاندنی ڕسوایی و زه‌لیلی و دووڕوویی چونكه ده‌وڵه‌تێكی شه‌ڕه‌نگێز و پاوانخواز و هه‌نگاو به‌ره‌و تاكڕه‌وی كه‌سی ده‌نێت له‌سه‌رده‌مێكدا كه قبوڵی تاكڕه‌ی ناكات.ئه‌م به‌ره‌یش وه‌كو خووی كلاسیكی و كۆنه‌پارێزی خۆیان هه‌میشه له خولگه‌ی زلهێزه‌كانی ئه‌مریكا و ئه‌وروپیه‌كاندا ده‌سوڕێنه‌وه و هه‌میشه به پشتیوانی خۆیانیان ده‌زانن.به‌ره‌ی دووه‌م و دژ به‌م به‌ره‌یه له‌ناوچه‌كه‌دا به ڕابه‌رایه‌تی ئێرانه و هه‌ریه‌كه‌ش له ڕژێمه‌كانی عێراق و سوریا و لوبنان و یه‌مه‌ن و ته‌نانه‌ت هێزه ڕزگاریخوازه‌كانی فه‌له‌ستینیشی كردۆته پاوانی خۆی و وایكردوه له‌خولگه‌ی سیاسه‌ت و تێڕوانین و به‌رژه‌وه‌ندی سیاسی و ئاینی و مه‌زهه‌بیه‌كانی شیعه‌دا بخولێنه‌وه‌و تاڕاده‌یه‌كیش سه‌ركه‌وتوو بوه ،ئه‌م به‌ره‌یه به سروشت و هه‌ڵكه‌وته‌ی پێگه جیۆسیاسیه‌كه‌ی هه‌میشه لایه‌نگری ڕۆژهه‌لاَت و زلهێزه‌كانی بوه له ڕوسیا و چین و كۆریای باكور كه سروستی ڕژێم و سیستمی حوكمڕانیه‌كانیشیان ئاینی و تاكڕه‌وی و خۆسه‌پێن و دوور له‌دیموكراسیه‌ت و ئازادیه‌كان بوون.
• له‌م نێوه‌ده‌شدا و له‌نێوان ئه‌م كاراكته‌ره ناوچه‌ییانه‌شدا ململانێیه‌كی ناوچه‌یی توند هه‌یه له‌سه‌ر ڕابه‌رایه‌تیكردنی ناوچه‌كه له نێوان هه‌ریه‌كه له توركیا و ئێران و سعودیه و میسر و ئیسڕائیلدا.كه ڕه‌گ و ڕیشه‌ی مێژوویی و ئاینی و مه‌زهه‌بیان له‌خۆگرتوه.
• له ئێستادا ململانێكان زۆر توندبون و نزیك كه‌وتونه‌ته‌وه له‌به‌ریه‌ك كه‌وتنی ڕاسته‌وخۆ و هه‌لاَیسانی شه‌ڕی گه‌رم كه بنچینه‌ی ڕاسته‌قینه‌یان بریتیه له ململانێی ئاینی و مه‌زهه‌بی نێوان سونه و شیعه‌ی ئیسلامیدا، چونكه ئه‌م ولاَتانه به‌تایبه‌تی سعودی و كه‌نداویه‌كان و ئێران ولاَتانێكی ده‌وڵه‌مه‌ندن و هیچیان پێویستیان به‌سه‌رچاوه‌كانی سروشتی و وزه‌ی ئه‌وی تر نیه و ململانێكه له‌نێوان هه‌ژار و ده‌وڵه‌مه‌ندا نیه وه‌ك ئه‌وه‌ی له نێوان بكور و باشوری گۆی زه‌ویدا هه‌یه،ته‌نها بۆ فراوانكردنی نفوز و پێگه و هێزی سه‌ربازی و مه‌زهبیه له ناوچه‌كه‌دا،له‌م نێوه‌نده‌شدا زلهێزه‌كان ته‌نها ڕۆڵی ئیداره‌دان و درێژه‌پێدانی ئه‌و ململانێیانه‌یان هه‌یه بۆئه‌وه‌ی باشترین و گه‌وره‌ترین و به‌رده‌وامترین بازاڕ بۆ چه‌ك و ته‌قه‌مه‌نی و پێداویستیه سه‌ربازیه‌كانیان بدۆزنه‌وه،ئه‌وه‌تا له هیچ سه‌ردانێكی سه‌رانی زلهێزه‌كان بۆ ناوچه‌كه به‌ده‌ستی به‌تاڵ ناگه‌ڕێنه‌وه و ئه‌مریكا به‌ته‌نها گریێبه‌ستی زیاد له 500 ملیار دۆرلا له‌گه‌ڵ سعودیه و ئه‌وانی تردا گرێداوه و ڕوسیاش ته‌نها له 9 مانگی ساڵی 2017دا بایی 15 ملیار دۆلار چه‌ك و ته‌قه‌مه‌نی فرۆشتوه.بۆیه هه‌رگیز ئه‌و زلهێزانه به‌جدی نیه‌تی چاره‌سه‌ركردنی كێشه‌كانی ئه‌م ناوچه‌یه به‌تایبه‌تی و دونیاش به‌گشتی نیه و به‌ڵكو هه‌میشه بۆ دۆزینه‌وه و دروستكردن و سه‌رهه‌ڵدانی كێشه و قه‌یران و ئاڵۆزی نوێ له پیلانداناندان بۆئه‌وه‌ی مان و قازانجی خۆیان به‌رده‌وامی پێبده‌ن.
