خەباتی سیاسی ناو پیاڵە ژهراویەكان!

وتار/ 11/02/2019 685 جار بینراوە

هێدی هه‌ولێری

خەباتی سیاسی ناو پیاڵە ژهراویەكان!
 هێدی هەولێری        
سەرهەڵدانەوەی مۆدێلێكی قڕكردن و لەناوبردنی یەكتر لەماوەی خەباتی سیاسی كورد لەمێژووی پڕ لە ناهەمواری تاریك و ناهەموارو تەریكدا بەدەر نەبووە لە باڵكێشانی خیانەت بەسەر مێژووی نەتەوەكەیدا بەئەندازەیەك بیرۆكەی زۆر لەئارادابوون بۆ مل شكاندن و قراندنی یەكتر لەگەڵ ئەو هەموو خوان و مێزە ڕازاوانەی سیاسەتی سڕینەوەی یەكتر لەكاتێكدا دوژمن لەبەردەمیاندابووە ، كەچی ئەوان خەریكی لەناوبردنی یەكتر بوون لەپێناو چوونە سەر كورسی یەكتر، یان مەترسی لەقبوونی كورسیەكان، كە لەدوایدا ڕق و قین دروست دەكات و سەرەنجام دەبێتە تۆزقاڵە شەهر لەناو پیاڵەیەكی قاوەدا، یان ژەمە خواردنێكدا.                           زۆرجار بەرپرسانی ئێستای كورد ئەزموونی شاخ و خەباتی چەكداری خۆیان وەك قارەمانێتی و شانازیی بە هاوڵاتیان و نەوەی ئێستا دەفرۆشنەوە, كە پێویست دەكات چیتر ئەو دۆڕاوانە بە پاڵەوانی ئەژمار نەكرێن، كە لەگەڵ ئەو خەبات و تێكۆشانەدا كۆمەڵێك دەرەنجامی تاڵ هەیە بە قەد خەباتە شۆڕشگێڕیەكەدا.                                        لەدواجاریشدا كادیرێكی یەكێتی ئەو فێڵەی ئاشكرا كرد، كە دەمێكە لەدەرەوەی وڵاتەو ژهر خواردكراوەو هەڕەشەی تۆڵە سەندنەوەی كردووە، ئەو نهێنیەی نوسەران و ڕۆژنامەوانان بەدوایدا دەگەڕان بەئاشكراكردنی دووبارەبوونەوەی ژهر خستە ناو خواردن و خواردنەوەكان ئەوەی بۆ دەرخستین، كە لەماوەكانی ڕابردوودا كۆمەڵێك كەسایەتی سیاسی لەڕیزەكانی هەردوو حزبی كوردی بەشێوەیەكی گوماناوی مردن و لەڕاگەیاندنەكانیشیاندا باس لەوە دەكرا، كە ئیتر نەخۆش بوون و پرسەشیان بۆ دانران، ئەوەش دەمان گەڕێنێتەوە سەر ئەو بۆچوونەی ڕەنگ بێـت ئەوانیش بەهەمان دەردی (عەتا سەراوی) چووبن، بەڵام ئەمجارە سەراوی زوو فریای خۆی كەوت و ڕەنگە كاریگەریشی لەسەر بمێنێ بەدرێژایی مانەوەی لەژیاندا.                                                    قسە لەسەر (سەراوی)نیە بەو پێیەی ناوبراویش بەشێكی دانەبڕاوە لەمێژووی خەیاتی زڕێنراوی كوردایەتیەو ڕەنگە پشكێكیش بەر ناوبراو بكەوێت، بەڵام ئەوە وەك بیرخستنەوەیەكە بۆ ڕۆڵەكانی ئێستا، تازە دەپشكوتن و لەڕابردوودا شارەزاییەكی ئەوتۆیان نیە بەئێمەی نوسەران و ڕۆژنامەنوسانیشەوە، ئەو دەردە نەخوێندەوارییەی لە سیاسەت و كاتێك بەرپرسێك قسەیەكی خۆش دەوروژێنێ دڵخۆشی دەرببڕین ، بەڵام ئەوەش ڕەنگە خواردنی ژهرێكی بەدوادابێت بۆ دەمداخستن و بێدەنگكردن بێت، لەبەرامبەر قبوڵ نەكردنی جۆرێكی دیكە لە كۆیلایەتی.                                            نوشینی ژهری سیاسی لەدەسەڵاتدارێتی كوردایەتی لەپاڵ تاڵان و قڕكردنی هاوڵاتیان و نەبوونی خزمەتگوزاری و موچەو ئەوەشیان فێری خەڵك كرد بۆ دەستەبەركردنی ژیانی ڕۆژانەی خۆی فێری دزی و درۆ و خیانەت بێت وەك خۆیان، كە ساڵانێكە بە میللەتی دەفرۆشرێتەوەو ئەو ئاوە تاڵەی خراوەتە قوڕگی كەسایەتیەكانی شاخ و شار، كاتێك لەسەر خوانەكانی خۆیان بانگهێشت كرابوون و لەشوشەیەكدا، یان لە ژەمە خواردنێكدا ژیانیان كۆیتایی پێهێنراوە.                                                    ئێستا دەبێ بگەینە ئەو دەرەنجامەی سیناریۆی دووبارەبوونەوەی ئاسانە، كە هەموو ڕۆژنامەنوس و نوسەرو چالاكی سیاسی و مەدەنی و خەباتگێڕانی دڵسۆزی ئیسلامی و نیشتمانپەروەر چاڵێكی لەو شێوەیەیان بۆ هەڵكەنرێت و بكەونە بەر تیری ژەهراوی خەباتی 27 ساڵ گەندەڵی ئەخلاقی و مل قرتاندنی هاوسەنگەرانی خۆیان، ئەوە لەكاتێكدا دوو حزب بەدرێژایی دروستبوونیان كۆمەڵێك دروشمی بریقەداریان هەڵدا، كە گوزارشت لەهیچ یەكێكیان ناكات و لەپێناو مانەوەی بەرژەوەندیەكانیان دۆستانی خۆیان ڕووبەڕووی مەرگ كردووەتەوە بەبەكارهێنانی شێوازەكانی ( فەتڵ، نەفی كردن، شونبزركردن، دواجاریش دەعوەتنامەیەك و ژهر خستنە ناو ژەمە خۆراكێك و كوشتنیان بەشێوازی سیناریۆی جیاواز.  دروستبوون و بەرهەڵستی هەر ناڕەزاییەك دەسەڵاتی سیاسی بەهێزترین بژاردەی لەبەردەمدابێت ژهرە وەك مۆدێلێلی سیاسی كۆن و نوێ بۆ لە خاچدانی نەیارەكانیان.

نوێترین نوسینەکانی هێدی هه‌ولێری