کازمی دەتوانێ تاکه‌ی به‌رده‌وام بێت؟

وتار/ 21/07/2020 511 جار بینراوە

فاروق عه‌لی‌

کازمی دەتوانێ تاکه‌ی به‌رده‌وام بێت؟

ئه‌وه‌ی سه‌رۆک وه‌زیرانی نوێی عێراق ده‌ستی پێداوە، کارێکی ئاسان نییه‌و پێناچێت بتوانێ به‌رده‌وامبێت و ماوه‌ی به‌رپرسیاریه‌تییه‌که‌ی زۆر بخایه‌نێت ..
ئه‌وه‌ی ئه‌و ده‌یه‌وێ بیکات، هه‌ڵوه‌شاندنه‌وه‌ی ئه‌و واقیعە‌یه‌ كە له‌ ساڵی ٢٠٠٣ ه‌وه‌و پاش داگیرکردنی عێراق له‌لایه‌ن ئەمریکاوه‌ بونیاد نراوه‌، عێراق له‌و به‌رواره‌ به‌داوه‌ مه‌یدانی کێبڕکێی زۆربه‌ی ده‌وڵه‌تانی ناوچه‌یی و جیهانی بووه‌و هه‌رده‌وڵه‌ته‌ی ویستویه‌تی جێپێی خۆی قایمتر بکات له‌ عێراقی نوێ دا، هیچ لایه‌ک نه‌یتوانیوه‌ بۆخۆی یه‌کلایی بکاته‌وه‌، به‌ڵام گومانی تێدانیه‌ کۆماری ئیسلامی ئێران زیاد له‌هه‌ر لایه‌کیتر هه‌ژموونی به‌سه‌ر ئه‌م وڵاته‌دا هه‌بووه‌و کاریگه‌ری هه‌بووه‌ له‌سه‌ر ڕه‌وتی ڕودوه‌کان.
له‌سه‌رووبه‌ندی دیاریکردنی کازمی بۆ سه‌رۆکی ئه‌نجومه‌نی وەزیرانی عێراق، کۆماری ئیسلامی ئێران له‌نێوان قبوڵکردن و ره‌دکردنه‌وه‌ی بێده‌نگ بوونی هه‌ڵبژارد، به‌ڵام دیاره‌ رووداوو پێشهاته‌کانیش له‌وانه‌یه‌ له‌ رویه‌که‌وه‌ ده‌رفه‌تی ره‌خساند بێت بۆ کازمی شانسی خۆی زیاتر تاقی بکاته‌وه‌، چونکه‌ ئه‌رکی کازمی که‌وتووه‌ته‌ دوای تیرۆرکردنی فه‌رمانده‌ی پێشووی فه‌یله‌قی قودسی سوپای پاسدارانی ئێران حاجی قاسمی سلیمانی، که‌ نه‌بوونی ئه‌و که‌سایه‌تییه‌ له‌گۆڕه‌پانه‌که‌دا کاریگه‌ری له‌سه‌ر رەوتی رووداوه‌کان هه‌یه‌ له‌شانسی ده‌وڵه‌تانی دیكەی جگه ‌له ‌ئێران، به‌ڵام پێناچێت ئه‌و بارودۆخه‌ی که‌ چاوه‌ڕوان ده‌کرێت کازمی بتوانێ رۆڵی ئێران له‌سه‌ر عێراق که‌م بکاته‌وه‌ درێژه ‌بکێشێت، به‌ڵکو زوویان دره‌نگ داره‌که‌ له‌ده‌ستی کازمی ده‌شکێت و ئه‌میش به‌ده‌ردی ئه‌وانه‌ی پێش خۆی ده‌چێت.
ئه‌وئه‌رکه‌ی کازمیم وەكو ئەوە ‌دێته ‌پێشچاو له‌سه‌رده‌می بزووتنه‌وه‌ی ئیسلامی له‌ ساڵی ١٩٨٩ له ‌دوای کۆنگره‌ی براله‌ و ته‌شکیلاتی نوێیی ئۆرگانه‌کان، له‌لایه‌ن مه‌کته‌بی سیاسی ئه‌وکاتی بزووتنه‌وه‌ی ئیسلامی، مامۆستایه‌کی به‌ڕێز که ‌ئێستا له‌ژیاندا نه‌ماوه‌و خودالێی خۆشبێت، ئه‌رکی به‌رپرسیاریه‌تی مه‌کته‌بی په‌یوه‌ندیه‌کانی پێسپردرا بوو، که ‌مه‌کته‌بی په‌یوه‌ندییه‌کان لێرسراو بوو له‌و نووسینگه‌و ده‌فته‌رانه‌ی له‌ هه‌ندێك له‌شاره‌کانی ئێران کرابوونه‌وه‌و کاروباری په‌یوه‌ندیه‌کانی بزووتنه‌وه‌ی ده‌برد به‌ڕێوه‌، له‌گه‌ڵ ده‌ستبه‌کاربوونی ئه‌و مامۆستا به‌ڕێزه،‌ یه‌کسه‌رکه‌وته‌ گۆڕینی زۆربه‌ی ئه‌وانه‌ی پێشتر له‌و نووسینگه‌و ده‌فته‌رانه‌ لێپرسراو بوون، ئه‌وه‌ش جێگه‌ی قبووڵ نه‌بوو به‌تایبه‌ت که‌ ڕاوێژی نه‌کردبوو له‌گه‌ڵ هه‌ندێک له‌و مامۆستا به‌ڕێزانه‌ی که‌ رۆڵیان هه‌بوو له‌نێو بزووتنه‌وه‌ی ئیسلامی دا، هه‌ربۆیه‌ پاش هه‌فته‌یه‌ک، به‌بڕیارێک ئه‌وبه‌ڕێزه‌ له‌ پۆسته‌که‌ی دورخرایه‌وه‌، دواتر له‌گه‌ڵ چه‌ند برایه‌کدا له‌و مامۆستا به‌ڕێزه‌مان پرسی ئه‌وه‌چی بوو لێپرسراویه‌تییه‌که‌ت زۆر درێژه‌ی نه‌کێشا؟
فه‌رموویان خۆڵی زۆرم له‌ده‌می شۆفڵه‌که‌م هه‌ڵگرت نه‌مزای ته‌حه‌موولی ناکا و ده‌پسێت!
جا ده‌بێ چاوه‌ڕوان بین بزانین ده‌می شۆفڵه‌که‌ی کازمی تاکه‌ی ته‌حه‌موول ده‌کات و له‌کوێ دا ده‌پسێت، له ‌ئایینده‌یه‌کی نزیک دا ئه‌وه‌مان بۆ روون ده‌بێته‌وه‌.