با گرفت و كێشه‌ كه‌سی و حزبییه‌كان وه‌لانێین، خه‌ممان ئاوڕدانه‌وه‌بێت له‌ نه‌هامه‌تییه‌كانی خه‌ڵک

وتار/ 18/03/2021 452 جار بینراوە

محه‌مه‌د حه‌كیم

با گرفت و كێشه‌ كه‌سی و حزبییه‌كان وه‌لانێین، خه‌ممان ئاوڕدانه‌وه‌بێت له‌ نه‌هامه‌تییه‌كانی خه‌ڵک

سەرەتا من لە گەڵ پۆستەکەی شەریفی مامۆستادا نیم، بەڵام ناکرێ قسەی کورێکی سەرۆکی کۆمەڵ کە پۆستی حزبی نەبێت و خۆیشی ئەڵێ ئەندامی کۆمەڵ نیم، لەسەر مامۆستا بە سیفەتی سەرۆکی حیزب و ھەموو کۆمەڵ بکرێتە ماڵ، وەکو فرسەتێک ھەندێک لە ناو ئەو دوو حزبە بەڕێزە ناخی خراپی خۆیان بەرانبەر کۆمەڵ ئاشکرا کەن و قسەی ناشرین بکەن، بەرامبەر بە سەرۆک و حزبی کۆمەڵ، وا وێنا بکرێت کە ئەگەر بزووتنەوەی گۆران و حزبی سۆشیالیست نەبونایە، ئێستا ئێمە یا لە ژێر خاک بووین، یا لە مەنفا...
من لێرە وێڕای ڕێز و حورمەتم بۆ کاک عومەری سەید عەلی و کاک محەمەدی حاجی مەحمود، ھەردووکیان دڵنیان لە ڕێز و حورمەتی مامۆستا عەلیش بۆیان، دەبوو ڕێ بە ھەڵدانەوەی ھەندێ ڕووداوی مێژوویی بە نوقسانی و نیوەناچڵی و ھەڵبەستراوی نەدەن و خەڵکی کۆمەڵ نیگەران نەکەن، بۆ مێژوو دەڵێم:

١. گەر ھەر کەسێکی گۆران باسی شەهیدكردنی مامۆستا عەبدوڵا دەکات و تانەی بێدەنگیمان لێدەدات، ئەوا دەبێ بزانێ گەر وابێ گۆرانیش بەشدارە لە کوشتنی مامۆستادا، چونکە لە ٢٠٠٣ کاک نەوشیروان جێگری مام جلال و کاک عومەر بەرپرسی کارگێری مەكتب سیاسی یەکێتی و کاک مستەفای سەید قادر بەرپرسی فەرماندەیی بوو، کاک داناو کاک سەرکەوتیش ئاسایشی گشتیی و سلێمانی بوون!

٢. ئێمە و گۆران لە بەرەی خەڵک بووین و پێکەوە لە پرسی سەرۆکایەتی ھاوڕا بووین و پشتێوانی یەک بوین تا ئەو کاتەی خەمەکان خەمی خەڵک بوون، ئیتر گەر شایەتی بدرێت، ئەوا بۆ ئێمەی کۆمەڵ ڕەوایە کە تا دوا ھەنگاو ماینەوە، یا دروستر وایە بوترێت ئێمە بە تەنھا جێھێڵراین! ئەو قسەیە ئەسڵ و ئەساسی نییە کە مامۆستا عەلی وتبێتی ئێمە لە پرسی سەرۆکایەتی هەرێم، گۆڕانمان جێھێشت... من شاھیدی ھەموو کۆبوونەوەکانم، وە زۆر لە گۆڕانە کۆنەکان شاھیدی ھەڵوێستی ئێمەن.

٣. برادەرانی سۆشیالیست دەبێ باش بزانن کە ھێزەکانی کۆمەڵ بووبونە پەڕژین لە نێوان ئێوە و ئەنسار و جوندو ترسی پێشمەرگەکانی ئێمە نەبوایە خوا دەیزانی لە نێوان ئێوە و ئەنسار چی ڕووی دەدا!

٤. کشانەوەی ئێمە لەو ناوچەیە، چاک دەزانن ھاوکێشەیەک بوو ئێران و مام جەلالی تێدابوو وئێوە وێرای سوپاس وپێزانینمان بەڵام خۆ لە ھەندێ ڕووەوە سودمەندبون ودەستکەوتان ھەبوو!
پێموایە لە بیرتان چوە باسێکی یەک دوو ژەم خواردنەکەشتان بکردبایە!

لە کۆتاییدا وێڕای ڕێزی تەواوم بۆ ھەدوو حزب، ئەم باسانەش کە سەرکردەو کادیرانی ئەو دوو حزبە دەیکەن، دوورە لە ئەخلاقیاتی حزبایەتییەوە، کە لە مێژووی نێوان حزبەکان چاکەش بەرانبەر یەکدی کراوە و دەکرێت، ھەردوو حزب باش دەزانن کۆمەڵیش چۆن بوە لە گەڵتان و جوان نییە ھەر ڕەخنەیەک گیرا، ئیتر لە وەڵامدا بە ڕاست و ناڕاست چاکە بە چاوی یەکدا بدرێتەوە، ئێمە لە ژیانی حزبایەتی دا بەشی خۆمان چاکەمان لە گەڵ خەڵکدا کردووە بە جوامێریی نازانین باسی بکەینەوە.
ئومێد دەکەم ئەم باس و خواسانە کۆتاییان بێ و پەیوەندییەکان وەکو خۆیان بن و ئاوڕێک لە کێشە سەرەكییەکانی ئەم میللەتە بەد بەختە بدەینەوە.