مێژوو تۆماری کرد هەڵکردنی ئاڵا و داگرتنی باڵا

وتار/ 15/04/2017 850 جار بینراوە

کەمال ئەسکەندەر

مێژوو تۆماری کرد هەڵکردنی ئاڵا و داگرتنی باڵا          
كه‌مال ئه‌سكه‌نده‌ر
خەونەکانی کورد و هیواو ئاواتەکانمان چەندین وێستگەی پاڵەوانەتیان لەمێژووی گەلەکەمان تۆمارکردوەو پانتاییەکی  فراوانیان لەلاپەڕەکانی مێژوودا لەخۆگرتوە .

لەسەدەی ڕابردوودا خاک و ئاڵا دەریایەک لە خوێنی ڕۆڵەکانی کوردی بۆ ڕژێنراوە ، لە ئێستاش دا سەنگەرو خوێن و مەینەتیەکان بون بەباڵای گەیشتن بەئومێد ،  کورد گوتەنی کەشتی ماف وخەونەکانمان خەریک بوو بگات بەکەناری بازاڕی دەستکەوتەکان .

بەداخەوە ناتەبایی سیاسی حزب ولایەنەسیاسیەکانی هەرێم و فرەجەمسەری ناوخۆی حزب لە سنوری کەرکوک ، بێ بەرنامەیی کردوە بە بەرنامەی گەیشتن بەدەستکەوتە چارەنوس سازەکانی میللەتەکەمان ، موزایەدە و کێ بڕکێ کردن بۆ گەیشتن بەسەردێرە گەرمەکانی هەواڵی میدیاکان بەجورێک لەخشتەی بردوین ، ئەمە وای کردوە هەموو هەوڵ وهیممەتی سیاسیەکانمان بۆ تاکتیکی ڕۆژ بێت و ستراتیژی دووربینی خەونەکانی ڕابردوو و شانازیەکانی داهاتوو فەرامۆش بکەین .

تاکەی سیاسیەکانی سەردەم شەرمەزاری لە مێژووی گەلەکەمان تۆماردەکەن ؟وەڵامی ئەو پرسیارە کێ دەیداتەوە ، لەماوەی کەمتر لەمانگێک لە شارێکی وەکو کەرکوک ئاڵای کوردستان لە حەملەیەکی عاتفی بێ دیراسەیی پەلەپروزێن دا  ، ئاوات وخەونی گەلێک دەکرێت بەحەقیقەت و حەقیقەتیش دەبێت بەسەراب .

لەئێستادا هەڵکردنی ئاڵای کوردستان لەکەرکوک  و داگرتنی باڵای دەسەڵاتی سیاسی کورد بەهێنانە خوارەوەی بە ماوەیەکەی کەم بەبڕیاری حکومەتی ناوەند ، وەک شکستی هەنگاوێکی سیاسی لە ئەنجامی حەملەیەکی عاتفی ومیزاجی چەند کەسێک لەمێژوودا تۆمارکرا ، کێ لێی بەرپرسیارە ؟

نوێترین نوسینەکانی کەمال ئەسکەندەر