ناعەدالەتی و قۆرخکاریی لای (كۆمه‌ڵ)!
وتار/
21/04/2019
721 جار بینراوە
عومه‌ر گوڵپی
ناعەدالەتی و قۆرخکاریی لای (كۆمه‌ڵ)!
كۆمه‌ڵ نه بیره نه‌وتی هه‌یه، نه پۆست‌و پله‌ی گه‌وره گه‌وره‌ی سیاسی و ده‌وڵه‌تی، نه هێنده‌ش متمانه‌ی له خه‌ڵك وه‌رگرتووه له هه‌ڵبژاردنه‌كان تا سه‌رۆكی په‌رله‌مان‌و سه‌رۆكی حكومه‌ت و سه‌رۆكی ئه‌نجومه‌نی ئاسایش لە حزبەکەى خۆى دابنێت!، هه‌ربۆیه بڕیاره‌كانی كاریگه‌ریی گه‌وره‌یان له‌سه‌ر ژیانی ده‌وڵه‌تی و هاووڵاتیانی كوردستان نییه، بەڵکو قورسایی و سەنگی کۆمەڵ له‌و خزمەت‌و کارانەوە سەرچاوە دەگرێت کە پێشکەشی خەڵکی کوردستانی دەکات به‌و وه‌سیلانه‌ی كه به ڕاست‌و شه‌رعی‌‌و یاساییان ده‌زانێت، ئیتر نازانم باسكردن له قۆرخكاریی و ناعه‌داله‌تی لای (كۆمه‌ڵ) له كوێوه سه‌رچاوه ده‌گرێت؟
كۆمه‌ڵ کە حزبێكی سیاسی كوردستانییه، لە ئێستەدا به‌هۆی سنورداری قه‌باره‌كه‌یەوە نه عه‌داله‌تی ناوخۆی ئه‌و حزبه ده‌بێته مایه‌ی حه‌سانه‌وه‌و خۆشگوزه‌رانی خه‌ڵك، نه سته‌م‌و چه‌وسانه‌وه‌و دیكتاتۆرییه‌تی ناوخۆیی ئەو حزبە ده‌بێته مایه‌ی ئه‌زیه‌ت‌و ئازارو به‌رته‌سككردنه‌وه‌ی ئازادی‌‌و چه‌وسانه‌وه بۆ ژیانی خه‌ڵكی كوردستان، بەڵکو ئه‌وه‌ی ده‌بێته هۆی عه‌داله‌ت‌و دیكتاتۆرییه‌ت له ژیانی خه‌ڵكدا په‌یوه‌ندی به كاریگه‌ریی حزب له پێگه‌ی گشتی‌‌و بوونی كاریگه‌رییه له‌سه‌ر سێكته‌ره ده‌وڵه‌تییه‌كان، ئه‌وه دۆخه‌كه زۆر خراپتره كاتێك حزبه‌كه "چه‌ك"ی هه‌بێت له ده‌ره‌وه‌ی یاساو ده‌ستور وەک ئەوەی لە کوردستان دەیبینین.
كۆمه‌ڵ به هۆی بوونی له‌به‌ره‌ی خه‌ڵك (تۆی خوێنه‌ر دیقه‌ت بده به‌ره‌ی خه‌ڵك له سوریاو میسرو لیبیا چی لێ هات! و لە"تونس"یش بە پیاوێکی میانڕەوی وەک "ڕاشید غەنووشی"شەوە لە چ ئازارێکدایە؟)، هەروەها سیاسه‌ته ڕوونه‌كه‌ی، سه‌ربه‌خۆبوونه‌كه‌ی، هه‌ڵوێسته سیاسییه‌كانی، هێندێك تیری ئاراسته ده‌كرێت، كه تا ئێستاش له به‌رده‌میاندا خۆڕاگره‌و لەسەر پێیەکانی خۆی وەستاوە.
كۆمه‌ڵ كه نه نه‌وت فرۆشه‌و نه نه‌وت كڕ، نه چه‌كداره‌و نه چه‌ك فرۆش، نه ئه‌مریكاییه‌و نه ئێرانی، ئه‌م بوون و مانه‌وه‌یه‌ی له جیهانێكدا كه زۆرینه‌ی بازرگانی چه‌ك و نه‌وت و خوێنە، لە جیهانێکدا کە دابەشبووە بەسەر به‌ره‌ی ئه‌مریكا لەلایەک و ئێران و ڕوسیا لەلایەکی ترەوە، بۆی ده‌بێته كێشه، كێشه‌كانیش قه‌باره‌یان گه‌وره‌تر ده‌بێت و به‌زیانی زیاتر ته‌واو ده‌بن ئه‌گه‌ر نه‌توانێت شێوازێكی به‌ڕێوه‌بردنی مۆدێرن‌و سه‌رده‌میانه بۆ خۆی په‌یڕه‌وی بكات و ئەو تاڵە باریکانەی پەیوەندی نە دۆزێتەوە کە بە گەنجانیەوە دەبەستێتەوە.
بۆیە دەتوانم لەبارەی ئایندەی (كۆمه‌ڵ)ەوە بڵێم: ئەگەر بتوانێت به‌م ڕه‌وته سیاسییه‌ی ئێستەی بمێنێته‌وه، گۆڕانكاری له میکانیزمی کاری خۆی بكات به ئاراسته‌ی سه‌رده‌میبوون‌و نوێبوونه‌وه، سه‌ربه‌خۆیی خۆی بپارێزێت‌و نه‌بێته بازرگانی نه‌وت‌و خوێن، نه‌وه‌ك به‌رگه‌ی شه‌پۆله‌كان ده‌گرێت، به‌ڵكو به‌هێزتر ده‌بێت‌و زۆر باش لەوەی ئێستەی ده‌توانێت خزمه‌ت به چاكه‌ی گشتی بكات، و له‌كاتی هاتنه‌پێشی ده‌رفه‌تی هه‌ڵبژاردنێكی (پاك‌و بێ ته‌زویرو ئازاد)یشدا متمانه‌ی گه‌وره‌ی خه‌ڵكیش به‌ده‌ست ده‌هێنێت.
نوێترین نوسینەکانی عومه‌ر گوڵپی
-
عومه‌ر گوڵپی
08/07/2021
-
عومه‌ر گوڵپی
28/06/2021
-
عومه‌ر گوڵپی
08/02/2021
-
عومه‌ر گوڵپی
04/02/2021
-
عومه‌ر گوڵپی
05/01/2021
-
عومه‌ر گوڵپی
21/10/2020