ئەقڵیەتی حوکمرانی حەزرەتی یوسف و کابینەکانی ھەڕێم!

وتار/ 07/10/2020 773 جار بینراوە

محه‌مه‌د حه‌كیم

ئەقڵیەتی حوکمرانی حەزرەتی یوسف و کابینەکانی ھەڕێم!

کاتێک مەترسی و کێشەی ئابوری روو لە میسر دەکات، حاكمی وڵات بۆ چارەسەر ڕاوێژ بە پێغەمبەر یوسف (سەلات وسەلامی خوای لەسەر بێ)ئەکات و ئەویش هەرزوو لە بابەتەکە تێدەگات وپڵانێکی پانزە ساڵی بە سێ قۆناغ ئەخاتە بەردەستیان، لە کرۆکی کێشەو پێشھاتەکان تێدەگات وپێیان ئەڵێ قۆناغێکی خۆش وبەرەکەتدار وگەشەداری حەوت ساڵە لە پێشتانە ، بەڵام بە دوایدا حەوت ساڵی وشک ونەبونی وبێ بارانی چاوڕێتانە وساڵی پانزەیەم دووبارە نیعمەت وبەرەکەتی خوا ئەڕژێ بە سەرتاندا، بۆ ھەر قۆناغێک پلان ونەخشەی دیاریکرد ودواتر بۆ خۆی جێبەجێیكرد و ئەوەش گەلی میسری رزگارکرد .
كورتەی فەلسەفەی تێپەڕاندنی سەختیەكە ئەوە بوو كە لە ساڵانی نیعمەت و هەبوونیدا دەستبگرنەوە ولێی ھەڵگرن بۆ ساڵانی وشک ونەبوونی !
بەڵام حەقە بپرسین پاش ڕاپەرین ورزگاربون لە ڕژێمی دیکتاتۆر چەند ساڵ برسێتی ونەبونی وئابلوقە مان بینی وخۆشمان حوکمران بوین وەک کورد،
دوای روخانی ڕژێم وتا چەندین ساڵ خێرو بەرەکەت وپارەو پول ڕژا بە سەر حوکمرانانی کوردستان، دەوترێ كە بریمر بە سێ کۆپتەر دۆلاری بۆ ھێنان !لە جیایی دەستپێوە گرتن وکەم خەرجکردن وبونیادنانی ژێرخانی ئابوری وکشتوکاڵ وبوژانەوەی گوندەکان وھەڵگرتنی کەمێ لەو پارەو دۆلارانە وپەرش وبڵاونەکردنی ونەبەخشینەوەی بۆ مەرامی حیزبی وکەسی وخانەوادەیی، دانەمەزراندن بە لێشاو وبێ پلان لە پێناو کێبرکێی حیزبی وبە خشینی پارەو وزەوی وزاری کوردستان بەسەر زۆری ناموستحەقدا وھەندێ جار بۆ عێراقی وعەرەبی وئەملاوئەولاش، بە دامەزڕاندی ھێزی گەورە گەورە بۆ پاراستنی دەست وپێوەندەكانیان
ھەرگیز بیریان لای ئەمڕۆ نەبوو؟ بیریان نەبوو کە نەبونی ونەداریش پێ ئەچێ لە رێگە بێت و بێ پلان بوون و هیچ حسابێكیان بۆ ئێستا نەكرد، کە بۆی ھەیە نەوت دابەزێ وعێراق وەک پێشوو نەمێنێ و وای لێبێت نەتوانن مووچە بدەن، ھەر وەکو ئەوەی ئەمڕۆبەسەریان ھاتوە !
بۆیە ئێوە گلەیی ٢٩ ساڵتان قابیلە وناتوانین پۆزش بۆ بێ پلانی وبێ نەخشەیی ساڵانی پێشوتان بھێنینەوە وسودی نیە لە گەڵتان !
چونكە ئەوەی لە ڕابردوودا كرا ئێوە و ستافەكانی ئێوە بوون، ئێوە نەتانتوانی پلانتان هەبێت، بۆیە ناتوانن بە ئاسانی لەبەردەم بەرپرسیارێتیدا خۆتان دەربازكەن، چونكە ئێوە بەرپرسی دروستبونی ئەم دۆخەن ، وتنی بەغدا پارە نانێرێ ونەوت دابەزیوە ومافیای نیوخۆی خۆتان رێگربێ لە چاکسازی ، دادتان نادات !