سێ تێبینی کورت لەسەر دوا کۆبونەوەکەی پارتی و یەکێتی و سێ پێشنیاز بۆ گۆڕان

وتار/ 15/04/2017 1103 جار بینراوە

عه‌دنان عوسمان

سێ تێبینی کورت لەسەر دوا کۆبونەوەکەی پارتی و یەکێتی و سێ پێشنیاز بۆ گۆڕان
عەدنان عوسمان
یەکەم: هەموو هەوڵی سەرکردە مەیلدارەکانی پارتی لە نێو مەکتەبی سیاسی یەکێتیدا، رازیکردنی گۆڕانە بۆ هاتنە نێو ئەم گەمەی بەیعەتە بە بنەماڵەی مەسعود بارزانی کە ناویان لێناوە ریفراندۆم. لەم پێناوەدا دەیانەوێت بەهەر فرت و فێڵێک بێت گۆڕان رازی بکەن بڕواتە نێو لیژنەکانیان، چونکە باش ئەزانن کە ئەم پرسە بەبێ گۆڕان ناکرێت، گەر بشکرێت ئەوا کێشەی گەورە بۆ سەرکردایەتی یەکێتی دروست ئەبێت. بۆیە سەرەتا دەبێت دەمی گۆڕان لەیەک نێن بە ناوی هەنگاونان بۆ کارا کردنەوەی پەرلەمان، بەڵام بە دەستەی سەرۆکایەتی نوێوە، ئەمەش گوایە هەم گۆڕان رازی ئەکات و هەمیش بارزانی. مەسەلەکەش ئەوەیە لە چەند دانیشتنێکی پەرلەماندا، بێ قسەکردن لەسەر کێشەی سەرۆکایەتی هەرێم و دەیان پرسی تر، پەرلەمان تەنها سەرقاڵی ئەم یاریە بکرێت. واتە پەرلەمان بکرێتە لیژنەیەکی تری ئەم پرسە.
دووەم: مەسعود بارزانی ئێستا تەنها سەرۆکی پارتی نیە، بەڵکو لە غیابی تاڵەبانیشدا سەرۆکی ئەم بەشەی سەرکردایەتی یەکێتیشە، بە بەڵگەی ئەوەی ئەمە دوو بەیاننامەیە ناوی کاک مەسعود بە: سەرۆک مەسعود بارزانی دەهێنن. نە سەرۆکی هەرێم و نە سەرۆکی پارتی، بەڵکو تەنها سەرۆک، ئەمەش لەهەموو عورفێکدا مانای رازی بونە بە سەرۆکایەتی ئەو کەسە. بۆیە چیتر ناکرێت باس لە پاشکۆیەتی بکرێت، مسەلەکە لەوەش تێپەڕیوە.
سێیەم: ئەم سەرکردانەی یەکێتی لەسەر دروستکردنی چەندین لیژنە رێککەوتون لەگەڵ پارتیدا، بەڵام تەنانەت هەر بۆ دڵخۆشکردنی کادرانی حزبەکەشیان، کە گوایە ئەم جارە شوکر نەخشەرێگاکەیان لەبیر نەچوەو لەگەڵ خۆیان بردویانە، باسیان لە هیچ لیژنەیەک نەکردوە بۆ گفتوگۆکردن لەسەر ئەو نەخشە رێگایە. کەواتە ئەم سەرکردانەی یەکێتی تەنها ئەرکیان گواستنەوە واتە بەرید بوە، نەک داکۆکی کردن لە پلانی حزبەکەیان بۆ چارەسەرکردنی هەموو قەیرانەکان کە لە نەخشەرێگاکەدا هاتووە.
 دوا تێبینیم ئەوەیە، بەشێک لە مەکتەبی سیاسی یەکێتی بەتەواوەتی پشتیان لە رێککەوتنی نێوان حزبەکەیان و گۆڕان کردوەو، حسابی نەبوی بۆ ئەکەن. هەموو ئەم هەنگاوانەی یەکێتی پێشێلکردنی روحی رێکەوتنەکەیە.
بۆیە پێویستە گۆڕان سێ هەنگاو بنێت:
یەکەم: هەموو جۆرە دانیشتنێک لەگەڵ وەفدی هاوبەشی پارتی و یەکێتی  یا هەر وەفدێک بەو پەیامەوە، رەد بکاتەوەو لە ژێر هیچ بیانویەکدا نەڕواتە ژێر باری ئەو یاریە ساختەیە، بە ناونیشانە جیاوازەکانیەوە.
دووەم: داوای دانیشتنی دەستبەجێی سەرکردایەتی هاوبەشی هەردولا، یا گەر نەکرا دانیشتنی هاوبەشی هەردوو سەرکردایەتی یەکێتی و گۆڕان بکات بۆ یەکلا کردنەوەی پرسی رێکەوتنەکە.
سێیەم: کار بۆ دانیشتنێکی پەرلەمان بکات بە هەیئەتی شەرعیی ئێستایەوە، بۆ قسەکردن لەسەر سەربەخۆیی هەرێم بە ناوچە دابڕاوەکانەوە. ئەگەر ئەوە نەکرا، هەوڵ بۆ بەدیلی گونجاوی تر بدات.

نوێترین نوسینەکانی عه‌دنان عوسمان