لە ماکرۆن ماکرۆنیتر کێن؟!

وتار/ 27/10/2020 495 جار بینراوە

محه‌مه‌د حه‌كیم

لە ماکرۆن ماکرۆنیتر کێن؟!

ژمارەیەك كەس كە لە نێویاندا خەڵكێكی تێدایە خۆیان بە داكۆكیار لە ئازادی و دیموكراسی دەزانن، بەڵام
زۆر ناڕەحەتن بە یاداشتنامەیەکی بەشێک لە پەرلەمانتارانی کوردستان، کە تەسلیم بە کونسوڵخانەی فەرەنسا کراوە لە ھەولێر، وە پێیان وایە ئەمە زەرەر لە ئاسایشی نيشتمانى و پەیوەندی نێودەوڵەتی کورد دەدات ! كە ئەمە پاساوێكی ساویلكانەیە بۆ بەرگری لە ناڕەوایی
ئەوەی بینرا ھەندێک کۆمێنت و بابەتی سەیری ئەوانەبوو کە سەد تانەو ڕەخنەی نابەجێ لە یاداشتنامەکە دەگرن، کە خودی قونسوڵی فەرەنسا بە کارێکی مەدەنیی و جوان لە قەڵەمی داوە، كەچی ئەمان لەبری فرنسا نیگەرانن
* بەڵێ، لە ماکرۆن ماکرۆنیتر ئەوانەن کە ناڕەزایەتی موسوڵمانان لە بێ ڕێزییکردن بە پێغەمبەر (صلی اللە علیە وسلم)، دەدەنە پاڵ ئیخوان، بەتەنیشت ناخ ڕەشی خۆیانەوە بەرانبەر بە ئیسلام، ئیخوان وەکو کۆمەڵێک تاوانکارو تیرۆریست لە قەڵەم دەدەن و بەحساب خۆشیان بە دیموکراتخواز و ئازادیخواز پێناسە دەکەن، كەچی ڕای ئازادی كەسیان قبوڵ نیە! باشە ئیخوان جگە لە زوڵم و زیندان و کوشتن و دەربەدەری بەشی چی بووە!! لەڕێی دیموکراسییەکەی ئێوەوە ھاتنە پێش، بەڵام بە دەبابەی کودەتاچی و جنراڵ و ستەمکاران لابران و کوژران و خرانە ژووری تاریکی بەندیخانەکانەوە
* ئەوەی ڕوونە ئەوەیە كە ئەگەر ئەو چینە دەستیان بڕوات لە ماکرۆن خراپتر دەکەن، کە پێیان وایە چی کێشەی میللەتی ئێمە ھەیە ئیسلامیی سیاسییە (بەقسەی ئەوان، ئەگەر نا من لەگەڵ بەکارھێنانی ئەم چەمکە نیم بۆ پارتە ئیسلامییەکان)، لەبەر ئەوەی ئەمانە ناڕەزایەتی ھاوڵاتیانی کوردستان و پەرلەمانتاران بەرانبەر بە بێ ڕێزییکردن بە پێغەمبەرەکەیان (صلی اللە علیە وسلم)، ئەوەندە ماکرۆنیەكانی کوردستانی نیگەران کردووەو كە چاویان خەڵكی ئاسایی موسڵمان نابینن كە سەدان هەزار خەڵكی ڕوو لە قیبلەیە كەچی پێیان وایە نیگەرانیەكە هی پارتە ئیسلامیەكانە و ئەوان وەك تاوانبار سەیردەكەن، لە كاتێكدا ئەو بەرگریە شانازیە
بەداخەوە ئەمانە لایان ئاساییە جنێو بە خواو بە پێغەمبەری خۆشەویست بدرێت و لایان ئاساییە ماکرۆن پشتیوانی بڵاوکردنەوەی کاریکاتێری گاڵتەئامێز بکات لەسەر پێغەمبەری خۆشەویست، وە دەڵێن ئەو کارە لە فەرەنسا یاسا ڕێی پێداوە، كەچی بیرناكەنەوە كە هیچ یاسایەك ڕێی نەگرتووە لەوەی موسوڵمانانی کوردستان بەشێوازی ئاسایی و یاسایی خۆشەویستی بۆ پێغەمبەرەکەیان دەربڕن و ئەوە لە چوار چێوەی مومارەسەی ئازادیدایە و پێچەوانەكەی لە چوار چێوەی پێشێلكردنی ئازادیە ئاینیەكاندایە، ئیتر تۆ بۆ ناڕەحەت و بۆ قەڵسی!
ئەگەر لانی کەم لە ناختدا خۆت بە موسوڵمان دەزانیت، خۆ تۆ نابێت چاوەڕێ بیت گاڵتە بە پێغەمبەر بکرێت و موسوڵمانانی کوردستان تەنھا بڵێن
( oh my god)!