ململانێی ساردی نێوان گۆڕان و یەکگرتوو

وتار/ 26/08/2016 1185 جار بینراوە

عه‌دنان عوسمان

هەر چۆن بە هەڵجونی لەناکاوی مرۆڤێکی هێمن و لەسەرخۆ ئەحەپەسێین، چونکە هەست ئەکەین ئەوە پێچەوانەی کاراکتەری ئەو کەسەیە، بەهەمان شێوەش لە گرژبونی پەیوەندیەکانی نێوان گۆڕان و یەکگرتوو توشی شۆک ئەبین، چونکە لە بناغەدا هەم لێکتێگەیشتنی رەسمی هەردولا پتەوەو، هەمیش پەیوەندیەکانیان.
بەڵام سەرباری ئەو پتەویە کە لە روکەشدا هەیە، بەردەوام هەست بەوە کراوە لە ژێرەوە دڕدونگی و خراپ لەیەک تێگەشتن و خراپ لەیەک خوێندن هەیە، هەمیشە نیگایەکی هەندێک لەکادرەکانی هەردوولا لەسەر یەکن و هەموو دەرفەتێک ئەقۆزنەوە بۆ خۆشکردن و زەقکردنەوەی ئەو ناکۆکیانە. نازانم ئەتوانین رای کادرانی خوارەوە، یا دەستە بژێری نوسەری ناوەند، نەک قسەو بزەی سەرکردەکان و وشە پڕ لە هیوابەخشەکانیان، بە عەقڵی ناوەکی یا لاشعوری حزبیی حزبەکان بزانین؟؟ بەڵام کە لە بۆنەی جیاوازدا سەیری تایتڵ و نوسین و ئاماژەو ئاراستەی کۆمەڵێک نوسینی ئێرەو ئەوێی کادری هەردوولا ئەکەی، ئەبینیت چ بوغز و رقێکی شاراوە هێشتا لە ئارادایەو ساڵانێکی کار و روئیای هاوبەش نەیتوانیوە لاوازی بکات.
قسەی من لەسەر ئەوە نییە کێن ئەو رقە ئەستور و ئاگری ناکۆکییە گەشتر ئەکەن، گۆڕانەکانن یا یەکگرتووەکان؟ کێیان دەستپێشخەربون یا هەن؟ کێ بە دوای عەیب و عاری ئەوی ترەوەیە؟ ئەوە ئیشی من نییە لەم وتارەدا، من ئەمەوێت ئەم مەسەلەیە ئیتر ئاوا بێ قسەلەسەر کردن و چارەسەرکردن نەڕوات، چیتر رێگە بە سازدەرانی ئەو کەرنەڤاڵی رقرشتنە نەدەین یاری بە پەیوەندیەکانی هەردوولاوە بکەن و ئاراستەی بکەن. پەیوەندییە حزبیەکان لەسەر بنەمای سۆز و وشەی سواو و قەوانی ئامادەکراو بینا ناکرێت، بەڵکو لەسەر بنەمای رێز لە یەکتر: لە بەرنامە، لە ئاراستە، لە شێوەی بڕیار، لە ئۆرگانەکان، لە جیاوازیەکان، لە هەڵوێستەکان ئەبێت. ئەو جیاوازیانە لە شێوازی کارکردندا نەک نەبێتە هۆکاری لێکترازان و دڕدۆنگی، بەڵکو هەوێنی لێکترنزیکبونەوەو گفتوگۆی زیاتر و لێکتێگەیشتنی قوڵتر بێت.
ئەوانەی زمانی گفتوگۆی نێوان هەردوولا و جیاوازیەکانی هەردوولا بە زمانی تەشهیر و سوکایەتی پێکردن و بریندارکردن ئەگۆڕنەوە، ئەوانە (جا لەهەر بەرەیەک بن)، نە دڵسۆزی بەرەکەیانن وە نە هەردوولا و نە ئەزمونی پێکەوە ژیان لە نیشتمانێکدا. ئەوانە ئەهلی قاڵبی ئامادەکراوی فکریی – سیاسین، دەیانەوێت هەمومان وەک ئەو بیربکەینەوە، وەک ئەو هەڵسوکەوت بکەین، ژیان لە دوتۆی قەناعەتەکانی خۆیدا ئەبینێتەوە کەسی دەرەوەی ئەو بازنەیەش ئیتر یا گومڕایە یا گێرەشێوێن یا ترسنۆک یا هەلپەرست.
یەکگرتوو و گۆڕان ساڵانێک گرنگیان بە کاری هاوبەش، دونیابینی لێکنزیک، پرۆسە و پلانی ئیسڵاحیی چ لە دەورانی ئۆپۆزسیۆنی و چ لە دەورانی ئێستادا بەسەربرد، ئەوە بناغەیەکی بەهێزە بۆ هاوکاری و هاوخەباتی هاوبەشی ئایندە.
هەریەکە لە ماڵی خۆی و هەموی لە پێناوی نیشتماندا.

نوێترین نوسینەکانی عه‌دنان عوسمان