فەڕەنسا چی بەخۆی کرد ؟

وتار/ 14/05/2017 553 جار بینراوە

کەمال ئەسکەندەر

فەڕەنسا چی بەخۆی کرد ؟

فەڕەنسیەکان ئیمانوێل ماکرۆنی تەمەن ٣٩ ساڵ ، بە لە سەدا ٦٥.١ ی دەنگەکان دەکەن بەسەرۆکی ووڵات ، واتە بچوکترین سەرۆک لەمێژووی فەڕەنسا لەساڵی 1848ز یەوە .

ئەگەر لەدوای ڕاگەیاندنی ئەنجامی پڕۆسەی هەڵبژاردنی ووڵاتانی تردا بەرنامەو توندوتیژی و دەیان شتی تر پەیوەست بەسەرۆکی نوێی ووڵات جێگەی باس وخواسی میدیاو جیهان بوبێت ، ئەوە بۆ ماکرۆنی سەرۆکی نوێی فەڕەنسا بچوکی تەمەنەکەی سەردێری هەواڵەکان گەرم دەکات و دەبێت بە جێگەی سەرسوڕمان لەجیهان دا .

ئێستا ماکرۆنی لەهەنگای یەکەمی ئەزمونی تەمەنی دایە بۆ حکومڕانی فەڕەنسا وفەڕەنسیەکان ، سەرکەوتنی پەیوەستە بەپاڵپشتی هاووڵاتیانی ووڵاتەکەی هەر وەکو چۆن فەشەل هێنانیشی پەیوەستە بە مەکری سیاسیە بەرژەوەندخوازە ئەزمون دارەکان  و هێزی سەربازی و چەندین کێشەی تر .

لای سیاسیە بەرژەوەندخوازەکانی ووڵاتانی بێ سەروبەر کە دوور لە سیستەمی دامەزراوە بەوێنەی کۆمپانیا لە حزب و حکومەت دەڕوانن و لە فەرهەنگی ئەوان دا تەنها ڕابردوو دەتوانێت کاریزما پێشکەش بەکۆمەڵگە بکات  ، دوای دەرچونی سەرۆکی تەمەن سی ونۆ ساڵ لە ووڵاتی فەڕەنسا  ئاساییە ئەو پرسیارە بکرێت ( فەڕەنسا چی بەخۆی کرد؟) ، بەڵام گرنگ ئەوەیە فەڕەنسیەکان چۆن هەنگاوی لەگەڵ هەڵدەگرن .

لەدوای دەرچونی ماکرۆنی بەسەرۆکی فەڕەنسیەکان دەکرێت  پرسیارێک ڕووبەڕووی فەڕەنسیەکان بکرێتەوە ، ئاخۆ بەپڕۆژە و پلانەکانیان  پاڵپشتی لەسەرۆکە گەنجەکەیان دەکەن و سەربەرزانە مێژوو تۆماردەکەن یان بە کێشەی ناوخۆوە سەرقاڵی دەکەن و بەرنامەی فەشەل پێهێنانی دادەڕێژن ؟ بە ئامانجی ئەنجامدانی هەڵبژاردنێکی پێشوەختە ئەگەر بەزیانی ووڵاتەکەشیان تەواو بێت .

ئەم پرسیارە داهاتوو دەمانگەیەنێت بەوەڵامێکی ڕاست و دروست .

نوێترین نوسینەکانی کەمال ئەسکەندەر