• له ئێستادا ئه‌م ناوچه‌یه له‌سه‌ر ئاگرێكی ئارام و هێمن ده‌كوڵێت و قوڵپ ده‌دات و زۆر نزیكه به‌ریه‌ككه‌وتنی گه‌رم ڕووبدات و وه‌ك ئه‌و شیره هه‌ڵچوه‌ی لێبێت كه ده‌بێته مایه‌ی كاولكاری و لێكهه‌ڵوه‌شانی ولاَتان و سنوره‌كانی ناوچه‌كه و دووباره و سه‌رله‌نوێ به شقڵ و شێوه‌یه‌كی نوێوه له‌لایه‌ن زلهێزه‌كان دابه‌ش و داگیر بكرێنه‌وه و دروست بكرێنه‌وه وه‌ك ئه‌وه‌ی له‌چوارچێوه‌ی بیردۆزه‌ی فه‌وزای دروستكه‌ردا له‌پێش 30 ساڵ له‌ئێستاوه به‌رنامه و پلانیان بۆ داڕشتوه.
• پرسیارگه‌لێك كه جێگه‌ی خۆیه‌تی بكرێت،ئه‌وه‌یه كه ئه‌مه حاڵی ولاَتانی خاوه‌ن سه‌روه‌ری و سیادی ناوچه‌كه بێت به‌ده‌ست زلهێزه‌كانه‌وه؟ئه‌ی حاڵ و دۆخی كورد و كوردستانی داگیر و دابه‌شكراو و بێ ده‌وڵه‌ت و سه‌روه‌ری و سنور ده‌بێت چۆن بێت؟ كورد له‌كوێی ئه‌م گه‌مه و ململانێیانه‌دایه؟ ده‌توانێت چی بكات؟ چۆن قازانج و ده‌سكه‌ت به‌ده‌ستبێنێت؟
به‌داخه‌وه كورد هه‌میشه و به‌درێژایی مێژووی خه‌باتی خۆی له‌م ناوچه‌یه‌دا هه‌ر زوڵملێكراو و پشتگوێخراو و خاك و گه‌له‌كه‌شی داگیر و دابه‌شكراو بون و تائێستاش نه‌بونه‌ته خاوه‌نی ده‌وڵه‌تێكی نه‌ته‌وه‌یی و نیشتیمانی خۆیان،دۆخی سیاسی و ئابوری و سه‌ربازی كورد هه‌میشه خراپ بوه،زلهێزه‌كان هێنده‌ی وه‌ك شه‌ڕكه‌رێكی ئازا سه‌یریان كردوه و پشتیوانی و هاوكاریان كردوه،نیوهێنده وه‌ك نه‌ته‌وه‌یه‌كی زوڵملێكرا و خاوه‌ن مافی ڕه‌وا نه‌یانبینیوه و ته‌نها بۆ مه‌به‌ست و به‌پێی نه‌خشه و پلانه‌كانی خۆیان ڕۆڵیان پێداوه و هه‌ركاتیش له پلان و گوته و فه‌رمانی ئه‌وان ده‌رچووبێت كردویانه‌ته قۆچی قوربانی و په‌ندی زه‌مانه ،هه‌روه‌ك له سه‌رده‌می مه‌لیك مه‌حمود و كۆماری كوردستان وشۆڕشی ئه‌یلول و شۆڕی نوێ و ئه‌م قۆناغه‌ی ئێستاش له بوونی هه‌رێمێكی نیمچه سه‌ربه‌خۆ له عێراقدا ، ته‌نها له‌سه‌ر به‌قسه‌نه‌كردن و ده‌رچوون له‌هێڵی قازانجی ئه‌وان له‌كه‌متر له 24 كاتژمێردا 51% خاكی كوردستانیان پێشكه‌ش به به‌غدادی پایته‌ختی عه‌ره‌بی شیعه مه‌زهه‌ب كردوه به‌بێگوێدانه ئه‌و هه‌موو قوربانی و خوێن و فرمێسك ڕشتنه‌ی كورد كه پێشكه‌ش به مرۆڤایه‌تی و هه‌موو دونیای كرد له‌و چه‌ند ساڵه‌ی ڕابووردوودا.كه هه‌رچه‌ند له‌گه‌ڵ ئێراندا له‌سه‌ر عێراق و ئاینده و سامانه سروشتیه‌كانی له‌ململانێیه‌كی توندان و هیچ كات ناگه‌ن به‌یه‌كتر،به‌لاَم كوردیان كرده دیاریه‌كی هه‌رزان به‌های خۆیان بۆ به‌غداد بۆئه‌وه‌ی ئاینده‌ی ئابوری خۆیان مسۆگه‌رتر بكه‌ن.
