جواناوی چاکسازی مەسڕن جۆماڵی گەندەڵی بکەن

وتار/ 12/12/2018 678 جار بینراوە

کەمال ئەسکەندەر

جواناوی چاکسازی مەسڕن جۆماڵی گەندەڵی بکەن
نوسینی : کمال سکندر
مەملەکەتی پێخواسان٫ لەسەرەتای تەمەنیەوە فرچکی بە گەندەڵیەوە گرتوە ٫ لەئێستادا  دەست لەملانێی گەندەڵی بووە  کورد گوتەنی بەیەکەوە خەریکە پیروخەڕۆ دەبن۰

لەسەیروسەمەرەکانی مەملەکەتی هەناسە ساردەکان ساڵ بەساڵ داهات و سەرچاوەکانی داهات زیاد دەبن ٫ هاوشانی زیادبونی داهاتەکانیش قەیرانەکانی دارایی لەسەر هاووڵاتیان سەخت و قوڕستر دەبن ۰

گەندەڵی و فەشەلی حکومڕانی لەمەملەکەتی ئەمڕۆ بەسبەی ٫ ساڵ بەساڵ زیاتر دەردەکەوێ ٫ کەچی لەبەرامبەردا هەناسەی ئۆپۆزسیون بون تەنگتر و دەنگی ناڕەزایی شەقام کپتر و پاکێجی چاکسازی حزبە ناڕازیەکانیش ونتر دەبێ۰

ئیتر لەسایەی سەری نوخبەیەکی تێروپڕی سودمەند لەڕەفاهیەتی مەملەکەتی وەعدوبەڵێنی سەراب ئاسا٫ هەوڵ و پڕۆژە و پاکێجەکانی چاکسازی گەیشتن بەسەرەمەرگ و ئارەقەی مەرگ (جواناو) دەردەکات ٫ هەموان بەلاشە لە دەوری جەمن و چاوەڕێن جواناوی دوای مەرگی چاکسازی بسڕن ٫ لەناخیش دا بۆ گەیشتن بە دەست کەوتەکان زەردەخەنەی خەونەکانیان سەمای سیاسەت دەکات بەوەیشومە و داهاتووی میللەتی پێ لەناو دەبات ۰

تۆ بڵێی ئەو بێ دەنگیەی شەقام و حزب لەمەملەکەتی جینۆساید و ئەنفال و کیمیاباران  هۆکارەکەی چی بێ ؟
سەنگەری چاکسازی گەیشتوە بە مەنزڵگە ! یان نەخێر گەندەڵی بوە بە عورفی حکومڕانی و هەموان بەدوای پاروی چەوری خۆیان دادەگەڕێن ۰

چۆن دەبێ سەنگەری چاکسازی خوازان چۆڵ بکرێ ؟ مەگەر خوێنی شەهیدان چی ؟ مەگەر دروشم و بەرنامەی هەڵبژاردنەکان چی ؟ ئەگەر پلەو پۆستی حکومڕانی استحقاقی انتخابی حزبەکان بێ ؟ ئەی مافی هاووڵاتیان چی ؟

لەمەملەکەتی بێ ئەزمون لەحکومڕانی ٫ هاووڵاتیان پێشینەی خانو و بەرە و موچەی فول و نەوتی بایەعی و ئاردی سفر  وەردەگرن و بەنزینیش هەرزانی هەرزان بۆیان دابین دەکرێ ۰

دەی ئیتر لەمەملەکەتی پاشەکەوتی موچە و بێ نەوتی و کەم کارەبایی و بەنزین گرانی ٫ میللەت چاوی لەدەستی کێ بێ تا جۆماڵی گەندەڵی بۆ بکات؟ لەڕوخساری کام کاریزما و لەپاکێجی چاکسازی کام حزب ئایندەی گەشی داهاتوی  ببینێ ؟

نوێترین نوسینەکانی کەمال ئەسکەندەر