كورد به‌داخه‌وه تائێستاش خاڵی لاوازه و پنتی گرنگ نیه له سیاسه‌ت و پلانی زلهێزه‌كانداـ سه‌ره‌ڕای قوربانیدان و مقاوه‌مه‌تی چه‌ندین ساڵه‌ی دژ به دڕنده‌ترین ڕێكخراوی تیرۆریستی له‌جیهاندا((داعش)).
كورد له‌ئێستادا و له‌دوای بچوكبنه‌وه‌ی قه‌واره و ده‌سه‌لاَتی له عێراقداو به‌هۆی هه‌ڵًكه‌وته‌ی له‌ناوجه‌رگه‌ی ڕووداوه‌كان و گۆڕانكاریه‌كاندا به‌جدی ڕووبه‌ڕووی گه‌لێك ئاڵنگاری گه‌وره ده‌بێته‌وه كه زۆر دووره بتوانێت به‌رگری له م قه‌واره‌یه‌ی خۆی بكات، چونكه كه‌وتۆته ناوجه‌رگه‌ی ململانێكان و سه‌ره ڕێگای ململانێكانی نێوان ڕوسیا و ئه‌مریكا له‌لایه‌ك و له‌لایه‌كی تریشه‌وه له‌نێوان ئێران و توركیادا و له‌ولای تریشه‌وه له‌نێوان سونه مه‌زهه‌ب و شیعه مه‌زهه‌به‌كانی سعودیه و ئێران و توركیادا،كه هیچیان قازانجی كوردیان گه‌ره‌ك نیه،به‌ڵكو هه‌ریه‌كه‌یان گه‌ره‌كێتی په‌لكێشی پیلانه‌كانی خۆیانی بكه‌ن و بۆماوه‌یه‌ك سوود له‌توانا و ئازایه‌تی وه‌ربگرن.
بۆیه كورد هه‌قه چیدی به به‌ڵێن و گوته‌ی بریقه‌دار و پیاهه‌ڵدانی نه‌زلهێزه‌كان و نه كاراكته‌ره ناوچه‌یه‌كانیش هه‌ڵنه‌خڵه‌تێ، به‌ڵكو ته‌نها سیاسه‌تێكی كوردانه‌ی نیشتیمانی و نه‌ته‌وایه‌تی چێ بكات، كێیان سوود و قازانجی زیاتری بۆ كورد پێبوو له‌گه‌ڵیدا بێت بۆ تاكتیك نه‌ك تاسه‌ر،خۆنه‌به‌ستنه‌وه به كۆنكرێتی له‌گه‌ڵ هیچ لایه‌كدا و تێكه‌ڵ نه‌بوونی قوڵ له‌گه‌ڵ هیچ به‌رژه‌وه‌ندیه‌كدا و ڕاوه‌ستانه له پێگه‌یه‌كی وه‌ك یه‌ك له‌گه‌ڵ هه‌مواندا، كورد ناتوانێت به‌رگری تاسه‌ر له‌خۆی بكات له‌به‌رامبه‌ر هیچ كام له‌و هێزانه‌دا هه‌ربۆیه پێویستی به‌پشتیوانیه‌كی به‌رده‌وام هه‌یه كه به‌پێی به‌رژه‌وه‌ندی خۆی بیانگۆڕێت، له ولاَتانی زلهێز و ناوچه‌كه‌ش و هه‌موو هێلكه‌كانی نه‌خاته یه‌ك سه‌به‌ته‌ی دیاریكراوه‌وه، كورد ناتوانێت هه‌ڕه‌شه له‌هیچ كامیان بكات و توندبێت له‌گه‌ڵیاندا هه‌ربۆیه ده‌بێت ته‌نها ڕێگای گفتوگۆو لێكتێگه‌یشتن و پاراستنی به‌رژه‌وه‌ندیه‌كانی و دۆستایه‌تی هه‌ڵببژێرێت .
كورد ته‌نها به‌یه‌ك و یه‌كگرتوویی هێز و توانا و ڕێكخستنی نێو ماڵی خۆی و چه‌سپاندنی یه‌كێتی و متمانه له‌نێو ماڵی خۆیدا ده‌توانێت ڕووبه‌ڕووی ئه‌م ئاڵنگاریانه ببێته‌وه و له‌كاتی ڕوودانی به‌ریه‌ك كه‌وتنی گه‌رم له‌نێوان ئه‌م جه‌مسه‌ر و زلهێزه دونیایی و ناوچه‌ییانه‌دا بتوانێت تابۆی بكرێت خۆی له‌شه‌ڕ و ئاگریان بپارێزێت، تا موعجیزه‌یه‌ك ڕووده‌دات له هاوكێشه و به‌لاَنسی هێزه‌كاندا و ده‌توانێت به‌قازانجی خۆی ئه‌م شكستانه‌ی بۆ سه‌ركه‌تن و ده‌سكه‌وتی زیاتر بگۆڕێته‌وه.
كورد به‌ناچاری و به‌بێ ویستی خۆی كه‌وتۆته ناو ئه‌و مه‌نجه‌ڵه‌ی كه پێی ده‌وترێت ڕۆژهه‌لاَتی ناوین و له‌ئێستاشدا له‌سه‌ر ئاگرێكی هێمن ده‌كوڵێت و هه‌ركات گه‌یشه ئاستی هه‌ڵچون و ته‌قینه‌وه گه‌ره‌كه كورد زیره‌ك و لێزانانه فریای خۆی بكه‌وێت،چونكه ده‌ركه‌وت كه كورد دۆستی ڕاسته‌قینه‌ی نیه و هه‌موان ناحه‌ز ودژین،جا ئه‌مه‌ش له‌لایه‌ك بۆ بێبه‌ڵێنی ناحه‌زه‌كان ده‌گه‌ڕێته‌وه‌و له‌لایه‌كیش بۆ گه‌مژه‌یی و نه‌فامی كورد و هه‌ڵه خوێندنه‌وه‌ی هاوكێشه و هێزه‌كان ده‌گه‌ڕێته‌وه له‌هه‌ڵبژاردنی دۆسته‌كان و لایه‌نه سه‌ركه‌وتوو به‌هێزه‌كانی گه‌مه‌ی ناوچه‌كه‌دا.به‌لاَم ئیدی كاتی ئه‌وه هاتوه كه كوردیش په‌ندو عیبره‌ت له ڕابووردووی خۆی وه‌ربگرێت و چانس و كارته‌كانی خۆی وه‌ك مه‌سه‌له و نه‌ته‌وه و نیشتیمان به‌فیڕۆ نه‌دات و ئاینده‌شی نه‌كاته قوربانی خواست و ویستی ناڕه‌وای سه‌ركرده و كه‌س و پارته سیاسیه‌كانی.
[email protected]
نوێترین نوسینەکانی نه‌وزادی موهه‌ندیس
-
نه‌وزادی موهه‌ندیس
17/09/2021
-
نه‌وزادی موهه‌ندیس
07/09/2021
-
نه‌وزادی موهه‌ندیس
29/08/2021
-
نه‌وزادی موهه‌ندیس
21/08/2021
-
نه‌وزادی موهه‌ندیس
12/08/2021
-
نه‌وزادی موهه‌ندیس
04/07/2021